Failimon
Fole Failimone futano dola omfubasebe.
Tekein kemin wengobe.
Yesuse atdimo kaanea imin hananea ulanea abilim unebua bifolo 32 ese mak blimanota Fole Lom bib ye klabutam bianeta futan olo dolaneta Failimone omfubanebiobe. Failimon ele inamin naminsa nakabe. E Kolosi bib ye bia bainobo galin nakaia unangai teniba e am ye mina binabibbiotabe. Fole futan olo dolanea Failimone omfubaseo mitmakam ole enaminobe. Failimone besa okok kehamin nakae niniino Onisimase Failimone inamin namin mako ayok doisa dletnea gilan monea Lom bib ye bianea Fole hetananea Fole Yesuse wengo omkeimabeo wentenea e bobol temo deskinanea Yesuse bainobo gene kesota Fole Onisimase imin dabanea unamabeta e Failimone tekein kemin wengo baabaneta Kobo Onisimase hengmino bobolo funino dokobkenoa deibanale ge baabaneta futano omanea dabane motemsebe.
1-3 Mikiktem wengobe.
4-7 Fole Failimone baabanea Keb kukubo ayamobo ge baabaseo wengobe.
8-22 Fole Onisimase wengo Failimone baabasebe.
23-25 Mubiang wengobe.
1
Ae Failimon kobo Fol neta keb futan olo dola omfubkenamabibe. Ne klabutam ele bianitabe. Niminbabe, ne Yesus Klaiste dowan wengo omkayebi o dafa ota ne klabuto getneib biotabe. Nib neke Timotie ne bekebne bianea daanebebe. Ni nek Failimon kobo keb okoko makob ni dab ni okoko ulabobe. Ni kla gobke biobobe. Ni dabo keb miine Akibas esa keb alelo Abia osa Yesus Klaiste bainobo galin nakaia unangai keb am tam minabib isa Klayam nabiobo ge baabenobobe. Abiao ni unang dikinobe. Eka Akibase okoko ni okoko ulab okok kebianea Yesus Klaiste dowan wengo nakaia unangai sbalma omkaye binabebe. Ni nib Aye God esa nib Sume Yesus Klaist esa baabenoba Ibo Failimon esa e meletan isa daabeniba bobol tem ayamo omkayemine ge baabenobobe.
Failimone Sume goba binebiobe.
4-5 Naka maki baaniba Failimone Yesus Sume gobanea bainobo genea e Yesuse bainobo galin naka unangi gobe biebo gesiba ne wentenia Gode gangobo genia keb bobolo amitie fumbiania Gode nganha biania God kobo Failimone daahamale ge ohabibe. Ne Gode imin baabania Failimone keb wengo nakaia unangai omkayemeo kobo inamin namin ayamo Yesus Klaiste ni omkayebeo alehabeba e kla tekein kemeko ge baabaiobe. Keb bobol temo ne omneneba eka Yesuse bainobo galin naka unang isa keb bobol temo omyeneba Gode wengo omkayebeba i bainobo galino sbal sam bianiba seimbib kesoa ne bobolo ayam fumbiania seinkebibe.
Fole Failimone baabanea Kobo Onisimase dab tlemin anale ge baabasebe.
8-10 Kobo nakaia unangai kukub ayamo omkayebeba ne seinkebi kesoa ne baabkenia Kobo Onisimas esa inabanale ge baabkenamabibe. E makob ne miinobe. Eka nele e ay dikinobe. Niminbabe, ne klabutam ele biania Yesus Klaiste wengo omkahabia e bainobo genebiobe. Hangkalebmin ne Yesus Klaiste wengo omkeimabi o dafa ota i ne klabuto getneibbiobe. Klaiste nemfakanea e titilo omnebio kesoa ne baabkenia Kobo Onisimase kukub ayam omkahamale ge baabkei mole olo ayam otane ne mo menganimibabe. Nib dabo bobol temo makob biob kesoa ne inamin kukubo deibonia weng fiab baabkenamabibe. 11 E niniino mitmakamo Ayam Okok Kemin Nakabe. Sino e keb okoko klayamo mo naim blim otane memalo e nib dab nib okok naka ayam anebe.
12-14 Ne Yesus Klaiste dowan wengo omkayebi o dafa ota klabutam blibe. Ne ele blio kobo mo daatnenamabebba otane ne keb okok nakae Onisimase kla goba blia e ele bianea keb alango dokonea ne daanemeko gabi otane ne kobo mo baabkeim blim kesoa ne e mo watanamabibabe. Ne naka ele gobania futan olo omania dabaia monea kebsu natlamabebe. Ne kobo mo baabkenita Onisimase dobneba daatneneko genimibabe. Kobo Ae genemeb Yeye genemebo kleb bobol temobe. 15 Onisimase kobo deibkenea wetou tlebuo ne mo tekein kebiba otane ne funania Gode kweimiki deibaia monea bib afet ye unanea Yesus Klaiste wengo wenteko geneta watanamino deibanea tlebu ese makobo ge funaiobe. Otane e amito mo nemebabe. E besa un te biebe. Memalo e Yesus Klaiste bainobo gene kesoa imin natlea dab keniba amit nomabiobe. 16 E nib Sume bainobo galin naka kesoa e ne ningobe. Ne e goba biania seinhabibe. Sino e okoko besa okok kemin naka otane memalo e Sume Yesus Klaiste bainobo gene kesoa e okoko besa okok kemin naka eka e keb ning na kesoa e natlameo kobo seinha bianeba kla gobanamabeobe.
17 Kobo funaneba Fole Klaiste okok naka makob ne ulabobo geneb mole ne natlia nemeb taneba keb am tam danamabeb inaneba Onisimase debeb tam danale! 18 E kukubo misiam nabianea inamin namino ayok doikenebio mole ne weng omfutnenebta neta inamin namino yang ke doklano! 19 Weng olo Fol neta dolaiobe. Ne dolania Neta yang ke doklano gei otane ne mo baanita Sino ne Yesuse kukubo alebkeia bainobo geneba afen smike doboneba amit namabeb yo yang kenale genimibabe. 20 Ae ne nek kobo Sume Yesus Klaiste bainobo galin naka kesoa daatnenale! Nib dabo Klaist emi kesoa kobo Onisimase imin natlea dab keniba ib bobol temo makob aib mole ne bobol ayam funania seinamabibe. 21 Ne wengo dola omfubkenamabi olo ne tekein kebibe, kobo ne wengo wenteneba inaneba inamin namin kukub ayamo afet osa omalamabeobe.
22 Kobo Onisimase kukub ayam omaneba gobanale! Eka ne weng mako baabkenamabio kebsa bainobo galin nakaia unangai keb am tam minabib isa ibo Gode nganha bianiba Fole klabuto tileisaneba tleko gabibo ne funania Gode ib wengo wentenea inanamabebo ge funai kesoa kobo biino mo deitnenabebte!
Weng mako klayam blibte ganamin wengobe.
23 Ebaflas esa Yesus Klaiste dowan wengo omkayebe o dafa ota klabuto gebaib biota e tena bianobta e Kobo klayam biebte ge baabkenebe. 24 Eka nakai ni dabwal okok biobi Mak esa Alistakas esa Dimas esa Luk esa i Kobo klayam biebte ge baabkeibobe. 25 Yesus Klaist Sume ibo daayemeko! Ne wengo bayotabe. Fol neta futan olo dola omfubkenamabibe.