1 बोग़ बूम पुटवस्केडाह मन्ह्‌तोग़, ओन माट मीक वेहतलाह आतोम. ओना लोप्पा माट केंजतोम, मावाङ कोंडाने ऊळतोम, बेस-नेह्‌ना ऊळिसि मावाङ कय्‍कने वने इटिस ऊळतोम.* 1:1 नावा साक्सि सेतेम मन्ह्‌ता इनजोर योहन इद्रम इतोग़. ओनाय मेटे देवुळि माक वळ्ह्‌किसि पिसमुळ ईस्ता. 2 बोग़ देवुळता पिसमुळ आंदोग़, ओन देवुळि मन्कल मारयिह कीस लोहताह्‌कु माट ओन ऊळतोम, अद पोल्‍लोता साक्सि माट ईयलाह आतोम. ओसो माट ओन पुनदनामुने ओग़ देवुळबाबाना संगे मतोग़, ओग़ अमेसाता पिसमुळ एवान मीक वेहतलाह आतोम. 3 देवुळबाबाना मग़ि येसु किर्स्तुन माट ऊळतोम, ओनाङ केंजतोम. मीट वने मावा संगे कलियिस मनदना इनजि ओना कबुरतुन मीक वेहतह्‌नोम. माट सबेटोरल ऐंगेन कलियिस मतल इतेके देवुळबाबाल ओसो येसु किर्स्तु वेरा संगे कलियिस मतप आस्ता. 4 मीट वने मावा संगे कलियिसि, माक पका गिर्दा वायि इनजोर मीकु इव पोल्‍लोन रासलाह आतन.

5 येसु किर्स्तुनग्डाह बेद पोल्‍लो केंजतोम, अदिन मीक वने वेहतलाह आतोम. अद इद्रम मन्ह्‌ता, देवुळि वेह्‌च लेह्‌का मन्ह्‌ता. तानगा मुर्तिय ईकळ इले. 6 अदिनेनाह्‌क माट देवुळता संगे कलियिस मह्‌नोम इनजोर वेहचि, ईकळते मतेक अचोन माटु जोल मन्कलोरल ओसो सेतेमते ताकवोरल आंदल. 7 मति देवुळि बेद्रम वेह्‌चते मन्ह्‌ता, अद्रमलेह्‌का माट वने ताना वेह्‌चते ताकतेके, ओर्विह्‌क-ओर्वोग़ कलियिस मह्‌नल. ओसो देवुळता मग़ि येसुना नेतुर मावा सबे पापमतुन एडिह कीस्ता.

8 मयगा बेदे पापम इले इनजोर इतेक अचोन, मयगा मुर्तिय सेतेम इले. माट कुदि नाळेम आय्ह्‌नल. 9 अदिनेनाह्‌क मावा पापमतुन मकिह केवालेवा देवुळता मुनेह कबुल आतेक अचोन अद मावा पापमतुन मापि कीस्ता. ओसो सबे लाग्वाङ कबस्कना पापमताहि माक एडिह कीस्ता. इद्रमलेह्‌का देवुळि तना वेहतप लेह्‌का कीसि तना सेतेम तोहतह्‌ता. 10 बोग़े मन्कल पापम केवोग़ इलेग़ इनजोर देवुळि इन्ह्‌ता. अदिह्‌क माट पापम केवोम इनजोर इतेक अचोन, देवुळतुन जोल कीय्ह्‌नल; ताना पोल्‍लोतुन मावा जीवातगा तासवल.