1 नना जीवा कीतोरिर! मीक रेंड सीटिङ लोहतन; इद नावा दुस्रा सीटि आंदु; मीवा विचर सेतेम पोल्‍लोनके मनि इनजोर सीता कीसीयलाह इव सीटिन लोहतन. 2 वेल्‍लाय मुने, देवुळता कबुरतोर तानेनाह्‌क एग़तोर ताना पोल्‍लो वेहतोर; किर्स्तुना बळयिर वने माक पिसिह केवाल मावा येसुसामि किर्स्तु ईतद उकुमतुन मीक वेहतोर. इद्रम मीट कग़यतव पोल्‍लोन सीता कीम्ह्‌टु इनजोर नना वेहतलाह आतन.

3 मुने मीट इद पोल्‍लोतुन पुनदना गावले: आक्रि दीयाने, आपुना लालुसते ताकवालोर वायनोर; ओर मीक माग़नुर ओसो, 4 इद्रम इनदनुर: “ओसो वने वायकन इनजोर किर्स्तु पोल्‍लो विळ्सिस अतोग़, बेगाडोग़? मावाङ तादोर-बाबोर वने डोलतोर! अस्केडाहि बाताले बद्‌लेम आयो! देवुळि बूमतुन पुटिह कीतस्के बेद्रम मता, अद्रमलेह्‌काने इंजेक वने मन्ह्‌ता,” इनदनुर. 5 ओर उंद पोल्‍लोतुन पुतोर, मति तान सीता केवोर; अद इद्रमि: सुरु मुने पोग़ोटा बूमि इंका देवुळि इतद पोल्‍लोते तयर आता. ताना पोल्‍लोतेन एताहि इळ्ता बूमि तयर आता; ओसो अगा निच मन्ह्‌ता. 6 अस्के मतद बूमतुन एतगान मुळ्हता ओसो बूळे कीता.✡3:6 पुटमुळि 7:11-12 7 मति इंजेक मनदनद पोग़ोटा बूमतुन ओसो इळ्ता बूमतुन किसते बूळे कीयलाहि तना इतद पोल्‍लोतेने तासता. तन्क पास्‍कवालोरिन नेयम कीसि, ओरिन बूळे कीयनद दिया एवनाह अदिन तासता.

8 नना जीवा कीतोरिर! उंद पोल्‍लोतुन मात्रम माग़्ङमाट: देवुळतुह्‌क उंद दिया अजर वर्साना लेह्‌कान ओसो अजर वर्साङ उंद दियाता लेह्‌कान मन्ह्‌ता. 9 सामि तना पोल्‍लो विळ्सिस मतदिन केवालेवा आल्सेम कीयलाह आता इनजोर उच्‍वुर मन्कलोर विचर कीस्तोर. मति अद्रम आयो; बोग़े बूळेम आयनद आयो इनजि देवुळता विचर मन्ह्‌ता, सबेटोर मन्कलोरिह्‌क पापमता अग़दाहि जर मलियलाह मोका दोर्कि इनजोर अद आपिस केपिह्‌ता.

10 मन्कलोरिह्‌क एर्का लेवस्के कले वायना लेह्‌कान, सामि ओसो वने वायनद दिया वायग़ा; अस्के पोग़ोटा बूमतगा मनदनव नेकनुङ ओसो मायनुङ; अगा मनदनव सबे कार्यिस बूळेम आयनुङ; इळ्ता बूमि ओसो तानगा मनदनव सबे कर्वनुङ. 11 इव सबे इद्रम लेह्‌का बूळेम आयना मन्ह्‌ता; अदिनेनाह्‌क मीवा ताकमुळि पवित्र मनदना गावले; अमेसा मीट देवुळता विचर मतप लेह्‌का कीयना गावले. 12 किर्स्तु ओसो वने वायलाह देवुळि निल्पिह कीतद दियातुन केपिस अद्रम पिसना गावले. अद दिया चट्‌पिट एवनाह पिसना गावले. अस्के पोग़ोटा बूमि किसते बूळेम आयनु; अगा मनदनव सबे दगडातुह्‌क कार्यनुङ. 13 मति देवुळि पोल्‍लो विळ्‍सतपु, पूना पोग़ोटा बूमि ओसो इळ्ता बूमि तयर आस्ता इनजोर माट अग़ ऊळिह्‌नल. अगा सबेटोर मन्कलोर तान्क विचर वायनदिने कीयनुर.

14 नना जीवा कीतोरिर! मीट इव पोल्‍लोङ आयनुङ इनजोर अग़ ऊळलाह आतिर; अग़ ऊळसोर, पापमता डागिल लेवा, कसुर लेवा मनजि, नावा संगे कलियिस मतोर इनजोर देवुळि इनाह पिससोर मन्ह्‌टु. 15 देवुळि मियेनाह्‌क आपिस केपिह्‌ता; इदिन पिसमुळ दोर्किह कीयलाह मीक अग़ ईता इनजोर समजेम आम्ह्‌टु. इदे पोल्‍लोतुनु माट जीवा कीतोग़, मावा तोळतोग़ विस्वसि पोलु, देवुळि ओन्क ईतद बुदते मीक रासतोग़. 16 तनाङ सबे सीटिने इदे पोल्‍लोतुन रासतोग़. ओनाङ सीटिने वळ्गा पोल्‍लोङ पुनदा पग़वाह मन्ह्‌ताङ. तेळियवोर, कमजोर विस्वसतोर अव पोल्‍लोना अर्तमतुन मिळ्हच मन्ज वेहतह्‌तोर. सास्त्रमताङ दुस्राङ पोल्‍लोन वने अद्रमलेह्‌काने मिळ्हच मन्ज वेहतह्‌तोर. इद्रम कीसि ओर तमाय जीवातुन बूळे कीस्तोर.

17 नना जीवा कीतोरिर! मीट इव पोल्‍लोन मुनेन पुतिर. अदिनेनाह्‌क मीवा विस्वसतुन राका कीम्ह्‌टु. अद्रम केवेके मीट इंजेके मतप मेग़्किस मनदनदिन विळ्सिस, देवुळताङ अडोन पास्‍कवालोरा नाळेमते एग़्किसि, लेसकिर बहा. 18 अद्रम लेसवा, मावा सामि माक पिसिह केवाल येसु किर्स्तुना देय्वातुन पका पुंजोर अन्ह्‌टु. ओन बेस पुनजोर अन्ह्‌टु. इंजेक वने ओसो अमेसा-अमेसातुह्‌क वने ओने मन्कलोर मान ईसि मोळ्किर! आमेन.