1 अद्रमे पया, येसुन विस्वस कीतोर लोकुर वेल्‍लाय बल्गेम आसोर अंदुर, अस्के ओरा नडुम इद्रमता कट्‌ला पुटटा. युनानि पोल्‍लो वळ्ह्‌कवालोर यहुदि विस्वसिर इद्रम इतोर इतेके, दिनम गाटो तूसिह्‌पा मावाङ रांडे आस्किह्‌क बराबर एवोर, इनजि इब्रि पोल्‍लो वळ्ह्‌कवालोर यहुदि विस्वसिरिन मुयोग़ आंदुर.*6:1 युनानि पोल्‍लो वळ्ह्‌कवालोर यहुदि विस्वसिर इस्रयेल देसेमते मनवालोर आयोर, अदिह्‌क वेर इब्रि पोल्‍लो वळ्ह्‌कवालोर यहुदि विस्वसिर ओराङ रांडे आस्किह्‌क गाटो तूसिह्‌पा बराबर एवोर आंदुर, एवाह्‌कु ओर मुयोग़ आंदुर. 2 अदिनेनाह्‌कु, बारा बळयिर बाताल कीतोर इतेके, सबे विस्वसिरिन केयिस इद्रम इतोर, “माट देवुळता पोल्‍लोतुन पोकुर कीयनद विळ्सिसि, गाटो तूसनद सेवा कीतेके, अद माक ओपो आयग़ा गोतो. 3 अदिह्‌क मावोरिर! मियग्डाह मीक विचर वातोरु, पका तेल्वतोरु, पवित्र जीवाते निंदतोरु, लोकुर कदर एवालोरु एळवुर मन्कलोरिन आचाटु. ओरिन माटु गाटो तूसनद सेवातुह्‌क निल्पिह कीकोम. 4 मति माट बळयिरोम इतेके पार्तना कीयनद ओसो देवुळता पोल्‍लोतुन पोकुर कीयनदे सेवाते मंदाकोम,” इनजोर इतोर. 5 बळयिर इतद पोल्‍लो सबे विस्वसिरिह्‌क विचर वाता. अदिह्‌क ओर इस्तिपन पेदिरतोन आचतोर, ओग़ पका विस्वस केवाल, ओसो पवित्र जीवाते निंदिस मतोग़. ओना संगे पिलिपि, परुकुरुस, नीकानोर, तीमोन, परमिनाल, निकुलावुस, वेरिन आचतोर.†6:5 1:13 वचनते बोग़ पिलिप मन्ह्‌तोग़ ओग़ अलगतोग़ आंदोग़, मति वेग़ पिलिप अलगतोग़ आंदोग़. (निकुलावुस इतेके अंताकिया इनदनद सहरतोग़ आंदोग़. ओग़ मुनेटाहि यहुदि दर्मतोग़ आयोग़ मति, पया यहुदि दर्मते ओळियतोग़.‡6:5 यहुदि दर्मतगा ओळियना इतेके कोय्तोर डायना रिवज कीसि ओळिय पग़न्दुर, अद्रमे वेग़ निकुलावुस वने डायना रिवज कीसि यहुदि दर्मतगा ओळियतोग़. ताना पया येसुन विस्वस कीतोग़.) 6 विस्वसिरा मुडग्डाहि वेरिन आचिसि, बळयिरा मुनेह निल्पिह कीतोर. ओर नितस्के बळयिर तमाङ कय्किन ओरा पोग़ोन तासिसि देवुळता दया ताल्ह्‌कतोर, ताल्ह्‌किसि ओरिन गाटो तूसनद सेवातेनाह्‌क निल्पिह कीतोर.

7 अद्रमे पया, देवुळता पोल्‍लो वेल्‍लाय पोकुर आसोर आङता. येरुसलेम सहरतगा विस्वसिर वेल्‍लाय बल्गेम आतोर. अहे यहुदि बूमयालोर वेल्‍लाटोर येसुन विस्वस कीसि ओना कबुर केंजलाह आतोर.

8 इस्तिपननगा इतेके देवुळता तोळ, ताना लाव मता. अदे लावते ओग़ु लोकुरा मुनेह बामनाह लेह्‌काडाङ कबस्क कींदोग़. देवुळता लावताङ सीनाङ वने तोहन्दोग़. 9 अस्के पया इद्रम आता इतेके, उय्तुर कुरेने सहरतोर, सिकंदरिया सहरतोर, किलिकिया पटटोर, आसिया पटटोर मन्कलोर मतोर, वेर रोम सर्करतोर विळ्सिस ईतोर यहुदिरा पार्तनाता लोतगा जमा आस मतोर.§6:9 येसु पुटवाये मूंड वीसाङ मूंड वर्साना मुने रोम सर्कर उच्वुर यहुदिरिन दोहच ओस मतोर, पया विळ्सतोर. ओरे अलग-अलग जागातोर यहुदिरा पार्तनाता लोन येरुसलेम सहरतगा मता. ओरग्डाहि उय्तुर इस्तिपननगा वास तेल्वेङ कीया बोटटोर. 10 मति इस्तिपन देवुळता जीवा ईतद बुदते वळ्ह्‌कनदिन ऊळिसि, ओरु ओन तेल्वेने गेल्स पग़वोर. 11 पया ओर बाताल कीतोर इतेके, दुस्रोरगा अनजि, “वेग़ इस्तिपन मोसानाङ अडोनु ओसो देवुळताङ पोल्‍लोनु पास्कसोर मनदनदिन केंतोम इनजि वेहाट रो!” इनजोर कुस्क्नेन काग़्हतोर. 12 काग़्हतस्के ओर इद्रम कीतोर इतेके, लोकुरगा, पेदल्कनगा, सास्त्रमगूरुरगा अनजि अद्रमे वेहचि ओरिन ओङ तेग़्हचीतोर. ओङ तेग़्हतस्के, ओर इस्तिपनिन अग़-ओङतेन पोस यहुदिराङ तग्वाङ केवालोरगा ओतोर.*6:12 4:5 वचनते बोर तग्वाङ केवालोर मन्ह्‌तोर वेर ओरे आंदुर. 13 अहे जोल साक्सि एवालोरिन वने तचि यहुदिराङ तग्वाङ केवालोरा मुनेह निल्पिह कीतोर. कीतस्के, “वेग़ इस्तिपन इद पवित्र जागातुन, मोसानाङ अडोनु, रोमवालेवा पास्कसोरेन मन्ह्‌तोग़. 14 ओसो ‘नासरेत नाटेनोग़ येसु इद मंदिरतुन बूळे कीयनोग़, ओसो मोसा मुय्तोग़ माक ईतव रीतरिवज्किन मिळ्ह्‌चीयनोग़,’ इनजोर वेग़ वेहतनदिन माट केंतोम,” इनजि ओर इतोर. 15 पया अद पंचतगा उदिस मतोर सबेटोर इस्तिपननके ऊळतोर, अस्के ओना मोकम देवतुलता मोकमलेह्‌का मांजतप दिसता.