1 उचुक दियाना पया, येसु ओसो वने कापेर्नाग़ मल्‍स वातोग़, वातस्‍के ओग़ लोन मन्ह्‌तोग़ इनजोर इद पोल्‍लो लोकुर केंजतोर. 2 पया वेल्‍लाटोर लोकुर अद लोतगा जमा आतोर, काल ओगलाह जागा इले, अग़दगा वने पूरा तिळ्ह्‌प अरस मतोर. येसु ओरिन देवुळता पोल्‍लो वेहचोर मतोग़. 3 अचोटेन नाल्वुर मन्‍कलोर ओर्वोग़ कय्‍क-काल्‍क वाग़तोग़ मन्‍कन कांजिसि येसुनगा ततोर. 4 मति लोकुर अग़दुह्‌क तिळ्ह्‌प अरनाह निंदिस मतोर, वेरिह्‌क येसुनगा एवयलाह अग़ दोर्को. पया वेर लोता वेसळतगा तग़्ङिसि, येसु मतद अरातगाह्‌क कटुल पोदनाह बेरा बूका कीतोर. बूका आतस्के अद बूकाताहि ओग़ तेदवोग़ मन्‍कन कटुल अग़्के येसुना मुनेह रेहतोर. 5 ओरा विस्वसतुन ऊळिसि, कय्‍क-काल्‍क वाग़तोन येसु इद्रम इतोग़, “अल बाबा! नना नीवाङ कसुर्कना मापि कीय्ह्‌नन,” इतोग़. 6 अस्‍के अगा उच्‍वुर सास्‍त्रमगूरुर उदिस मतोर. ओर येसु इतद पोल्‍लोतुन केंजिसि आपुना-आपोग़े इद्रम विचर कीया बोटटोर इतेके, 7 “ऊळा वेग़ मन्‍कल उगसे देवुळतन इतपे बह पोंगिह्‌तोग़! देवुळतुन विळ्‍सिस इतेके बोग़े पापमतुन मापि कीया पग़वोग़,” इनजोर विचर कीया बोटटोर. 8 पया येसु चट्‌ने ओरा पोटाताङ विचर्किन पुनजि ओरिन इद्रम इतोग़, “मीवा पोटाते नावा लोप्पा बाराह्‌क कुळ्सा वळ्ह्‌किह्‌निर रा? 9 वेग़ कय्‍क-काल्‍क वाग़तोन ‘नीवाङ कसुर्कना मापि आता,’ इह इतेके अल्‍कोया? बार वेनु ‘तेदिस नीवा कटुल पोस अन,’ इनदनद अल्‍कोया? 10 इंजेके नना माने-मन्‍कना नडुम पुटटोनन मनजि, देवुळतेनाह नयगा इद बूमते पापमतुन मापि कीयनद अदिकर इंका मन्‍ह्‌ता इनजि मीक तोहतकन,” इतोग़. इनजि कय्‍क-काल्‍क वाग़तोग़ मन्‍कन इद्रम इतोग़, 11 “नना नीक वेहतलाह आतन, अले! तेदा! नीवा कटुल पोस लोन अन,” इतोग़. 12 इताहे ओग़ मन्‍कल तेदतोग़, तेदिसि तना कटुलतुन पोस सबेटोरा मुनेहतुह्‌क पेसिस अतोग़. इदिन ऊळिसि अगा जमा आतोर लोकुर पका बामतोर. बामिसि देवुळतुन जोहर कीसोरे, “माट इद्रमता कबळ बेस्‍केन ऊळवाल अयो!” इनजोर इतोर.

13 पया येसु अद लोताहि पेसिसि गालिल सम्‍दुरता दड कचुलिये अतोग़, अस्‍के वेल्‍लाटोर लोकुर ओना पयाह वातोर. पया येसु ओरिन काग़्हता बोटटोग़. 14 पया अग्डाह अनेके सिद्‌वा एतना नाकातगा अल्‍पुना मग़ि लेवि पेदिरतोन सिद्‌वा एतह्‌पा येसु ऊळतोग़. ऊळिसि “नावाङ कग़यवानिन आयकिन दय!” इतोग़. इतस्‍के लेवि तेदिसि येसुना संगे अतोग़. 15 पया येसु तनाङ कग़यवालोरा संगे लेविना लोतगा गाटो तिनदलाह उदिस मतोग़. अस्‍के येसुना पयाह वास मतोर वेल्‍लाटोर सिद्‌वा एनवालोर ओसो पापिर वने तिनदलाह उदतोर. 16 येसु सिद्‌वा एनवालोरा संगे, पापिरा संगे गाटो तिनदनदिन, परुसिर ओसो सास्‍त्रमगूरुर ऊळतोर. ऊळिसि “येसु एग़्ङ वानाहि बेद्रम वेरा संगे तिनदना-उनडना कीस्‍तोग़ रा?” इनजोर ओनाङ कग़यवालोरिन कट्‌ला कीतोर. 17 येसु ओरा वळ्ह्‌कनदिन केंजिसि ओरिन इतोग़, “रोगमलेवोरु डाक्‍टरनके अनोर, मति रोगम मतोरे तमा दुकतुन पोहतलाह दास्‍तोर, अद्रमलेह्‌काने माट नेह्‌नोरोम इनवालोरिन आयो, मति पापिरिन केयलाह नना वातन,” इतोग़.

18 देवुळता पेदिरते एग़ मीहवाल योहननाङ कग़यवालोर ओसो परुसिर उपस कींदुर, मति येसुनाङ कग़यवालोर उपस केवोर. अदिनेनाह्‌क ओर येसुनगा वासि इद्रम इतोर, “योहननाङ कग़यवालोर ओसो परुसिराङ कग़यवालोर उपस कीस्‍तोर, मति नीवाङ कग़यवालोर बेद्रम उपस केवोर?” इतोर. 19 अस्‍के कग़यवालोरा संगे नना मनेके ओर उपस कीयनद ओप्‍पो, इदिन तोहतलाह येसु ओरिन इतोग़, “मर्म-पेकाल तमा संगे मनदह्‌पा मर्मिङ अतोर उपस कीया पग़यह्‌तोरा? मर्म-पेकाल ओरा संगे मनाहजोम ओर उपस कीया पग़वोर. 20 मति कोटुलतोर वासि मर्म-पेकान ओरग्डाहि एग़्पिह कीसि पोस ओयनुर इद्रमता वेला वायग़ा, अद तूकने ओर दुकम आसि तिनोर आयनुर,” इतोग़.

21 इतापया तना काग़्हतव पूनाङ पोल्‍लोनगा, पाळ्‍ना रिवजताङ पोल्‍लोङ कलिय पग़वोङ इनजोर तोहतलाहि रेंड पुन्‍पिह कीयनव पीटोने इद्रम इतोग़, पाळ्‍ना गेंदेता अग़ता बूकातगा मेतलाह पूना गेंदे बोग़े ओल्‍सोग़. ओल्‍सतेके पूना गेंदे पाळ्‍ना गेंदेतुन अग़्हचि, इंका ओसो बेरा बूका कीयग़ा. 22 अद्रमे ओयवदु पूना अंगुर जोमातुन पाळ्‍ना तोलाजोर्काते बोग़े एन्‍दोग़. एन्‍तेके अंगुर जोमा जोर्कातुन अग़्हतह्‌ता, अग़तस्‍के अंगुर जोमा ओसो जोर्का रेंड आसि बूळेम आस्‍ताङ. मति पूना पूला अंगुर जोमातुन पूना जोर्काते एन्‍दिह्‌तोर.

23 उंद दिया इद्रम आता इतेके, येसु वारमता पोल्‍वादियाते गोह्‌क अय्स मतव बोराङो पोलह्‌कना नडुमतुह्‌क अनजोर मतोग़. अनेके येसुनाङ कग़यवालोर गोह्‌कनाङ एन्‍किन ऊचिंदुर. 24 तेन ऊळिसि अगा मतोर परुसिर येसुन इतोर, “पोल्‍वादियाते बेदे कबळ कीयलाह पोलो, तान नीवाङ कग़यवालोर बह नोमोर?” इनजोर कट्‌ला कीतोर. 25 अस्‍के येसु ओरिन इद्रम इतोग़, “मुनेटा कालमते दाविद राजाल तनाङ ऐंगेटोर बार, कग़्व वसतस्के ओग़ बह कीतोग़? 26 अबियातार इनवाल पेर्माल मतोग़, अस्‍के ओग़ देवुळता रावुळतगा बह अतोर, अगा देवुळतुह्‌क वाटटाङ आरिङ बूमयालोरिन विळ्‍सिस, दुस्रोरिह्‌क तिनदलाह पोलो आंदु. पोलवेकाय अवे आरिन पेर्माल ओरिह्‌क तिनदलाह ईतोग़, तेन मीट देवुळता सास्‍त्रमते बेस्‍केन अर्वविरा? अस्‍के देवुळि दाविद राजानु ‘तपतिन’ इनो अले,” इतोग़. 27 ओसो येसु ओरिन इतोग़, “देवुळि वारमता पोल्वादियातेनाह्‌क मन्‍कन पुटिह केवो, मति मन्कनेनाह्‌क पोल्वादियातुन कीता. 28 अदिनेनाह्‌क नना माने-मन्‍कना नडुम पुटटोनन आंदन, पोल्‍वादियाते पोलनदिन, पोलवदिन वेहतनद अदिकर नाक मन्‍ह्‌ता,” इनजोर इतोग़.