1 नना मुने रासतपु, मीट विस्वसिरिर देवुळताहि पूना पिसमुळ दोर्किह कीसि, किर्स्तुना संगे जीवा अरतप लेह्‌का आतिर.✡3:1 2:12 ऊळाट. इंजेके ओग़ पोग़ोन देवुळदीपते देवुळता तिनळ बाजे उदिस मन्ह्‌तोग़. अदिह्‌क मीट देवुळदीपताङ पोल्‍लोनगाने सीता कीसोर मन्ह्‌टु. 2-3 ओग़ डोलतस्के मीटवने मीवा पाळ्ना पिसमुळतुह्‌क डोलतप लेह्‌कान आतिर. इंजेके मीट ओना संगे पूना पिसमुळते पिसलाह आतिर. अद पिसमुळतुन किर्स्तु देवुळदीपतगा बेस तासिह्‌तोग़, तान बोग़े बूळे कीया पग़वोग़. अदिनेनाह्‌क इद बूमतग्डाङ पोल्‍लोन आयो, मति देवुळदीपतग्डाङ पोल्‍लोने सीता कीसोर मन्ह्‌टु. 4 मावा पिसमुळ किर्स्तुनगाने मन्ह्‌ता. ओग़ सबेटोर ऊळनाह पका डीसाते ओसो दिसनोग़, अस्के मीटवने ओना डीसाते कलियकिर.

5 मावा पिसमुळ किर्स्तुनगाने मनाह्‌कु इद बूमताङ विचर्किन हव्किस पोहाटु: साट्याल कबळ, साट्याल बुदि, लाग्वाङ विचर्क, लालुस कीयना. बेदिनेनाह्‌क मीवा लालुस मन्ह्‌ता, अदिने मीट मोळ्किह्‌निर. 6 देवुळता पोल्‍लो केंजवोर इद्रमताङ कबस्क कीस्तोर. अद ओरिह्‌क निटम सिक्सा ईयग़ा, इदिन सीताते तासाटु. 7 मीटवने मुने अद्रमतोर ताकनद अग़दे ताकिंदिर, अस्के अद्रमताङ कबस्क कीसोर मतिर. 8 मति इंजेके, ओङ आयना, गुरा-गुरा आयना, कुळ्सा कीयना, बद्‌नम कीयना, करब पोल्‍लोङ तोडटाह पेहतना, इव सबे विळ्‍साटु. 9 अहे ओर्विह्‌क-ओर्वोग़ जोल वळ्ह्‌कमाटु. बाराह्‌क इतेके मीट किर्स्तुनगा वातस्के, मीवा पाळ्ना बुदतुन ओसो तानाङ लाग्वाङ कबस्किन कतम पोहतिर. 10 अह कीसि देवुळ मीक ईतद पूना बुदतुन पोयतिर. इद पूना बुदतुन देवुळिये पुटिह कीता. मीट तान बेस पुनजि, ताना लेह्‌का आयना इनजि देवुळि अद बुदतुन बद्ले कीसोरेन मन्ह्‌ता. 11 पूना पिसमुळ दोर्किह कीताह्‌कु, डायना रिवज कीतोग़ यहुदि मन्कल मनेग़, डायना केवोग़ यहुदि आयवोग़ मनेग़, कग़यतोग़ मनेग़, गेळा-माळातोग़ मनेग़, ओर्युलतोग़ मनेग़, मता मन्कल मनेग़, इव पोल्‍लोङ देवुळता मुनेह बेराङ आयोङ. बाराह्‌क इतेके किर्स्तुये मोदुल आंदोग़, ओग़ माट सबेटोर विस्वसिरगा मन्ह्‌तोग़.

12 देवुळि मीक आचता, आचिसि तना मन्कलोर इनजोर अलग कीता, अहे मीक जीवा कीता. अदिनेनाह्‌क पूना गेंदे उहतप लेह्‌का मीवा पूना पिसमुळतुन पोयम्ह्‌टु; दुस्रोरिन जीवा लोपाटु, दुस्रोरिन गूनम तोहाटु, उड्ला बुदतोर मन्ह्‌टु, कुलुल बुदते मन्ह्‌टु, बेदाय पोल्‍लोत्‍कु चट्ने ओङ आयमाटु. 13 दुस्रोर मीक तप कीतेक तेला, कोदा तासमाटु, गूनमते आपाटु. ओर्विह्‌क-ओर्वोनगा कसुर मतेके, सामि मीवा कसुरतुन मापि कीतप लेह्‌का, मीट वने मापि कीम्ह्‌टु. 14 इव सबे कीम्ह्‌टु, मति इविस्किन वीळिसि ओर्विन-ओर्वोग़ जीवा कीम्ह्‌टु. अह कीसोर मतेके, माट विस्वसिरल उंदिय विचरते पूरा कलियिस मनदकल. 15 मीट सबेटोरिर उंदिय मेंदुललेह्‌का मह्‌निर, देवुळ मीक ऐंगेन गूनमते मनदलाह केयता. अदिह्‌क देवुळ ईतद गूनम मीक ताकिह कीयि. देवुळता बेरा दयातुन सीता कीसोर मन्ह्‌टु. 16 अद्रमे किर्स्तुना पोल्‍लो मीवा जीवातगा गडि, अदे मीक ताकिह कीयि. देवुळ ईतद बुदते ओर्विह्‌क-ओर्वोग़ बुदिङ-एदिङ काग़्हचोर मन्ह्‌टु. देवुळता सास्त्रमताङ पाटाङ ओसो रीतरीतिनाङ पाटाङ, इविस्कने देवुळतुन जोहर कीसोर, मीवा पूरा जीवाताहि ओसोर मन्ह्‌टु. 17 बाताल कीतेकाय, बाताल वळ्ह्‌कतेकाय, सबे येसुसामिना पेदिरतुन मान ईसि कीम्ह्‌टु. ओना मेटे माक देवुळबाबाना दया दोर्कता इनजि, देवुळतुन जोहर कीसोर मन्ह्‌टु.

18 मुतेस्कनिर! मीवाङ मुजोरा पोल्‍लोते वरेम आस मन्ह्‌टु. सामिन विस्वस कीयनव आस्किह्‌क अद्रम कीयनद ओप्पिह्‌ता. 19 मुजोरिर! मीवाङ मुतेस्किन जीवा कीम्ह्‌टु. अविस्कना मुनेह कोक्ळमते मनमाट. 20 पेकोरिर! सबे पोल्‍लोने मीवाङ तलिस्क-तपेराङ पोल्‍लोङ केंजाट! पेकोर अद्रम मनदना इनजि देवुळतुह्‌क विचर वास्ता. 21 तपेरिर! मीवाङ पिलाङ-पेकोरिन ओङ वानाह केमाट. अद्रम कीतेके, बाताले केवाय, पेकोर आरेम आस्तोर.

22 ओर्युलतोरिर! इद बूमतगा मनवालोर मीवाङ माल्कालोराङ सबे पोल्‍लोन केंजाट. सिरप ओर ऊळिह्‌पान ओरिन गिर्दा कीयलाह कबळ केमाटु, मति देवुळतुन रेयिसि, मीवा जीवाताहि कबळ कीम्ह्‌टु. 23-24 मियेनाह्‌क पोग़ोन तासतद तूसतुन इनम इनजोर देवुळि मीक ईयग़ा, इदिन पुतिरे. अदिनेनाह्‌क मीट बेदाय कबळ कीतेके मन्कलोरेनाह्‌क आयो, मति सामिनेनाह्‌क कीतल इनजोर, अद कबळतुन पूरा जीवाताह कीम्ह्‌टु. मीट सामि किर्स्तुनाये ओर्युलतोरिर आंदिर, इदिन पुन्ह्‌टु. 25 देवुळि बोनाये मोकम ऊळिस नेयम केवो. अदिनेनाह्‌क माल्काल मनेग़, ओर्युलतोग़ मनेग़, लाग्वा कबळ केवाना कबळता इसबतेन देवुळि सिक्सा ईयग़ाये.