1 देवुळता मग़ि येसु किर्स्तुना बेसता कबुरता पोल्‍लो इद्रम सुरु आस्‍ता: 2 देवुळता कबुरतोग़ यसयाना सास्‍त्रमते इद्रम रासतद मन्‍ह्‌ता इतेके, ऊळा! नना नावा कबुरतोन नीकाय मुने लोहतलाह आतन. ओग़ नियेनाह्‌क अग़ि तीर्ह्‌कनोग़. 3 पेळ्‍ह्‌कल बूमते ओर्वोग़ केयवाना आल्का वेनदा वास्‍ता: सामि मीवा जीवातगा वायना इनजि ओना अग़दुन तीर्ह्‌काटु, ओना वायनद अग़दुन कसुम कीम्‍ह्‌टु, इनजोर रासतद मन्‍ह्‌ता. 4 रासतद पोल्‍लो निटम आनाह, पेळ्‍ह्‌कल बूमतगा देवुळता पेदिरते एग़ मीहवाल योहनि वातोग़. ओग़ इद्रम पोकुर कींदोग़: “पापमता अग़दाहि मलतस्के देवुळता पेदिरते एग़ मीम्ह्‌टु, अस्‍के देवुळि मीवा पापमतुन मापि कीस्‍ता,” इंदोग़. 5 पया येरुसलेम सहरताहि ओसो यहुदा पटटाङ दुस्राङ नाह्‌कनाहि वेल्‍लाटोर लोकुर ओनगा अंदुर. लोकुर तमा कीता पापमतुन कबुल आसि योर्दन बेरेटगा योहनिना कयदे देवुळता पेदिरते एग़ मींदुर. 6 योहनि रूटुह्‌कनाङ केल्‍कने कोटटद गेंदे उहन्‍दोग़, नंटुह्‌कु तोलाता पेटा दोहन्‍दोग़. ओसो ओग़ पापेङ, ओग़्वेनेय तिनदोग़. 7 ओग़ इद्रम पोकुर कींदोग़: “नावा पेग़्के ओर्वोग़ वायलाह आतोग़, ओग़ नाकाय पका लावतोग़ आंदोग़. ओना कादुन इटलाह वने नना ओप्पोन. 8 नना मीकु देवुळता पेदिरते सिरप एतेन मीहतन, मति ओग़ मीकु देवुळता पवित्र जीवाते मीहतनोग़,” इनजोर पोकुर कींदोग़.

9 अद्रमे योहनि देवुळता पेदिरते एग़ मीहचोर मनेके, उंद दिया येसु गालिल पटटा नासरेत नाटेनाहि वासि, योर्दन बेरेटगा योहनिना कयदे देवुळता पेदिरते एग़ मीतोग़. 10 येसु एतगा मुळ्‍न्‍दिस पोग़ोन तेदतोग़, अस्‍के चट्‌ने पोग़ोटा बूमि पङ्‌ने आसि देवुळता पवित्र जीवा परेवा पिटेलेह्‌का तना पोग़ोन रेगनदिन येसु ऊळतोग़. 11 अचोटेन पोग़ोटाहि देवुळता आल्का केंज वाता, “निमा नावा जीवा कीतोग़ मग़निन, नीवा लोप्‍पा नना पका गिर्दा आतन,” इनजोर केंज वाता.

12 पया चट्‌ने देवुळता जीवा अग्डाहि येसुन पेळ्‍ह्‌कल बूमते लोहता. 13 अगा रेंड वीसाङ दियाङ देयह्‌कना मुक्याल येसुना पट ऊळता, मति येसु केंजोग़. ओसो येसु अगा जन्वर्क मनदना गेळाते मतोग़, मति देवतुल्‍कु ओन्‍क तोळ ईसोर मंदुङ.

14 पया बह आता इतेके, योहनिन जेलते ओता पया येसु गालिल पटटे वासि देवुळता राजेमता बेसता कबुरतुन पोकुर कीतोग़. 15 येसु इद्रम इंदोग़, “देवुळि मुने वेहच मतद वेला मारता, इंजेके देवुळि मन्‍कलोरा जीवातगा राजेम कीयनद दिया एवता. मीट पापमता अग़दाहि मल्‍सि, बेसता कबुरतुन विस्वस कीम्‍ह्‌टु,” इनजोर इंदोग़.

16 उंद दिया येसु गालिल सम्‍दुरता दडिय अनेके, ओग़ु सिमोनि, आंद्रेयल वेर तमोग़ इर्वुरिन ऊळतोग़. वेर मीन्‍क पोयवालोर मताह्‌कु सम्दुरतगा वदिङ आहचोर मतोर. 17 अस्‍के येसु ओरिन इतोग़, “नावा संगे वाटु. नना मीक मन्‍कलोरिन पोसि नयगा तवालोर कीकन,” इतोग़. 18 इदिन केंजिसि वदिन अगान विळ्सिसि वेर तमोग़ इर्वुर येसुना संगे अतोर. 19 पया येसु उचुन मुनेह अनेके जेबेदि इनवानाङ मग़्कु याकुबि ओसो योहनि वेरिन ऊळतोग़. वेर तमोग़ इर्वुर ओडातगा वदिन ओर्कुल कीसोर मतोर. 20 येसु ओरिन ऊळतस्‍के चट्‌ने तना संगे वायलाह केयतोग़. केयतस्‍के ओर इर्वुर तमा तपेन जेबेदिन कुलिनोरा संगे ओडातगान विळ्‍सिसि येसुना संगे अतोर.

21 अद्रमे पया येसु ओसो ओनाङ कग़यवालोर कापेर्नाग़ अतोर. अनजि वारमता पोल्‍वादियाते पार्तनाता लोतगा येसु काग़्हता बोटटोग़. 22 ओग़ काग़्हतनदिन केंजिसि लोकुर बयल आतोर. बह इतेके येसु ओरिन सास्‍त्रमगूरुरा लेह्‌का काग़्होग़, मति तन्क अदिकर मतपु काग़्हन्दोग़. 23 अचोटेन दोम्ह्‌क्ने अद लोतगा ओर्वोग़ मन्‍कल ओळियतोग़. ओन देयम पोस मता. 24 अद देयम जोरते केयिस इद्रम इता, “ए नासरेत नाटेनोग़ येसुनिन, मावा संगे नीवा बाताल कबळि? निमा बह माक बूळे कीयलाह वातिना? निमा बोनिन इनजोर पुनोना? निमा देवुळ लोहतोग़ पवित्र मन्कनिन आंदिन!” इता. 25 मति येसु अद देयमतुन, “केमेन मन! वेनग्डाहि पेसिस अन!” इनजोर दगा ईतोग़. 26 अस्‍के अद देयमि ओग़ मन्‍कन तेल्‍ह्‌च मनजि, जोरते केयिसि ओनग्डाहि पेसिस वितता. 27 इदिन ऊळिस अगा मतोर लोकुर बामिसि, ओर्विह्‌क-ओर्वोग़ वळ्ह्‌कसोर, “इद बेद्रमता पूना पोल्‍लो रा? वेग़ अदिकरते देयह्‌किन वने उकुम ईस्‍तोग़, अव वेना पोल्‍लोतुन केंजिह्‌ता,” इतोर. 28 पया इद येसुना पोल्‍लो चट्‌पिटे गालिल पटटाङ ऐरे-गूरेताङ नाह्‌कनगा आबुर आता.

29 अद्रमे पया येसु तनाङ कग़यवालोर याकुबिन, योहनिन पोसि पार्तनाता लोताहि पेसिस सिमोन, आंद्रेयाल वेर तमोग़ इर्वुरा लोन अतोग़. 30 अद वेलाते सिमोनना आतोह्‌क दंड पोस मता, इद पोल्‍लो बोरो येसुन वेहतोर. 31 पया येसु तानगा अनजि ताना कयदुन पोस तेहतोग़, तेहतस्‍केन ताना दंड रेगता. पया अद ओरिह्‌क जावा-एग़ कीसीता.

32 अदे दिया मुलतस्‍के वारमता पोल्‍वादिया मारता.*1:32 लूकाल 4:40 वचनता कालनोट ऊळाटु. अदिनेनाह्‌क यहुदिरिह्‌क कबळ कीयलाह पोलिंदु. अस्‍के लोकुर सबे दुकिनोरिन ओसो देयह्‌क पोयतोरिन येसुनगा ततोर. 33 पूरा नाग़मेटोर इतपे मुलु अद लोता मुनेह जमा आतोर. 34 पया अलग-अलग रीतताङ दुकिने तिपल आसोर मतोरिन येसु सव्रे कीतोग़. अहे ओसो वेल्‍लाटोरिन देयह्‌क पोस मताङ, अविस्‍किन वने ओरग्डाहि पेसिह कीतोग़. देयह्‌कु येसु बोग़ आंदोग़ इनजोर पुन्‍दुङ, अदिनेनाह्‌क अविस्‍किन वळ्ह्‌कलाह एवोग़.

35 पया सकरताङ कोग़्क कूसिह्‌पान येसु तेदिसि, बोरे लेवगा अन्‍ज पार्तना कीतोग़. 36 अस्‍के पया सिमोन ओसो ओना तोळतोर, येसुन पर्ह्‌कलाह अतोर. 37 अनजि येसुन ओर दोर्किह कीतोर, अस्‍के ओन इतोर, “नाटेनोर वेल्‍लाटोर लोकुर नीक पर्ह्‌कलाह आतोर,” इतोर. 38 मति येसु ओरिन इतोग़, “आयो! माट इकेडाङ ऐरे-गूरेताङ नाह्‌कने दाकल. अगा वने नाक देवुळता पोल्‍लोतुन पोकुर कीया पोयह्‌ता, इदे कबळतुह्‌क नना वातन,” इतोग़. 39 अद्रम पया येसु यहुदिराङ पार्तनाताङ लोह्‌कनगा अनजि पोकुर कीसोर पूरा गालिल पटटे तिरियतोग़. अहे देयह्‌क पोस मतोरग्डाह देयह्‌किन पेसिह कींदोग़.

40 उंद दिया ओर्वोग़ मोंडरोगमतोग़ मन्‍कल येसुनगा वातोग़. अद्रमतोरिन यहुदिर कळ्‍वोग़ तासिंदुर. ओग़ येसुनगा वासि मिंडाङ कोटिसि इद्रम अर्जि कीतोग़, “नीवा विचर मतेके नाक सव्रे कीसि नावा कळ्वोग़तुन तेंड पग़यकिन,” इतोग़. 41 इतस्‍के येसुह्‌क जीवा नोता. अदिनेनाह्‌क पया “अह इतेके अले, नावा विचर मन्ह्‌ताये! निमा बेस आम,” इनजोर पया यहुदिरा मोळतोन इटवद नोमळता अडोतुन नोमवा, येसु कय आहच ओन बोयतोग़. 42 अस्‍के चट्‌नेन ओना मोंडरोगम मायता, ओग़ बेस आतोग़. 43-44 पया येसु ओन इद्रम उकुम ईतोग़ इतेके, “इंजेके मोंडरोगमता कळ्वोग़तुन तेंडनद मोक ईयलाह मोसानाङ अडोङ मतपु निमा कुदि अनजि ‘बेस आतन’ इनजि बूमयाह्‌क मात्रम तोहा. बूमयानके अनेके इद पोल्‍लोतुन बोन्‍के बार वेहमा. ‘सव्रेम आताह्‌कु मोक ईतोग़,’ इनजि बूमयाल सबेटोरिन वेहतनोग़, अस्‍के नियगा मोंडरोगमता कळ्‍वोग़ मनो आयग़ा, नीकु देवुळतुन मोळ्कलाहि पोलग़ा,” इनजोरे मोळतोन येसु वेहच लोहतोग़. 45 निमा बोने वेहमा इनजोर वेहच आय मति, ओग़ मन्‍कल अद पोल्‍लोतुन पका आबुर कीतोग़. अदिनेनाह्‌क येसुह्‌कु नाटेनगा दायलाह अग़ दोर्को. ओग़ पलते लोकुर लेवगान मनदोग़. तेला मति लोकुर ईनाह-आनाह ओनगा वांदुरे.