2
पोत ऊळवालोर येसुन ऊळलाह वास्तोर
1 बेह्रोग़ एरोद राजाना कालमते यहुदा पटटे बेत्लेहेम नाटेनगा येसु पुटिस मतोग़. ताना पया अद पटटा मोदुल सहर येरुसलेमते बोर उकाना पोत ऊळवालोर वातोर. ओर पोळ्द पेसनेनाहि वेल्लाय जेक देसेमताहि येरुसलेमते वासि पता कीयलाह बोटटोर. 2 “यहुदातोरा राजाल पुटटोग़, तेन तोहतनद उकातुन माट पोळ्द पेसना बाजे ऊळतोम, अहे ओन दंडुम अरयकोम इनजि वातोम. ओग़ पुटटोग़ बेगाडोग़?” इनजि वेर पोत ऊळवालोर ताल्ह्कतोर. 3 दुस्रोग़ बोग़ राजाल पुटटोग़, इद कबुर केंजिसि एरोद राजाना जीवा डक इता, अद्रमे एरोद इंजेके बाताल कीयनोग़? इनजि आलिह कीसि पूरा येरुसलेमतोर वने मिळ्कतप आतोर. 4 पया राजाल यहुदातोराङ सबे पेर्मालोरिन ओसो सास्त्रमगूरुरिन उंदि जागाते गुम कीसि ओरिन ताल्ह्कतोग़, “मीवा सास्त्रम वेहतपु देवुळ लोहवाल राजाना पुटमुळि बेगा आस मंदग़ा?” इनजि राजाल ताल्ह्कतोग़. 5-6 अस्के ओर इतोर, “यहुदा पटटे बेत्लेहेम नाटे, महरज. बाराह्क इतेके देवुळता मुनेतोग़ कबुरतोग़ सास्त्रमते तेना लोप्पा इहे रासिस तासतोग़:
‘ए यहुदा पटटा बेत्लेहेम नाटेनोरिर, मीवाय नाटे नावा इस्रयेल लोकुरिन अय केवाल ओर्वोग़ सेह्नल पुटनोग़ इनजि
7 इद पोल्लो केंजिसि एरोद राजाल पोत ऊळवालोरिन “इह वाट,” इनजि तनगा कुस्क्ने केयतोग़, केयिसि “मीक बेद उका दिसता, तान मीट ऊळतिर अग्डाहि नेंड एवनाह बेचोक दियाङ आताङ, नाक बराबर वेहाटु,” इनजि ओग़ु पुट वाता पेकाना वय्स पुनदलाह ओरिन बेस ताल्ह्कतोग़. 8 ओर राजान वेहतापया, राजाल ओरिन बेत्लेहेमतके लोहतोग़, लोहनेके ओरिन नाळेह कीस इन्ह्तोग़, “मीटु अगा अनजि ओन पेकान बेस-नेह्ना ताल्ह्कसोर पर्ह्काटु. मीक दोर्कतोग़ इतेके नाक वासि ओना जाडा वेहाटु, अस्के ननावने अनजि ओन दंडुम अरयकन,” इतोग़.
9 राजानाङ इव पोल्लोङ केंजिसि ओर पोत ऊळवालोरु बेत्लेहेम नाटे दायलाह पेसतोर. पया ऊळाटु, बेद उकातुन ओर पोळ्द पेसनके ऊळिस मतोर, अदे उका ओरा मुनेह पेससोर अंदु, पया पेकाल मता लोता पोग़ोन अनजि रोमता. 10 उका रोमतदिन ऊळिसि ओरिह्क बेचोन वेल्ला गिर्दा वाता! 11 पया ओरु उका रोमतद लोतगा नेङतोर, अगा पेकानु, ओना तलोग़ मरियानु ऊळतोर, ऊळिसि पेकानाङ काल्क अरसि ओरु ओन दंडुम अरतोर. ओसो ओरु तमाङ सोमताङ पेटिनु तेंडिसि बंगरि, वेल्ला दाराता दूपमि, अतर्नेयु, इद्रमताङ पेकाह्कु वाटटोर. 12 पया वेन पेकान एरोद हव्कनोग़, इदिन देवुळ पुनजि “एरोद राजानके मल्स अनमाटु,” इनजि ओरिह्कु कलाते कबुर वेहता. अदिह्कु ओरु तमा देसेमतके दुस्रा अग़िये पेसिस अतोर.
मिसर देसेमतके वितना
13 पोत ऊळवालोर अतापया ऊळाटु, योसेपिन उंदि देवतुल कलाते कलियिसि वेहता, “पेकान हव्कलाहि एरोद राजाल कोज पेह्कसोर मन्ह्तोग़. अदिह्के निमा तेदा, पेकानु, ओना तलिनु पोसि मिसर देसेमते विता. अहे ‘अग्डाहि मल्स वाटु,’ इनजि नना नीक वेहनाह्जोम मीटु अगाने मन्ह्टु,” इनजि वेहता. 14 अदिह्क पया योसेपि उंजिस तेदताहे पेकानु, ओना तलिन पोसि नग़्काडा-नग़्का मिसर देसेमते पेसिस विततोग़. 15 अहे ओरु बेह्रोग़ एरोद राजाल हानाह्जोम अद देसेमतेन मतोर, पया मल्स वातोर. “नना नावा मग़िनु मिसर देसेमतग्डाहि केयतन,”✡2:15 होशे 11:1 इनजि वेल्लाङ वर्साङ मुने देवुळबाबाल तना कबुरतोना संगे वेहचि. ओर मल्स वातस्के अद कबुर करल आता.
एरोद पेकोरिन हव्किह्तोग़
16 ओर मुवुर मिसर देसेमते अतापया, “पोत ऊळवालोर नाक नाळेह कीतोर,” इद्रम ऊळिसि एरोद राजाल पकाय ओङ आतोग़. ओङ आसि, पोत ऊळवालोरिन ताल्ह्कता वेलाता लेका कीसि, वेग़ पुटटोग़ पेकाल रेंड वर्साह्क उड्लोग़ मंदनोग़ इनजि राजाल पुतोग़. इद्रम गंता कीसि, वेग़ पेकाल बेत्लेहेमतेन इंजेक मंदनोग़ इनजि, बेत्लेहेमते ओसो तानाङ एरेगूरेताङ नाह्कने बोर रेंड वर्सानोर ओसो ओरिह्काय उड्लोर पेकोर मतोर, ओरिनु सीपय्किन लोहचि ओरिनु कतमे हव्कनाह कीतोग़.
17-18 देवुळता कबुरतोग़ यिर्मयाल वेल्लाङ वर्साङ मुने वेहतद मता, अद इह मन्ह्ता:
“रामा इनदनद नाटे दुकमते आस्कनाङ अळयनाङ, केयनाङ,
बेरा आल्का वेनदा वाता.
रागो तनाङ पिलाङ-पेकोर हातोर इनजि अळयह्ता.
ओर हाताह्कु अदु मेक्र्ने मनदा पग़वो आंदु.”✡2:17-18 यिर्मयाह 31:15
मिसरताहि मलयना
19 एरोद राजाल हातापया, मिसर देसेमते योसेपिना लोतोर मनेके उंद देवतुल कलात कलियिसि ओन वेहता, 20 “योसेपि, पेकान हव्कलाह ऊळिंदुर ओर हातोर. निमा इंजेके तेदिसि पेकानु, ओसो ओना तलिन पोसि इस्रयेल देसेमते मल्स अन,” इता. 21 अदिह्क पया ओग़ तेदिसि पेकानु ओसो पेकाना तलिनु पोसि इस्रयेल देसेमते मल्स वातोग़. 22 मति यहुदा पटटे अर्केलाल राजाल तना तपे बेह्रोग़ एरोदिना जागाते राजेम कीस्तोग़, तेन केंजिसि ओग़ अद पटटे दायलाह रेयतोग़. ओसो कलाते देवुळता कबुर दोर्कताह्कु यहुदा पटटुन विळ्सिसि गालिल पटटे अतोग़. 23 अगा एवसि ओग़ु नासरेत इनदनद मरियाना नाटे अनजि जागा-पग़्सा कीतोग़. “ओन नासरेततोग़ इनदनुर,” इद्रम देवुळता कबुरतोर देवुळ लोहवाल राजाना लोप्पा मुने वेहच मतोर, अद इंजेके करल आता.
✡2:5-6 2:5-6 मीका 5:2
✡2:15 2:15 होशे 11:1
✡2:17-18 2:17-18 यिर्मयाह 31:15
*2:17-18 2:17-18 इस्रयेल देसेमतोर याकुबि इनवाना कुट्मळताहि पुट वातोर. याकुबिना उड्ला मुते, अदे इद रागो, ओर येसु पुट वायना मुने रेंड अजर्क वर्साना कालमतोर मतोर. येसु पुटिसि आरुङ नुह्कु वर्साना मुने बेबिलोन देसेमताङ सीपय्क वासि इस्रयेल देसेमतुन बूळे कीतोर. अस्के वेल्लाटोरिन रागोना कूळतोरिन तमा देसेमतके दोहच ओतोर. वेरिन दोहच ओयना अग़दे रामा नाग़ मता. अद नाटे इद दुकमता पोल्लोतुन ऊळिसि रागो तना गुमयातगा अळतप आस्ता, इद्रम यिर्मयाल वेहन्दोग़. इंजेके येसुना कालमते बेत्लेहेमते मतोर रागोनाये जालपिलतुह्क इद दुकम अरता, अदिह्क यिर्मयाल रासतद पोल्लो ओसो उंद देबा करल आता.