1 नना याकुब, देवुळता ओसो किर्स्तु येसुसामिना सेवकनन आंदन. मावा इस्रयेल लोकुर बारा कूळिनोर दुस्राङ-दुस्राङ देसेह्‌कने बिरोबटो आसि मनवालोर सबेटोर विस्वसिरिह्‌क नयेनाह जोहर!*1:1 येसु पुटटदिह्‌क रेंड अजर्क वर्साना मुने अब्रहम मुय्तोग़ मतोग़, ओना मग़ि इसक, इसकना मग़ि याकुब आंदोग़, याकुबना दुस्रा पेदिर इस्रयेल आंदु. वेनग्डाहि बारा मग़्क पुटटोर, ओरे इस्रयेल लोकुरा बारा कूळिनोर पेदामुय्तोर आंदुर. येसु देवुळदीपते तग़्ङतापया इस्रयेलतोर बारा कूळिनोर यहुदि विस्वसिर लोकुरा विरुदतेनाह्‌कु दुस्राङ-दुस्राङ देसेह्‌कने बिरोबटो आस मतोर, ओर विस्वसिरेनाह्‌क इद सीटटुन याकुब रासतोग़.

2 मावोर विस्वसिरिर, मियगा बेस्के मीवा आसातुन देहतनाङ अलग-अलग रीतताङ पोल्‍लोङ वायनुङ, अस्के मीट पका गिर्दा आम्ह्‌टु. 3 बेस्के मीट विस्वसते मनजि आरेम आयविर, अस्के मीक दीरा पोयतनद लाव दोर्किह्‌ता इनजोर पुनदकिर. 4 मीट आक्रि एवनाह दीरा पोस मन्ह्‌टु, अस्के मीवा विस्वस बेस मेग़्कग़ा, ओसो मीवा ताकमुळतगा बाताले कमि आयो आयग़ा.

5 मियग्डाह बोन्क बुदता कमि मन्ह्‌ता, ओग़ देवुळतुन ताल्ह्‌केग़, अस्के देवुळ ओन्क ईयग़ा. बाराह्‌क इतेके तान ताल्ह्‌कवालोर कतमतोरिह्‌के अद नाराज केवा लेकालेवा ईस्ता. 6 मति ताल्ह्‌कनेके पूरा आसा देवुळतगान मनदना गावले. ताल्ह्‌किह्‌पा मुर्तिय रेंड विचर्क आयना आयो. बह इतेके रेंड विचर्कनोग़ मन्कल, वळ्यते ईनाह-आनाह वायनाङ सम्दुरतग्डाङ लच्काना लेह्‌का मन्ह्‌तोग़. 7 अद्रमतोग़ मन्कल देवुळतग्डाह नाक बातालाय दोर्कग़ा, इनजि विचर वने केमाकेग़. 8 ओग़ रेंड विचर्कनोग़ मन्कल आंदोग़, बेद कीतेक आयि मुर्म अरनाह केवोग़.

9 देवुळि तना मुनेह माक कदर ईता, इनजोर कदर लेवोर विस्वसिर गिर्दा आयना गावले. 10 साव्कर लोकुर बार रोंडातगा पूयनद पुंगेग़ता लेह्‌का वाग़िस मायिह्‌तोर, अदिनेनाह्‌क देवुळि, साव्कर्किन उड्‌लोर कीयह्‌पा, “देवुळ माक उड्‌लोर कीयग़ा” इनजोर तेला गिर्दा आयिर!†1:10 याकुबना पुस्तकते बेगा बेगा साव्कर्कना पोल्‍लो वास्ता, अद अविस्वसिरा लोप्पा वळ्ह्‌किह्‌तोग़. 11 पोळ्द पेसिह्‌ता अस्के पका एद तेग़यह्‌ता, अस्के पका एद दल्गिसि, रोंडा वतिह्‌ता. ओसो ताना पुंग़ेग़ वने ऊसिह्‌ता. ऊसतापया ताना सोबा मारिह्‌ता. अद्रमलेह्‌काने साव्कर लोकुर वने तमा कमयता पेग़्के अन्ज-अनजि बूळेम आयनुर.

12 पापमते अर्हतनव पोल्‍लोङ वातेकतेला बोर लोकुर विस्वसते मेग़्किस निच मन्ह्‌तोर ओर देय्वातोरु, ओर दीरा पोसि देवुळतुन विळ्सवाह्‌कु ओरिह्‌क देवुळतेनाह अमेसाता पिसमुळता इनम दोर्कग़ा. बह इतेके, “नाक बोर जीवा कीस्तोर, ओरिह्‌क अद अमेसाता पिसमुळता इनम ईकन” इनजि देवुळि पोल्‍लो विळ्सिस मता. 13 बेस्के पापमते अर्हतनव पोल्‍लोङ वास्ताङ, अस्के देवुळिये नावा पट ऊळिह्‌ता, इनजोर बेस्केन देवुळता तप तोहतना आयो. बाराह्‌क इतेके, लाग्वा विचर कीसि देवुळता पट ऊळनद आयो, अहे देवुळ वने पापम कबळ कीयेग़ इनजोर बोनाय पट ऊळो. 14 मति मन्कना लालुसिये ओन नाळेह कीसि तनेके गुंजिह्‌ता, गुंजिसि ओन तनगा एग़्किह कीसि पापम कीनह कीस्ता. 15 पया आंचाळ नेलाङ हव्किस रिकम आयना लेह्‌का, मन्कना जीवातगा लालुस वने बेर्सिसि पापमतुन पुटिह कीस्ता. पया अद पापम बेर्सिसि आक्रिते ओन देवुळताह एग़िह कीस्ता.

16 मावोर विस्वसिरिर! मीट इद्रमलेह्‌का देवुळता तप तोहचि नाळेम आयमाटु. 17 बाराह्‌क इतेके पोळ्दतुन, नेलातुन, उकानु पुटिह कीतोग़ देवुळबाबानग्डाह सबे बेसताङ माचलेववु बर्कत्कु वास्ताङ. मति पोळ्दता, नेलाता वेह्‌च बेद्रम एक्वा-तक्वा मिळ्न्दसोर दास्ता, अद्रमलेह्‌काडा मावा देवुळ आयो, ताना गूनम बेस्केन मिळ्न्दो. 18 माटु देवुळता सेतेमता कबुरता मेटे पूना पुटमुळ दोर्किह कीतल, इद्रम आयि इनजोर देवुळि मुनेन विचर कीस मता, अद विचर मतपु इद बूमतगा पुटिह कीतव सबेटविनग्डाह मुने माके पूना जीवा ईसि तनेनाह्‌क अलग कीस तासता.

19 मावोरिर! मीट सबेटोरिर बेस उसरते केंजना गावले, वळ्ह्‌कलाह कंद्रेम आयना आयो, ओसो चट्‌पिट ओङ वने आयनद आयो, इव पोल्‍लोन सीताते तासाटु. 20 बाराह्‌क इतेके मन्कना ओङि देवुळता सेतेम अग़दे ताकिह कीया पग़वो. 21 अदिनेनाह्‌क मीवा जीवातग्डाहि सबे रीतिना माचतुन ओसो लाग्वाङ कबस्किन जेक कीम्ह्‌टु. कीसि देवुळ मीवा जीवातगा ओग़्सतद पोल्‍लोतुन कुलुल बुदते मोन्ह्‌टलाह ईम्ह्‌टु, अद पोल्‍लो मीक पिसिह कीया पग़यह्‌ता.

22 मीट देवुळता पोल्‍लोतुन सिरप केव्कने केंजवालोरिरे आयमाटु, मति अद्रमलेह्‌का ताकवालोरिर वने आम्ह्‌टु. सिरप केंजवालोरिरे बार मतेके, मीट आपुने नाळेह कीय्ह्‌निर. 23 बोग़ देवुळता पोल्‍लोतुन केंजलाह केंजिह्‌तोग़, मति अद्रमलेह्‌का ताकोग़, इतेके ओग़ु तना मोकमतुन अदमतगा बेस ऊळवाना लेह्‌का मन्ह्‌तोग़. 24 ओग़ तन्क अदमतगा ऊळिह्‌तोग़, मति अबर अतस्के नना बेद्रम दिसिह्‌नन इनजोरे तना मोकमतुन अस्केने माग़्ङिह्‌तोग़. 25 मति बोग़ु पापमताहि विळ्सिह कीयनव, चुकवालेवा ताकिह कीयनव देवुळताङ अडोन बेस सीता कीसोर, अविस्किन माग़्ङवालेवा अडोङ वेहतप केवाल मन्ह्‌तोग़, अद्रम कीसोर मनेके देवुळि ओन्क देय्वा ईयग़ा.

26 इंजेके मियगा बोग़ाय मन्कल, नना देवुळता संगे कर्तुळते मह्‌नन इनजोर इन्ह्‌तोग़, मति तना वेंजेटुन आव्रे केवा तना तन्के नाळेह कीस्तोग़, अद्रमतोना कर्तुळतनम उगसताये आंदु. 27 मति मूरा-मूरि पिलाङ-पेकोरा ओसो रांडे आस्कना तिपलतुन ऊळिसि, अविस्कना साय्ता कीयना, ओसो इद दुनियाताङ सबे लाग्वाङ कबस्कनग्डाहि आपुन जेक तासना, इद्रमताये ताकमुळ मावा देवुळबाबाना विचरते तपलेवद निटमता कर्तुळ आंदु.