1 अद्रमे अपुलोस कुरिंत सहरतगा मनदह्‌पा, पोलु गलत्या पटटाहि पेसिस वानेके इपिसुस सहरते एवतोग़. एवतस्के अगा ओन्क उच्वुर विस्वसिर कलियतोर. 2 कलियतस्के ओरिन ताल्ह्‌कतोग़, “मीट येसुन विस्वस कीतिर अस्के मीवा पोग़ोन देवुळता पवित्र जीवा रेगताया?” इतोग़. इतस्के ओर इतोर, “पवित्र जीवा इतेके बातालि, इद पोल्‍लो माट बेस्कन केंजोम!” 3 इतस्के पोलु ओसो ताल्ह्‌कतोग़, “पया मीटु बोनाङ कग़यिस एग़ मीयना रिवज कीतिर?” इतोग़, इतस्के ओर इतोर, “एते मीहवाल योहन वेहतपे माट कीतोम,” इतोर. 4 अस्के पोलु ओरिन बेस तेळियिह कीस वेहतोग़. “पापमता अग़दाहि मलतोरिन योहन देवुळता पेदिरते एग़ मीहन्दोग़. मति ‘नावा पेग़्के ओर्वोग़ येसु वावाल मन्ह्‌तोग़, ओना पोग़ोन मीट विस्वस कीम्ह्‌टु,’ इद्रम योहन काग़्हच मतोग़” इनजोर ओर विस्वसिरिन पोलु वेहतोग़. 5 वेहतस्के पया ओर येसु किर्स्तुना पेदिरते एग़ मीतोर. 6 मीतापया पोलु तनाङ कय्किन ओरा पोग़ोन तासतस्के, देवुळता जीवा ओरा पोग़ोन रेगता. रेगतस्के ओर तमा कग़यवव पोल्‍लोने वळ्ह्‌क बोटटोर ओसो देवुळता कबुर वेहता बोटटोर. 7 अगा ओर जोक-जोक बारा मांदि मतोर.

8 अद्रमे पया मूंड नेलाङ आनाहि पोलु देवुळता पार्तनाता लोन अनजि अग्डोर यहुदिरा संगे देवुळि मन्कलोरगा राजेम कीयनद पोल्‍लोतुन रेयवालेवा दीराते तेळियिह कीसि वेहन्दोग़. 9 मति उय्तुर मन्कलोर कैंगम आसि पोलुनाङ पोल्‍लोङ केंजोर. ओसो येसुना अग़ मुर्तिय लागो इनजोर जमा आता मुडा मुनेह पास्क बोटटोर. अदिनेनाह्‌क अद पार्तनाता लोतुन विळ्सिस, विस्वसिरिन पोसि पोलु पेसिस अतोग़. अनजि तुरनुस इनवाल गूरु काग़्हतनद लोतगा लोकुरिन येसुनाङ पोल्‍लोङ दिनमे वेहन्दोग़. 10 अद्रमे रेंड वर्साङ आनाहि कीसोर मतोग़. इद्रमि आसिया पटटोर वेल्‍लाटोर यहुदिर ओसो युनानिर येसुना पोल्‍लोतुन केंतोर.

11 पोलु इपिसुस सहरते मनदह्‌पा लोकु़र मुने बेस्केन ऊळवा-केंजवा मतोर अद्रमताङ देवुळि तना लावताङ कबस्किन पोलुना कयदे तोहता. 12 अदिह्‌कु लोकुर पोलुना मेंदुदगा दुपटिन ओसो गेंदेन बोयपिह कीसि, दुक अरतोरा पोग़ोन ओस तासिन्दुर अस्के दुकह्‌लोर बेस आंदुर. ओसो बोरिन देयह्‌क पोस मंदुङ, ओरग्डाह वने देयह्‌क पेसिस वितिंदुङ.

13 उय्तुर यहुदिर मतोर, ओर नाह्‌क-नाह्‌क तिरियसोर, गूनिने देयह्‌किन पेसिह केवालोर मतोर. ओर वने येसुसामिना पेदिरतुन पोसि देयह्‌किन पेसिह कीयलाह ऊळिंदुर. ओर देयह्‌किन इद्रम इंदुर, “पोलु पोकुर कीस्तोग़, ओग़ येसुना पेदिरते मीकु उकुम ईय्ह्‌नोम पेसिस अन्ट,” इनजोर इंदुर. 14 इस्किवा पेदिरतोग़ ओर्वोग़ यहुदि मन्कल पेर्माल मतोग़. ओनाङ एळवुर मग़्कु इद्रम कींदुर. 15 मति उंद दिया बाताल आता इतेके देयम ओरिन इता, “नना येसुन पुतन ओसो पोलुन वने पुतन, मति मीट बोरिर आंदिर?” इता. 16 इतस्के देयम पोस मतोग़ मन्कल ओग़ इस्किवानाङ मग़्किन पोसि ओराङ गेंदेङ अग़नाह ओरिन पका नल्हचि आरे कीतोग़. अवे देबाने ओर पूरा नोमुर्क आसि अद लोताहि पेसिस विततोर.

17 इपिसुस सहरतगा मनवालोर वेल्‍लाटोर यहुदिरिह्‌क ओसो युनानिरिह्‌क वने इद पोल्‍लो एर्का आता. ओर केंजिस पका रेयतोर, रेयिसि येसुसामिना पेदिरतुह्‌क पकाय कदर ईन्दुर. 18 वेल्‍लाटोर विस्वसिर बाताल कींदुर इतेके, ओर “माट इद्रमताङ पूजर-गूनिङ कींदोम,” इनजोर तमाङ लाग्वाङ कबस्किन सबेटोरा मुनेह कबुल आंदुर. 19 मुनेन पूजर-गूनिङ कीसोर मतोर मन्कलोर तमाङ पुस्तकिन जमा कीसि, जमा आतोरा मुनेह बोळ्सिस ईतोर. ओराङ पुस्तकिना दारातुन लेका कीतोर, अस्के अविस्कना दारा पनास अजर्क वेंडटाङ कोताङ आताङ.*19:19पोलुना कालमते उंद दियाता कूलि उंदि वेंडिता कोता मता. 20 इद्रमि येसुना पोल्‍लो पकाय आबुर आसोर अंदु, वेल्‍लाटोरे लोकुर अद पोल्‍लोता पोग़ोन विस्वस कीसोर अंदुर.

21 इव पोल्‍लोङ आतापया पोलु “मकिदुनिया पटटे, अकाया पटटे अनजि, अग्डाह येरुसलेम दाय्ह्‌नन,” इनजोर तना विचर कीतोग़. “येरुसलेम अतापया, अग्डाहि रोम सहरते वने नाक दाया पोयग़ा,” इतोग़. 22 पया तना तोळतोर तिमोतिन ओसो इरास्तुसिन मुनेन मकिदुनिया पटटे लोहचि, आसिया पटटगान तना उचुक दियाङ मतोग़.

23 अद तूकने इपिसुस सहरतगा येसुसामिना कबुर आबुर आताह्‌कु बेरा गळ्बळ आता. 24 इद्रम आता इतेके, देमेतिरियुस पेदिरतोग़ ओर्वोग़ मन्कल मतोग़, ओग़ वेंडिना कबळ कींदोग़. ओग़ वेंडिने अरतिमिस पेदिरता पेनताङ गूडिङ पंडिसि ओना संग कबळ केवालोरिह्‌क बेसता कमय दोर्किंदु.†19:24 अरतिमिस पेनता बोमा पोग़ोटा बूमतग्डाह इळ्न अरता, इदु जीवाते मनदनद सबे नरुळतुन अय कीयनद आंदु इनजोर ओर इंदुर. इपिसुस सहरतगा इद पेनता पेदिर अतद पका बेरा मंदिर मता. 25 ओग़ तनगा कबळ केवालोरिन ओसो वेल्‍लाटोरे अद्रमताङ गूडिङ पंडवालोर दुस्रोरिन वने जमा कीसि इद्रम इतोग़, “केंजाट रा! इद दंदा केवालोरल माटु पका कमय कीय्ह्‌नल इनजोर पुतले. 26 मति इंजेके वेग़ पोलु बाताल कीयलाह आतोग़, अदिन मीट इतेके ऊळसोरेन-केंजसोरेन मह्‌निर. कयदे पंडटव पेन्ह्‌कु बाताङ इलेङ, उगसताङे मन्ह्‌ताङ इनजोर लोकुरिन वेहता बोटटोग़, अह इनजोर इपिसुस सहरतगान आयो, मति मावा आसिया पटटोर वेल्‍लाटोर मन्कलोरिन तना पोल्‍लोतुन विस्वस कीयनाह वेहतोग़. 27 मति इंजेक वेग़ मावा दंदातुन बंद कीयनोग़. ओसो इद इचोन बेरा अरतिमिस पेनता मंदिरतुन बोरे सीता केवोर आयनुर इनजि रेय मन्ह्‌ता. इंजेके आसिया पटटोर ओसो दुनियातोर लोकुर तान मोळ्किह्‌तोर, मति पया तान्क अचोन मान एवोर आयनुर,” इतोग़.

28 इद पोल्‍लो केंजिसि ओर मन्कलोरिह्‌क पका ओङ वाता. ओर अग़-ओङतेन, “इपिसुसता अरतिमिस पेनतुह्‌क जोहर,” इनजोर केयलाह आतोर. 29 अद्रमे ओरा सहरतगा पका रोदा पोसि, सहरता मुल बाताल कीतोर, पोलुना संगे नाह्‌क-नाह्‌क तिरियवालोर गयुस ओसो अरिस्तरकुस वेर मकिदुनियातोर मन्कलोरिन पोयतोर, वेरिन पोसि कतमतोर गोटुदगा ओळियतोर. 30 अस्के पोलुना वने अगा ओळियिसि ओरा मुनेह वळ्ह्‌कना विचर मता, मति विस्वसिर ओन अगा दायलाह एवोर. 31 पोलुना गोत मनवालोर बोर आसिया पटटा साय्बालोर वने ओनु, “निमा उगसलेवा अद गोटुदगा ओळियमा, ओळियतिन इतेके नीवा पोग़ोन तिपल वायग़ बहा,” इनजोर कबुर लोहतोर. अदिह्‌क पोलु ओळियोग़. 32 अद गोटुदगा जमा आतोरा नडुम पकाय गळ्बळ आता. ओसो माट इगा बाराह्‌क जमा आतल इनजोर मुडगा वेल्‍लाटोरिह्‌क मुर्तिय एर्का बार इले आसि. अदिह्‌क अगा जमा आतोर लोकुर तम्क विचर वाताङ पोल्‍लोने रोदा पोस मतोर. 33 उय्तुर यहुदिर सिकंदर इनवाल मन्कनु निल्पिह कीसि लोकुरिन वेहतलाह मुडा मुनेह लोहतोर. अदिह्‌क ओग़े इद कट्‌ला पुटिह कीस मनदनोग़ इनजोर लोकुर इंदुर. अस्के सिकंदर जमा आता मुडुन केमेन आयनुर इनजोर कय तोहतोग़, तोहचि माट यहुदिरोम मीक कट्‌ला केवोम इनजोर वेहतलाह आतोग़. 34 अस्के ओग़ यहुदि मन्कल इनजोर मुडा मन्कलोरिह्‌क एर्का आता, अदिनेनाह्‌क ओसो रेंड गंटाङ आनाहि “इपिसुसता अरतिमिस पेनतुह्‌क जोहर,” इनजोर बेरा लेङते केयसोर रोदा पोयन्दुर.‡19:34 यहुदिर बोमान मोळ्कनदिन लागो इंदुर, अदिह्‌कु नाटेनोर ओरिन बेस ऊळोर.

35 अस्के बाताल आता, सहरतोग़ बाबु ओरिन केमेन कीस इतोग़, “इपिसुस सहरतोर मन्कलोरिर, बेस केंजाटु! बेरा अरतिमिस पेनता मंदिर ओसो ताना पोग़ोटाहि अरतद बंडातुन राका कीयनद जबब्दर मावा सहरतुह्‌क अरता इनजोर सबेटोरिह्‌क एर्काये. 36 इव पोल्‍लोङ जोलताङ इनजोर बोग़े वेहता पग़वोग़. अदिह्‌क मीट इंजेके केमेन आसि, बेस विचर केवालेवा बातय केमाटु. 37 मीट इंजेक वेर इर्वुरिन इगा ततिर. मति वेर मावा मंदिरता सामनतुन कलवालोर आयोर, ओसो मावा पेनतुन पास्कवालोर वने आयोर. 38 अदिह्‌क देमेतिरियुस ओना तोळतोर बार बोनातेल पोग़ोन कसुर वाटनद इतेके कोरोट्‌क चालु मन्ह्‌ताङ, ओसो नेयम केवालोर मुक्यालोर वने मन्ह्‌तोरे, ओरगा अनजि ओर्विह्‌क-ओर्वोग़ कसुर तोहता पग़यकिर. 39 मति तान्काय वीळिस पोल्‍लोङ कीयना इतेके, सर्करता काय्दा मतपु माट नाग़मेटोरोम मीवा पोल्‍लोतुन मीटिङ कीस देहतकोम. 40 नेंडु उगसताङ पोल्‍लोनेनाह्‌क अचोन गळ्बळ कीतिर! इद कट्‌लातेनाह्‌कु मावा पोग़ोन रोदा पोयतनद कसुर वाटनुर बह इनजोर रेय मन्ह्‌ता, अस्के ताना इसब माट बेद्रम ईकल.” 41 इनजोर वेहच जमा आता मुडुन लेङ वेहतोग़.