18
Te moni hanu Babilon dolalio
Te penani wede pedalabo sę eno te tiwai suali. Tama nosali te sogo eno suali gasa ensel mobo bidi te dagalu tagalama e tǫba dulubo eno suali. Agai bomo genuai mu elaluai, tama agai bomo yai ulago te tǫ ula mu ilai. Agai i genuai bomo elama mu weyu, te po wai,
“Dolalio, dolalio, te genuai hanu Babilon mu dolalio.
Megi te bulu te dwai haubo noma bidi dabego bulu
pedalama bidibao. Te dwai meda yai mobo bidi
dabe me augwali tede bidibao. Te meda yai ba dabe
me, te dwai bulude bidibo ba dabe me, augwali
me tede naga kalabus bidibo dao. * Ais 13:21; 21:9; Jer 50:39; 51:8; Ped 14:8
Magi baso meni. Te moni hanu Babilon aga te
bomo yai ąį wain hauwa tubo penani sę ebo we
tiwai dao. Te we agai te bomonama tama te dwai
dwai sę ebo dao. Tama agai aga bomo yai ąį wain
te tigidali tǫde bidibo we bidibolo menama, tama
augwaligo me te penani ebo kolesaga aga dali me
yali dao. Tama te tǫde tuni bidi augwaligo me te
penani ebo kolesaga aga dali me yali dao. Tama
tigidali tǫde bidi augwaligo mone sabo bisnis sę
eyu, tama tede te masigi hauwa mu umabo sali. Te
moni hanu aga te we me deli tiwai bidiyu, tama te
wego homugo ‘Eno ena tigi tau sabo nai, te tigide
pusubo nai, te ena homu dwagi yai ilibo haniani
nai, te tobage wiegi yai nai hauwa eno abelaio,’ te
tobage homu eyu, tama te hanugo te bisnis bidi
dabego nai umabo abelai dao,”
te ensel mobo bidigo te po wai. * Ais 23:17; Jer 51:7
Tama eno odali, gasa pedauwalidu po dagaludu pedalali, tama agai te po wali,
“Eno we bidi hani, dage te bulu tagalama buluba soao.
Dage aga dali te dwai sę ebode te dene sidali weyu,
tama dagego agai ebo dwai dwai sę me egimio. Tama
tibaso, te bulu tagalao.
Magi baso meni. Te agai dwai sę ebo sęgę te
pobele bage deliba sisinibo tiwai mu yali, tama te
dagaluba mu usu nainogo holai. Tama God agai
te bulude ebo dwai dwai kolesaga tigidali agai
homugo ma koneai.
Dagego te penani wego yali kolesaga tiwai
koneyu, tama dagego te kolesaga ebo usu nama aga
dali wei sao. Te agai dage dali yali dwai kolesaga
dali gasa me dali ugwadu daganama agabolo ma
mao.
Te wego dagebolo dene dali sęgę si mani, te bidigo
bomo yai ąį si te kap deli tomode taluama tama
gasa bidibolo mabo tiwai yai. Tama te kapde po
digi po begelama, tama dagego te bomo mu yai
ąįgo te wego kap pągąnama tama aga tumainao.
Tama tiyu, tama agai dagebolo mani dene dali sęgę
dali agabolo ma mao.
Te aga digi aga nogi ugwaba siyu, tama aga tigi
naga tau sabo sę yai dao. Tama dagego agabolo
dene dali sęgę dali si hauwa mayu, te yali dwai
sę usu nama yao. Tama dagego aga gela hauwa
omainogo yao.
Magi baso meni. Agai aga homude e tama po wabo
dao: ‘Ena te tuni we bidibao, tama ena te tuni bidi
bidibo saide dulalubo dao. Ena te bidi isai we bidibo
tiwai olo bidibeo. Tama tibaso, te sęgę enabolo
pedaluyu, te ena gela me wagobeo. Mu menio,’
agai te homu ebo dao.
Agai te homu ebaso, polo te haniani dwai sę mu
agabolo te deli sogo naga pedalaibao. Te genuai
gasi pedaliyu, tama bidi hauwa augwaligo dwai
gela weyu, tama genuai nasi yaibao.
Tama siago te Babilon tigidali daibao. Magi baso
meni, te genuai bomo mu elalubo Genuai Bidi God
aga digi dagalama tama Babilon hanuba te dwai
dene wei ponobo dao,”
te po wabo te dagaludu asobo eno odali.
Te tǫde tuni bidi augwaligo te penani we dali penani eyu bidai dao. Tama te kibu dabe augwali te we gede pebege pibo tiwai, te tuni bidi augwali te wego haniani wiegi yai naide dwagi yai homu eyu bidai dao. Tama augwaligo te penani we siago deyu hano holobo subaso, tama augwaligo moni gela weyu nogo pagasayu bidaibao. 10 Te we aga te dwai dene sabo suyu, te augwali aga digibulu dolaluyu te po wabo,
“Aua, hobede yali, hobede mu te bulu Babilon dali
yai. Nage te genuai hanu, tama nage bomo yai hanu
dao. Tiali goli te deli sogo naga nago dwai sę yali
sęgę nageba mu pedalalio.”
11 Tama tigidali tǫde bidi augwaligo te mone sabo bisnis sę ebo bage, augwaligo homugo te bulu Babilon kone paliyu, tama augwaligo agade gela weyu, te homu sęgę dali bidibao. Magi basowe, te augwaligo doado bage abelabo bidi me menio. * Ese 27:31, 36 12 Te wiegi yai doado bage e tiwai dao, te kapa gol me silva, te gasa haniani wiegi yai masigi me, te bis gasagi yai nai me, te wiegi yai tedela yai ugwa dabe, tama te haniani mama yai ugwa me, te dila pai ugwa nogi slika elalubao. Tama te gasagi yai denami ebo ni dabe tigidali, tama tigidali dila pai nai augwaligo te kibu elefan kelego nigali nai dabe, tama te genuai masigi elalubo nigo te nai tigidali nigali, te kapa nogi bras me, te ain me te sigo nigali wiegi yai nai tigidali, me te tomode dodobolo pai wiegi yai masigigo nigali nai me, te tobage doado bage. 13 Tama te meba doado bage e tiwai elalubo, te denami ebo tubo nai nogi sinamon me, te tubo gagi, tama te denami ebo nai pauda me, tama te haniani denami ebo ili yai nai elaluai, tama wiegi yai denami ebo nai sanda, me te bomai ąį wain me tubo wel, te wiegi yai tubo plaua me te tubo nai wit ge, te kibu bulmakau me sipsip, te me hos dali te hosgo kegasa pabo wiegi yai nai nogi karis dabe me, tama te augwaligo mu abelai masigi sisąbo sę ebo we bidi dabe me, te tigidali nai bidi dabe augwaligo ma abelegobeo. 14 Te masigi hauwa sabo bisnis sę ebo bidi dabe augwaligo te po waibao, “Te nai nago homu hodaloyu sabo homu yai, te nai tigidaligo nage tagalama pai dao. Tigidali dwagi dwagi yai tubo nai dabe te genuai mone naga elaluali, te nago wiegi wiegi yai tigidali au ebo doado bage dali, te nai tigidaligo nage taga palio. Tama te bidi dabe augwaligo te tobage nai dabe nagede munalubo ma sugobeo,” te bisnis sę ebo bagego te po waibao. 15 Tama te sęde te mone umabo sali bisnis sę ebo bidi dabe augwaligo te masigi hauwa mu te hanude sai, te augwali te hanugo dwai dene mu sobaso tama augwali wi mu yaibao. Tama augwali aga digibulu dolaluyu, tama augwali gela weyu, tama dwai homu sęgę elama bidaibao. 16 Tama tiyu, augwaligo te po waibao, “Hobede ebo, te genuai hanu te hobedagia bidibao. Polobadu agai te wiegi yai tedela yai ugwa gudai, tama haniani mama yai ugwa gudama, tama aga tigi te golgo au ilai, tama te wiegi yai dila pai masigi dali bis dali te nai dabego tama au yai. 17 Te megi deli sogo naga, te masigi me te tigidali au ebo doado bage tigidali dola silai dao,” augwali gela weyu te po waibao.
Tama te moni geba sip guni tolasa bilibo bidi tigidali me, tama te sip abelama gasa buluba painogo ebo bidi dabe me, te sip tomode sę ebo bidi dabe badi, tama te tamu ąįde masigi sabo bisnis sę ebo bidi tigidali me, te bidi dabe tigidali augwali te Babilon bulu digibulu dolaluali. * Ais 23:14; Ese 27:26-30 18 Tama dolalubadi, augwaligo aga te siago dabo hano ebo suyu, tama augwaligo i e tama wai, “Mena hanu te e tiwai genuai hanu elalualiwe? Mu menio,” te po wai. 19 Tama augwaligo te tǫ pobele bage augwa digi augwa toboluba sąyu, tama gela weyu augwali homu sęgę dali bidai dao. Tama augwaligo i weyu, “Hobede ebo, te genuai hanu te hobedagia bidibao! Te tigidali moni geba sip aga aya te tamu ąįde masigi sabo bisnis sę ela biliyu, te augwali te sęde masigi sabo bidi mu pedaliyu, te genuai hanude genuai masigi sabo sę yai dao. Hobede mu ebao! Te megi deli sogo naga mu te genuai hanu aga mu dola silai dao!” te po wai.
20 Nage te dagalu, nage dali te Godigo we bidi dali, tama dage te Godigo po pusigi pabo bidi dabe me, te Godigo nosali yabo sę po ola mabo bidi dali, dage tigidaligo te genuai hanude megi pedalobo sęde wiegi yai homu yao! Godigo aga dagalama, tama agabolo te dwai dene sabo wei ponai dao. Tama te kolesagade agai te hanu agai dwai kolesaga dage dali yali wei ponai dao!
21 Te po silali, tama moni bomai ensel mobo bidi me deligo te wit ge agaga pelama pęgą sabo moni masigi tiwai sela asai. Tama agai te moni sęgę yai masigi ugwaba selama, tama tamu ąį aba sąwai. Tama agai te po wai, “Te kolesagade naga augwaligo te genuai hanu Babilon selama bomonama aiyaba sąyu, tama bidi dabe augwaligo aga ma suainogo ebo usu egobeo. * Jer 51:63-64; Ese 26:21 22 Tama te gita elebo po wabo me, te haniani habidi po wabo tiwai ebo me, te genagi me te bu wabo nai me, te tobage naigo po wabo nage pagede ma te po wagobeo. Tama bidigo tigidali haniani sęde konea sali bidi, te tiwai bidi nage Babilon bulu tomode bidibo augwaligo ma sugobeo. Te nai wit ge agaga pabo masigigo kulu kulu wabo, te tiwai wabo augwaligo nagede ma odogobeo. 23 Te lam sole ula ebo te ula nagebolo ma iligobeo. Tama te we sainogo ebo bidi me, te bidi dali painogo homu ebo we me, augwali si dwagi yai homu eyu po wabo te nage tomode ma wagobeo. Polobadu nago bisnis bidi dabe augwaligo te masigi sabo sę elama, tama augwali te tǫde genuai nogi yai bidi dabe bidai. Tama nago tigidali bidi hani dali te nago tibo pode haniani pobi po wabo sę elama, tama augwali dwai tųba kegasa pali.”
24 “Tama Godigo suali, te Babilon hanude bidibo we bidi augwaligo agai po ola mabo bidi dabe dali, te agai po wali pabo we bidi dali ela mubo sę yai. Tama tigidali tǫde augwaligo we bidi meba dali boi bidi eyu, augwali ela muyu, tama te dwai sę ebo page te bulu Babilonde naga elalubo dao. Tama tibaso, te hanu dola silai dao,” te moni bomo elalubo ensel mobo bidigo te po wai.

*18:2: Ais 13:21; 21:9; Jer 50:39; 51:8; Ped 14:8

*18:3: Ais 23:17; Jer 51:7

*18:11: Ese 27:31, 36

*18:17: Ais 23:14; Ese 27:26-30

*18:21: Jer 51:63-64; Ese 26:21