Hiblu
Naka make futan olo dolanea Hiblu teni omfubenebiobe.
Tekein kemin wengobe.
Yesuse atdimo kaanea imin hananea ulanea abilim unebua bifolo 37 ese mak blimanota naka make futan olo dolaneta Hiblu teni Yesuse bainobo gabibi omfubenebiobe. Nibo futan olo dolanebio nakae mo tekein kebobbabe. Naka maki teniba Hiblu teni Yesuse bainobo galin nakaia unangai dim omin wengo omkayebiba i Bain ese dim ese gabianiba maki bainobo galino deibonom genamib kesota naka ele futan olo dolaneta omfubenebiobe. E i alebenea baanea Klaiste okok osa e niniin osa ota Mosese okok osa e niniin osa gaisonobiobo ge baabenebiobe.
1:1-3 Gode Klaiste dabane tlea e kukubo nakaia unangai alebenebuo wengobe.
1:4–2:18 Klaiste abiseli gaisenebiobe.
3:1–4:13 Klaiste Mosese Yosuae i dabo gaisenebiobe.
4:14–7:28 Klaiste okoko Gode amo kimanin nakai okoko gaisenebiobe.
8:1–9:28 Klaiste wengo Gode hekmel wengo sino gaisonobiobe.
10:1-39 Klaiste kaanea e ileme singanea nakaia unangai hengmino temo blibo dotlanebuo wengobe.
11:1–12:29 Bainobo galin wengobe.
13:1-25 Mubiang wengobe.
1
Gode miine wengo nibo omyebiobe.
Sinanggwano am homono dimo Gode e weng omkeimalin nakai e wengo omkaye bianea eka kukub homono aleye biam bia isak nib faninwali weng olo omkaye binibbiobe. Otane memalo mubiang amo bomano dim olo e miine e wengo omalea eka esak weng olo nibo omyebe. Sinanggwano Gode e miine baabanea Kobo abil esa dabal esa inamin namin osa alukum klanale ge baabanea e klanebiobe. Gode e dofakanea Ne inamin namin olo doklamabibo genebio kesoa e dlalamabebe. Gode titilo ayal inamin eibie inanea e miin esa e titilo ayal inamin eibiebe. E miine makob aalebe Gode ulabobe. E wengo titilsa kesoa inamin namino abilim uto bu osa eka dabalim olo bu osa owebea alukum klayam biobe. E inamin namin olo alukum kima biebe. Sino e atdimo kaanea nib hengmino omtlabenea imin hana utnea abilim ut unanea Gode titilo inamin namino alukum gaisonea kima bie nakae kweile kweitale kikib ye toumbianea inamin namin olo kima biebe.
Gode e miine niniino dobtouleb biebe.
Yesuse ina bie kesoa e abiseli gaisenebiobe. Gode Yesuse niniino dobtouleb bie otane e abiseli niniino mo dotouleb biebabe. Sinanggwano Gode e buk temo baanea
Kobo ne miinobo, eka nesa memalo keb ay aiobo ge baabanebio
 
kesoa e Yesuse niniin ota dobtouleb binebiobe. E abiseli niniino mo dotouleb nin blimobe. Eka e imin baanea
Ne keb ay eka kebsak ne miin nabo ge baabanebiobe.
 
E weng olo abiseli mo baabeim blimobe. Ele miin eta baabanebiobe. Eka sino Gode e miine hek sume dabanea daakenea dabalim ele tlang genabe dimo Gode abiseli baabenea
Ne abisel ibo alukum ne miine niniino dobtouleb nine ge baabenebiobe.
 
E abiseli weng sango baanea
Ne abiseli baabenia Ibo makob glole hebmamsab kikim binabe inaniba ne okoko hebmamsab okok kebianiba ib titilo makob atolo ulab aine gabibo ge baanebiobe.
 
Ina otane Gode e miine weng sango baanea
God kobo inamin namin olo kimaneba keb kimanin kukub olo amit namabobe. Kobo inamin namin olo kima bieba keb kimanin kukub olo amitie molot namabobe. Kobo kukub molot ota gobo biebobe. Kobo hengmino mo gobo biebbabe. Kobo inabeb kesoa Sum kobo ne keb God neta kemfakaibua kobo sum aneba seineba keb seinino naka mak unang maki seinino gaisenobo ge baabanea
 
10 eka imin baabanea
Sum kobo sinanggwano dabal ele klaneba eka abil esa klananeba inamin namino abilim ut bu osa kebta klanebbiobe. 11 Sinanomo dabal esa abil esa blimanamabo otane kobo amit namabeobe. Abil esa dabal esa ole makob youmo aluanoa banabo inanoa blimanamabobe. Kobo dabal esa abil esa halbuneba 12 makob nakaia unangai youmo halbugenabib inabonamabeobe. Makob nakai sin youmo dibianiba mema youmo dloniba dlusanabib inaneba kobo dabal esa abil esa olbianeba eka dabale mema esa eka abile mema esa ota klanamabeobe. Inanamabeb otane kobole sinanggwano ming inamin ye binabebbua memalosa ming inamin ye biebobe. Sinanomosa ming inamin ye namabeobe. Kobo afet anamino blimobe. Kobo kaanamin osa blimobo ge baabanebiobe.
 
13 Gode imin baabanea
Kobo ne kweile kweitale kikib ele toumbianeba inamin namino kima bieba sinanomo ne keb makaai alukum yalia i titilo blimanamabobo ge baabanebiobe.
 
E weng olo abiseli mo baabeim blimobe. Ele miin eta weng olo baabanebiobe.
14 Abiseli fatnamine? I smiki ulab kesoa i Gode okoko okok kebiobe. I Gode dlanea moniba nakaia unangai hengmino temo bliba Gode dotlanebuei sinanomo dleb utnea e bibam ut danea nomabib isu ye moniba daayebiobe.