4
1 मीक आरम ईकन इनजोर देवुळि मुनेन पोल्लो विळ्सिस मता. अद पोल्लो इंजेक वने अरयह्ता. अदिनेनाह्कु आरम दोर्कनगा एव्वोम आयकोम बहा इनजोर मीट ओर्वोग़-ओर्वोग़ रेयिस मन्ह्टु. 2 बेसतल कबुरतुन इस्रयेलतोर केंजतप लेह्कान माट वने केंजतल; मति ओर केंजतस्के अद कबुरतुन विस्वस केवोर. अदिनेनाह्क केंजिसाय ओरिह्क बाताले पाय्दा इले. 3-4 मति माट विस्वस कीतोरल देवुळ ईतद आरम कीयनगा एवयह्नल. देवुळता सास्त्रमतगा,
देवुळि तना पूरा कबळतुन मारिह कीस वारमता आक्रि दियाते रोमता.✡4:3-4 पुटमुळि 2:2
इनजोर वारमता आक्रि दियाता पोल्लो रासिस मन्ह्ता. इद्रमि तना पूरा बूमतुन पंडटस्केडाहि आरम कीयनद जागा तासताये! मति विस्वस केवोरिन
“आरम कीयिर इनजोर नना वेरेनाह्क तासतद जागातगा,
वेर मुर्तिय एव्वोर आयनुर इनजोर ओङते किरिया कीतन,”✡4:3-4 देवुळताङ पाटाङ 95:11
इनजोर इता.
5 “आरम कीयिर इनजोर नना वेरेनाह्क तासतद जागातगा, वेर मुर्तिय एव्वोर आयनुर,”✡4:5 देवुळताङ पाटाङ 95:11
इनजोर आरम कीयनद पोल्लोतुन देवुळि ओसो वने इता. 6 ओसो, बेसतल कबुरतुन पोकुर कीतदिन केंजतोर मुनेतोर मन्कलोर, देवुळता पोल्लो केंजवाह्कु आरम कीयनगा एवया पग़वोर; मति उय्तुर अगा ओळियना इनजि, अद आरम कीयनद जागा नेंड वने दोर्किह्ता. 7 अदिनेनाह्क ओसो उंद दियातुन देवुळि आचता. तान “नेंडु” इनजोर इन्ह्ता. पेळ्ह्कल बूमते देवुळताङ केंजवोरा पोल्लोता पया वेल्लाङे वर्साना पेग़्के दाविद राजाना तोडटे देवुळि इता:
नेंड देवुळि वेहतनद केंजतेके अचोन,
केंजोम इनजोर कैंगम आयमाट.✡4:7 3:7-8
इनजोर इता. इद पोल्लोतुन पोग़ोन रासतन.
8 आरम कीयनद जागा ईकन इनजोर देवुळि पोल्लो विळ्सिस मता. इद पोल्लोतुन अर्विसि माक बाताल तेळियिह्ता? कनान इनदनद देसेमते मावा तादोर-बाबोरिन यहोसा मुय्तोग़ ओस मतोग़.*4:8 इद पोल्लोतुन पुनदलाहि यहोशु पुस्तकतुन अर्वाटु. अद देसेम आरम कीयनद जागा आया पग़वो, आस मतेके आरमतेनाह्क ओसो उंद दियातुन देवुळि वेहो आवालि. 9 अदिनेनाह्क इदे पोल्लो मन्ह्ता: देवुळि बेद्रम वारमता आक्रि दियाते तना कबळताहि रोमता,✡4:9 पुटमुळि 2:2-3 अद्रम तना मन्कलोरेनाह्क वने आरम कीयनद जागा मन्ह्ता. 10 बेद्रम देवुळि तनाङ कबस्कनाहि रोमता, अद्रमे तानाङ मन्कलोर, देवुळि तासतद आरम कीयनगा ओळियिसि तमाङ कबस्कनाहि रोमिह्तोर. 11 अदिनेनाह्क माट वने अगा, आरम कीयनद जागातगा एवयलाहि जिद कीयिङ. मयग्डाहि बोग़े, मुनेतोर मन्कलोरा लेह्कान, देवुळता पोल्लो केंजवाह्क बूळेम आयनद आयो. 12 बाराह्क इतेके देवुळ वेहतद पोल्लो जीवात मन्ह्ता. मावा लोप्पा कबळ कीस्ता. रेंड बाजेङ वाय्व मनदनद तल्वर कसेग़ बेद्रम बोकातुन, मुळ्गुंजतुन पग़्क पहतना लेह्का गडिह्ता; तान्काय एक्वा वीळिस देवुळता पोल्लो मन्कलोरा जीवातुन, बुदतुन पग़्क पहतना लेह्का गडिह्ता. अद मन्कलोरा सीतातुन, विचरतुन पर्ह्किस ऊळिह्ता. 13 देवुळि पुटिह कीतद बेदे आयि तानाङ कोंडानाहि मक पग़वो; मति सबेटव तान्क पोळ्क्ने दिसिह्ताङ. तान्के माक पूरा इसब ईया पोयह्ता.
येसु मावा बेरोग़ पेर्माल
14-15 मति मयेनाह्क बेरोग़ पेर्माल मन्ह्तोग़; ओग़ आंदोग़ देवुळता मग़ि येसु. ओग़ देवुळदीपते देवुळबाबाना बाजे उदिस मन्ह्तोग़. मावा लेह्कान ओन्क वने पापम कीया वेसनाह सबे रीतिनाङ विचर्क वाताङ, तेला मति ओग़ बेस्केन पापम केवोग़. अदिह्क ओग़ मावा कमजोरतुन ऊळिस जीवा लोपवाल आंदोग़. अदिनेनाह्क येसुनगा विस्वस कीयनद बेद पोल्लोतुन माट कबुल आय्ह्नल, अद पोल्लोतुन विळ्सवालेवा मेग़्किस पोस मनदना गावले. 16 माक बेस्के गर्ज अरयह्ता, अस्के देवुळ माक ऊळिस जीवा लोपि, दया कीस तोळ ईयि इनजोर, दया कीयनद देवुळता एरे माट दीरा पोस दाकल.