10
Jisasgo te we sabo sę togobo kolesagade po wai
(Mat 19:1-12; Luk 16:18)
1 Te Jisas hogodama, te bidali bulu taga peyu, tama aga te Judia provins tǫ pedai badu te pabo ąį Jordan pedai u badu pai. Tama we bidi hauwa agaba ma sisinagasali. Tama agai te aga ebo kolesaga wali peyu, tama Godigo po te augwalibolo ola mawai. 2 Tama te po ola mobadi, te Farisi dabe meba agaba aselama, tama augwaligo usu sinayani. Augwaligo te po wali, “Te da Juda dabego bomai pode te bidigo aga we sela sąbode, te usu da wali elalubowe, ma meniwe?” 3 Jisasgo augwaliba po wei ponoyu, te po wai, “Mosesgo mena bomai po dagebolo mawai dawe?” 4 Augwaligo te po wali, “Moses agai te po wai, bidigo we sabo togobo nogi pepa asęnama, tama te we sela sąwainu eyu da, te usu da po wai dao.” * Bom 24:1-4; Mat 5:31
5 Tiali goli Jisasgo augwalibolo te po wai, “Te dagego hagoma ebaso, tama Mosesgo te tobage bomai po dagebolo polobadu asęai dao. 6 Tiali goli polobadu mu, hasia bolo te Godigo tigidali nai nigali sogo, agai te bidi me we augwali si nigai dao. * Gag 1:27; 5:2 7 Tama tibaso, megi bidigo te aga aya de ida si tagalama, tama aga we dali kęą pelama bidaibao. 8 Tama tiyu, augwali si tigi te deli mu naga pedelaibao. Tama tibaso, augwali si te tedali bidu tedali bidu yali tiwai gilama ma elalugobeo. Menio. Augwali si tigi te dedeli mu tiwai naga bidaibao. 9 Tama tibaso, te Godigo tama kęnani nai, te bidigo me togolamu dao,” Jisasgo te po wai.
10 Te po olama, nosali augwali te be tomoba ma geasa pelama, tama aga wali pabo bidi dabego agabolo te wali pode hanalu wali. 11 Agai te po augwalibolo wali, “Te bidi me deligo aga we tagalu, tama gasa we sobaso da, te bidigo aga hasia sali we doloyu tama penani ebo kolesaga yai dao. 12 Te tiwai me, te we me deligo aga bidi tagalu, tama gasa bidi dali pobaso da, te we agai te penani ebo kolesaga yai dao,” Jisasgo te po wai. * Mat 5:32; 1 Ko 7:10-11
Jisasgo te dwasianu wai puluba augwali te wiegi yai po mani
(Mat 19:13-15; Luk 18:15-17)
13 Te we bidi meba augwaligo te augwa dwasianu wai puluba meba te agaba odasa asali. Augwaligo homugo te agai nogo augwaliba muyu, te augwaliba dwagi yai sę pedalabo po omainu homu yai. Tiali goli te aga wali pabo bidi dabego augwaliba wado ilali. 14 Jisasgo te tebo sulama, tama agai homu dwai yai. Agai augwalibolo te po wai, “Dagego te dwasianu wai puluba augwali enaba asomainu emainao. Dagego augwali panigimio. Te Godigo bomo dologoba peyu tede bidabo we bidi, augwaligo homu kolesaga te e wai pulubago homu kolesaga tiwai si dao. 15 Eno mu po dagebolo obe dao, te bidi me deli aga te dwasianu wai puluba tiwai gagayu, te God bidibo madi tomoba pabo homu me isiąwani bidi, aga te tomoba painu ebo usu me egobeo. Mu menio,” te po wai. 16 Tama olama, tama agai nogogo te wai puluba tolalu, tama augwali deli deliba nogo ugwadu munama, tama augwaliba te wiegi yai mobo mawai.
Doado bage hauwa elalubo bidide po
(Mat 19:16-30; Luk 18:18-30)
17 Te Jisas hogodama tama ma pobadi, tama bidi me deli udada asama, tama agaba kidu sugunagaselama, tama agabolo hanalu, “Te po ola mabo wiegi yai tisa bidio, te eno magi ilama tama eno te bidabo ula selama, bugagia sesemane sogo bidada peyu bidada pogowe?” Te po wai. 18 Jisasgo agabolo te po wai, “Magi baso nago ena wiegi yai da nogi obawe? God agaduba deli naga te wiegi yai dao. 19 Nago te bomai po koneanio: ‘Nago te bidi ela mugio. Nago te penani sę egio. Nago nai wi sigio. Nago gasa bidibolo tibo po me olamuo. Nago tibo pode gasa bidigo doado bage anoma elama sigio. Nago te naga aya de ida sigo po wali pao,’ te bomai po dabe nago koneanio, te wali pao,” Jisasgo te po wai. * Sai 20:12-16; Bom 5:16-20
20 Tama te bidigo Jisasbolo weyu, te po wai, “Tisa, po ola mabo bidi, te ena wai bǫųde digi gagalasa megi e sogoba usu nagasali, eno te bomai po tigidali wali pai dao.” 21 Jisasgo agaba tonaludama, tama aga dali dwagi yai homu eyu godolo mu yai. Agai agabolo te po wai, “Nage te nai me deli digi habuge yai elalubao. Nage pelama, te nago doado bage tigidali munama, tama nago tede mone selama, tama te magi nai meni yai bidi dabeba dobayao. Tama tiyu da, te nago wiegi yai nai mu te Godigo bidibo madide elaluaibao. Tama nage ena wali asao,” te po wali. 22 Te bidigo te po odama, tama aga gesabidi hulia selama, tama aga homu sęgę ebaso, tama aga pai. Magi baso meni, te agai doado bage hauwa elalubaso te homu yai.
23 Te bidi taga pelama, tama Jisasgo aga wali pabo bidiba tonono bilama tama te po wai, “Te doado bage hauwa elalubo bidi dabe augwali te God bidibo madi tomoba pabo te sinabo sę yaibao,” te po wai. 24 Tama aga wali pabo bidi dabe te pode midigi siyu noma sai. Tiali goli Jisasgo po wei augwalibolo ma ponoyu, te po wai, “Te eno ogomani dabe, te God bidibo madi tomoba painu ebo bidi, aga te sinabo sę dene yaibao. 25 Te moni kibu kamel te ugwa hobolobo medabu agebele tomodu dula painu da, aga te sinabo sę dene me isiąma te doado bage hauwa elalubo bidi te Godigo bidibo digi tomoba painu sinabo sę ebo tiwai gilama me egobeo,” te po wai. 26 Tiali goli te aga wali pabo bidi dabe augwali te pode homu midigi mu selama, tama augwa hasi po mia siyu te po wali, “Te tiwai elalubaso da, teda de te Godigo aga ma dobola somainogo usu yaibawe?” 27 Tama Jisasgo augwaliba dolo ponama tonalu, te po wai, “Te we bidi dabe augwa digi tede augwali usu egobe, tiali goli God agai da, te usu yaibao. Godigo te tigidali sę yainu ebo usu dao.”
28 Tama Pitago po me deli Jisasbolo weyu, te po wai, “Suao, da nage wali pabo bidi dabe, dago te tigidali doado bage tagalama, tama da nage wali bilibao,” te po wai.
29 Jisasgo te po wai, “Eno mu po dagebolo obao, tigidali bidigo enade homu kone palu, tama te Godigo wiegi yai gesi pode me koneama, tama te be, ma ama, me abe, me ida, me aya, me wai, me gi, te tigidali nai taga peyu da, 30 teda Godigo augwaliba te tobage nai te 100 nedama tama wei ponaibao. Tama augwali te tǫde bidalubo sogo teda augwaligo be hauwa siyu, te ama me hauwa siyu, te abe me hauwa sobadi, te ida me hauwa sobadi, te wai puluba me hauwa siyu, te gi me hauwa sobadi yaibao. Tama te bidi mebago te dwai kolesaga hauwa augwaliba yaibao. Tama te nosali bidabo sogo augwali te sesemane bugagia bidada peyu, bidada pabo ula me saibao. 31 Tiali goli te sogo te megi polali bidi dabe hauwa mu augwali nosali tudi badu yaibao. Tama te megi tudi badu yali bidi dabe hauwa augwali poligi soaibao,” Jisasgo te po wai.
Sela sogo wali Jisasgo aga isibode po wali
(Mat 20:17-19; Luk 18:31-34)
32 Augwali te sunumidu pelayu, tama augwali te Jerusalem moni hanuba pabo homu yai. Te Jisas poligi pelama pali. Tama aga wali pabo bidi dabe augwali homu hauwa yai. Tama augwali wali asali we bidi, augwali wi yali. Jisasgo aga wali pabo bidi te nogo si olama sągągo si te augwali tedali ma selama, tama agaba pedelabo sę po te po augwaliba wabo gagalali. 33 Agai te po wali, “Odiąo, megi da te Jerusalem hanuba paibao. Tama da teba sabolama, tama bidi me deligo ena Godigo Bidi Mu te genuai pris bidibolo me, te Juda dabego bomai po page koneai bidi dabe augwaligo nogoba muaibao. Tama augwaligo ena po tų ilibo sę elama, tama ena ela muabo po minama dąų waibao. Tama augwaligo ena te Juda hani isąwai bidi dabeba mawaibao. 34 Tama te bage augwaligo posobo po enaba weyu, tama enaba pesa sąyu, te ena subigila eliyu elama, tama ena ela muaibao. Tama sela sogo ena te gų pagede bidama, tama nosali ena Godigo Bidi Mu ena ma hodaluaibao,” Jisasgo te po wai.
Jems de Jon augwali si te genuai bidi bidabo homu yali
(Mat 20:20-28)
35 Te bidi Sebedigo ogwa si, Jems me Jon, augwali si te Jisasba aselama, te po agabolo wai, “Tisa bidi, da sigo te magi nai po deli nagebolo hanalu waibao, tama da sigo homugo nago te sę da sibolo emainu homu ebao.” 36 Tama agai augwali sibolo te po wai, “Dage sigo homugo eno mena sę dage sibolo emainogowe?” 37 Augwali sigo agabolo te po wali, “Nosali te nage genuai tuni bidi pedalubo side, da sigo homugo te da si me deli te nago dolo nogo badu dugayu, te me nago pobase nogo badu dugayu emainu te homu yai dao,” te po wai. 38 Tiali goli Jisasgo te aga tamadi tama dene sabode me, te aga isibo side yabo sę po, te side agai po digi po begelama, weyu, tama augwali sibolo te po wali, “Dage sigo te enabolo hanalubo naide po te dage sigo bugagia konesiąma te obao. Te dage sigo eno tamadi e ąį tuainu ebo kap tede te dage sigo homugo tuabo te usu dawe? Ma, te dage sigo eno megi sainu ebo baptais te dage sigo me te sabo homu usu dawe?”
39 Tama augwali sigo agabolo te po wai, “Te da si usu yaibao,” wai. Jisasgo augwali sibolo te po wai, “Mu dao, te megi eno ąį tubo kapde te dage sigo me tueibao. Te megi eno baptais sabo, te dage sigo me saibao. 40 Tiali goli de te eno dolo nogode ma pobase nogode duayabo sę, te sę eno me egobeo. Menio. Godigo digi te duabo sia sai te bidi mebabolo mawainu agai sisi ilai elalubao,” Jisasgo te po wali.
41 Te wali pabo bidi dabe nogo si bage augwaligo te tiali po odama, tama augwaligo te Jems de Jon si dali dwai homu mu yai dao. 42 Tiali goli Jisasgo augwali i olama asobo si, tama agai augwalibolo te po wai, “Dagego koneani, te Juda hani isąwai we bidi hani tomode te augwa tobolu bidi dabego augwali aiyaba elaluabo bomo hauwa elalubao, tama augwa genuai bidi dabego te augwali bomo elama mu tonalubo dao. 43 Tiali goli te kolesaga dage tomode munu me elalugobeo. Menio. Te bidi aga te dage tomode genuai bidi bidabo homu eyu da, te aga dagego sę ebo bidi tiwai bidao. 44 Tama bidi te polalubo bidi bidabo homu eyu da, teda aga te tigidali bidigo sę ebo nogi meni yai bidi tiwai bidao. 45 Magi baso meni, te ena Godigo Bidi Mu tama, tama ena me te bidigo ena tau sabo sę emainu me asobeo. Menio. Ena asali, te eno augwali tau sabo sę yainu asai, tama eno bidibo ulago digi te hauwa we bidi ma abelagasai dao,” Jisasgo te po wai.
Te Jeriko hanu gedu widai bidi po
(Mat 20:29-34; Luk 18:35-43)
46 Te Jisas dali, aga wali pabo bidi dabe dali, augwali te Jerusalemba pabo tųdu pobadi, tama augwali te Jeriko hanuba sabolali. Tama agai te Jeriko tagalama pali. Tama aga wali pabo bidi dabe, te genuai we bidi hani dali, augwali aga dali pali. Tama bidi me nogi Bartimeus, te Timeus aga ogwa, aga te sunumi bogo sese badu dulaludai. Aga te gedu widai, tama te sunumidu soabo we bidi dabe augwalibolo te mone ge me doado bage momainu i udubo sę iduai. 47 Agai te Nasaret bidi Jisas asobo po odama, tama agai i wabo gagalama bomonama wai, “Jisas, nage te Devitgo Ogwa dao, nago ena homu dene eyu tau sao!” te po wai. 48 Te bidi hauwa augwaligo aga wado iliyu, te po wali, “Nago pedauwali pania sao,” wai. Tiali goli agai po dagą genuai olama i wali, “Devitgo Ogwa, nago ena homu dene eyu tau sao!”
49 Tama Jisas dolagaselama, tama te po wai, “Te aga i olama asomainao.” Tama augwaligo te gedu widai bidi i olama, tama augwaligo agabolo te po wai, “Nago haliga bomo emainao. Nage hodaluao. Agai nage i obao.” 50 Tialima, aga genuai holobo ugwa peda sąnama, tama polo doligulama, tama Jisas bidiboba pali. 51 Tama Jisasgo agabolo te po wali, “Nago homugo te eno magi sę nagebolo emainuwe?” Tama te gedu widai bidigo agabolo te po wai, “Tisa bidi, te ena gedu ma pedelimainu elama, bulu ula ma suainogo yai.” 52 Tama Jisasgo agabolo te po wai, “Nage piduao. Te naga enade konealubo po dąų olama, naga homu enaba tialubo kolesaga ebogo te nage wiegi yai ma ilibao.” Te tama polo te aga gedu usu elama, tama aga bulu ula ma suali. Tama agai te Jisas dali te sunumidu wali pai.