1 मावोरिर! मीटु देवुळता डीसाते मनवाल मावा सामि येसु किर्स्तुन विस्वस कीतिर. अदिनेनाह्‌क बोनाय बह मोकम ऊळिस ताकमाटु. 2 मीटे सीता कीस ऊळाटु, मीवा पार्तनातगा ओर्वोग़ मन्कल बंगरताङ मुदाङ केग़सि, बेसता मलियळि केग़्स वावेग़. ओसो दुस्रोग़ गरिब मन्कल बार माच आतद जगा केग़्स वावेग़. 3 बेसता जगा केग़तोन ऊळिसि, “इगा बेरोर उदनद जागातगा उदा!” इनजोर इनेरिर, गरिब मन्कन बार, “इगा निच मन रा! उदना इतेक बार नेल उदा,” इनजोर इनेरिर. 4 इद्रम कीसि लाग्वाङ विचर्कने मीवाय नडुम उड्‌लोर-बेरोर इनजोर मोकम ऊळिस ताकवालोरिर आयविरा?

5 मावोर विस्वसिरिर, केंजाट! इद दुनियाता लोकुरा मुनेह बोर गरिबते मन्ह्‌तोर, ओरिन विस्वसते बेरोर कीयलाह देवुळि आचताया, आचोया? नावा राजेम मियेनाह्‌के आयग़ा इनजि देवुळि तन्क जीवा केवालोरेनाह्‌क पोल्‍लो विळ्सिस मता इनजि पुतिर; अदे राजेम गरिबतोर विस्वसिरिह्‌क आयग़ाया, आयोया? 6 मीट बार गरिब मन्कलोरा कदर रेहतिर. मति मीक मुळ्ह्‌वालोर ओसो पंचतगा ईळ्सिस ओयवालोर साव्कर मन्कलोरे आयोरा? 7 ओसो पिसिह केवाल किर्स्तुना बेसता पेदिर मीक अरता, अद पेदिरतुन वने पास्कवालोर वेरे साव्कर मन्कलोर आयोरा?

8 ओसो निटम मीट देवुळता राजेमताङ अडोङ माळतिर इतेके पका बेस कीय्‍ह्‌निर, देवुळता सास्त्रम वेहतपु “निमा नीक बेद्रम जीवा कीय्ह्‌निन, अद्रमे नीवा एरे-गूरेतोन वने जीवा कीम.”✡2:8 लैव्यव्यवस्था 19:18 9 मति दुस्रोन उड्लोग़, बेरोग़ इनजोर ऊळतिर, इतेक मात्रम मीट पापम कीय्ह्‌निर. पया देवुळताङ अडोनु माळवद कसुर मीवा पोग़ोन उदग़ा. 10 बोग़ाय मन्कल देवुळताङ अडोङ पूरा माळिसाय मति, उंद अडोतुन तपतोग़, इतेके ओग़ पूरा अडोङ माळवदिना कसुरतोग़ आस्तोग़, पुनविरा? 11 बह इतेके “साट्याल कबळ कीयनद आयो”✡2:11 निर्गमन 20:14; व्यवस्थाविवरण 5:18 इनजोर वेहतदे देवुळि “दुस्रोन हव्कनद आयो”✡2:11 निर्गमन 20:13; व्यवस्थाविवरण 5:17 इनजोर वने वेहता. निमा साट्याल कबळ केविन, मति हव्कतिन, इतेके निमा अडोङ माळवोनिन आय्ह्‌निन. 12 मीक पापमताहि विळ्सिह कीयनव देवुळताङ अडोनु माळतिरा, माळविरा? अविस्कना इसबते देवुळ मीवा नेयम कीयग़ा; अदिह्‌कु मीवा तोडटाङ पोल्‍लोङ, मीवाङ कबस्क, अव अडोङ वेहतप मनिङ. 13 बह इतेके बोग़ दुस्रोरा पोग़ोन दया केवोग़, देवुळ वने नेयम कीयनद दियाते ओना पोग़ोन दया केवो आयग़ा. मति दया केवालोर मन्कलोर नेयमतुह्‌क रेयोर आयनुर.

14 मावोर विस्वसिरिर! बोग़ाय मन्कल किर्स्तुन विस्वस कीय्ह्‌नन इनजोर वेहेग़, मति तना विस्वसतुन तोहतलाह बेसताङ कबस्क केवोग़, इतेके ओना विस्वसता बाताल पाय्दा आयग़ा? बह इद्रमता विस्वस ओन पिसिह कीया पग़यह्‌ताया? 15 इंजेके बोग़ाय विस्वसि मन्कल नियगा वास्तोग़, ओन्क इर्ङमते केग़यलाह गेंदेङ इलेङ, दिनम तिनदलाह तिंडि वने आलो. 16 अस्के निमा ओन ऊळिसि, “सुकमते अन! देवुळि नीकु बेस मल्ङनाङ गेंदेङ ईयि! पोटामेंड पंजनाह गाटो ईयि,” इनजोर इह्‌निन, मति ओना मेन्दुदुह्‌क बेव गर्ज मन्ह्‌ताङ, अव ओन्क एविन, इतेके ताना बाताल पाय्दा? 17 इद्रमलेह्‌का विस्वस कीसि, बेसताङ कबस्क केवेकचोन मीवा विस्वस बाताल कबळता.

18 बोग़ाय नाकु “नियगा विस्वस मन्ह्‌ताया?” इनजोर इनेग़. नना इतेक “नना बेसताङ कबस्क केवानन. निमा बेसताङ कबस्क केवाये नीवा विस्वसतुन नाक तोहतह्‌निन. नना बार बेसताङ कबस्कनेने नावा विस्वसतुन तोहतकन,” इनदकन. 19 इंजेके देवुळि उंदिय मन्ह्‌ता इनजोर मीट विस्वस कीतिर बेसे, मति देयह्‌क वने मीवालेह्‌का अद पोल्‍लोतुन विस्वस कीस्ताङ, ओसो देवुळ माक सिक्सा ईयग़ा इनजोर रेयिसि साङिह्‌ताङ. 20 एय बुद लेवोग़ मन्कनिन! बेसताङ कबस्क केवालेवा, वेट विस्वस बाताले कबळता आयो! इचोन वने पुनविना?

21 अद्रमे मावा पेदामुय्तोग़ अब्रहम देवुळता पोल्‍लोतुन केंजिसि, तना मग़ि इसकिन मोक ईयलाह गर्यातगा तासतोग़,✡2:21 पुटमुळि 22:9-12 ओग़ अद्रम कीसि तना विस्वसतुन तोहतस्के, देवुळि ओन सेतेमतोनिन इता, इनजोर इद पोल्‍लोतुन मीट बेस पुह्‌निर. 22 ऊळाट, ओना विस्वस ओसो ओग़ कीतव कबस्क कलियिस मताङ, ओनाङ कबस्कनेन ओना विस्वस करल दिसता. 23 इद्रमलेह्‌का “अब्रहम मुय्‍तोग़ देवुळता पोल्‍लोतुन नमतोग़, अस्‍के देवुळि ओन सेतेमतोनिन इता,”✡2:23 पुटमुळि 15:6 इनजोर देवुळता सास्त्रमतगा रासतद इद पोल्‍लो करल दिसता, ओसो अब्रहमिन देवुळता गोततोग़✡2:23 2 इतिहास 20:7; यशायाह 41:8 इनजोर वने इंदुर. 24 अदिह्‌क सिरप विस्वस कीतेकेन आयो, मति बेसताङ कबस्क कीतेकेने देवुळि माकु सेतेमतोरिर इन्ह्‌ता, इनजोर माक तेळियिह्‌ता.

25 अद्रमे राहब पेदिरता बोगे आंचाना पोल्‍लोतुन पुतिरे. ताना सहरतुन ऊळलाह अन्ज मतोर इस्रयेलतोर आय्डाङ गुंजवालोरिह्‌क अद आंचाळ तना लोते मकलाहि जागा ईता. अह कीस पया ओरिन बोरे ऊळवस्के दुस्रा अग़दे मल्हच लोहचीता.*2:25 राहब पेदिरता आंचाळि यहुदि आयवद मता ओसो बोगे कबळ कीन्दु, मति देवुळि कनन देसेमतुन इस्रयेलतोरिह्‌क ईता इनजोर विस्वस कीसि, अद देसेमतुन ऊळलाह अन्ज मतोर इस्रयेलतोर आय्डाङ गुंजवालोरिन तना सहरतोरग्डाह मकिह कीसि दुस्रा अग़दुह्‌क मल्हच लोहतनद बेसता कबळ कीता (यहोशु 2 अद्यय ऊळाट). अद अद्रम देवुळतुन विस्वस कीसि इद कबळ कीताह्‌कु देवुळता मुनेह अद सेतेमतद आता.

26 निटमे बेद्रम ऊकुर लेवा मेंदुल डोलिह्‌ता, अद्रमलेह्‌काने बेसताङ कबस्क केवालेवा विस्वस वने डोलिस मन्ह्‌ता.