1 बोराय विस्वसिरा मुडगा “मुक्यानन आयकन,” इनजोर ऊळिह्‌तोर, ओरा विचर बेसतलिये, इद पोल्‍लो सेतेमताये. 2 बेद्रमतोग़ मुक्यान निल्पिह कीयना इतेके, ओनगा कसुर दिसवप मनवाल, दुस्राङ बेविस्कनके लालुस केवा उंदिय आंचान पोस काळ्ङवाल, बेस बुदते तिरियवाल, तनाङ विचर्किन आव्रे कीस ताकवाल, सबेटोरिह्‌क विचर वानाह ताकवाल, बोरे आयि ओना लोन वातेके ओरिन बेस ऊळवाल, देवुळता पोल्‍लो बेस काग़्हवाल, इद्रमलेह्‌का मनदना गावले. 3 ओग़ कल लोटि मनदनद आयो, नल्ह्‌तना-कोह्‌कना केवाल मनदना आयो, वह्‌चळ केवाल मनदना आयो मति गूनमते वळ्ह्‌कवाल मनदना, ओसो कोताना लालुस मनदनद आयो. 4 मुक्यानाङ पिलाङ-पेकोर इतेके ओना पोल्‍लोते वरेम आसि, ओन पूरा कदर ईसि ताकना, इद्रमलेह्‌का ओग़ु तना लोतोरिन बेस तिर्हतना गावले. 5 (तनाय लोतोरिन ओन्क तिर्हतलाह वायो इतेके, देवुळता लोकुरिन ओग़ बह तिर्हता पग़यनोग़?) 6 ओग़ु वेल्‍लाजोम येसुसामिन नमिस ताकवाल मनदना गावले. पूना-पूना विस्वसते वातोनु मुक्याल तासमा, तासतेके “नना सबेटोरिह्‌काय नेह्‌ना मन्कनन इनजि, ओर नाक मुक्याल आयलाह तासतोर,” इद्रम इनजोरे ओग़ पोमाडेङ आयनोग़ बहे. अस्के देयह्‌कना मुक्याह्‌क ईतद सिक्सा इद्रमतोन्कु वने दोर्कग़ा, बह इतेके अद वने “नना बेरोनन,” इनजि देवुळताहि एग़ता. 7 येसुन नमवोर वने ओग़ कर्तुळ मन्कल इनजि ऊळनुर, इद्रमलेह्‌का मुक्याल ताकना गावले. अद्रम ताकवेके ओना लजा दायग़ा, अस्के ओनाङ बोरे केंजोर आयनुर. इद्रम आयना इनजि देयह्‌कना मुक्याल ऊळसोर मन्ह्‌ता.

8 अद्रमलेह्‌का विस्वसिरा मुडगा सेवा केवालोरिन वने तासनदु. बेद्रमतोर सेवा केवालोरिन निल्पिह कीयना इतेके, नाटेनोर ओरिन कदर एवालोर मनदना गावले. ओरु कल लोटिर मनदनद आयो, नाळेह कीस तिनवालोर मनदनद आयो. ओसो ओरगा रेंड वेंजेह्‌कना बुद मनदनद आयो. 9 ओरु किर्स्तुना लोप्पा देवुळ पुन्पिह कीतव पोल्‍लोन पोसि नमसोरे, जीवाताहि सेतेमते ताकना गावले. 10 मुक्यालोरा लेह्‌का, सेवा केवालोरिन वने मुने पर्ह्‌किस ऊळना गावले. पया ओरगा बाताले तप दोर्कवेकेने, ओर विस्वसिरा मुडगा सेवा केवालोर आयिर. 11 अद्रमलेह्‌का सेवा कीयनवु*3:11 “सेवा कीयनवु” इलवेके “ओराङ मुतेस्कु” नाटेनोर कदर ईयनव मनदना, कूदिङ केववु, बेस बुदते तिरियनवु, सबे पोल्‍लोने सेतेमते मनदना गावले.

12 सेवा केवालोर इतेके दुस्राङ बेविस्कनके लालुस केवा उंदिय आंचान पोस काळ्ङवालोर, तमाङ पिलाङ-पेकोरिनु, तमाङ लोह्‌कने मनवालोरिन बेस ताकिह केवालोर आयिर. 13 विस्वसिरा मुडगा बोर बेस-नेह्‌ना सेवा कीस्तोर, ओरा पेदिर पेसग़ा, किर्स्तु येसुनगा ओरा विस्वस पका आयग़ा.

14-15 इंजेके नियके चट्पिट वायकन इनजि नावा आसा मन्ह्‌ता. मति बहाय आसि आल्सेम आतेक बारा, इद सीटि नीक रासिसीय्ह्‌नन. देवुळता लोकुर बेद्रम ताकना, तेन निमा पुनदना इनजि इव पोल्‍लोङ नीक वेहतह्‌नन. देवुळता लोकुर बोर इतेके किर्स्तुन नमवालोर जीवात मनदनद देवुळता मुलु. बेद्रमलेह्‌का रायिना, जोताना आदरते लोन नितह्‌ता, अद्रमलेह्‌काने विस्वसिरा मुल बेगा बेस ताकिह्‌तोर, अगा देवुळता सेतेम पोल्‍लो नितह्‌ता.

16 ओसो किर्स्तुना लोप्पा देवुळ पङ्ने कीतव पोल्‍लोङ पका असलताङ मन्ह्‌ताङ, इद करलिये.