मार्कल रासतदु बेसता कबुरि
येसु इद बूमतगा मतस्के, इद पुस्तकतुन रासवाल मार्कल लेयोग़ मन्कल मतोग़. पोलु, बार्नबस मुने सेवातुह्क अतस्के, वेग़ मार्कल वने ओरा संगे अन्ज मतोग़, ताना पया पत्रुना संगे वने कबळ कीतोग़.
मार्कना बेसता कबुरतुन, माट कबस्कना बेसता कबुरि, इद्रम वने इनदा पग़यह्नल. मत्याल तना रासतद बेसता कबुरतुन, यहुदि लोकुरेनाह्क रासतोग़. मति मार्कल बारा रोमि लोकुरेनाह्क रासतोग़. ओरु लोकुराङ कबस्किन ऊळिसि ताकिंदुर. अहे वेग़ येसु बाताल-बाताल कीतोग़ इन्जि, ओर पुनदलाह ऊळिंदुर. येसु नयेनाह्क बाताल कीया पग़यह्तोग़? नना बाताल कीया पग़यह्नन? इद पुस्तक बामनाङ कबस्कना ओसो कबळ कीयनव पीटोना उंद पुस्तक आंदु. येसु कबळ केवाल मतोग़ इन्जि, इव कबळ कीयनव पीटोङ तोहतह्ताङ, ओग़ वेट मन्कले आयोग़. सिरप देवुळता मग़िये इद्रमताङ बामनाङ कबस्क कीया पग़यह्तोग़. देवुळता मग़ मनाह्कु, येसुना बेरा अदिकर मन्ह्ता; इद दुनियाते कतमतोरा पोग़ोन, कतमतविना पोग़ोन ओना अदिकर मन्ह्ता. अचोन अदिकर मन्जाय मति, ओग़ मन्कलोरा सेवा कीतोग़, इद पोल्लो मार्कल माक तोहतह्तोग़.
येसुना बेसता कबुरताङ नालुङ पुस्तकिनग्डाह, इद मार्कना पुस्तकिये उड्ला आंदु. इद पुस्तकते येसुना काग़्हमुळतुह्काय एक्वा, ओनाङ कबस्कना लोप्पा वेहतद मन्ह्ता. मार्कल पुस्तक उंद विडियोलेह्का मन्ह्ता, येसुना सेवाता उंदि वेलियनद चित्रलेह्का मन्ह्ता. इद दुनियाते, मावा दिनमता कबळते, मार्कल तोहतपु, सेवा केवाल येसु माक कलियिह्तोग़. ओग़ सिरप बेद उंद दर्मतोर मन्कलोरेनाह्के पिसिह केवाल ओसो सामि आयोग़, मति ओग़ु कबळ केवालोर मन्कलोरा वने पिसिह केवाल ओसो सामि आंदोग़.
“माने-मन्कना नडुम पुटटोनन, नना दुस्रोरिन नावा सेवा कीया वेहतलाह, इद बूमते वावोन. मति दुस्रोरा सेवा कीयलाहि, ओसो वेल्लाटोरा पापमता दांड निहतलाह, नना नावा जीवा ईयलाह वातन,” इन्जि येसु इतद पोल्लोतुन निमा इद पुस्तकते अर्वकिन. मयेनाह्कु तना जीवा ईयनदु, इदे ओना सबेट्क बेरा कबळ आंदु. बह येसुना अद कबळता पाय्दा नीक दोर्कताया? निमा येसुन विस्वस कीतेके, नीवा पापमता मापि आयग़ा, येसु नीक देवुळता संगे कलियिह कीसीयनोग़.
मार्कना बेसता कबुरतुन निमा अर्विसि, नीक इद विचर वायग़ा — नाक पिसिह केवाना बेद-बेद सेवा कीयना गावले? बाराह्क इतेके ओग़ नावा सेवा कीयलाह वास मतोग़. दुस्रोरेनाह्क गर्ज मतदिना सेवा कीसोर, येसु बराबर देवुळ वेहतप तपवालेवा ताकिंदोग़. ओना लेह्का आयना इन्जि, मावा पिसमुळता सीना मनदना गावले.
1
देवुळता कबुरतोग़ योहनना काग़्हमुळि
(मत्याल 3:1-11; लूकाल 3:2-16)
1 देवुळता मग़ि येसु किर्स्तुना लोप्पाडा✡1:1 मत्याल 4:3; 16:16; 26:63; मार्कल 14:61; लूकाल 22:70; योहन 3:16-18; 11:27; बळयिर 9:20; 13:33; रोम सहरतोर 1:3-4; तोहचीतव पोल्लोङ 2:18 बेसता कबुरता पोल्लो, इद्रम सुरु आस्ता: 2-3 (किर्स्तु वायनेनाह्कु, लोकुरिन ओप्पे कीयलाह, देवुळि ओर्विन लोहता. वेग़ लोहतोना लोप्पा,) मुनेने देवुळता सास्त्रमते, इद्रम रासतद मन्ह्ता इतेके,
केंजाटु! सामि वायनामुनेन, नना देवुळतन, नावा बळयिन लोहतलाह आतन.
ओग़ सामिनेनाह्क अग़ि तीर्ह्कनोग़.✡1:2-3 मलाकी 3:1
पेळ्ह्कल बूमते नावा बळयि केयलाह आतोग़:
“सामि मीवा जीवातगा वायना इन्जि, ओना अग़दुन तीर्ह्काटु,
ओना वायनद अग़दुन कसुम कीम्ह्टु,”✡1:2-3 यशायाह 40:3; मत्याल 3:3; लूकाल 3:4; योहन 1:23
इनजोर वेल्लाय मुनेतोग़ देवुळता कबुरतोग़ यसयाल इनवाल रासिस मतोग़. 4 (रासतद पोल्लो निटम आनाह,) पेळ्ह्कल बूमतगा देवुळता पेदिरते एग़ मीहवाल योहनि वातोग़. ओग़ इद्रम पोकुर कींदोग़: “पापमता अग़दुन विळ्सिसि, देवुळतके मल्म्ह्टु. मलतोम इनजोर तोहतलाह, देवुळता पेदिरते एग़ मीम्ह्टु*1:4 देवुळता पेदिरते एग़ मीम्ह्टु इद रिवजतुन वेल्लाटोर “बप्तिस्मा” इन्ह्तोर., अस्के देवुळि मीवा पापमतुन मापि कीयग़ा,” इंदोग़.✡1:4 बळयिर 13:24; 19:4 5 पया येरुसलेम सहरताहि, ओसो यहुदा पटटाङ दुस्राङ नाह्कनाहि, वेल्लाटोर लोकुर ओनगा अंदुर. लोकुर तमा कीता पापमतुन कबुल आसि,✡1:5 याकुब 5:16 योर्दन बेरेटगा योहनना कयदे देवुळता पेदिरते एग़ मींदुर. 6 योहनि इतेके (देवुळता कबुरतोनन इन्जि तोहतलाह,) रूटुह्कनाङ केल्कने कोटटद गेंदे उहन्दोग़, नंडटुह्कु तोलाता पेटा दोहन्दोग़. ओसो ओग़ पापेङ, ओग़्वेनेय तिंदोग़. 7 ओग़ इद्रम पोकुर कींदोग़: “नावा पेग़्के ओर्वोग़ वायलाह आतोग़, ओग़ नाकाय पका लावतोग़ आंदोग़. ओना कादुन इटलाह वने, नना ओप्पोन.✡1:7 योहन 1:20,27; बळयिर 13:25 8 नना मीकु देवुळता पेदिरते सिरप एतेन मीहतन, मति ओग़ मीकु देवुळता पवित्र जीवाते मीहतनोग़,✡1:8 योहन 1:32-33; बळयिर 1:4-5; 11:16” इनजोर पोकुर कींदोग़.
योहनि येसुन देवुळता पेदिरते एग़ मीहतह्तोग़
(मत्याल 3:13-17; लूकाल 3:19-22)
9 अद्रमे योहनि देवुळता पेदिरते एग़ मीहचोर मनेके, उंद दिया येसु गालिल पटटा नासरेत नाटेनाहि वासि, योर्दन बेरेटगा योहनना कयदे, देवुळता पेदिरते एग़ मीतोग़. 10 येसु एतगा मुळ्न्दिस पोग़ोन तेदतस्के, अस्केडस्केन पोग़ोटा बूमि पङ्ने आसि,✡1:10 योहन 1:51; बळयिर 10:11देवुळता पवित्र जीवा परेवा पिटेलेह्का, तना पोग़ोन रेगनदिन येसु ऊळतोग़.✡1:10 योहन 1:32-33 11 अचोटेन पोग़ोटाहि देवुळता आल्का केंज वाता, “निमा नावा जीवा कीतोग़ मग़निन,✡1:11 इपिसुसतोर 1:6 नीवा लोप्पा नना पका गिर्दा आतन,” इनजोर केंज वाता.✡1:10-11 1 योहन 5:6,9
12 पया चट्ने देवुळता जीवा अग्डाहि येसुन, वेल्लाय जेक पेळ्ह्कल बूमते ओसीता. 13 अगा रेंड वीसाङ दियाङ, देयह्कना मुक्याल येसुना पट ऊळता,✡1:13 2 कुरिंततोर 12:6-7 मति येसु तानाङ केंजोग़. ओसो येसु अगा गेळा जन्वर्कना संगे मतोग़. अगा मतस्केने, देवतुल्कु ओना सेवा कीसोर मंदुङ.✡1:12-13 मत्याल 4:1-11; लूकाल 4:1-13
येसु तना कबळ सुरु कीस्तोग़
14 पया बह आता इतेके, अग्डोग़ राजाल योहनिन जेलते वाट वेहतोग़. ताना पया, येसु गालिल पटटे वासि, देवुळता राजेमता बेसता कबुरतुन पोकुर कीतोग़.✡1:14 मत्याल 4:12 15 येसु इद्रम इंदोग़, “देवुळ वेहतद कगो एरे एवता; इंजेके देवुळि मन्कलोरगा राजेम कीयनद दिया एवयलाह आता.✡1:15 गलातितोर 4:4; इपिसुसतोर 1:10; 1 तिमोति 2:6 मीट पापमता अग़दाहि मल्सि,✡1:15 लूकाल 24:47; बळयिर 2:38; 3:19; 5:31; 20:21 बेसता कबुरतुन विस्वस कीम्ह्टु,” इनजोर इंदोग़.✡1:15 मत्याल 3:2
येसु तनाङ कग़यवालोरिन आचिह्तोग़
(मत्याल 4:18-22)
16 उंद दिया येसु गालिल सम्दुरता दडिय अनेके, ओग़ु सिमोनि, आंद्रेयाल, वेर तमोग़ इर्वुरिन ऊळतोग़. वेर मीन्क पोयवालोर मताह्कु, सम्दुरतगा वदिङ आहचोर मतोर. 17 अस्के येसु ओरिन इतोग़, “नावा संगे दटु. मीट इचानाह मीन्क पोयंदिर; मति इंजेके मीटु मन्कलोरिन नयगा तवालोरिर आयकिर, अद्रम नना मीक कीकन,” इतोग़. 18 इदिन केंजताहे, वदिन अगान विळ्सिसि, वेर तमोग़ इर्वुर आसि, येसुना संगे अतोर. 19 पया येसु उचुन मुनेह अनेके, जेबेदि इनवानाङ मग़्कु याकुबि ओसो योहनि, वेरिन ऊळतोग़. वेर तमोग़ इर्वुर आसि, ओडातगा वदिन ओर्कुल कीसोर मतोर. 20 येसु ओरिन ऊळतस्के, चट्ने तना संगे वायलाह केयतोग़. केयतस्के ओर इर्वुर आसि, तमा तपे जेबेदिन, कूलतोरा संगे ओडातगान विळ्सिसि, येसुना संगे अतोर.
ओर्वोग़ मन्कनग्डाहि येसु देयमतुन पूंडिह्तोग़
(लूकाल 4:31-37)
21 अद्रमे पया येसु ओसो ओनाङ कग़यवालोर कापेर्नाग़ अतोर. अन्जि वारमता पोल्वादियाते पार्तनाता लोतगा येसु काग़्हता बोटटोग़. 22 ओग़ काग़्हतनदिन केंजिसि, लोकुर बयल आतोर. बह इतेके येसु ओरिन सास्त्रमगूरुरा लेह्का काग़्होग़, मति तन्क अदिकर मतपु काग़्हन्दोग़. 23 अचोटेन दोम्ह्क्ने अद लोतगा ओर्वोग़ मन्कल ओळियतोग़. ओन देयम पोस मता. 24 अद देयम जोरते केयिस इद्रम इता, “ए नासरेत नाटेनोग़ येसुनिन, मावा संगे नीवा बाताल कबळि? निमा बह माक बूळे कीयलाह वातिना? निमा बोनिन इनजोर पुनोना? निमा देवुळ लोहतोग़ पवित्र मन्कनिन†1:24 देवुळ लोहतोग़ पवित्र मन्कनिन वेन इब्रि पोल्लोते मसिहा इन्ह्तोर, युनानि पोल्लोते किर्स्तु इन्ह्तोर. आंदिन!” इता.✡1:24 याकुब 2:19 25 मति येसु अद देयमतुन, “केमेन मन! वेनग्डाहि पेसिस अन!” इनजोर दगा ईतोग़. 26 अस्के अद देयमि ओग़ मन्कन तेल्हच मन्जि, जोरते केयिसि, ओनग्डाहि पेसिस वितता. 27 इदिन ऊळिस अगा मतोर लोकुर बामिसि, ओर्विह्क-ओर्वोग़ वळ्ह्कसोर, “इद बेद्रमता पूना पोल्लो रा? वेग़ अदिकरते देयह्किन वने उकुम ईस्तोग़, अव वेना पोल्लोतुन केंजिह्ताङ वने,” इतोर. 28 पया येसुना इद पोल्लो चट्पिटे गालिल पटटाङ एरे-गूरेताङ नाह्कनगा आबुर आता.
येसु वेल्लाय मुडुन सव्रे कीस्तोग़
(मत्याल 8:14-17; लूकाल 4:38-41)
29 अद्रमे पया येसु तनाङ कग़यवालोर याकुबिन, योहनिन पोसि, पार्तनाता लोताहि पेसिस सिमोन, आंद्रेयाल, वेर तमोग़ इर्वुरा लोन अतोग़. 30 अद वेलाते सिमोनना आतोह्क दंड पोस मता, इद पोल्लो बोरो येसुह्क वेहतोर. 31 पया येसु तानगा अन्जि, ताना कयदुन पोस तेहतोग़, तेहतस्केन ताना दंड रेगता. पया अद ओरिह्क जावा-एग़ कीसीता.
32 अदे दिया मुलतस्के, वारमता पोल्वादिया मारता.‡1:32 लूकाल 4:40 वचनता कालनोट ऊळाटु. अस्के लोकुर सबे दुकिनोरिन ओसो देयह्क पोयतोरिन येसुनगा ततोर. 33 पूरा नाग़मेटोर इतपे मुलु, अद लोता मुनेह जमा आतोर. 34 पया अलग-अलग रीतताङ दुकिने तिपल आसोर मतोरिन, येसु सव्रे कीतोग़. अहे ओसो वेल्लाटोरिन देयह्क पोस मताङ, अविस्किन वने ओरग्डाहि पेसिह कीतोग़. देयह्कु येसु बोग़ आंदोग़ इनजोर पुंदुङ. मति (अद तूकने, नना बोनन इन्जि, सबेटोरिह्क एर्का आयनद आयो इनजोर,) येसु अव देयह्किन वळ्ह्कलाह एवोग़.
येसु दुस्राङ नाह्कने देवुळता पोल्लोतुन पोकुर कीस्तोग़
(लूकाल 4:42-43)
35 पया सकरताङ कोग़्क कूसिह्पान येसु तेदिसि, बोरे लेवगा अन्ज पार्तना कीतोग़. 36 अस्के पया सिमोन तना तोळतोर बार, येसुन पर्ह्कलाह अतोर. 37 अन्जि येसुन ओर दोर्किह कीतोर, अस्के ओन इतोर, “नाटेनोर वेल्लाटोर लोकुर नीक पर्ह्कलाह आतोर, गूरु,” इतोर. 38 मति येसु ओरिन इतोग़, “आयो! माट इकेडाङ एरे-गूरेताङ नाह्कने दाकल. अगा वने नाक देवुळता पोल्लोतुन पोकुर कीया पोयह्ता, इदे कबळतुह्क नना वातन,” इतोग़. 39 अद्रम पया येसु तनाङ कग़यवालोर बारा, पूरा गालिल पटटे तिरियतोर. नाग़-नाग़ अन्जि, येसु यहुदिराङ पार्तनाताङ लोह्कनगा पोकुर कींदोग़.§1:39 यहुदि जाततोर इस्रयेल देसेमते मंदुर, ओरिन इस्रयेलतोर वने इंदुर. अहे देयह्क पोस मतोरग्डाह देयह्किन पेसिह कींदोग़.✡1:39 मत्याल 4:23; बळयिर 10:37-38
येसु मोंडरोगमतोन सव्रे कीस्तोग़
(मत्याल 8:2-4; लूकाल 5:12-14)
40 उंद दिया ओर्वोग़ मोंडरोगमतोग़ मन्कल येसुनगा वातोग़. (अद्रमतोरिन यहुदिर कळ्वोग़तासिंदुर.) ओग़ येसुनगा वासि, मिंडाङ कोटिसि इद्रम अर्जि कीतोग़, “नीवा विचर मतेके, नाक सव्रे कीसि नावा कळ्वोग़तुन तेंड पग़यकिन,” इतोग़. 41 इतस्के येसुह्क मान वसता. अदिनेनाह्क पया “अह इतेक अले, नावा विचर मन्ह्ताये! निमा बेस आम,” इनजोर इतोग़. इनदह्पा, (यहुदिरा मोळतोन इटवद नोमळता अडोतुन नोमवा,) येसु कय आहच ओन बोयतोग़. 42 अस्के चट्नेन ओना मोंडरोगम मायता, ओग़ बेस आतोग़. 43-44 पया येसु ओन इद्रम उकुम ईतोग़ इतेके, “इके केंजा! इद पोल्लोतुन बोन्के बार वेहमा. इंजेके निमा कुदि अन्जि, बेस आतन इन्जि, बूमयाह्क मात्रम तोहा. मोसानाङ अडोङ मतपु, मोंडरोगमता कळ्वोग़तुन तेंडनद मोक ईमु. सव्रेम आताह्कु मोक ईतोग़ इन्जि, बूमयाल सबेटोरिन वेहतनोग़, अस्के नियगा मोंडरोगमता कळ्वोग़ मनो आयग़ा,”✡1:43-44 लैव्यव्यवस्था 14:1-32 इनजोरे मोळतोन येसु वेहच लोहतोग़. 45 (निमा बोन्के वेहमा इनजोर वेहचाय) मति, ओग़ मन्कल अद पोल्लोतुन पका आबुर कीतोग़. आबुर कीताह्कु, गोह्डिनाङ गोह्डिङ लोकुर नाक कलियलाह वायनुर इन्जि, येसु बेदे नाटेनगा पिङम-पङम दाया पग़वोग़. ओग़ पलते लोकुर लेवगान मंदोग़. तेला मति लोकुर ईनाह-आनाह ओनगा वांदुरे.
✡1:1 1:1 मत्याल 4:3; 16:16; 26:63; मार्कल 14:61; लूकाल 22:70; योहन 3:16-18; 11:27; बळयिर 9:20; 13:33; रोम सहरतोर 1:3-4; तोहचीतव पोल्लोङ 2:18
✡1:2-3 1:2-3 मलाकी 3:1
✡1:2-3 1:2-3 यशायाह 40:3; मत्याल 3:3; लूकाल 3:4; योहन 1:23
*1:4 1:4 देवुळता पेदिरते एग़ मीम्ह्टु इद रिवजतुन वेल्लाटोर “बप्तिस्मा” इन्ह्तोर.
✡1:4 1:4 बळयिर 13:24; 19:4
✡1:5 1:5 याकुब 5:16
✡1:7 1:7 योहन 1:20,27; बळयिर 13:25
✡1:8 1:8 योहन 1:32-33; बळयिर 1:4-5; 11:16
✡1:10 1:10 योहन 1:51; बळयिर 10:11
✡1:10 1:10 योहन 1:32-33
✡1:11 1:11 इपिसुसतोर 1:6
✡1:11 1:10-11 1 योहन 5:6,9
✡1:13 1:13 2 कुरिंततोर 12:6-7
✡1:13 1:12-13 मत्याल 4:1-11; लूकाल 4:1-13
✡1:14 1:14 मत्याल 4:12
✡1:15 1:15 गलातितोर 4:4; इपिसुसतोर 1:10; 1 तिमोति 2:6
✡1:15 1:15 लूकाल 24:47; बळयिर 2:38; 3:19; 5:31; 20:21
✡1:15 1:15 मत्याल 3:2
†1:24 1:24 देवुळ लोहतोग़ पवित्र मन्कनिन वेन इब्रि पोल्लोते मसिहा इन्ह्तोर, युनानि पोल्लोते किर्स्तु इन्ह्तोर.
✡1:24 1:24 याकुब 2:19
‡1:32 1:32 लूकाल 4:40 वचनता कालनोट ऊळाटु.
§1:39 1:39 यहुदि जाततोर इस्रयेल देसेमते मंदुर, ओरिन इस्रयेलतोर वने इंदुर.
✡1:39 1:39 मत्याल 4:23; बळयिर 10:37-38
✡1:43-44 1:43-44 लैव्यव्यवस्था 14:1-32