Hill Madia 2 कुरिंततोर 6

माक जीवा कीम्ह्‌टु इन्जि पोलुना अर्जि

1 माट देवुळता संगे कबळ कीय्ह्‌नोम, अदिनेनाह्‌क मीक अर्जि कीस वेहतह्‌नोम.✡ मीट देवुळता दयातुन दोर्किह कीतिर, ताना लेह्‌कान पिसाट. तान सीता केवालेवा मनमाट.✡ 2 देवुळता सास्त्रमतगा अद तना वेहतद पोल्‍लो इद्रम रासतद मन्ह्‌ता:

“ओप्पनद कगोते नना मीवाङ केंजतन,

मीक पिसिह कीयनद दियाते, नना साय्ता कीयलाह वातन,”✡

इनजोर इता, इदिन सीता कीम्ह्‌टु. नना मीक वेहतलाह आतन, देवुळता ओप्पनद कगो इदे आंदु. अद पिसिह कीयनद दिया इदे आंदु.

3 मावा सेवातुन बोरे पास्कनद आयो इन्जि, बेदे पोल्‍लोते, दुस्रोरिह्‌क एग़्कुळ आयमाकि इनजोर पिसिह्‌नोम.✡ 4 मति सबे पोल्‍लोने, माट देवुळता सेवातोरोम इनजोर तोहतह्‌नोम.✡ रीतरीतिनाङ तिपल्कने, दोकाने, कंडिसतनमते, दीरा पोस मह्‌नोम.✡ 5 मन्कलोर माक नल्हतह्‌तोर, जेलते वाटिह्‌तोर,✡ लोकुरिन जमा कीसि, मावा विरुद रोदा पोयह्‌तोर,✡ बागिस-दोगिस कह्‌टेम कीय्ह्‌नोम, उस्कंडलेवा मह्‌नोम, कग़्वते मह्‌नोम✡. 6 इद्रम मन्जाय मति, माट कसुरलेवा पिससोरे, देवुळता बुदतुन पुनजोरे,✡ बेदे पोल्‍लोते मुयोग़ आयवा, दुस्रोरिन गूनम तोहचोरे,✡ ओरिन जीवाताहि जीवा कीसोरे,✡देवुळता जीवा वेहतप ताकसोरे,✡ 7 सेतेम पोल्‍लोतुन पोकुर कीसोरे,✡ देवुळता लाव माक ताकिह कीतप ताकसोरे,✡ ईनाह-आनाह विरुद वातेक तेला, देवुळ माक ईतद सेतेमि मावा कयदे तल्वरलेह्‌काडा, अहे माक राका कीयनद वने मन्ह्‌ता.✡ 8 दुस्रोर माक मान ईतेकाय, पास्कतेकाय,✡ माक लागोर इतेकाय, बेसतोर इतेकाय✡; उच्वुर माक नाळेह केवालोर इतेकाय, माट सेतेमतेन ताकिह्‌नोम.✡ 9 उच्वुर माक अदिकरलेवोर इन्ह्‌तोर, वेल्‍लाटोर बार माक किर्स्तुनाङ बळयिर इन्जि, बेस पुन्ह्‌तोर. डोललाह आतोर इनजोर, मन्कलोर माक इन्ह्‌तोर,✡ मति इदु! माट जीवातेन मह्‌नोम.✡ देवुळि माक सुद्रे कीसोर मन्ह्‌ताये, मति मावा जीवातुन ओयो. 10 दुकम आतेक तेला, बेस गिर्दा आस मह्‌नोम.✡ माट कोताङलेवोरोम मह्‌नोम, मति वेल्‍लाटोर मन्कलोर देवुळता बेरा बर्कततुन दोर्किह कीयनाह कीय्ह्‌नोम.✡ मयगा बाताले इलवेक तेला, किर्स्तुनग्डाह दोर्कनव सबेटव मयेनाह्‌के मन्ह्‌ताङ.✡

11 कुरिंत सहरतोरिर! मीक पकाय जीवा कीय्ह्‌नोम, मीक मकिह कीतद पोल्‍लो बेदे मावा जीवातगा इले. 12 माट मीक जेक तासोम, मीक बारा मावा एरे वाया वसो.✡ 13 तपेना लेह्‌कान मीक वेहतलाह आतन: माट बेद्रम मीक जीवा कीय्ह्‌नोम, अद्रम माक वने कीम्ह्‌टु!✡

विस्वसिराङ, विस्वस केवोराङ, पोल्‍लोङ कलियोङ

14 विस्वस केवोरा संगे, उंदिय जुवाते जोळ आस मनमाट.✡ बेसता पोल्‍लो लाग्वा पोल्‍लोता संगे, जोळेम आया पग़यह्‌ताया? वेह्‌च ओसो ईकळ गोत आया पग़यह्‌ताङा?✡ 15 किर्स्तु ओसो देयह्‌कना मुक्याल* बह गोत आस मन्ह्‌तोर? विस्वस कीतोना, विस्वस केवोना संगे, बाताल कबळ मन्ह्‌ता? 16 देवुळ मनदनद मंदिरतगा बह बोमाङ मन्ह्‌ताङा?✡ सास्त्रमतगा देवुळि वेहतद इद पोल्‍लो रासतद मन्ह्‌ता:

नना नावा मन्कलोर मनदनगा जागा आयकन.✡ ओरा नडुम तिरियकन.✡

नना ओरा देवुळ आयकन. ओर नावा मन्कलोर आयनुर,✡

इनजोर रासतद मन्ह्‌ता. अद इसबते माटे जीवात मनदनद देवुळता मंदिर!✡ 17 इद्रम वने रासतद मन्ह्‌ता:

“अदिनेनाह्‌क ओरग्डाहि पेसिस वाटु,

ओरग्डाह एग़िस मन्ह्‌टु.✡

कळ्‍वोग़आतदिन इटमाट, ✡

अस्के नना मीक एरे कीकन.

18 नना मीवा बाबानन आयकन.

मीट नावाङ मग़्क-मयास्‍क आयकिर” इनजोर, बेरा डीसाता सामि इन्ह्‌ता,✡

इनजोर रासतद मन्ह्‌ता.

✡6:1 6:1 5:20

✡6:1 6:1 इब्रितोर 4:1; 12:15

✡6:2 6:2 यशायाह 49:8

✡6:3 6:3 1 कुरिंततोर 8:9,13; 9:12

✡6:4 6:4 1 कुरिंततोर 3:5

✡6:4 6:4 बळयिर 9:16; 2 कुरिंततोर 4:8-11; 11:23-27; 12:10

✡6:5 6:5 बळयिर 16:23; 2 कुरिंततोर 11:23

✡6:5 6:5 बळयिर 19:23-34

✡6:5 6:5 1 कुरिंततोर 4:11; 2 कुरिंततोर 11:27

✡6:6 6:6 11:6

✡6:6 6:6 1:23; 2:10; 13:10

✡6:6 6:6 रोम सहरतोर 12:9

✡6:6 6:6 1 कुरिंततोर 2:4-5; कुलुसितोर 3:12; 1 तिसलुनितोर 1:4-5

✡6:7 6:7 2:17; 4:2; याकुब 1:18

✡6:7 6:7 1 कुरिंततोर 2:4-5

✡6:7 6:7 10:4; इपिसुसतोर 6:11-17

✡6:8 6:8 1 कुरिंततोर 4:10

✡6:8 6:8 रोम सहरतोर 3:8; 1 कुरिंततोर 4:13; 2 कुरिंततोर 12:16

✡6:8 6:8 1:18; 4:2; 1 तिसलुनितोर 2:3-4

✡6:9 6:9 रोम सहरतोर 8:35-36

✡6:9 6:9 1:10; 4:11

✡6:10 6:10 योहन 16:22; 2 कुरिंततोर 7:4-7; पिलिपितोर 2:17; 4:4; कुलुसितोर 1:24; 1 तिसलुनितोर 1:6

✡6:10 6:10 1 कुरिंततोर 1:5-7; 2 कुरिंततोर 8:9; तोहचीतव पोल्‍लोङ 2:9

✡6:10 6:10 बळयिर 3:6; रोम सहरतोर 8:32; 1 कुरिंततोर 3:21-22

✡6:12 6:11-12 7:2-3

✡6:13 6:13 1 कुरिंततोर 4:14

✡6:14 6:14 व्यवस्थाविवरण 22:10

✡6:14 6:14 1 कुरिंततोर 5:9; 7:39; इपिसुसतोर 5:6-7,11; 1 योहन 1:6

*6:15 6:15 देयह्‌कना मुक्यान “बलियाल” इनजोर वने इन्ह्‌तोर.

✡6:16 6:15-16 1 कुरिंततोर 10:21

✡6:16 6:16 पेसमुळि 25:8; योहन 14:23

✡6:16 6:16 तोहचीतव पोल्‍लोङ 2:1

✡6:16 6:16 पेसमुळि 29:45; लैव्यव्यवस्था 26:11-12; यिर्मयाह 31:1; यहेजकेल 37:27; तोहचीतव पोल्‍लोङ 21:7

✡6:16 6:16 रोम सहरतोर 8:9

✡6:17 6:17 तोहचीतव पोल्‍लोङ 18:4

✡6:17 6:17 यशायाह 52:11

✡6:18 6:18 2 शमूएल 7:14; 1 इतिहास 17:13; यशायाह 43:6; रोम सहरतोर 8:14