किर्स्तुना बळयि पोलु तिमोतिह्क रासतदु मुनेता सीटि
इद सीटटुन रासवाल किर्स्तुना बळयि पोलु आंदोग़. पोलु इद सीटटुन तिमोति इनवाल लेयोनेनाह्क रासिह्तोग़. वेग़ तिमोतिना तपे युनानि जाततोग़ मतोग़, ओना तलोग़ बार यहुदि जातता मता. वेग़ तिमोतिना नाटे पोलु तना सेवातुह्क वातस्के, इर्वुरा कलियमुळ आता (बळयिर 16:1-3 ऊळाट). ताना पया पोलुना सेवाते तोळ आंदोग़. पया पोलु तिमोतिन इपिसुसतोर विस्वसिरा मुडुन ताकिह कीयलाह तासतोग़.
पोलु इद सीटटुन बाराह्क रासतोग़ इतेके, इपिसुस सहरता विस्वसिरा मुडा नडुम जोल काग़्हवालोर मतोर, ओरा लोप्पा बेद्रम उसर मनदना, येसुना सेवा बेद्रम कीयना इनजोर पोलु तिमोतिन वेहतह्तोग़. ओसो विस्वसिरा मुडगा आस्क-कोय्तोर बेद्रम मनदना, मुक्यालोर ओसो सेवा केवालोर बेद्रमतोर मनदना, रांडे आस्कना बेद्रम तोळ ईयना इनजोर वेहतह्तोग़. अहे ओसो किर्स्तुनाङ पोल्लोन विस्वसिरिह्क बेस-नेह्ना काग़्हतलाह पोलु इद सीटटगा तिमोतिन वेहतह्तोग़.
1
तिमोतिह्क पोलुना जोहर
1 नना पोलुनन इद सीटि रासवानन. माक पिसिह कीतद देवुळि, ओसो माक आसा एवाल येसु किर्स्तु, वेर इर्वुर नाकु येसु किर्स्तुनाबळयि आयना इनजि तासतोर. 2 तिमोति, नीके नना इद सीटि रासिह्नन. विस्वसताङ पोल्लोन निमा नयग्डाहि कग़यसोर वातिन इनजि निमा नावाये मग़िना लेह्काडोनिन. मावा देवुळबाबाल ओसो मावा येसुसामि किर्स्तु नीकु देय्वा ईयिर, गूनम तोहिर, अह आसि निमा सुकमते पिसा.
जोलताङ काग़्हवालोरिन रोमिह कीयनदु
3-4 इंजेके इपिसुस सहरते उय्तुर लोकुर जोलताङ काग़्हवालोर मन्ह्तोर. ओरु जोला-जमाताङ लेकाङ-जोकाङ कीसि लाट-लाट सास्त्रह्क पुटिह कीस वेहतह्तोर. अवटे जग्ळा-बोबाये पुटिह्ता. मति विस्वस कीतेकेने देवुळताङ विचर्कु करल आयनुङ. अदिनेनाह्कु इपिसुस सहरताहिमकिदुनिया पटटके दायलाह पेसतन अस्के “तिमोति, निमा इगाने मनजि वेर जोलताङ काग़्हवालोरिन रोमिह कीम,” इनजोर नीक वेहच मतन. 5 ओरिन बाराह्कु रोमिह कीयलाह वेहतन इतेके अगा विस्वसिर जग्ळा-बोबा केवालेवा गूनमते मनदना गावले. गूनमते मनदना इनजि बेसताङ विचर्कु, नेह्ना-लाग्वा पुनजि ताकनद बुदि, ओसो देवुळतगा सेतेमता विस्वस मनदना गावले. 6 इविन विळ्सिसि ओर जोलताङ काग़्हवालोर उगसता वळ्ह्कमुळतके मिळ्न्दतोर. 7 ओरु मोसानाङ अडोङ काग़्हवालोर गूरुर आयलाह ऊळिह्तोर. मति ओर पका पुतोरा लेह्का वळ्ह्कतेकाय, ओर बाताङ काग़्हतह्तोर, इद ओरिह्के तेळियो.
8 मोसानाङ अडोङ बेसे मन्ह्ताङ इनजोर माट पुह्नल, मति अविस्किन बराबर काग़्हतना गावले. 9-10 इद पोल्लो माक एर्का मन्ह्ता इतेके, सेतेम मन्कलोरेनाह्क काय्दा तासोर, मति काय्दातुन माळवोरु, कैंगम आयवालोरु, देवुळतुन नमवोरु, पाप्यहलोरु, देवुळतके सीता केवोरु, देवुळतुन मान एवोरु, तलोग़-तपेन हव्कवालोरु, मन्कन हव्केर, सिंड्रि-साट्याल आयवालोरु, आंचाळ-कोय्तोग़ आतपु कोय्तोग़ कोय्तोना संगे मनवालोरु, मन्कन कलिस वमवालोरु, जोलहालोरु, जोल साक्सि एवालोरु, ओसो बोराय सेतेम काग़्हमुळतुन माळवोरु, वेरा इद्रमतोरेनाह्के काय्दा तासिह्तोर. 11 इद सेतेम काग़्हमुळ इतेके मावा कूब असलता, डीसाता देवुळि, ताना बेसता कबुर आंदु. इद बेसता कबुर दुस्रोरिन वेहतलाहि देवुळ नाकु निल्पिह कीता.
पोलु देवुळता बेरा देय्वाता लोप्पा वेहतह्तोग़
12 “नीवा पोग़ोन नना बर्वस तास पग़यकन,” इनजि मावा येसुसामि किर्स्तु तना बेसता कबुर वेहतनद सेवातेनाह्क नाक निल्पिह कीतोग़, अद सेवा कीयलाह लाववने ईतोग़. अदिह्क “निमा बेचोनु गूनम तोहवानिन सामि!” इनजि ओन इह्नन. 13 ननान कोनि मुने येसुन उस्किस-पास्किस वळ्ह्कतोनन, येसुनोरिनु तिपल कीतोनन, पका मोर्दोप मन्कनन मतन. तेला मति “पुनवालेवा ओग़ इद्रमताङ कबस्क कीस्तोग़, इंकातेला ओग़ नाक नमोग़,” इनजि येसुसामि नाक दया कीतोग़. 14 ओसो बल्क अरतपु ओग़ नाक देय्वा ईतोग़, अह आसि इंजेक नावा ओनगा विस्वस मन्ह्ता, ओनग्डाहि जीवा कीयनद बुद वाता. 15 इदिन बह सीता कीम: पापि लोकुरिन पिसिह कीयलाहि येसु किर्स्तु इद बूमते वास मतोग़. इद पोल्लो सेतेमताये, इदिन माट पेग़्के-मुने आयवा नम पग़यह्नल. पापि लोकुरग्डाहि ननान कोनि मुक्यानन आंदन. 16 मति अदिनेनाह्के येसुसामि नाक दया कीतोग़. नना पापि लोकुरग्डाह मुक्यानन मन्ज तेला, नावा पापमताहि नना मल्स वायलाह, येसु किर्स्तु वेल्लाजोमताह केपसोर मतोग़. पया नयिद्रमता पापि लोकुरिन इंका येसुसामि मापि कीस्तोग़, तान ऊळिसि दुस्रोरवने ओन नमलाह आयनुर. नमिसि ओरिह्क ओना संगे अमेसाता पिसमुळ दोर्कसोर दायग़ा, इद्रम येसुसामिना विचर मता. अदिनेनाह्क नाक इंका ओग़ गूनम तोहतोग़. 17 अदिह्कु मावा अमेसा मनवाल, बेस्केन मायवोग़ु, मन्कह्क दिसवोग़ु देवुळराजाल, ओग़े सेतेम देवुळ इनजोरे अमेसा-अमेसातुह्क मान आयि, जोहर आयि. अहे आयि.
तिमोतिना जबब्दरि
18 इंजेके तिमोति नावा पेकानिन, पोग़ोन रासतद बेद जबब्दर नीक ईतन, अद पूना पोल्लो आयो. इतेके मुने देवुळता कबुरतोर नीवा लोप्पा बाताङ-बाताङ वेहतोर, अहलेह्काने नना नीकु इव पोल्लोङ वेहतह्नन. इव पोल्लोनु सीता कीतेके, निमा जोल काग़्हमुळतुनु विरुद कीसोर मनदा पग़यकिन. 19 येसुनगा कीतद विस्वसतुन विळ्सवा, नेह्ना-लाग्वा पुनजि ताकनद बुदतुन पोसि, निमा वेहचोर अन. इद्रमता बुदतुन विळ्सिसि, उय्तुर लोकुर तमा विस्वसतुन मुळ्ह्चीतुर. 20 ओरा नडुमि अगा उमनेयल, सिकंदर, वेर ईवुर मन्कलोर मन्ह्तोर. ओरु किर्स्तुना मुडुन कलियना आयो इनजोरे, नना ओरिनु गळ्किह्कु पेहचीतन. देयह्कना मुक्याल ओरिन बह कीयना, कीयि, अस्के देवुळतुन उस्किस-पास्किस वळ्ह्कनदायो इनजि ओरिह्क बुद वायग़ा.