1 गोततोरिर! इद्रम देवुळि मावा संगे मनदलाह पोल्‍लो विळ्सताह्‌कु, मावा मेंदुलतुन ओसो मावा जीवातुन, सिरसिर कीस मनदकल, कळ्‍वोग़ आयवा! देवुळतुन रेयिस, पूरा पवित्र आसोर दाकल.✡7:1 1 पत्रु 1:17; 1 योहन 3:3

2 अलेट रा! मावा संगे गोत आम्ह्‌टु! माट बोनाय संगे लाग्वाङ केवोम, बोने एळ्होम, बोने नाळेह कीस तिनोम.✡7:2 12:15 3 मीट माक इद्रम इतिर इनजोर, नना मीक कसुर वाटोन. नना मुनेन वेहतपु, मीक इचोन जीवा कीय्ह्‌नोम इतेके,✡7:3 पिलिपितोर 1:7 हातेकाय पिसतेकाय, माट मीवा ऐंगेन मह्‌नोम.✡7:2-3 6:11-13

4-7 मकिदुनिया पटटे एव्स मतोम अस्के, माक मुर्तिय आरम दोर्को आसि.*7:4-7 तीतुसिन कलियलाह, पोलु मकिदुनिया पटटे अन्ज मतोग़ इन्जि, 2:13 अगा वेहतद मता. 2:14 अग्डाहि 7:3 एवनाह, तीतुसना पोल्‍लोतुन विळ्सिसि, पोलु तनाय सेवाता लोप्पा, वेल्‍लाङे पोल्‍लोन तेळियिह कीस वेहतह्‌तोग़. इगा मकिदुनिया पटटे बाताल आता इन्जि, पोलु ओसो वेहचोर दास्तोग़. मावा सर्ने तिपल्के मताङ. मन्कलोर माक जग्ळम कींदुर. मावा जीवा वने पका रेयिस मता.✡7:4-7 4:8 मति मेसेह्‌ने मनवालोरा जीवातुन सितुर कीयनद देवुळि, तीतुसिन मयगा लोहचि, मावा जीवातुन सितुर कीसीता.✡7:4-7 2:13 सिरप ओग़ वाताह्‌के आयो, मति ओग़ मियग्डा कबुर वने ततोग़. मीट ओना जीवातुन सितुर कीसीतिर. नाक ऊळलाह पकाय मीवा जीवा पर्ह्‌किह्‌ता; ओसो मीट गल्ति कीताह्‌कु, आलिह कीय्ह्‌निर; अहे नावा संगे गूनम आयलाह, पकाय मीवा जीवा पर्ह्‌किह्‌ता इनजोर वने वेहतोग़. मीट माक जीवा कीतिर इनजोर नना पुताह्‌कु, बाताले मकिह केवालेवा, वेहतलाह आतन. मीवा लोप्पा नना पोग़यिह्‌नन.✡7:4-7 8:24; 9:2-3; 10:8; पिलिपितोर 1:26; 2 तिसलुनितोर 1:4 मीट नावा जीवातुन सितुर कीतिर.✡7:4-7 1:3-4 माट पकाय तिपल आतेक तेला, नना ओसोय गिर्दाते मह्‌नन.✡7:4-7 6:10

8 नना मीक रासतद सीटटुन अर्विसि, गळ्क मीट दुकम आस मतिर. विस्वसिरिन दुकम आनाह कीतन इनजोर, मुने आल्सिंदन, मति इंजेक आल्सोन.✡7:8 2:2,4 9 इंजेके गिर्दा आतन, मीट दुकम आतिर इनजोर आयो, मति मीवा दुकमतेनाह्‌कु, मीट पापमता अग़दाहि देवुळतके मलतिर इनजोरे. मीट देवुळतुह्‌क विचर वातप दुकम आस मतिर. अदिनेनाह्‌क इंजेके मयेनाह मीवा विस्वसता बाताले नुस्कन आयो. 10 माट देवुळतुह्‌क विचर वातप दुकम आतेकेने, पापमता अग़दाहि देवुळतके मलयह्‌नल. अद इसबते देवुळि माक पिसिह कीस्ता. अद्रमता दुकम आतेक, ताना लोप्पा आल्समुळ आयो.✡7:8-10 1 कुरिंततोर 5:2 मति देवुळतगा मलवा, उगस दुकम आतेक बारा, इद्रमता दुकमि माक देवुळता पिसमुळताहि जेक कीस्ता. 11 देवुळतुह्‌क विचर वातप दुकम आस मतिर. अदिनेनाह्‌क मीक बेस-नेह्‌ना आता ऊळाट! इंजेके मीट सेतेम मन्कलोरिर इनजोर तोहतलाह आतिर, गल्ति कीतोन ऊळिस, ओङ आतिर. ओना सिक्साते कलियकोम इनजोर रेयतिर.✡7:11 2:6 इंजेके नाक ऊळलाहि, पकाय मीवा जीवा पर्ह्‌किह्‌ता. नावा संगे गूनम आयलाह, मीवा जीवा पर्ह्‌किह्‌ता. गल्ति कीतोन नेयम कीयलाह आतिर. ओसो मीट सबे पोल्‍लोने, मुर्तिय कसुरलेवोरिर इनजोर तोहतिर. 12 नना मुने मीक सीटि रासिस मतन, तान कसुर कीतोनेनाह्‌क रासोन. अहे ओग़ बोना विरुद कसुर कीतोग़, ओनेनाह्‌क वने रासोन. मति देवुळता मुनेह, मीट मावा बेचोन पर्वा कीय्ह्‌निर, इदिन तोहतलाह मीक मोका दोर्कि इन्जि, रासिस मतन.✡7:12 2:4,9 13 अदिनेनाह्‌क माक दीरा दोर्कता.

अचोने आयो मति, मीट सबेटोरा गूनमतुन ऊळिस, तीतुसना जीवा वने सितुर आता. अदिनेनाह्‌क ओग़ गिर्दा आतोग़. ओग़ गिर्दा आतदिन ऊळिसि, माट इंका पका गिर्दा आतोम.✡7:13 1 कुरिंततोर 16:18; 1:4; 7:4-7 14 नना तीतुसनगा मीवा लोप्पा पोग़यिस मतन. नना पोग़यतद निटमे इनजोर, मीट तोहतिर. अदिनेनाह्‌क पोग़यिस मतन इनजोर, इंजेक नाक लजा वावो.✡7:14 8:24; 9:2-3; 10:8; 2 तिसलुनितोर 1:4 माट अमेसा मीक निटमे वेहतना लेह्‌कान, नना मीवा लोप्पा तीतुसिन वेहतद वने, निटम इनजोर करल आता.✡7:13-14 2:13 15 ओग़ मियगा वास मतोग़ अस्के, मीक काग़्हतोग़ अद पोल्‍लोतुन मीट सबेटोरिर केंजतिर. केंजिसि तान मानेम आतिर, ओसो रेयसोर, ओना पोल्‍लोतुह्‌क वरेम आसोर, ओन बेस-नेह्‌ना ऊळतिर इनजोर, ओग़ सीता कीस्तोग़.✡7:15 2:9 कीसि मीक ओसोय जीवा कीस्तोग़. 16 सबे पोल्‍लोने नाक मियगा पूरा बर्वस मन्ह्‌ता इनजोर, नना गिर्दा आतन.