1 इह केंजा, नीक नना वेहतह्‌नन. सबेटोरेनाह्‌क पार्तना कीयना, सबेटोर पापमताहि पिसना इनजि देवुळतुन ताल्ह्‌कना, देवुळ माक बेस ऊळता इनजि जोहर कीयना, इद मोदुल पोल्‍लो आंदु, इदिन निमा काग़्हतना गावले. 2 राजालोर ओसो अदिकरते मनवालोर सबेटोर बेसता बुदते राजेमतुन काळ्ङना इनजि ओरेनाह्‌क वने पार्तना कीयना गावले. अस्के माट रेयलेवा देवुळ वेहतव अडोने तिरिय पग़यकल, दुस्रोरिह्‌क विचर वानाह ताक पग़यकल, अह आसि मावा मनमुळ सुकमते दायग़ा. 3-4 कतमतोरे देवुळता सेतेम पोल्‍लोतुन पुनजि, पापमताहि पिसलाह तनेके मिळ्न्दना इनजि देवुळता विचर मन्ह्‌ता. अदिह्‌कु इद्रमलेह्‌का पार्तना कीयनद माक पिसिह कीयनद देवुळतुह्‌कु बेस विचर वास्ता.

5 उंदिय देवुळ मन्ह्‌ता, ओसो मन्कलोरिन देवुळतगा कलियिह केवाल वग़ोग़े मन्कल मन्ह्‌तोग़, इतेके येसु किर्स्तु. 6 माट पापमते दोहतप मतल, मति वेग़ तना जीवाता कर्सा कीसि माक विळ्सिह कीतोग़. अदिनेनाह्‌क कतमतोर पापमताहि पिसना इनजि देवुळता विचर मन्ह्‌ता. इद पोल्‍लो सबे लोकुरिन पुन्पिह कीयनद कगो इंजेक एवता. 7 अदिनेनाह्‌क इद सेतेम पोल्‍लोतुनु यहुदि आयवोर वने नमना इनजि “निमा ओरेके अनजि वेहवाल-काग़्हवाल नावा बळयिनिन आयकिन,” इह इनजोरे देवुळ नाक लोहता; नना जोल वळ्ह्‌कोन, सेतेमे वेहतह्‌नन.

8 पया बेगा-बेगा मावोर विस्वसिर मोळ्कलाह कलियिह्‌तोर, मोळ्कनस्के कोय्तोर ओङ आयवा, वह्‌चळ आयवा, सेतेमता जीवाते, कय्किन तेहचि देवुळता संगे वळ्ह्‌कना इनजि नावा विचर मन्ह्‌ता. 9 अद्रमलेह्‌का आस्क बारा “नना मलियकन,” इनजि गेंदेङ उहतनद आयो, सिंड्रिङ-पोह्‌ळेस्कना लेह्‌का उहतनद आयो. केल्किन एन्‍डिसि सोनो-कूराङ, मोतिङ केग़यना ओसो मिळ्स्कनव गेंदेङ उहतना इद्रमता सोबाता पोमाडेङ केमाकिङ. 10 अद्रम मलियवा, “माट देवुळतुन नमिस ताकवालोरोम,” इनजि अवु नेह्‌नाङ कबस्क कीयनदु. इद्रमतेने अविस्किह्‌क सोबा आयग़ा. 11 मीट मोळ्कलाह जमा आय्ह्‌निर अस्के, बोग़ाय देवुळता पोल्‍लो काग़्हतनस्के, आस्कु पूरा वग़्ङिसि, केमेन मनजि कग़यिङ. 12 “मीटु कोय्तोरिन काग़्हमाटु, ओरा पोग़ोन अदिकर ताकिह केमाटु. कोय्तोर देवुळता पोल्‍लो काग़्हतनस्के, मीट केमेन उदिसि केंजाटु,” इनजि नना आस्किन वेहतह्‌नन. 13 नना इद बाराह्‌कु वेहतह्‌नन इतेके आदमिन देवुळ मुने पंडटा, अवान बारा पया पंडटा.*2:13 पुटमुळि 2:18-23 ऊळाट. 14 ओसो आदम कोनि नाळेम आयोग़, आंचाळ बारा नाळेम आसि कसुरतद आता.†2:14 पुटमुळि 3:6 ऊळाट. 15 मति आस्कु कुदताङ विचर्किन आव्रे कीसि, येसुसामिन नमसोरे, दुस्रोरिन गूनम तोहचोरे, देवुळतुन रेयिस ताकसोर मतुङ इतेके अविस्किह्‌क देवुळता पिसमुळ दोर्कग़ा. तमाङ पिलाङ-पेकोरिन बेस आयह्‌पा मुनेता आंचाह्‌क ईतद नोपता सरप दल्गतेक तेला,‡2:15 पुटमुळि 3:16 ऊळाट. अवु तमा विस्वसतेनाह्‌क पिसनुङ.