1 पया पोलु, सीलास, गलत्या पटटा दिरबे ओसो लुस्त्रा, इव सहर्कने अतोर.*16:1 इव सहर्कने पोलु बार्नबसिना संगे मुने सेवा कीस मतोग़; 14:6-23 ऊळाट. लुस्त्रा सहरतगा तिमोति पेदिरतोग़ ओर्वोग़ विस्वसि मतोग़, ओना तपे युनानि जाततोग़ु, मति तलोग़ि यहुदि आंचाळ आंदु, अद वने विस्वस कींदु. 2 लुस्त्रा, इकुनियुम, इव सहर्कनोर विस्वसिर तिमोतिन “पका बेसतोग़” इनजोर कदर ईन्दुर. 3 पया पोलु, तिमोतिन तना संगे सेवातुह्‌क ओयलाह विचर कीतोग़, मति तिमोतिना तपे यहुदि आयोग़ इनजोर अग्डोर वेल्‍लाटोर यहुदिर पुन्ज मतोर. अदिह्‌क तिमोतिन डायना रिवज केवेक ओना पोल्‍लोतुन यहुदिर केंजोर आयनुर, इनजोर पोलु ओन ओस डायना रिवज कीसीतोग़.

4 अद्रमे पया पोलु, सीलास, तिमोति, वेर मुवुर अग्डाङ सहर्कना विस्वसिरिन कलियसोर, येरुसलेमताबळयिर ओसो विस्वसिराङ पेदल्क ईतव अडोन ओरिह्‌क ईसोर, अव अडोने ताकलाह वेहतोर.†16:4 बळयिराङ कबस्क 15:23-29 वचनते ऊळाट. 5 अदिह्‌क वेल्‍लाटोर विस्वसिरा विस्वस बेर्सिंदु. दिनम उय्तुर विस्वस कीसोर अंदुर, इद्रमलेह्‌का ओरा मुलु बेर्ससोर अता.

6 पया वेर मुवुर सेवकिरिन देवुळता पवित्र जीवाआसिया पटटगा देवुळता पोल्‍लोतुन पोकुर कीयलाह एवो. अदिह्‌क ओर अके अनवा, गलत्या पटटा पुरुगिया एरियाते अतोर. 7 पया मूसिया एरियाते एवसि बितुन्या पटटे दायलाह विचर कीतोर, मति येसुना जीवा ओरिन अगा दायलाह एवो. 8 अदिह्‌क मूसिया एरियाताहि, सम्दुर कचुल मतद तरोवस सहरतगा वातोर. 9 ओर अगा मनदह्‌पा, पोलु नग़्का मकिदुनिया पटटोग़ ओर्वोग़ मन्कना मेटे, देवुळ तोहतना लेकातुन ऊळतोग़. ओग़ मन्कल निचि, “इद दडि वासि, मावा मकिदुनिया पटटोर मन्कलोरिन काग़्हा,” इनजोर अर्जि कीतोग़. 10 इतस्के पोलु अद देवुळ तोहतद लेकातुन सीलासिन, तिमोतिन ओसो नाक वेहतोग़, (अगा नना लूकानन ओरा संगे मतन.) वेहतस्के येसुना बेसता कबुरतुन पोकुर कीयलाहि देवुळि माक मकिदुनिया पटटे लोहतलाह आता, इनजोर उंदिय विचर कीसि चट्‌पिट अगा दायलाह पेसतोम.

11 पया तरोवस सहरतग्डाहि ओडा उदिसि सीदा सुमात्राके इनदनद तोग़दगा अतोम, अग्डाह इमा दिया मकिदुनिया पटटा नियापोलिस इनदनद सहरते एवतोम. 12 पया अग्डाहि ताकसोर अनजि पिलिपि सहरते एवतोम.‡16:12 नियापोलिस सहरताहि पिलिपि सहर जोक-जोक 16 किलोमिटर जेक मता. अदु मकिदुनिया पटटा मुनेटा जिलाता सहर मता, अद रोम सहरतोरेनाह्‌क गूळा कीतद आंदु.§16:12 इतालिया पटटगा मतेक बेद्रम रोमि मन्कना अदिकर मंदु, अद्रमे इद पिलिपि सहरतगा मतोर मन्कलोरिह्‌क वने रोमि मन्कना अदिकर रोम सर्करतोर ईस मतोर. अद सहरतगा माट उचुक दियाङ मतोम.

13 पया वारमता पोल्वादिया सहरता अग़दा पलते यहुदिरा देवुळतुन पार्तना कीयनद जागा बेगा मंदग़ा इनजोर बेरेग़ दडिय अतोम.*16:13 पिलिपि सहरता लोप्पा यहुदिरा पार्तनाता लोन इले, बारह्‌क इतेके उंदि पार्तनाता लोतगा कमसेकम दहा यहुदि कोय्तोर गावले, अगा अच्वुर इलेर, अदिह्‌क वेर सहरता पलते अतोर. अनजि अद जागातुन दोर्किह कीसि अगा जमा आस मतव आस्कना संगे येसुसामिना पोल्‍लोतुन वेहतलाह आतोम. 14 अस्के अगा उंद यहुदि आयवदु लुदिया पेदिरता आंचाळ मता. अद आसिया पटटा तुवातिरा इनदनद सहरता आंदु. पका दाराताङ, डुंगा पंडटा रंग लेह्‌काडाङ गेंदेना वीकुर कींदु. अदु यहुदिरा देवुळतुन मोळ्किंदु. पोलु वेहतनव पोल्‍लोन अद बेस केंजसोर मता. अस्के ओग़ वेहतनव पोल्‍लोन विस्वस कीयनाह देवुळि तान्क तेळियिह कीसीता. 15 पया अद आंचाळि ओसो ताना लोते मनवालोर येसुना पेदिरते एग़ मीतोर. एग़ मीतापया अद माक इता, “नाक येसुना सेतेम विस्वसि आंचाळि इनजोर मीट इतेके, मीट सबेटोरिर नावा लोन वास मन्ह्‌टु,” इनजोर इता. माट केंजनाह्‌जोम अद पका कयर कीता, अस्के माट ताना लोन अतोम.

16 अद्रमे उंद दिया माट पार्तना कीयनद जागातगा अनजोर मतोम. अस्के उंद ओर्युल मनदनद पिला माक कलियता. तानु पोत ऊळनद देयम पोस मता, अदिह्‌क लोकुर तानगा पोत ऊळलाह वांदुर. इद्रमि ताना माल्कालोर तानेनाह पका कोताङ कमय कींदुर. 17 अद पिला बेद्रम कींदु इतेके, “वेर सबेट्‌क बेरा देवुळताङ सेवकिर आंदुर, देवुळ लोकुरिन बेद्रम पिसिह कीस्ता, अदिन मीक पोकुर कीस्तोर,” इनजोर केयसोर-केयसोर मावा पयाह-पयाह वांदु. 18 वेल्‍लाङे दियाङ अद अद्रमे कीसोर मता. पया उंद दिया पोलु पका नारज आतोग़, आसि पेग़्के मिळ्न्दिस तानगा मतद देयमतुन इतोग़, “येसु किर्स्तुना पेदिरते नीक उकुम ईय्ह्‌नन, इद पिलाताहि पेसिस अन!” इनजोर देयमतुन दगाङ ईतोग़. इताहे अद देयम पेसिस अता.

19 अस्के अद पिलातुन तासिस मतोर माल्कालोर, “इंजेके माक कमय कीयलाहि अग़ दोर्को,” इनजोर बेद्रम कीतोर इतेके, पोलुन, सीलासिन पोसि, बजरतगा गुंजिस ओतोर. 20 पया ओरिन सहरता बेरोर तग्वाङ केवालोरगा ओसि इद्रम वेहतोर, “वेर यहुदिर मावा सहरतगा पकाय गळ्बळ कीस्तोर. 21 मावा रोमि मन्कलोरिह्‌क पोलवव रीत-रिवज्किन काग़्हतलाह बोटटोर. वेर काग़्हतनव पोल्‍लोन माट नम पग़वल, माळ पग़वल,” इतोर. 22 इतस्के अगा जमा आस मतोर लोकुर वने ओरिह्‌क तोळ आसि इर्वुर सेवकिरा विरुद आतोर. आतस्के तग्वाङ केवालोर पोलुनाङ, सीलासनाङ जगान एग़्हच डुडिने नल्हतलाह उकुम ईतोर. 23 ईतस्के ओरिन पका नल्हतोर, नल्हचि जेलते वाटिसीतोर. पया “वेरिन बेस दोहच राका कीमु,” इनजोर जेलता दरोगान उकुम ईतोर. 24 उकुम ईतस्के ओग़ पोलुन, सीलासिन लोप्पाडा अरातगा ओसि, ओराङ काल्किन पूहतव बलाना संगे दोहतोर.

25 पया नडुमनग़्का पोलु, सीलास पार्तना कीसोर देवुळताङ पाटाङ ओसोर मतोर. अस्के अद जेलतगा दोहच मतोर मन्कलोर वने केंजसोर मतोर. 26 अचोटेन उंदिदेबा बूम गल्जता, गल्जतस्के जेलताङ पाय्वाङ पका जोरते मेलियताङ. अस्के चट्‌नेन जेलताङ तेल्पिनाङ ताल्ह्‌क तम-तमय कुय्ह वाताङ ओसो जेलते मतोर मन्कलोरिन दोहच मतव गोल्स्क ओराङ कय्‍कनाहि पिह्‌ट अरताङ. 27 अस्के दरोगाल तेदिस ऊळनेके, जेलताङ तेल्पिङ पिङम-पङम आस मताङ, “जेलतगा मतोर मन्कलोर विततोर इंजेके नाक तग्वाङ केवालोर निटम हव्कनुर,” इद्रम आलिह कीसि दरोगाल तन्के तल्वर कसेग़ते कोटलाह आस मतोग़. 28 अस्केन पोलु जोरते केयिसि, “निमा अह केमा, साय्ब! माट सबेटोरोम इगान मह्‌नोम,” इतोग़. 29 इतस्के दरोगाल चिमलिङ तता वेहचि लोप्पा अतोग़. अनजि पका रेयतुह्‌क साङसोरेन पोलुना, सीलासना मुनेह अरसि काल्क मोळ्कतोग़. 30 पया ओरिन पलते तचि, “दादालोरिर! देवुळि नाक पिसिह कीयना इनजि नना बाताल कीकन?” इनजोर ताल्ह्‌कतोग़. 31 ताल्ह्‌कतस्के ओर वेहतोर “येसुसामिन विस्वस कीम, अस्के नीकु, नीवा लोतोरिह्‌क अमेसाता पिसमुळ दोर्कग़ा,” इतोर. 32 पया ओर ओन्क ओसो ओना लोतोर सबेटोरिह्‌क देवुळता पोल्‍लोतुन वेहतोर. 33 पया नग़्काडा नग़्कान दरोगाल ओरिन ओसि ओराङ देबान नोग़तोर. नोग़तस्के ओग़ु ओसो ओना लोतोर सबेटोर येसुना पेदिरते एग़ मीतोर. 34 पया दरोगाल ओरिन तना लोन ओसि ओरिह्‌क गाटो ईतोग़. ओग़ तना लोतोरा संगे देवुळतुन विस्वस कीसि पका गिर्दा आतोग़.

35 पया इमा दिया तग्वाङ केवालोर “ओर इर्वुरिन विळ्सिस ईम्ह्‌ट” इनजोर दरोगानगा तमा पोलिसिरा मेटे कबुर लोहतोर. 36 अस्के जेलता दरोगाल पोलुन वेहतोग़, “तग्वाङ केवालोर मीकु विळ्सिस ईयलाह कबुर लोहतोर, इंजेके गिर्दाते लोन अन्ह्‌टु,” इतोग़. 37 मति पोलु पोलिसिरिन इतोग़, “माट रोमि मन्कलोरोम मन्ज तेला मावा तपतुन तोहवालेवा वेल्‍लाटोरा मुनेह नल्हता वेहचि जेलते वाटटोर,†16:37 रोमि मन्कन कसुरलेवा नल्हतनद रोम सर्करता काय्दाता अडम मता. पोलुह्‌क पुटटग्डासि रोमि मन्कना अदिकर रोम सर्करतोर ईस मतोर, अदिह्‌क पोलु इद्रम इतोग़. इद तग्वाङ केवालोर कीतद कबळ मुर्तिय ओपो. इंजेक इसि कुस्क्नेन माक विळ्सिस ईस्तोरा? अद्रम आयो! ओर तमाय माक पेहता वायिर,” इतोग़. 38 पया पोलिसिर अनजि पोलुना पोल्‍लोतुन तग्वाङ केवालोरिह्‌क वेहतोर. पोलु, सीलास, वेर रोमि मन्कलोर इनजोर पुतापया तग्वाङ केवालोर पका रेयतोर, बह इतेके रोमि मन्कलोरिन नल्हतना पोलो आंदु. 39 अदिह्‌क ओर तमाय वासि, “माक मापि कीम्ह्‌टु” इनजोर इतोर, पया पोलुन, सीलासिन जेलताहि पेहतोर. पेहचि, “मीट इंजेके इद सहरताहि पेसिस अन्ह्‌टु, माट मीवाङ काल्क मोळ्किह्‌नोम,” इनजोर इंदुर.

40 पया पोलु, सीलास लुदियाना लोन अतोर. अनजि अगा विस्वसिरिन कलियतोर, येसुसामिन विळ्सवालेवा विस्वस कीसोर मन्ह्‌टु, इनजोर ओरिह्‌क दीरा ईसि पिलिपि सहरताहि पेसिस अतोर.