5
मुक्यालोरिह्क, लेयोरिह्कु बुदिङ-एदिङ
1 इंजेके येसुना मुडगा मनवालोर मीक मुक्यालोरिह्क उंद पोल्लो. नना इंका मुक्यानन, येसु किर्स्तुना तिपलतुनु कोंडामेंड ऊळतोनन, ओसो ओग़ु मल्स वायह्पा ओना कदरते, डीसाते कलियवानन आंदन. 2 नना मीक वेहतह्नन, मीवा नडुम मनदनदु देवुळता गोह्डटुन कोपालोरा लेह्का मनजि ओरिन बेस ऊळाटु. इद कबळ सारातुह्क इनजोर केवा, देवुळता विचर इहे मन्ह्ता इनजि गिर्दाते कीम्ह्टु. मालसोम दोर्कग़ा इनजि आयो, मति देवुळतुन सेवा कीय्ह्नन इनजि जीवातुन गडिह कीसि गिर्दाते कीम्ह्टु. 3 मियगा ऊळेवळे कीयलाह देवुळि ईतोर लोकुरा पोग़ोन पका कळकते मनवा, ओरिह्क अग़ तोहवानलेह्का मन्ह्टु. 4 इद्रम मतिर इतेके सबेटोरा बेह्रा कोपाल येसु वानेके, मीकु बेस्केने मायवदु, बूळेम आयवदु डीसाता पाय्दा दोर्कग़ा.
5 इहलेह्का मीटवने लेयोरिर, बेरोरा पोल्लोते वग़्ङिस मन्ह्टु. ओसो मीटु सबे विस्वसि लोकुरिर बुदते उड्ला आसि, ओर्विह्क-ओर्वोग़ साय्ता आम्ह्टु. बाराह्क इतेके पवित्र सास्त्रम वने इहे इन्ह्ता:
“नना बेरोनन!” इनवानु देवुळि अडम मन्ह्ता,
मति “नना उड्लोनन!” इनवाह्कु देवुळि देय्वा ईस्ता. ✡5:5 बुदताङ पोल्लोङ 3:34
इद पोल्लो मीट सीताते तासाटु.
6 अदिनेनाह्कु मीटु बेरा लावता देवुळता मुनेह माट उड्लोरोम इनजि ताकतिर इतेके, ओप्पनद कगोते देवुळि मीक बेरा कीयग़ा. 7 देवुळिये मीकु सीता कीस्ता इनजोर मीवा कतम आल्सुळतुन ताना कयदे विळ्सिसीम्ह्टु.
पट ऊळना मोका
8 उसर आम्ह्टु, रो! सीताते मन्ह्टु! मीवा अडम मनदनद देयह्कना मुक्याल कह्चनद सिङपुललेह्का बोन पोसि पिळ्ह्पळ्ह कीस तिनदकन, इनजोरे तिरियिह्ता. 9 मति मीट विस्वसते निच मनजि ताना अडम मन्ह्टु. दुनियामेंड मनवालोर विस्वसिर इद्रमताये तिपलते मन्ह्तोर, इनजि मीट सीता कीम्ह्टु.
10 माक कतम देय्वाङ ईयनद देवुळि येसु किर्स्तुना संगे, मीकु बेस्केन मायवदु डीसाते कलियलाह केयता. इद रेंड दियाना जीवाते मीटु गय्क तिपल आतापया, देवुळ मीकु ओसोवने बेस कीसि तासग़ा. अद मीवा विस्वसतुन मेग़्किह कीसि, मीक लाव ईसि, निल्पिह कीयग़ा. 11 देवुळि अमेसा अमेसात्कु राजेम कीयि! अहे आयि!
आक्रिता जोहर
12 नना मीकु इद उड्ला सीटि नाक तमोग़लेह्का मनवाल, कर्तुळ विस्वसि सिल्वनि, वेना साय्ताते रासिस लोहतह्नन. मीकु बाताले आयि, देवुळता देय्वा मियगा अमेसा तोळ मन्ह्ता इनजि, मीकु तेळियिह कीयलाहि, ओसो पेग़्के-मुनेह आलिह केवा, मीट विस्वसतुन पोस मन्ह्टु, इनजि बुद वेहतलाह नना इद सीटि रासतन.
13 मीवा लेह्का बेबिलोनते मनवालोर विस्वसिर “मीवा सीता कीय्ह्नोम,” इन्ह्तोर.*5:13 अद कालमते वेल्लाटोरे लोकुर रोम सहरतुन पेदिर पोयतलाह रेयिसि, तान बेबिलोन इनजोर इंदुर. मार्कल इंका नावा पेकानलेह्का मन्ह्तोग़, ओग़वने “मीवा सीता कीय्ह्नन,” इन्ह्तोग़. 14 मीट लोकुरिर ओर्विह्क-ओर्वोग़ जीवा वाटसोरे जोहर कीम्ह्टु. येसुसामिना लोकुरिर सबेटोरिर बेस पिसाटु.