1-3 मीट कुलुसि नाटेनोर विस्वसिरिर, इद पोल्‍लोतुन बेस पुन्ह्‌टु. मीट नावा मोकमतुन ऊळवेक तेला मीकु, लोदिकिया नाटेनोर विस्वसिरेनाह्‌कु ओसो मीवा पटटोर सबेटोर विस्वसिरेनाह्‌कु नना पका पप्ळेम आयलाह आतन. मीवा जीवातगा दीरा वायना, मीट सबेटोरिर ओर्विह्‌क-ओर्वोग़ जीवा कीसोर कलियिस मनदना, ओसो देवुळतगा मकतद पोल्‍लो मीक पका बेस-नेह्‌ना तेळियना इनजि नना पप्ळेम आयलाह आतन. देवुळतगा मकतद पोल्‍लो इतेके किर्स्तुये आंदोग़. देवुळता पूरा बुदि ओसो ताना जीवाताङ कतम पोल्‍लोङ बेरा मालसोमलेह्‌का किर्स्तुनगा जमा आस मन्ह्‌ताङ. 4 नना इद पोल्‍लोतुन बाराह्‌क रासलाह आतन इतेके, मीक बोरे मिङताङ-मिङताङ पोल्‍लोने नाळेह कीस लेसिह कीयनायो. 5 नना कोंडाते दिसलाह मियगा इलेन; मति सीताते मीवा संगेन मह्‌नन. मीट मीवा पिसमुळते बेस-नेह्‌ना पिसलाह आतिर इनजोर, ओसो किर्स्तुन पका मेग़्किस विस्वस कीतिर इनजोर केंजिसि, पका गिर्दा आयलाह आतन.

6 मीट किर्स्तु येसुन मावा माल्काल इनजोर ओनाङ पोल्‍लोङ केंजलाह आतिर, अद्रमलेह्‌कान येसुना अग़दे ताकसोर मन्ह्‌टु. 7 मीटु विस्वसते ओनगा मराता लेह्‌का बेस ऊटिस मन्ह्‌टु, ओसो मीटु ओनाङ पोल्‍लोने बेर्ससोर मन्ह्‌टु. अस्के इपपरासनाहि मीट येसुना पोल्‍लो कग़यतपु, विस्वसताहि इळ्न अरवा मेग़्किस मनदकिर; देवुळतुन अमेसा पका जोहर कीसोर मनदकिर.

8 इदिन पुन्ज मन्ह्‌टु! मन्कलोर वासि मन्कना बुदताहि पुटटव पोल्‍लोन देवुळताङ पोल्‍लोङ इनजोर काग़्हतह्‌तोर. ओर पका बुदतोर दिसतेक तेला ओराङ पोल्‍लोङ उगसताङ ओसो जोल पोल्‍लोङ आंदुङ. लोकुर वेहतव अव इद दुनियाताङ अङ्ळमताङ पाय्दालेवाङ उतुर्कनाङ पोल्‍लोङ आंदुङ, किर्स्तुनग्डाह वातव आयोङ. अदिनेनाह्‌क अव पोल्‍लोङ काग़्हचि तमा कयदे कीयलाहि, ओरिह्‌क मीट अग़ एमाटु. 9 बाराह्‌क इतेके देवुळता पूरा गून किर्स्तु इनजोर मेंदुल अग़्के मन्ह्‌ता. 10 राजेम कीयनव पेन्ह्‌कु ओसो अदिकर ताकिह कीयनव देवतुल्कु, इविस्कना पोग़ोन किर्स्तुनाये अदिकर मन्ह्‌ता. मीट ओना संगे जोळेम आतिर, अदिह्‌क इंजेके मियगा बाताले कमि इले.

11 माट यहुदिरोम इतेके मन्कना तोलातुन डायिसि डायना रिवज कीय्ह्‌नोम; विस्वसिरा डायना रिवज बार मन्कना कयदे कीतद इले. किर्स्तुह्‌कु हव्कनागुटाता सिक्सा आतस्के मीवा पापम बुदि ओना मेंदुलता संगे जोळेम आता, अस्केने ओना संगे मीवा वने डायना रिवज आतप आता. 12 मीट येसुना पेदिरते एतगा मुळ्न्दिस तेदतस्के मीवा पापम बुदतुन किर्स्तुना संगे गुमयाते मिसतप लेह्‌का आता. देवुळि बेद बेरा लावते ओन डोलतोरग्डाहि जीवा अर्हता, अदे लावता पोग़ोन मीट विस्वस कीतिर. कीताह्‌कु अद मीक पूना पिसमुळ ईता. पूना पिसमुळ दोर्कताह्‌के मीट वने किर्स्तुना संगे जीवा अरतप लेह्‌का आतिर. 13-14 मीट मुने पुनजि कसुर्क कींदिर, यहुदि आयवाह्‌कु देवुळता लोकुर आयवा मतिर, अदिनेनाह्‌क देवुळता मुनेह डोलतप मतिर. मति देवुळि मावाङ सबे कसुर्किन मापि कीता. ओसो माक सिक्सा आयना इनजि मावाङ कसुर्क तोहतनद सीटि मावा विरुद मता. मति अद सीटटुन देवुळि किर्स्तुना संगे हव्कनागुटातगा मोलाङ कोटटप लेह्‌का मायिह कीता. इद्रमलेह्‌का देवुळि माक कसुरलेवोर कीसि किर्स्तुना संगे जीवा अर्हता. 15 इंजेके इद्रम आता इतेके, अदिकरते ताकिह कीयनव देयह्‌कना लावतुन, देवुळि अविस्कनग्डाहि किर्स्तुना हव्कनागुटाता मेटे पूरा तेंडिस पोहता. पोहचि अव देयह्‌क पूरा आरेम आताङ इनजि अविस्किन सबेटोर ऊळनाह दोहच तिर्हतप लेह्‌का कीता.

16 अदिनेनाह्‌क इद दुनियाताङ अडोङ-उतुर्क काग़्हवालोरिह्‌क मीट अग़ एमाट इनजोर वेहतन. इतेके तिनदना-उनडना नोमळतुन माळविर, वर्सामेटा पोल्वा केविर, आम्स आयनस्के पोल्वा केविर, पोल्वादियातुन नोमविर इनजोर बोने बह मीवा पोग़ोन कसुर पुटिह कीयलाह एमाटु. 17 किर्स्तु वावस्के देवुळि तना लोकुरिह्‌क इव अडोङ ईस मता. इविस्किन बाराह्‌क ईता इतेके, वायना कालमते देवुळि तना लोकुरा संगे बेद्रम कलियना इनजि तोहतलाह ईस मता. मति इंजेके किर्स्तुना मेटे देवुळि माक गट्ने कलियिह्‌ता. अदिह्‌क इंजेके इद्रमताङ अडोङ वेहवालोराङ पोल्‍लोन केंजमाटु. 18 मीक जोल काग़्हवालोर इद्रम वेहतह्‌तोर, “मावा लेह्‌का तिपलता नोमळ कीयना, पोग़ोटाङ देवतुल्किन मोळ्कना,” इन्ह्‌तोर. इद्रम वेहचि, मीट देवुळता राजेमता लायकतोरिर इलविर इनजोर, मीवा पोग़ोन कसुर ओपलाह एमाटु. अद्रमतोर मन्कलोर इद्रम-इद्रमताङ लेकाङ ऊळतोम इनजोरे, तमाय मन्कना बुदते उगसे पोंगसोर तिरियिह्‌तोर. 19 बेद्रम तला मेंदुलतुन ताकिह कीस्ता, अद्रमे किर्स्तु माक विस्वसिरिन ताकिह कीस्तोग़. अविङ, सीराङ पूरा मेंदुलतुन जोळे कीस तासिह्‌ताङ, ओसो अद्रमे मेंदुलताङ कय्क-काल्क बाताङ ऐंगेन बेर्सिह्‌ताङ वने. अद्रमलेह्‌काने माट विस्वसि मन्कलोरल ओर्विह्‌क-ओर्वोग़ तुंडिस मह्‌नल. ओसो देवुळता देय्वा दोर्कताह्‌कु ऐंगेन बेर्सिह्‌नल. मति जोल काग़्हवालोर मावा तलालेह्‌काडोग़ किर्स्तुनाङ केंजवाह्‌कु मावोर आयोर.

20-22 तेन बोयमाटु, तान तिनमाटु, इदिन इटमाटु इनजोर मीट नोममाटु. तिनदनद मालु कबळतुह्‌क अरयह्‌ताये; मति तितापया अद कबळतुह्‌क अरवो. अद्रमता मादा पोग़ोन मन्कलोरे अडोङ पुटिह कीसि, दुस्रोरिन काग़्हतह्‌तोर. मीवा मन्कना बुदि किर्स्तुना संगे डोलताह्‌कु, इद दुनियाताङ अङ्ळमताङ अडोङ-उतुर्क मीक दोहच तास पग़वोङ. पया मीट दुनियातोरा लेह्‌का अद्रमताङ पोल्‍लोन केंजिसि बाराह्‌क पिसलाह आतिर? 23 इद्रमताङ अडोङ-उतुर्क पुटिह केवालोर पका बुदतोर, देवुळतुन कर्तुळते नोमवालोरा लेह्‌का दिसिह्‌तोर. बह इतेके माट उड्ला बुदतोरोम इनजि ओरु सबेटोरिन तोहतह्‌तोर, ओसो तमाङ मेंदुस्किन पकाय तिपल कीसि आव्रे कीस्तोर. मति निटम ऊळतेके, इव अडोङ-उतुर्क मावा पापम बुदतुन आव्रे कीयलाह मुर्तिय कबळतुह्‌क अरवोङ.