141
Te Devitgo asęani balia po me deli dao.
Bidi me deligo gedu haluasa po hulide walio
1 Genuai Bidi, megi eno nageba gedu
haluasa po obao.
Eno homugo nago ena polo tama
tau somainu homu ebao.
Eno nageba i obao, tama eno homugo nago
eno gedu haluasa po odomainu homu ebo dao.
2 Eno homugo nago eno gedu haluasa
po wabo te nageba denami ebo nai
hano asobo tiwai emainao.
Awe, te eno nogo si ugwaba siyu,
nagebolo gedu haluasa po wabo si,
eno homugo te ebo te nago gedude
te piode mabo ofa tiwai emainao. *Ped 5:8
3 Genuai Bidi, nago eno pedauwali bugagia tonaluao,
tama eno po wabo me bugagia tonaluao.
4 Ena te dwai kolesaga ebo tomoba
pidali weyu, nago ena hageao.
Tama nago ena te dwai sę ebo bidi dabe
dali deliba sisinama,
tama te dwai sę meba emainu me elamuo.
Ena te augwali te moni nai daa tuboba pelama,
te augwali dali deliba dugamainu me
idali weyu, nago ena togolao.
5 Wiegi yai bidigo te ena homu dene elama,
tama ena sesanobo sę eyu, te enaba wado ilaibao.
Awe, usu dao, po menio, te kolesaga ebogo agai
ena tau sabo dao.
Tiali goli, eno te dwai sę ebo bidi dabe
dali abagi me wagobeo.
Magi baso meni, te sesemane sogo eno
te augwa ebo dwai kolesaga tagalomainu,
te gedu haluasa po wabo dao.
6 Te bidi mebago te dwai sę ebo bidi
dabego tobolu bidi dabe selama,
tama augwali te bobobage sauba sąwaibao.
Te augwali te tiwai dolobo sogo da,
teda te dwai sę ebo bidi dabe augwaligo koneama,
te eno polobadu wali po te mu po da waibao.
7 Tama augwaligo te bidi dabe
augwaligo dili te gų pageba sąwaibao,
te bidigo te ni dage kakali miminama,
te sąsąbo tiwai gilama yaibao.
8 Tiali goli, Tigidali Nai Tonalubo God,
Genuai Bidi, eno konealubo homu
nageba beagasalio.
Nago ena bugagia tonaluao, nago ena isimainu me igio.
9 Te ena te dwai sę ebo tomoba painu eyu,
te dwai bidi dabego ena kegebo dao,
bidigo te bulu hasa sabo kę geme
dualama mubo tiwai ebo dao.
Tiali goli, nago ena bobogela selama,
te kę dabede ena dąų me wagobeo.
10 Meni. Nago te dwai sę ebo bidi dabe
te augwa muani kęde digi te augwa
ma tola somainu mu yao.
Tiali goli, ena menio.
Ena te augwali bugagia ela soayu,
tama te magi nai me deligo ena me dologobeo.