1 देवुळ इद बूमते लोहतोग़ येसु इनवाल राजानु. वेग़ु यहुदा जाततोरा पेदामुय्‍तोग़ अब्रहम मुय्‍तोना, ओसो दाविद राजाना पुळ्‍गताहि इस्रयेल देसेमतगा पुटटोग़. येसुनाङ पेदल्‍क सास्‍त्रमते ओरा लेका रासिस तासतोर, ओर इह मन्ह्‌तोर. 2 अब्रहम मुय्‍तोना मग़ि इसकि पुटिस मतोग़, इसक मुय्‍तोना मग़ि याकुबि, याकुब मुय्‍तोह्‌कु बारा मग़्कु पुटिस मतोर, अवटे ओर्वोग़ यहुदाल इनवाल मतोग़. 3 यहुदानाङ मग़्कु पर्साल ओसो जेराल, वेरा तलोग़ि तामरि (मति अदु यहुदाना मुते आयो). पर्साना मग़ि एस्रोनि, एस्रोनिना मग़ि रामाल. 4 रामाना मग़ि आमिनदाबि, आमिनदाबिना मग़ि नहसोनि, नहसोनिना मग़ि साल्‍मोन.

5 साल्‍मोन वेग़ राहबि इनदनद दुस्रा जाततद आंचाना संगे जोळेम आतस्के, बोहजि पुटटोग़. वेग़ बोहजि रूतिना संगे जोळेम आतस्के ओबेदि पुटटोग़, अद रूति वने दुस्रा जातता आंदु. ओबेदिना मग़ि यीसाल. 6 पया यीसाह्‌कु दाविदि राजाल पुटटोग़. (ओनाय कुट्मळताहि सबे यहुदि राजालोर पुटटोर).

मुने बेदु ऊरियाना मुते मता, अद रांडे मुतेना संगे दाविदि जोळेम आतस्के साल्‍मोन राजाल पुटटोग़. 7 पया साल्‍मोनना मग़ि रहबामि, रहबामिना मग़ि अबियाल, अबियाना मग़ि आसल. 8 पया आसाह्‌कु यहोसपति, यहोसपतिह्‌कु योरमि, योरमिह्‌कु मूंड पीळिना पया, ओनाय कूळते उजियाल पुटटोग़. 9 उजियाह्‌कु योतमि, योतमिह्‌कु अहजि, अहजिह्‌कु एजेक्‍यल पुटटोग़. 10 एजेक्‍यह्‌कु मनासे, मनासेह्‌कु आमोनि, आमोनिह्‌कु योसियाल पुटटोग़. 11 योसियाना मग़िह्‌कु यकोनियाल, वेना पया ओसो उय्‍तुर पेकोर पुटटोरे. अद वेलाते बेबिलोन देसेमतोर यहुदा देसेमतगा वासि लळय कीतोर, लळय कीसि यहुदि जातता लोकुरिनु वेल्‍लाटोरिन तमा देसेमते दोहच ओतोर.

12 बेबिलोनते ओरिन दोहच ओतापेग़्‍के यकोनियाह्‌कु सल्‍तियल, सल्‍तियाना मग़िह्‌कु जरुबाबेल पुटटोग़. 13 जरुबाबेलिह्‌कु अबिहुदि, अबिहुदिह्‌कु एल्‍यकिमि, एल्‍यकिमिह्‌कु अजुराल पुटटोग़. 14 अजुरानाहि सादोकि, सादोकिनाहि याकमि, याकमिह्‌कु एलिहुदि पुटटोग़. 15 एलिहुदिह्‌कु एलियजरि, एलियजरिह्‌कु मतानि, मतानिह्‌कु याकुबि पुटटोग़. 16 पया याकुबिह्‌कु योसेपि पुटटोग़. योसेपिना मुते मरियालि, तेनाये पोटाताहि येसुसामि पुट वातोग़, ओने देवुळ लोहतोग़ पिसिह केवाल इन्ह्‌तोर. *1:16 देवुळ लोहतोग़ पिसिह केवाल राजाल वेन इब्रि पोल्‍लोते मसिहा इन्ह्‌तोर, युनानि पोल्‍लोते किर्स्तु इन्ह्‌तोर.

17 इद्रमि अब्रहम मुय्‍तोनाहि दाविदि राजानग एवनाह सबे पोसि चव्‍दा तादो-पीळिङ आताङ. ओसो दाविदिनाहि यहुदि लोकुरिन बेबिलोनते दोहच ओस मतोर अव दियाङ एवनाह चव्‍दा तादो-पीळिङ आताङ. अहे ओरिनु बेबिलोनते ओतग्‍डाहि देवुळ लोहतोग़ पिसिह केवाना पुटमुळ एवनाह चव्‍दा तादो-पीळिङ आताङ.

18 देवुळ लोहतोग़ पिसिह केवाल येसु इद्रम पुटटोग़ इतेके ओना तलोग़ मरियानु योसेपि ताल्ह्‌किसि कर्सा ईस मतोग़. वेर इर्वुर बेस्‍केन कलियवा, मुनेन अदु नेलाङ हव्‍कतद दिसता; इदु देवुळता पवित्र जीवाता लावतेनाहि आता. 19 तान ताल्ह्‌कतोग़ कोय्‍तोग़, योसेपि इतेके पकाय कर्तुळ मन्कल मतोग़. अदु नेलाङ हव्‍कता इनजि ओग़ पुतोग़, सिंड्रि आस्‍किनु विळ्‍सिसीयलाह देवुळता अडो मन्ह्‌ता, इदिन वने पुतोग़. ओसो तान लोकुरा मुनेह इजक तेंडनायो, इद्रम ओना विचर मता. अदिनेनाह्‌कु बोन्‍के पता दल्‍गवा नना तान विळ्‍सिसीकन, इनजि ओग़ विचर कीतोग़. 20 तना जीवाते वेग़ इद्रम आलिह कीनेके ऊळाटु, देवुळबाबाना उंद देवतुलि कलाते वासि ओन वेहता, “ए योसेपि, दाविदि राजाना पुळ्‍गतोनिन, मरियाना पोटाते बेद पेनेम मन्ह्‌ता, अदु मन्‍कना आयो मति देवुळता पवित्र जीवातेनाहिये मन्ह्‌ता. अदिह्‌के निमा तान ततलाह पेग़्‍के-मुनेह आयमा. 21 अदु पेकान पुटिह कीयग़ा, ओना पेदिरि येसु (इतेके ‘देवुळि पिसिह कीस्‍ता’) इनजोर तासा. बाराह्‌क इतेके ओग़ तना लोकुरिन (इतेके इस्रयेल लोकुरिन) ओरा पापमता सिक्‍साताहि पिसिह केवाल आयनोग़,” इनजि देवतुल वेहता.

22-23 (इव सबे बाराह्‌कु इद्रम आताङ इतेके, वेल्‍लाङ वर्साना मुने देवुळबाबाल तना कबुरतोना संगे इदिनलोप्पा वेहचि,

24 पया योसेपि उंजिस तेदताहे देवतुल वेहतपे सबे कीतोग़. अहे मरियानु मर्मिङ कीयलाह लोन ओतोग़. 25 मतिंगा अदु रिकम आनाह्‌जोमु ओग़ ताना संगे ऐंगे कलियोग़, आंचाळ-कोय्‍तोग़ आसि मनोग़. तान्‍क पेकाल पुटटस्‍के योसेपि ओना पेदिरि येसु तासतोग़.