1 केंजाट! मावा मेंदुलि इद बूमतगा माट मनदनद गुळ्सेलेह्‌काडा मन्ह्‌ता. गुळ्सेतुन मुटिह कीयना लेह्‌कान मावा मेंदुल वने बूळेम आयग़ा, मति अद्रम आतेक वने, माक मनदलाहि कयदे पंडवद, अमेसा मनदनद, पूना लोन देवुळि ईयग़ा इनजि माट पुतल. अद दिसवद लोन देवुळता जागातगा मन्ह्‌ता.*5:1देवुळ ईयनद लोन इतेके, माट डोलतापया देवुळि माक ईयनद पूना मेंदुलि. 2 माट इद मेंदुलते मनदह्‌पा, पूना गेंदे उहपिह कीयना लेह्‌कान, देवुळि पोग़ोटा तना जागाता पूना मेंदुलतुन माक बेस्के उहपिह कीस्‍ता इनजोर ऊल्गिह्‌नल.†5:2किर्स्तु ओसो वने वातस्के, इद बूमते जीवात मनदनद मेंदुलि चट्‌ने बद्‌लेम आसि, पोग़ोटा मेंदुलतुन केग़नाह आयग़ा इनजोर पोलुह्‌क विचर वायलाह आता. 3 देवुळि माक तान उहपिह कीतस्के, मेंदुललेवा वेट जीवा आस मनवल. 4 इद मेंदुलते मनदह्‌पा माट मोताते मनजि ऊल्गिह्‌नल, इतेके डोलतस्के इद मेंदुलतुन विळ्सिस दाकल इनजोर ऊल्गवल. मति इद मेंदुलता बद्ला पोग़ोटा पूना मेंदुल दोर्कि इनजोर ऊल्गलाह आतल. अस्के हामुरतुन पिसमुळ गेल्सता इतप लेह्‌का आस्ता. 5 इद पोल्‍लोतेनाह्‌क माक तयर कीतद देवुळिये. अदे इसबते इसर (गह्‌ना) ईतप लेह्‌कान तना जीवातुन माक मुनेन ईता.

6 अदिनेनाह्‌क माट दीरा पोयसोर मह्‌नोम. ओसो इद बूमता मेंदुलते मनाह्‌कु, माट सामि मनदनगा मनदा पग़वल इनजोर पुह्‌नल. 7 (बह इतेके ऊळनव पोल्‍लोना इसबते माट पिसवल, मति विस्वस कीयनव ऊळवव पोल्‍लोनाये इसबते पिसिह्‌नल.) 8 अदिनेनाह्‌क दीरा पोस मह्‌नोमे, मति इद मेंदुलतुन विळ्सिसि पोग़ोन किर्स्तुनगा मनदनदिन पका विचर कीय्ह्‌नोम, इद मेंदुलते मनदनदिन आयो! 9 अदिनेनाह्‌क माट इद मेंदुलते मतेकाय, मनवेकाय, सामिह्‌क विचर वानाह पिसना इनजोर ऊळिह्‌नोम.‡5:9इद वचनता अर्तम इद्रम वने आया पग़यह्‌ता: सामि ओसो वने वातस्के, माट जीवात मतेकाय, डोलिस मतेकाय, ओन्क विचर वानाह पिसना इनजोर ऊळिह्‌नोम. 10 बाराह्‌क इतेके, किर्स्तु नेयम कीयनद जागाता मुनेह माट सबेटोरल नितना मन्ह्‌ता. इद बूमतगा मनदह्‌पा माट कीतव कबस्क बेसताङ आयि, लाग्वव आयि, अविस्‍कना इसबते माक ओर्विह्‌क-ओर्विह्‌क ओग़ बर्कत ईयनोग़ इलवेके सिक्सा ईयनोग़.

11 अदिनेनाह्‌क सामिह्‌क रेयिस पिसनदिन पुतोम. पुताह्‌कु “मावा पोल्‍लोतुन विस्वस कीम्ह्‌टु” इनजोर मन्कलोरिन तेळियिह कीय्ह्‌नोम. मावाङ विचर्क देवुळतुह्‌क पोळ्क्ने दिसिह्‌ताङ! मीवा जीवातुह्‌क वने मावाङ विचर्क पोळ्क्ने दिसिस मनदनुङ इनजि नना आसा कीतन. 12 माट बेसतोरोम इनजोर ओसो उंद मल्का तोहतलाह इद पोल्‍लो इनोम. मति उच्‍वुर मन्कलोर मन्ह्‌तोर, ओर उगस मन्कलोरिह्‌क दिसनव पोल्‍लोना इसबतेने वळ्ह्‌किह्‌तोर. मति तमा जीवालोप्पाडा पोल्‍लोतुन सीता केवोर, अद्रमतोर मन्कलोरा मुनेह मावा लोप्‍पा मीट पोंगलाह मीक अग़ ईयलाह आतोम. 13 उच्‍वुर मन्कलोर माक ऊळिस पिसाङ आतोर इनजोर इतेके, देवुळतेनाह्‌क अद्रमलेह्‌काने मनि. उच्‍वुर माक बेस बुदतोर इनजोर इतेके, मीवा पाय्दातेनाह्‌क अद्रमलेह्‌काने मनि. 14 माट बह मतेकाय किर्स्तु माक जीवा कीतोग़, अदे पोल्‍लो माक पूरा ताकिह कीस्ता. अदिह्‌क इद्रम विचर कीतोम: ओग़ वग़ोग़ सबेटोर मन्कलोरा जागाते डोलिस मतोग़. अदिह्‌क ओना हामुरते माट सबेटोरल कलियतल, ओना संगे हातप आतल. 15 बेद्रम इतेके पूना पिसमुळ दोर्किह कीतोर मन्कलोर इंजेटाहि तमेनाह्‌क पिसमाकिर. मति किर्स्तु डोलिसि ओसो वने जीवा अरतोग़, ओनेनाह्‌क पिसिर इनजोर ओग़ सबेटोरेनाह्‌क डोलिस मतोग़.

16 अदिनेनाह्‌क इंजेटाहि मुनेह बोने माट मन्कना विचर मतपु ऊळनद आयो, इद्रम मुने माट किर्स्तुन वने मन्कना विचर मतपु ऊळिस मतोम. मति इंजेके ओन माट अद्रम ऊळोम. 17 बह इतेके इंजेके बोर-बोर किर्स्तुना संगे जोळेम आतोर, ओर पूना मन्कलोर आतोर. ओरगा मतव पाळ्नाङ पोल्‍लोङ मायताङ. इंजेके ओरा पूरा पिसमुळ पूना आता. 18 इव सबे पोल्‍लोङ देवुळताहि वाताङ. किर्स्तुना हामुरता मेटे अद माक तना संगे कलियिह कीता, ओसो मन्कलोरिन तना संगे कलियिह कीयनद सेवातुन माक ईता. 19 अद इद्रमि: देवुळि पूरा बूमतोर मन्कलोरा पापमता इसब तासवा, ओरिन किर्स्तुना हामुरता मेटे तना संगे कलियिह कीता. कलियिह कीयनद कबुरतुन मन्कलोरगा ओयलाह माक निल्पिह कीता.

20 अदिनेनाह्‌क माट किर्स्तुनेनाह्‌क वळ्ह्‌कवालोर मन्कलोरोम आतोम. देवुळि माक मियगा लोहचि अर्ज कीयना लेह्‌का आता. अदिनेनाह्‌क माट किर्स्तुनेनाह मीक अर्जि कीय्ह्‌नोम, देवुळता संगे गूनम आम्ह्‌टु. 21 किर्स्तु पापमलेवा मतोग़. मतेक तेला माट ओना संगे जोळेम आसि देवुळता मुनेह सेतेमतोर आयना इनजोर देवुळि, मावा पापमतुन ओना पोग़ोन वाटिसि, मावा बद्‌ला ओन्क सिक्सा ईता.