2
देवुळता जीवा विस्वसिरा पोग़ोन रेगिह्ता
1 (येसु हातापया 50 दियाने,) यहुदिरा पंटाता पंडुमतस्के,
✡ सबेटोर विस्वसिर उंद लोतगा जमा आस मतोर.
* 2 अचोटेन, पकाय दूंद वातप लेह्का पोग़ोटा बूमताहि नेकनद केंज वाता. ओर उदिस मतद लोन पूरा नेकता.
3 पया किसताङ वेंजेह्कना लेह्काडाङ ओरिह्क दिसताङ. पया बाताल आता, अवु ओर्वोग़-ओर्वोग़ मन्कना पोग़ोन उंद-उंद वास उदताङ.
4 वास उदतस्के ओर कतमतोर देवुळता पवित्र जीवाते निंदतोर.
✡ अस्के देवुळता जीवा ओरिह्क
(तमा पुनवव दुस्राङ-दुस्राङ देसेह्कनाङ पोल्लोने वळ्ह्कनद) बुद ईता. बुद ईतस्के ओर सबेटोर दुस्राङ-दुस्राङ देसेह्कनाङ पोल्लोने वळ्ह्क बोटटोर.
✡ 5 अस्के अगा देवुळताङ अडोङ माळवालोर यहुदि जाततोर, पंडुम इनजोर, ईनाह-आनाह सबे देसेह्कनाहि येरुसलेमते वास मतोर.
6 ओर मन्कलोर विस्वसिरा वळ्ह्कनद लेङतुन केंजतोर, अस्के ईनाह-आनाह वेल्लाय मुल जमा आतोर. जमा आता मुडग्डाहि, ओर्वोग़-ओर्वोग़ मन्कल तना-तना देसेमता पोल्लोते, विस्वसिर वळ्ह्कनदिन केंजिसि, मुडा मन्कलोर एक्बेक आतोर!
7 एक्बेक आसि, ओर पका बामिस इतोर; “वेर इतेक गालिल पटटोरु!
8 मति माट इतेके ओर्वोग़-ओर्वोग़, बेद देसेम पुटटल, अदे देसेमता पोल्लोते वेर वळ्ह्कनद केंजिह्नल! इद बहु!
9-11 माट इतेके पारति, मेदि, एलामि, मेसोपोटामिया, यहुदा, कपदुकिया,
✡ पुंतुस,
✡आसिया, पुरुगिया, पंपूलिया, मिसर देसेम, लिबुवा देसेमता कुरेनि सहरतकेडा एरिया, ओसो रोम सहरतोर यहुदिर वने ओसो दुस्राङ जातिनोर मावा दर्मते ओळियतोर
✡ वने, ओसो केरति, अरब, इव सबे देसेह्कने मनवालोरल यहुदिरल मह्नल. मति आपुना-आपुना पोल्लोते, देवुळताङ बामिह कीयनाङ कबस्किन, वेर मन्कलोर वेहतनदिन केंजिह्नल अयो,” इन्जि इतोर.
12 ओर बामिसि, एक्बेक आतोर, ओर्विह्क-ओर्वोग़ “इद बह बह आता?” इनजोर इंदुर.
13 मति उय्तुर बार, विस्वसिरिन ऊळिसि, “वेर अंगुर कल उन्जि ओचतोर, अदिह्क अह आस्तोर,” इनजोर कवतोर.
पत्रु मुडुन येसुना कबुर वेहतह्तोग़
14 अचोटेन पत्रु, किर्स्तुना अक्रा बळयिरा संगे निचि, जोरते इद्रम इतोग़: “मावोर यहुदिरिर ओसो येरुसलेमते मनवालोरिर, मीट ऊळतदिन पुनदलाह, मियेनाह्क पोल्लो वेहचोर मह्नन, नावा पोल्लो केंजाट!
15 मीट बेद्रम विचर कीय्ह्निर, अद्रम वेर मन्कलोर कल ओचोर, इंजेके सकरताङ नोव एगलाह आताङ;
✡ इद वेलाते बोग़ाय बह ओचनोग़?
† 16 अह आयो रा,
(वेर मन्कलोर मीवाङ देसेह्कनाङ पोल्लोने वेहतनदिन केंजतिर). इदिना लोप्पा देवुळता कबुरतोग़ योवेल, मुनेन कबुर वेहच मतोग़,
(अद मीवा मुनेह करल आता).
17 ओग़ इद्रम रासतोग़:
देवुळि इन्ह्ता, ‘आक्रिताङ दियाने नना नावा जीवातुन कतमतोरा पोग़ोन उदिह कीकन.
अस्के मीवाङ मग़्क-मयास्क वने नावा कबुर वेहतनुर.
मियग्डोर लेया मन्कलोर नना तोहतनद लेकातुन ऊळनुर.
मुय्तो मन्कलोर बार नना ईतव कलाङ कळ्स्कनुर.
18 नाक मोळ्कवालोर ओर्युलतोरा, ओर्युलतविस्कना पोग़ोन इंका,
नना नावा जीवातुन उदिह कीकन; ओर वने नावा कबुरतोर आयनुर.
19-20 दुनियातुन नेयम कीयनद देवुळता बेरा दिया वायग़ाये.
अद दिया वायनामुने, पोग़ोटा बूमतगा बामनाह लेह्काडाङ कबस्क कीकन.
पोळ्द ईकळ आयग़ा, नेला नेतुरता लेह्का गंजग़ा.
ओसो इळ्ता बूमतगा बेराङ सीनाङ तोहतकन.
नेतुरि, किस उंडुलता मोयुलि, इविनाङ सीनाङ तोहतकन.
21 अस्के बोर सामिना पेदिरतुन पोस केयनुर, ओर सबेटोर पिसनुर.’✡✡ 22 “मावोर इस्रयेलतोरिर, नावा पोल्लो केंजाट. नासरेत नाटेनोग़ येसुना मेटे, देवुळि मीक रीतरीतिनाङ बामनाह लेह्काडाङ कबस्क कीस तोहता इनजोर, मीट बेस-नेह्ना पुतिर.
✡ 23 ओग़ येसुनु यहुदाल मीवा कयदगा पोस ईतापया, मीट देवुळताङ अडोङ पुनवोरा संगे, हव्कनागुटातगा मोल्लाङ कोटिस हामुरता सिक्सा ईतिर.
✡ इद देवुळता मुनेताहि विचर मता,
✡(अद्रमे पनस दियाङ मुने करल आता).
24 मति हामुर ओन मुर्तिय पोस तास पग़वो, अदिह्क हामुरता तिपलताहि, देवुळि ओन पिसिह कीसि, जीवा अर्हचीता.
✡ 25 ओना लोप्पा दाविद राजाल मुनेन देवुळताङ पाटाने रासिस मतोग़,
‘देवुळि अमेसा नावा ऐंगे मन्ह्ता इन्जि नना पुह्नन,
अद नावा पकाते मन्ह्ता, नना बेस्केन पेग़्के गुचोन आयकन.
26-27 अदिनेनाह्क नावा जीवा सितुर आस्ता, नना गिर्दाते मह्नन,
नावा मेंदुल वने सुकमते मन्ह्ता.
बाराह्क इतेके निमा नावा जीवातुन हानादीपतगा विळ्सविन आयकिन.
नीवा पवित्र सेवकिना सेत्तातुन कळिय एविन आयकिन.✡ 28 मति निमा नाकु पिसमुळता अग़ तोहचीतिन.
नीवा संगे मनदह्पा नना पूरा गिर्दाते मह्नन,’✡ इनजोर दाविद रासतोग़.”
29 पत्रु ओसो इतोग़, “मावोरिर! इद पोल्लोतुन रासवाल मावा पेदामुय्तोग़ दाविद मुनेन हातोग़. ओनु गुमयातगा मिसतोर, ओन मिसतद गुमया नेंड वने मयगा मन्ह्ता इन्जि, नना सेतेम पोल्लोते वेहतह्नन.
✡(इतेके दाविद इद पाटाते कुद तना लोप्पा वेहोग़).
30-31 मति
‘नीवा कूळता मन्कन, नीवा लेह्का नावा लोकुरगा राजाल कीकन’ इन्जि, देवुळि ओन किरिया कीस मता.✡ दाविद देवुळता कबुरतोग़ मन्जि, पेग़्के वावाल राजानु, इतेके किर्स्तुनु, देवुळि जीवा अर्हचीयग़ा इन्जि मुनेन ऊळिसि, ‘ओना
जीवातुन हानादीपतगा विळ्सिस एवो, ओना सेत्ता कळियो,’ इनजोर रासतोग़.
✡ 32 “वेग़े येसुन देवुळि जीवा अर्हचीता इनजोर, माट सबेटोर विस्वसिरोम इद पोल्लोता साक्सि मह्नोम.
✡ 33 देवुळि
(ओन पोग़ोन ओसि,) तना तिनळ बाजे उदिह कीस, ओन्क पका कदर ईता.
✡ देवुळबाबाल मुनेन पोल्लो विळ्सिस मतपु, पवित्र जीवातुन ओन्क इद बूमतगा लोहतलाह ईता.
✡ अद जीवातुन येसु माक ईतोग़.
✡ ईतस्के बाताल बाताल आता, इदिन मीट इंजेके ऊळतिर, केंजतिर.
✡ 34-35 (नना येसुना लोप्पा इव सबे पोल्लोन बाराह्क इह्नन) इतेके, मेंदुल अग़्के देवुळदीपते पोग़ोन अनवाल दाविद आयोग़, बह इतेके ओग़ कुदि पोग़ोन अनवाना लोप्पा मुनेन कबुर वेहतोग़:
देवुळि नावा सामिन इता,
‘बेचानाह नना नीवा कोटुलतोरिन, नीवाङ काल्कना इळ्न तच एवोन,
अचानाह नावा तिनळ बाजेता राजगादेतगा उदिस मन,’ इता,✡ इद्रम दाविद सास्त्रमते रासतोग़.
36 मीट बोन हव्कनागुटातगा मोल्लाङ कोटिस हव्कतिर, ओग़े येसुन, देवुळि कतमतोरा माल्काल कीता,
✡ ओसो मीवा पिसिह केवाल राजाल कीताये.
✡ इद पोल्लोतुन सबेटोर इस्रयेलतोर बेस-नेह्ना पुनिर,” इनजोर पत्रु वेहतोग़.
37 इदिन केंजिसि ओर मन्कलोरा जीवा काल्सता, अद्रम आतस्के पत्रुनु ओसो दुस्रोर बळयिरिन ताल्ह्कतोर, “मावोरिर! इंजेके मावा पापम एडलाहि बाताल कीकोम?
✡ माक वेहाटु,” इतोर.
38 इतस्के पत्रु इतोग़, “मीट ओर्वोग़-ओर्वोग़ मन्कल पापमता अग़दाहि जर मल्सि,
✡ देवुळ लोहतोग़ किर्स्तु इनवाल येसुराजाना पेदिरते एग़ मीम्ह्टु
‡.
✡ अस्के देवुळि मीवा पापमतुन मापि कीसि,
✡ तना पवित्र जीवाता बर्कत ईयग़ा.
✡ 39 बाराह्क इतेके तना जीवातुन ईकन इन्जि, देवुळि मुनेन पोल्लो विळ्सता.
✡ अद पोल्लो मियेनाह्के ओसो मीवा जालपिलतेनाह्क, जेक-जेकताङ देसेह्कनोरेनाह्क, बेच्वुरिन देवुळि तनगा केयिह्ता, अच्वुरिह्क,” इनजोर इतोग़.
40 ओरिन तेळियिह कीयलाहि, ओसो वेल्लाङे पोल्लोङ बुदिङ-एदिङ वेहतोग़. देवुळि येसुन नमवोरिह्क सिक्सा ईयना मन्ह्ता, अद सिक्साताहि पिह्ट अर्म्ह्टु इनजोर,
✡ बुद काग़्हचोर मतोग़.
41 पत्रुना कबुरतुन केंजिस वेल्लाटोर विस्वस कीतोर, विस्वस कीसि, येसुना पेदिरते एग़ मीतोर. अद दिया जोक-जोक मूंड अजर्क मन्कलोर विस्वसिरा मुडगा कलियतोर.
विस्वसिरा दिनमता मनमुळि
42 विस्वसिर किर्स्तुनाङ बळयिर काग़्हतनाङ पोल्लोन केंजसोरे,
✡ ऐंगेन कलियसोरे,
✡ किर्स्तुना मोकता सीता कीसि ऐंगेन आरिङ तिनजोरे,
✡ पार्तना कीसोरे, इद्रम मंदुर.
43 किर्स्तुनाङ बळयिर रीतरीतिनाङ बामिह कीयनाङ वेल्लाङे कबस्क कींदुर. अविन ऊळिसि, येरुसलेमतोर मन्कलोर पका रेयिस मतोर.
44 येसुन विस्वस कीतोर सबेटोर ऐंगेन कलियिंदुर, ओसो तमा सामनतुन ओर्विना-ओर्वोग़ काळ्ङसोर पिसिंदुर.
45 इतेके तमा जागा-बूमतुन, मालसोमतुन वमिसि, बोन्काय गर्ज अरतेके, अवे कोतान तूसिस ईंदुर.
✡ 46 दिनम उंदिय एकाते मंदिरताङ मंडानगा कलियिंदुर.
✡ ओसो गिर्दाते, बेसतल बुदते, लोह्क-लोह्क जमा आसि, ऐंगेन जावा उंडुर, अहे
(किर्स्तुना मोकता सीता कीसि) आरिङ तिंदुर.
✡ 47 देवुळतुन जोहर कीसोर मंदुर. सबेटोर मन्कलोर विस्वसिरिह्क मान ईंदुर.
✡ दिनम येसुसामि वेल्लाटोर मन्कलोरिन पापमताहि पिसिह कींदोग़. ओर मन्कलोर विस्वसिरा मुडगा कलियिस मंदुर.
(इद्रमलेह्का विस्वसिरा मुडुन देवुळि बोल्गिह कींदु.)✡