15
Dago Kraisgo homu kolesaga wali pao
Te da Godigo we bidi hani tomode te we bidi meba augwaligo te Kraisde te konealubo po bomo meni yai bidiyu, tama augwaligo haniani sęde te habu selebo dao, te ena tamadi tama te sęde po asęani. Tama da meba te Kraisde te konealubo po bomo eyu dąų olama bidibao. Tama da augwali dali te nagamea pai kolesaga eyu augwali sao. Dago augwali dali tama tiyu, tama dago augwaligo sęgę tolao. Dago augwali sula tagalama tama dena homu kolesaga naga wali me piduamu dao. Te menio. Da tigidali deli deli dago te da pąde bidibo bidide homugo kone palama, tama aga tau sabo sę yao, te aga wiegi yai kolesaga selama, tama aga te Kraisde konealubo po bugagia dąų wali bidi pedalomainao. Te Kraisgo me, Krais aga digi aga homu wali me pabeo. Te meni. Te we bidi augwaligo agade nogi posobo po wali goli, aga Godigo homu naga wali pali. Te agade pedalali kolesaga te bidi mego Godibolo polobadu wali po tiwai gilama yai. Te bukude asęani po e dao: “Te God, te bidi dabe augwaligo nagebolo wabo dwai po wabo, te augwaligo dwai po wabo te po asiyu ena mesegelai dao,” te po asęani, tama te Kraisde usu nagasai dao. * Tib 69:9 Godigo po tigidali augwaligo polobadu asęani, te augwaligo te po dabolo te wiegi yai bidabo kolesaga ola momainogo asęanio. Tama dago te asęani po nededu geyu, tama tede dago te haniani sęgę tolabo bomo dali, te dwagi yai po mobo mabo po dali somainogo eyu augwaligo te po asęani. Tama dago te bomo me te mobo mabo po me te bukude asęani pode selama, tama dwagi yai homu eyu, dago te Godigo da dali yabo wiegi yai sę bugagia tonaluaibao. Te God da, te haniani sęgę tolabo bomo page bidi dao, te dwagi yai mobo mabo po page bidi dao. Tama eno homugo te Godigo dage tau siyu, tama dage te Krais Jisasgo yali homu kolesaga wali mu peyu, tama dage deli homu naga duga hasi elaluyu bidaibao. Eno homugo dage te tama bidiyu, tama pedauwali deli elama, tama Godigo nogi ugwaba somainogo yao, aga God tama dago Genuai Bidi Jisas Kraisgo Aya dao.
Krais da te Juda dabe dali gasa hani dabe dali ma dobola sabo bidi dao
Dago te da pąde bidibo bidide homugo kone palao. Tama tibaso, duga hasi dage tigidali deli deligo te ama dede dabe selama, tama augwali dali deli homu elama bidao, te Kraisgo me da sali tiwai yaligi yao, te Godigo genuai nogi ugwaba pedalomainogo tiao. Eno po page e dao: Krais agade digi naga aga homugo kone palisiąbadi tama aga te tigiwali togobo Juda hani tau sabo sę bidi pedalai. Agai tama tialigo te God da te mu po naga wabo bidi dao ola mani dao. Tama tede Kraisgo te Godigo te polobadu bidali augwa wąį dabebolo menama dąų wali po tigidali usu nai dao. Tama aga te Juda hanigo sę ebo bidi pedalobo te page me elalubao, te e dao: agai homugo te gasa hani augwaligo te Godigo homu dene eyu olo tau mabo wiegi yai kolesaga ebo te augwaligo sulama, tama aga nogi ugwaba somainogo homu yali, te Godigo po bukude wali po tiwai gilama yali, te po e dao:
“Tama eno nago nogi ugwaba sabo po gasa hani
dabe tomode augwalibolo pusaibao.
Tama eno tęąbi pogo nago nogi ugwaba saibao.”* 2 Sml 22:50; Tib 18:49
10 Tama bukude te sęde gasa po me wali e dao:
“Dage gasa hani dabe, dagego te Godigo hani we bidi
dali wiegi yai homu pemene yao.” * Bom 32:43
11 Tama bukude te po gasa badu e tiwai po wali,
“Dage tigidali gasa hani bidi, dagego te Genuai
Bidigo nogi ugwaba sao. Tama tigidali we bidi
dagego aga nogi ugwaba sao.” * Tib 117:1
12 Tama te Juda hani isąwai bagede te polobadu Godigo po pusali bidi Aisaiago me te po wai,
“Te gelali ni pedalide te ni koliama holobo tiwai
gilama tama te bidi me deli te Jesigo hanide
pedalaibao. Tama te bidi Godigo te gasa hani we
bidi tonalubo bidi nigilaibao. Tama nigilama, tama
augwaligo agade augwa homu tialuama, tama
dwagi yai homu eyu, agai augwalibolo nosali yabo
sę ebo tonaluaibao,” * Ais 11:10
te Godigo po polobadu pusali bidi Aisaiago te po asęani.
13 God da, aga te dago homu agaba tialuama tama dwagi yai homu eyu te agai dabolo nosali yabo sę tonalubo kolesaga page bidi dao. Tama eno gedu haluasa po weyu tama wabo dao, “God, te Rom bulude bidibo we bidi augwaligo nageba te konealubo po dąų wali dao. Tama tebogo nago augwali wiegi yai homu pemene genuai elama, tama nagame yai homu te augwaliba pedalama tama pągąnalumainogo yao, te eno homugo dao. Tama nago Tedali Mobo Bidigo bomogo augwali tau siyu tama augwaligo te nago nosali yabo sę bugagia tonalubo kolesaga te geninama mu pedalomainao,” eno te tobage po te Godibolo hanalu wabo dao.
Polgo aga ebo sęde digi po weyu, tama agai te Rom dabede siade po wai
(Dąį 15:14–16:27)
Pol agai te Godigo sę te Juda hani isąwai gasa hani bage tomode yali
14 Eno ama dede dabeo, te eno dagede te homu si ebo meni. Te eno homugo digi te dagego te we bidi tau sabo wiegi yai kolesaga sesemane sogo ebo dao, tama dagego haniani kolesaga tigidali elaluyu, tama dagego te Godigo wiegi yai homu kolesaga te duga hasi ama dede dabe augwalibolo ola mabo te dage usu ebo dao. 15 Tiali goli eno e pas tomode po meba ena homu wi me isąyu, tama bomo elama te po dagebolo hania asęani. Eno te pode dage homu hodolainogo homu ebao, te dagego te po kegeda pidali weyu yali. Magi baso meni, Godigo te aga olo tau mabo wiegi yai kolesaga ena dali eyu, tama enaba te dwagi yai sę mawai dao. 16 Tama agai ena te Krais Jisasgo sę ebo bidi bidimainogo ilama, te Juda hani isąwai gasa hani augwali tomode sę emainogo yai. Ena te Godibolo lotu po weyu sę ebo bidi pris tiwai elama, tama eno Godigo wiegi yai gesi po pusubo sę ebao. Eno te gasa hani augwali te Godiba sela aselama, tama Tedali Mobo Bidigo augwali wiegi yai mu doloba pai we bidi ilibo si, tama eno augwali Godibolo te usu si yai ofa tiwai elama mawaibao. 17 Tama tibaso, ena Krais Jisas dali wadolama, tama eno te Godibolo ebo sęde te ena wiegi yai homu pemene ebo usu ebo dao. 18 Tama eno gasa bidigo yali sęde po me wagobeo. Menio. Tama bomo elama, eno te Kraisgo sę ena nogode yali sę po naga pusubao. Agai eno po tau selama, tama wiegi yai sę dabe eno nogode yai. Tama te si ebogo te Juda hani isąwai gasa hani we bidi augwali te Godigo po odoyu, tama augwaligo homu tulaluyu, tama augwali agai po wali pabo sę ilali. 19 Tama agai eno nogode te haniani bidigo me isąwai bomai sę yai. Tama Tedali Mobo Bidigo me enabolo sę bomo yali. Te tigidali sę agai yai, te gasa hani dabe hodolama, tama augwaligo te Godigo po wali pomainogo yalio. Tama tiyu, eno te sę Jerusalemde gagalama, tama eno Kraisde wiegi yai gesi po tigidali augwalibolo pusali, tama ena bilali te tigidali habuba te digibulu mu bulu nogi Ilirikum dąį egi pelama, tama te sę ela silai dao. 20 Tama tiyu, te sęde eno homugo te Kraisgo nogi polobadu konesiąwani bage bidiboba pelama, tama augwalibolo eno te wiegi yai gesi po pusabo homu godolo mu yalio. Te po digi po begelama tama e tiwai dao, eno te gasa bidigo tulai be ni daide eno be me sę idali weyu, ena te digibulu buluba pai dao. 21 Tama tiyu, eno te Godigo po bukude polobadu asęani po usu numainogo yai, te po e dao,
“Te agade po munu me odosiąwani bidi dabe, te
augwaligo aga sueibao. Tama agade po odosiąwani
bidi dabego, te augwaligo agade bugagia koneaibao.”* Ais 52:15
Polgo Rom dabe suabo homu yali
22 Te digibulu bulude bidibo bage, te augwali Kraisgo nogi munu me odosiąwani we bidi, te eno augwalibolo Godigo po pusubo sę hauwa elalubaso, tama te sęgo hauwa sogo ena tų palidubaso, tama ena dageba pabo usu me ebeo. * Rom 1:13 23 Tiali goli megi eno yabo sę te gasa pąde elalubo tǫ pedai dabede me elalubeo, te sę tede silai dao. Tama hauwa kibu bede te ena dage bidibo madi asabo homu godolo mu yai dao. 24 Tama tialigo da, megi eno homugo te ena te digibulu tǫ pedai nogi Spen, te dagego bulu Rom u badu bulu, teba ena paio. Tama te Spenba pobadi tama tomode ena dagego hanu Romba hasia sabolaibao. Tama dageba te tiwai sabolama, tama ena dwasianu sogo dage dali dwagi yai homu eyu bidama, tama dagego ena tau siyu ena odasa pelama, te Spen bulu pabo tųba tagaligi pagameo. 25 Tiali goli megi hasia bolo ena te Jerusalem hanuba pabo tamadi gagalaibao, te tede bidibo Godigo we bidi tau magi paibao. 26 Te e tama tiaibao: te Masedonia dali Akaia dali te tǫ pedai side bidibo Godigo we bidi augwaligo po mia selama, tama dwagi yai homu eyu augwa nai sesa pelama sisinama, tama eno nogoba munama, tama te nai meni yai te Godigo we bidi augwalibolo te Jerusalemba tolainogo ebo dao. * 1 Ko 16:1-4 27 Mu tama, augwa digi augwaligo te mone mabo sęde wiegi yai homu elama augwaligo tama tiwai yali, tiali goli augwaligo negeli me te Jerusalem dabede elaluai. Magi baso meni, te Jerusalemde bidibo Juda dabe augwaligo te Juda hani isąwai gasa hani dabe augwali te Godigo wiegi yai gesi po mani negeli elaluai. Tama tibaso, gasa hani augwaligo te tigide nai tau sabo negeli te Juda dabe augwalide elaluai dao. * 1 Ko 9:11 28 Te gasa hani bage augwaligo Godigo wiegi yai po odama, tama te pogo megi du walobao, te gasa hani bage augwaligo augwa monego te Juda dabe tau saibao. Tama eno te ena nogoba muani sę silabo homu eyu, tama eno te wiegi yai du tigidali te Jerusalem dabe augwaligo nogoba bugagia menama da, tama nosali ena te Spen buluba pabo tųdu painogo, tama tedu pobadi hasia eno dage bolo suagasaibao. 29 Tama eno koneanio, te ena dage bidiboba sabalobo si, te Kraisgo da tigidalibolo te wiegi yai homu ilibo dwagi yai sę elama, tama da pągąwaibao.
30 Eno ama dede, eno homugo dagego te dago Genuai Bidi Jisas Krais homu koneama, tama te Tedali Mobo Bidigo da tomode hodolali duga hasi godolo ebo kolesaga me homu kone palao. Tama te side homu kone palama, dage homu hodolama, tama te gedu haluasa po wabo sę dene ena dali emainu eno te homu godolo ebao. Dagego te Godibolo gedu haluasa po weyu ena tau somainogo yao, 31 tama ena te Juda dabe meba te Godigo po sela sąbo bidi augwali nogode ena dagala samainogo yaibao. Tama me, dagego te Godibolo gedu haluasa po obaso, te Godigo aga we bidi Jerusalem dabe augwaligo te eno augwali tau sabo sęde dwagi yai homu eyu tama godolo emainao. 32 Tama tiyu, tama Godigo usu da homu ebaso da, te ena wiegi yai homu pemene eyu, tama dage bidiboba sabolaibao. Tama ena dage dali dwasianu sogo bidiyu toma nabo homu yaibao. 33 Eno homugo God da, aga te wiegi yai homu nagame ebo page bidi, aga te dage tigidali dali bidao. Mu dao.

*15:3: Tib 69:9

*15:9: 2 Sml 22:50; Tib 18:49

*15:10: Bom 32:43

*15:11: Tib 117:1

*15:12: Ais 11:10

*15:21: Ais 52:15

*15:22: Rom 1:13

*15:26: 1 Ko 16:1-4

*15:27: 1 Ko 9:11