5
1 Tama Elifas agai po genina ma weyu, e tama wali,
“Polobe da, Jop, nago i bomonama tau somainogo.
Tiali goli, eno homugo bidi deli bidibo te asogowe?
Nago homugo dagalude ensel bidigo
nage tau somainu hanalu waibawe?
2 Ma, kolesaga meni yai bidigo da,
teda dwai kolesaga wali paibao.
Tama homu sęgę eyu, sębę ebo sę tigidali sogo yaibao.
Tama aga te kolesagago aga digi aga ma isilaibao.
3 Eno suali, bidi meba augwa obo
tomode bugagia bidibo suali.
Tiali goli, augwaligo kolesaga mu dwai mu elalubo suali.
Tama tibaso, eno God polo i wali, te bage dolomainu.
4 Ao, augwa wai puluba dabe
bugagia bidabo sunumi meni yai.
Tama bidi dwai dabego augwali po tų
ebode aiyaba elaluainu ebaso da,
teda augwali po tų ebode
kisa sabo hai namu meni yaibao,
te po tųde ela holabo.
5 Te we bidi nai menia siyu ebode,
ma dogoni aloa siyu ebaso da,
teda augwali te dwai bidi dabego
giba dabe nai sagasiyu yaibao.
Tagalogobeo, te dwai sesani bono tomode
elalubo nai me, augwaligo te nai me siyu naga yaiba.
Tama augwaligo moni doado bage sabo
sunumi gegaibao, te bidi hanigo.
6 Dago koneani, te dwai dwai sęgę,
me dwai dwai sę ebo kolesaga
te nai tubo tiwai e tǫde pedalobo meni.
7 Bidi dena digi da, te tobage dwai dwai sęgę sabo
kolesagago sę ebo dao.
Dena digi te sęgę sabo, e tiwai ebo dao,
te kenage isi ulama podiliyu, te isi hobolu,
ugwaba dagala sąbo tiwai ebo dao,” wali.
Te dwai sogo God nage tonaluaibao
8 Elifas agai po genina ma weyu, e tama wali,
“Tiali goli, ena tama nago tigide
sęgę yali tiwai igi sogo da,
teda ena Godibolo gedu haluasa po wagi da,
agai eno te sęgę silimainu.
9 Agai haniani sę hauwa mu ebo dao,
tama dago te sę nedebo usu egobe.
Augwaligo dago kolesaga edelai,
te dago kuna konegobeo.
10 Agai te tulubage e tǫba mayu,
te dago giba me tulubage mabo dao.
11 Agai genuai nogi te nogi meni yai
bidibolo te genuai nogi mabo dao.
Tama agai te dwai sęgę sobaso
gela wabo bidi dabe tau siyu ebo,
tama bugagia bidimainu,” wali.
12 “Agai te tibo po walama,
dwai kolesaga ebo bidi agai tobolu dolobo dao,
tama tiyu, te bidi dabe augwaligo
yagą wali haniani sę ebo meni.
13 Bidi mebago haniani kolesagago
bidi mebago homu kolesaga dolainu ebo dao.
Tiali goli, God te dwai kolesaga ebo bidi
aga te dwai kolesaga ebogo
aga ma dolomainu ebo dao.
Te e tiwai dao.
Bidigo sųgų sabo wa te sųgų sainu wąį goli,
te wa aga digi aga tigide ma agabesai subo dao.
Tama augwaligo sainu yali homu
te olo buluba taga pabo dao. * 1 Ko 3:19
14 Augwaligo homu kolesaga mu kone tųą pabo dao,
tama augwaligo magi sę me yabo homu ebo menio.
Te giliga nanani da homu egobeo.
Augwali te homu kolesaga mu menia pela,
huli dulude bidibo tiwai elama,
augwa pabo sunumi subo menio.
15 Tiali goli, Godigo
te nai meni yai bidi tau sabo dao.
Ma tagala, te bomo yai genuai bidi dabe da,
augwaligo te nai meni yai bidi dabe dologobeo.
16 Tama tibaso, te nai meni yai bidi dabe
augwa Godiba homu kolesaga dąų weyu,
God augwali tau somainu tonalubo dao.
Tama te dwai sę ebo bidi dabego
augwalibolo dwai sę ma egobeo,” wali.
17 “Ma, te Tigidali Bomo Elalubo God
agai bidi me deli kolesaga dodolobaso da,
teda te bidigo dwagi yai homu yao.
Tama megi da, agai nage dodolaiba,
tiyu nago aga tudi ola maidali weyu.* Prs 3:11-12; Hib 12:5-6
18 Dago koneani, Godigo nage sęgę mu mayu
elama ebaso da,
teda aga digi nage usu ma ilaibao.
19 Tigidali sogo mu, agai nage
dwai sogo ebaso me, agai nage tau saibao,
tama te dwai naigo nage me dologobeo.
20 Ma, te nasi ebo si asobaso da,
agai nage nai mawaibao,
tama nage bugagia bidaibao.
Ma, te wąbi hwįbo sogo, agai nage tonaluaibao,
tama tiyu, te boi bidi dabego
nage me ela mugobeo,” wali.
21 “Ma, te bidi dabego ili po walama,
nago nogi aiyaba elaluainu ebaso da,
me ma te dwai nai pedalama,
tama nage dolainu ebaso da,
teda God nage pagede bidiyu, tau saibao,
nage wi me egobeo.
22 Te moni nasi si asobo sogo me, te dwai sogo me,
Godigo nage tonaluaibao, tama nage
dwagi yai homu elama, bugagia bidaibao.
Tama nage bulu hasa wi me egobeo.
23 Te nago gide tǫ elebo si,
te gide masigi du me sugobeo.
Tama te bulu hasa dabe nage dali bugagia bidaibao.
24 Tama nago koneaibao,
naga nai dabe bugagia bidiba olama,
tama naga ugwa bede bugagia dua bidaibao.
Tama naga kibu sipsip dabe bugagia bidibo suaibao,
tama te kibu sipsip me hagagobeo.
25 Naga hani te genuai mu pedalaibao,
tama augwali genuai mu pedalama,
te tǫde nosai holobo tiwai yaibao.
26 Tama tibo si, nage monu dabe mu
elama, tama nage isaibao.
Nage te gide wit nai inabo tiwai elama,
tama te bidi dabego sabo sogo saibao.
27 Jop, dago sulama, homugo koneama,
tama dago mu suali,
te nai dabe tama dago mu koneani,
te mu tama mu dao.
Eno te po pusali, te nage tau somainu.
Tama tibaso, nago olo sąganama, bugagia odama,
tama homu kolesaga bugagia sao,”
Elifasgo te po wali.