1 पोलु, सीलास, वेरु पिलिपि सहरताहि पेसिस, अंपिपोलिस ओसो अपुलोनिया इव सहर्किह्‌क अतापया, तिसलुनि सहरते एवतोर.*17:1 तिसलुनि सहर पिलिपि सहरताहि जोक-जोक 160 किलोमिटर जेक मता. ओसो अदु मकिदुनिया पटटा मोदुल सहर आंदु. अगा यहुदिरापार्तनाता लोन मता. 2 पोलु तना अल्वट मतपु, अद लोन अनजि, वारमता पोल्वादियाते अगा देवुळता सास्त्रमताङ पोल्‍लोनु जमा आस मतोरिह्‌क काग़्हतोग़, अद्रमे मूंड वारस्क एवनाह कीतोग़. 3 “देवुळ लोहतोग़ पिसिह केवाल किर्स्तु तिपल आसि डोलनाये मता, डोलिस ओसो वने जीवा अरयना मता,” इनजोर देवुळता सास्त्रमतग्डाङ पोल्‍लोन उंद-उंद वचन तोहचि, तेळियिह कीस वेहतोग़. ओसो “बोग़ येसुना लोप्पा मीक वेहतन ओग़े येसु, पिसिह केवाल किर्स्तु आंदोग़,” इनजोर वेहतोग़. 4 अद्रम वेहतस्के उय्तुर यहुदिर, पोलु वेहतद कबुरतुन नमतोर. नमिसि पोलुना, सीलासिना संगे कलियतोर. यहुदिरा देवुळतुन मोळ्कवालोर युनानि जाततोर वेल्‍लाटोर, ओसो बेचोको कदर दोर्कनाङ आस्क वने, येसुन विस्वस कीयलाह आतोर. 5 मति वेल्‍लाटोर लोकुर पोलुना पेग़्के दायलाह आतोर इनजि अग्डोर यहुदिरा पका जीवा कर्वता. अस्के अग़-ओङतेन बजरते वेलियवालोर करब बुदतोर मन्कलोरिन जमा कीसि, पूरा सहरमेंड रोदा पोयतोर. रोदा पोसि पोलु, सीलास, वेर यासोन इनवाना लोतगा मनदनुर बहे इनजोर विचर कीसि, ओरिन लोकुरा पंचता मुनेह ततलाहि यासोनना लोतुन पिळ्हपळ कीतोर. 6 मति ओरिह्‌क वेर दोर्कोर, दोर्कवाह्‌कु यासोनिन ओसो उय्तुर विस्वसिरिन सहरतोर मुक्यालोरा मुनेह ईळ्ससोर ततोर. तचि, “वेरु दुनियामेटोरिन लेसिह केवालोर आंदुर, मावा सहरते वने वातोर. 7 ओरिह्‌क वेग़ यासोन तना लोतगा जागा ईतोग़. ओर येसु इनवाल दुस्रा राजाल मन्ह्‌तोग़ इनजोर कय्सर राजानाङ अडोना अडम वेहतलाह आतोर†17:7 कय्सर इद पेदिर यूलियुस कय्सरना लोता पेदिर आंदु, ओग़ हातस्के ओन तादो (काकोना दादाल) इनवाल ओगुस्तुस पेदिरतोग़ रोम राजेमता मुनेतोग़ राजाल आतोग़. ओग़ राजान लोकुर पका कदर ईन्दुर, अदिह्‌क ओना पेग़्के बय्तुर रोम राजेमते राजालोर मतोर, ओर सबेटोर कय्सर पेदिरतुन तमा पेदिरते जोळे कीतोर.,” इनजोर रोदा पोयतोर. 8 अस्के वेरा पोल्‍लोतुन केंजिसि, जमा आतोर लोकुर ओसो सहरता मुक्यालोर पकाय ओङ आतोर. 9 अदिह्‌क सहरतोर मुक्यालोर यासोन ओसो दुस्रोर विस्वसिर वेरग्डाह जमानत एचि विळ्सिस ईतोर.

10 पया अदे नग़्का विस्वसिर पोलुन, सीलासिन तिसलुनि सहरताहि बिरिया सहरते लोहतोर. बिरिया सहरते एवतस्के ओर इर्वुर यहुदिरा पार्तनाता लोतगा अतोर. 11 बिरिया सहरतोर यहुदिर तिसलुनि सहरतोर यहुदिरा लेह्‌काडोर कैंगम बुदतोर आयोर, अदिनेनाह्‌क पोलु वेहतद पोल्‍लोतुन बेस केव वाटिस केंजिदुर. ओसो इव पोल्‍लोङ निटमेया-जोलिया इनजोर दिनमे पोलु वेहतद सास्त्रमतुन पर्ह्‌किस ऊळिंदुर. 12 पया वेल्‍लाटोर येसुन विस्वस कीतोर, यहुदिर ओसो युनानिरगा कदर दोर्कनाङ आस्कु ओसो कोय्तोर वेल्‍लाटोर, येसुन विस्वस कीतोर.

13 पया बिरिया सहरते वने पोलु देवुळता पोल्‍लोतुन पोकुर कीयलाह आतोग़ इनजोर तिसलुनितोर यहुदिरिह्‌क केंज वाता. अस्के ओर बिरिया सहरते अतोर, अग्डा मन्कलोरिन वने ओङ तेग़्हचि कट्‌ला कीया बोटटोर. 14 अदिह्‌क बिरियातोर विस्वसिर बाताल कीतोर इतके, उय्तुर विस्वसिरा संगे पोलुन ओडाते उदिस दायलाहि सम्दुर कचुल लोहतोर. मति सीलास, तिमोति, वेर इर्वुर बिरिया सहरतगान मतोर. 15 पोलुन ओसीतोर मन्कलोर अकाया पटटा एतेंस सहरते एवनाह ओतोर. पया ओर अग्डाह बिरिया सहरतके मल्स दायह्‌पा “सीलास ओसो तिमोति वेर इर्वुर आसि चट्‌पिट एतेंस सहरते नयगा वायिर,” इनजोर पोलु ओरा संगे कबुर लोहतोग़.

16 पोलु एतेंस सहरतगा सीलास, तिमोति, वेरेनाह्‌क केपिस मतोग़. पया अद सहरतगा तिरियनेके ओग़ बेके ऊळतेकाय ओन्क पेन्ह्‌कनाङ बोमाङे दिसिंदुङ. अविस्किन ऊळिसि ओना जीवा चुहेम आयो. 17 अदिह्‌क यहुदिरा पार्तनाता लोन अनजि अगा यहुदिर ओसो देवुळतुन मोळ्कवालोर युनानिरा संगे देवुळता पोल्‍लोतुन वेहतलाह आतोग़. ओसो दिनम बजरतगा अनजि ओन्क कलियवालोरा संगे देवुळता पोल्‍लोतुन वेहन्दोग़. 18 अस्के इपिकुरि तुंगाता‡17:18 इपिकुरि तुंगातोरा विचर इद्रम मंदु इतेके, देवुळि लोकुरग्डाहि जेक मन्ह्‌ता, तान्क माने-मन्कना पोग़ोन गिर्दा इले इंदुर. ओसो बह कीसि तेला रेयतुन, आल्सुळतुन गेल्सिसि सुकम दोर्किह कीयना गावले इंदुर. ओसो इस्तोयिकि तुंगाता§17:18 इस्तोयिकि तुंगातोरा विचर इद्रम मंदु इतेके, देवुळतुन केनकेनेन तमा जीवाते तासिंदुर, ओसो देवुळता तोळ लेवाये दीराते, लावतेने मन्कल आपुना पिसमुळते पिसिह्‌तोग़. गूरुर वने ओना संगे वेल्‍लाङे पोल्‍लोङ वळ्ह्‌कतोर. ओसो उय्तुर “वेग़ पोमाडेङि बाताङ वेहतलाह आतोग़ रा?” इतोर. येसुना लोप्पा ओसो ओग़ डोलिस जीवा अरतद बेसतल कबुरतुन वेहतह्‌पा केंजिसि “वेग़ु, माट पुनवाङ पेन्ह्‌कनाङ पोल्‍लोन पोकुर कीस्तोग़ बहे,” इनजोर उय्तुर इतोर.

19 अदिह्‌क ओर ओन अरियुपगुस पेदिरता गुड्रातगा ओतोर.*17:19 अरियुपगुस इतेके अरिस इनदनद पेनता गुड्रा आंदु, अगाने सहरता पंच उदिंदु. अगा एतेंस सहरतोर पंच उदिंदुर. पया पोलुन अगा निल्पिह कीसि, “निमा पोकुर कीयनद पूना पोल्‍लोतुन माक तेळियिह कीम. 20 माक इचानाह पुनवव पोल्‍लोन वेहता बोटटिन. अदिह्‌क इव पोल्‍लोङ बाताङ आंदुङ इनजोर अविस्किन पुंदकोम,” इनजोर इतोर. 21 (इंजेके एतेंस सहरतोर ओसो पलतेनाह अगा वासि पिसवालोर लोकुर पूनाङ-पूनाङ पोल्‍लोङ वेहतना, ओसो केंजना इदे कबळते अमेसा मंदुर.)

22 अदिनेनाह्‌क पोलु तेदिस अरियुपगुस पंचता मन्कलोरा मुनेह निचि इद्रम इतोग़, “एतेंस सहरतोर लोकुरिर, मीट मीवाङ पेन्ह्‌किन पका माळवालोरिर इनजोर नना पुह्‌नन. 23 इद्रम बाराह्‌क इह्‌नन इतेके, मीवाङ रावुळ्किन ऊळसोर तिरियनेके उंद गर्यातुन ऊळतन, अगा ‘माट पुनवद पेनतेनाह्‌क,’ इनजोर रासिस मता. मीट पुनवालेवा मोळ्किह्‌निर, अदे देवुळता पोल्‍लोतुन नना इंजेके मीक वेहतह्‌नन.

24 “इद पूरा बूमि, बूमतगा मंदनव सबेटविन पंडटद देवुळि पोग़ोटा बूमता, इळ्ता बूमता, माल्काल आंदु. अदिह्‌क अद मन्कलोर पंडटव रावुळ्कनगा मनो. 25 मन्कलोरेनाहि तान्क बातय गावल आयो, बह इतेके देवुळिये सबेटोरिह्‌क पिसमुळ ईस्ता, जीवा ईस्ता ओसो पिसवग़तुह्‌क सबे ईस्ता. 26 ओर्वोग़े मन्कनाहि सबे जातिनोरिन पुटिह कीसि, ओरिन पूरा बूममेंड आनाह कीता. ओसो उंद-उंद जातता लोकुर बेद कालमते इद बूमते मनदनुर, वेरा देसेमता अंद बेगा मंदग़ा इनजि मुनेन निल्पिह कीता. 27 लोकुर नाक पर्ह्‌किर, नाक पर्ह्‌कनेके दोर्किह कीया वने पग़यनुर इनजोर देवुळ इद्रम कीता. तेला मति निटमे अद देवुळि मयग्डाहि जेक इले. 28 ‘बह इतेके अदे माक पिसनाह कीता, जीवात मनाह कीता.’ इद्रम इनजोर मीवाय मन्कलोर वने ‘निटम माट देवुळताङ पिलाङ-पेकोरल’ इनजोर मीवाय सास्त्रमते रासतद मन्ह्‌ता. 29 मन्कलोर आपुना विचरते, आपुना बुदते बंगरताङ, वेंडटाङ, बंडानाङ बोमान पंडिह्‌तोर. माट देवुळता पेकोरल, अदिनेनाह्‌क देवुळि अव बोमाना लेह्‌काडा इनजोर विचर कीयना आयो. 30 लोकुर देवुळतुन पुनवालेवा मतोर. अद कालमतस्के देवुळि मावा पापमता नेयम केवो, मति इंजेके दुनियामेटोर कतमतोर पापमता अग़दाहि मलयना इनजोर उकुम ईता. 31 बाराह्‌क इतेके, बूममेटोरिन ओर्वोग़े मन्कना कयदे तपवालेवा नेयम कीयग़ा. अद नेयमता दियातुन मुनेन निल्पिह कीसि ओग़ मन्कन वने मुनेन निल्पिह कीता. ओग़ डोलिस मतोग़ मति ओन जीवा अर्हचि ओना नेयम कीयनद अदिकर कतमतोरिह्‌क कीस तोहता,” इनजोर पोलु वेहतोग़.

32 हामुरताहि जीवा अरयना पोल्‍लोतुन केंतापया, उय्तुर बार ओन कवतोर, ओसो उय्तुर बार “अले बेस्काय इद नीवा पोल्‍लोतुन माट ओसो केंजकोम,” इनजोर इतोर. 33 अदिह्‌क पोलु अग्डाहि अतोग़. 34 मति दियनुसियुस पेदिरतोग़ पंच उदवाल मन्कल, दमरि पेदिरता आंचाळि ओसो उय्तुर बोर-बोर, पोलुना संगे वासि येसुन विस्वस कीतोर.