111
Dago te Genuai Bidi nogi ugwaba sao wali
1 Genuai Bidi nogi ugwaba sao.
Eno wei ebo homu te bomo elalubao,
tama tiyu, eno agaba usu da
po wabo genuai mayu,
te aga we bidi tigidali sisinibo madi tiaibao.
2 Genuai Bidigo te polalubo sę dabe mu ebo dao.
Te we bidi dabego te Genuai Bidigo
ebo sę te wei mu yali, augwaligo te sę dabe
te bugagia koneainu homu yalio.
3 Tigidali sę agai ebo te aga genuai nogi
pedalumainu yai, tama te wiegi yai mu yali.
Te agai doloba pai kolesaga te sesemane elalua pidu,
elalua pabo dao.
4 Genuai Bidigo te we bidigo homu hodolama,
te augwaligo agai ebo wiegi yai
sę dabe te sesemane sogo
homu konealumainu yai.
Sesemane sogo Genuai Bidigo te olo
tau sabo wiegi yai kolesaga eyu,
tama da homu dene eyu, tau sabo dao.
5 Agai te agade wi ebo we bidi dabe
tubo nai mabo dao.
Agai te aga hani bage dali dąų walali pode
te homu kone gegeda peyu me egobeo.
6 Agai te meba hanigo tǫ
te aga hani we bidi dabeba mawai.
Tama tiyu, te kolesagade agai te aga bomo
te aga te augwaliba ola mawai dao.
7 Agai kolesaga te mu elalu, te dolo mu elalubao.
Dago te agai bomai po tigidaliba
homu kęą pelama, wali pobaso, te usu dao.
8 Te Godigo bomai po sesemane elalubao.
Godigo te wiegi yai doloba pai kolesaga naga elama,
tama te bomai po dodolama, elalubo dao.
9 Agai aga we bidi augwali ma abelali.
Tama agai augwali dali te bomai po me deli dąų walali,
tama te dąų walali bomai po te
sesemane elalua peyu, elalua pobao.
Genuai Bidi aga te tedali wiegi yai da,
tama agai te tigidali bomo elalubao.
10 Te bidi te kolesaga koneai bidi
pedelainogo eyu da, aga te Godide wi yao.
Agai te wiegi yai homu kolesaga
te agaba homu mubo we bidiba mabo dao.
Dago aga nogi sesemane bidada pabo sogo ugwaba sao.* Jop 28:28; Prs 1:7; 9:10