1 अद्रमे ओसो उंद देबा, येसु पोल्‍वादियाते यहुदिरा पार्तनाता लोन अतोग़. अगा ओर्वोग़ वाग़ता कयदोग़ मतोग़. 2 अद लोतगा उच्‍वुर परुसिर मतोर. पोल्‍वादियाते ओग़ मन्‍कना कयदुन येसु सव्रे कीस्तोग़ा, बार केवोग़ा, इनजोर ऊळसोर मतोर. पोल्‍वादियाते सव्रे कीतेके येसुना पोग़ोन अद दिया कबळ कीयनद तप तोहतकोम इनजोर पट ऊळिंदुर.*3:2 लूकाल 6:7 कालनोट ऊळाट. 3 येसु वाग़ता कयदोनु, “तेदिसि नडुम वास निल्म,” इतोग़. 4 पया येसु अगा मता मन्‍कलोरिन इद्रम ताल्‍ह्‌कतोग़, पोल्‍वादियाते बाताल पोलिह्‌ता? बेसता कबळ कीयनदा, बार लाग्‍वा कबळ कीयनदु? जीवातुन पिसिह कीयनदा, बार बूळे कीयनदु वेहाट! इतोग़. मति बोरे बह वळ्ह्‌कोर. 5 येसु ओङते सबेटोरिन ऊळतोग़, मति ओर कैंगम बुदते मतदिन ऊळिसि येसु नारज आतोग़. आसि वाग़ता कयदोन “नीवा कय आहा!” इतोग़, अस्‍के ओग़ कय आहतोग़. आहतस्के ओना कय सव्रेम आता. 6 पया परुसिर अद लोताह पलत पेसिसि “येसुन बह कीस हव्ककल,” इनजोर एरोद राजाना तुंगातोरा संगे कलियिसि वळ्ह्‌किंदुर.

7 अद्रमे पया येसु तनाङ कग़यवालोरिन पोसि सम्‍दुरतके अतोग़. गालिल पटटोर वेल्‍लाटोर लोकुरा मांदि येसुना पेग़्के अतोर. 8 येसु कीतद बामिह कीयनद कबळतुन केंजिसि येरुसलेम सहरताहि, अद सहरता यहुदा पटटाङ दुस्राङ नाह्‌कनाहि, इदुमिया पटटाहि, योर्दन बेरेग़ता अबरताङ नाह्‌कनाहि, सोर, सिदोन सहर्कनाहि, अव सहर्कना एरे-गूरे मनदनव नाह्‌कनाहि वेल्‍लाटोर लोकुर येसुनगा वातोर. 9 वेल्‍लाटोर लोकुर मताह्‌कु, लोकुर तना पोग़ोन अरमाकिर इनजोर येसु तनाङ कग़यवालोरिन, “उदिस काग़्हतलाह नाक उंदि ओडा तयर कीम्‍ह्‌टु,” इनजोर इतोग़. 10 येसु वेल्‍लाटोरिन सव्रे कीस मतोग़, अदिह्‌क बेमरतोर ओन बोयलाह दोबेङ-नूकेङ आंदुर. 11 देयह्‌क पोयतोर वने लोकुरा नडुम मतोर. अव देयह्‌क येसुन ऊळतेक अचोन ओना मुनेह अरसि, “निमा देवुळता मग़निन!” इनजोर जोरते केयिंदुङ. 12 मति येसु, “नना बोनन इनजि बेगान बह वेहमाटु!” इनजोर अविस्‍किन वेहन्दोग़.

13 अद्रमे उंद दिया येसु गुड्रातगा पोग़ोन तग़्ङतोग़. तग़्ङिसि तन्‍क विचर वातोरिन तनगा केयतोग़. केयतस्‍के ओर ओनगा अतोर. 14 अतस्‍के तना संगे मनजि कग़यलाहि, देवुळता पोल्‍लोतुन पोकुर कीयलाह लोहतलाहि, 15 मन्कलोरग्डाह देयह्‌किन पेसिह कीयनद अदिकर ईयलाहि बारा मन्‍कलोरिन निल्‍पिह कीतोग़. 16 ओर बारा मन्कलोराङ पेदिर्क इद्रम मन्‍ह्‌ताङ: सिमोन वेन पत्रु इनजोर येसु दुस्रा पेदिर तासतोग़. 17 जेबेदिनाङ मग़्कु याकुब ओसो योहन वेर तमोग़ इर्वुर, बुवनरगिस इतेके गुळ्न्जना लेह्‌काडोर इनजोर येसु वेरिन दुस्रा पेदिर तासतोग़. 18 आंद्रेयाल, पिलिप, बार्तोलोम, मत्याल, तोमाल, अल्‍पुना मग़ि याकुब, तदु इनवाल यहुदाल, सिमोन (वेग़ रोम सर्करता अडम पार्टितोग़ मतोग़). 19 ओसो केर्योत नाटेनोग़ यहुदाल, वेग़े आक्रिते येसुन कोंटेतोरा कयदे पोसीतोग़.

20 पया येसु कापेर्नाग़ तना मतद लोतगा वातोग़. अस्‍के ओसो वने इचोन लोकुर जमा आतोर इतेके येसुह्‌क ओसो ओनाङ कग़यवालोरिह्‌क गाटो तिनदलाह वने अग़ दोर्को. 21 येसुना लोतोर इद पोल्‍लोतुन केंजिसि, ओन ततलाह अतोर. बाराह्‌क इतेके, येसु बय्माङ आतोग़ इनजोर लोकुर वळ्ह्‌किंदुर.

22 उच्‍वुर सास्‍त्रमगूरुर येरुसलेम सहरताहि वास मतोर. ओर इद्रम इतोर, “वेन देयह्‌कना मुक्याल पोयता, तानाय साय्ताते देयह्‌किन मन्कलोरग्डाहि पेसिह कीस्‍तोग़ रा!” इनजोर इतोर. 23 अदिह्‌क येसु ओरिन तनगा केयिसि पुन्‍पिह कीयनव पीटोने इद्रम वेहतोग़, “देयह्‌कना मुक्याल बाराह्‌क तनाङ देयह्‌किन पेसिह कीयग़ा? 24 बेदाय राजेमते तमाय नडुमि कोंटेङ पुटटेके अद राजेम निच मनो. 25 अहे बेदाय लोतगा कोंटेङ पुटटेके अद लोन निच मनो. 26 अद्रमे देयह्‌कना मुक्याल ओसो ताना तोळताङ देयह्‌क तमा-तमा विरुद आतेके अविस्‍कना लाव मनो आस्‍ता. 27 मति उंद लोतगा नेङिस लूटे केवाल मुने अग्डोन पळयोन दोहवालेवा अग्डा मादुन लूटे कीसि पेहता पग़वोग़. मुने ओन दोहतेकेने ओना लोतुन वेग़ लूटे कीस ओयनोग़. अद्रमलेह्‌का देयह्‌कना पळयोन दोहतेकेने नना देयह्‌किन पूंड पग़यकन,” इनजोर इतोग़. 28-30 ओर येसुन देयम पोयता इनजोर इंदुर. अदिनेनाह्‌क इद्रम तप तोहतनद देवुळता जीवातुन उस्‍कतप आस्‍ता, इदिन तोहतलाह येसु ओसो इतोग़, “नना मीक सेतेम वेहतह्‌नन, मन्‍कना सबे पापमतुनु, अहे देवुळता अडम वळ्‍ह्‌कतदिनु, देवुळि माप कीया पग़यग़ा. मति बोग़ देवुळता पवित्र जीवाताङ कबस्‍किन उस्‍किह्‌तोग़, ओन देवुळि बेस्‍केन माप केवो आयग़ा. ओग़ हातेकाय अद पापम मापि आयवा ओनगा मन्ह्‌ताये,” इनजोर इतोग़.

31 पया अस्‍केन येसुना तलोग़ि, ओनाङ तमोर वातोर. ओर अग़दगा निचि येसु पलत पेसेग़ इनजोर केय लोहतोर. 32 अस्‍के ओना सर्ने उदिस मतोर लोकुर इतोर, “गूरु, नीवा यायालि, नीवा तमोर पलते नीक पर्ह्‌कलाह आतोर,” इतोर. 33 इदिन केंजिसि येसु इतोग़, “नावा यायालि, नावाङ तमोर, नावा लोतोर बोर आंदुर?” इतोग़. 34 पया ओना सर्ने उदिस मतोरिन ऊळिसि इतोग़, “ऊळाट! नावा लोतोर इतेके वेरे आंदुर. 35 बोग़ देवुळ वेहतप ताकिह्‌तोग़, ओग़े नावा दादाल-तमोनलेह्‌का, एलाळ-बायिनलेह्‌का, तलोग़लेह्‌का आंदुर,” इनजोर येसु इतोग़.