Hill Madia तोहचीतव पोल्‍लोङ 11

देवुळता साक्सि एवालोर इर्वुर मन्कलोरु

1 अद्रमलेह्‌काने पया, बोग़ो मति कहतलाहि नाक लाट डुडि ईतोग़.✡ ईतस्के नाक इद्रमता उकुम केंज वाता, “अले! तेदिसि देवुळता मंदिरता मोळ्कनद जागातुन, ओसो अग्डा गर्यातुन कहा, अहे अगा मोळ्कवालोरिन लेका. 2 मति मंदिरता रेसातुन,✡ नाक पुनवोर लोकुरा कयदे ईतन. अदिनेनाह्‌क तान कहमा. ओर मन्कलोरु, मूंड वर्साङ आरुङ नेलाङ आनाह,✡ नावा पवित्र येरुसलेम सहरतुन, तमा काल इळ्न तासनुर.✡ 3 ओर अद्रम कीयनव दियाने, नावा साक्सि एवालोर✡ इर्वुर मन्कलोरिह्‌क, नावा पोल्‍लो वेहतनद अदिकर ईकन. ओर पोता-गेंदेङ उहचि,✡* उंद अजर रेंड नूह्‌क मूंड वीसाङ (1260) दियाङ एवनाह, नावा पोल्‍लोतुन पोकुर कीयनुर,” इन्जि सामिना उकुम नयगा वाता. 4 (देवुळि तना मुनेतोग़ ओर्वोग़ कबुरतोनु, लेका तोहच मता; अद लेकाते, पूरा बूमता सामिना मुनेह निच मनदनव रेंड जय्तुन मराङ† ओसो रेंड चिमलिङ दिसताङ.✡ अस्के वेर इर्वुर साक्सि एवालोरा लोप्पाने, देवुळि तोहच मता.) 5 वेरिन बोराय बूळे कीयलाहि आतेके, वेर इर्वुर मन्कलोराङ तोडिनाहि, किस पेसिसि ओरिन बूळे कीस्ता.✡ वेरा कोटुलतोर निटम इद्रमलेह्‌काने डोलिह्‌तोर. 6 वेर इर्वुर मन्कलोर देवुळता पोल्‍लोतुन वेहतह्‌पा, पेग़ अरमाकि इनजोर, तान रोमिह कीयलाहि, ओरिह्‌क अदिकर दोर्कता.✡ बेस्के ओरिह्‌क विचर वास्ता, अस्के एतुन नेतुर मारियिह कीयलाहि,✡ बूममेटोरिन दुस्राङ-दुस्राङ पीळाने तिपल कीयलाहि, ओर इर्वुरिह्‌क अदिकर मन्ह्‌ता.

7 ओर देवुळता साक्सितुन वेहतनद मारिह कीतस्के, देयमदीपता सिक्सा-बोंदाताहि,✡ किर्स्तुना विरुदतद रकस पेसिस वास्ता,✡ वासि ओर इर्वुरिन लळय कीस्ता. अह कीसि, ओरिन गेल्सिस हव्किह्‌ता.✡ 8 ओराङ सेत्ताङ अद बेरा सहरता अग़दगा अर्स मन्ह्‌ताङ. अदे सहरतगा, ओरा सामिन वने, हव्कनागुटातगा मोल्‍लाङ कोटिस हव्किस मतोर. सोदोम सहरतोरा लेह्‌काने,✡ अहे मिसर देसेमतोरा लेह्‌काने,✡(अद बेरा सहरतोर वने ओसोय लाग्वोरु)!✡‡ 9 सबे देसेह्‌कनोर, सबे कूळिनोर, दुस्राङ-दुस्राङ बासाङ वळ्ह्‌कवालोर, सबे जातिनोर,✡ मूंड दियाना वळ्गा एवनाह, ओराङ सेत्तान ऊळिह्‌तोर. ओराङ सेत्तान गति कीयलाह एवोर.✡ 10 वेर इर्वुर हातोरु देवुळता कबुरतोरु, बूमतोर मन्कलोरिन पकाय तिपल कीस मतोर. अदिह्‌क वेर डोलतोर इनजोर, बूममेटोर गिर्दा आस्तोर.✡ ओसो तमा सोमताहि, ओर्विह्‌क-ओर्वोग़ माल ईस्तोर.✡

11 मति मूंड दियाना वळ्गा आतापया, देवुळि लोहतद ऊकुरि डोलतोरगा ओळियिह्‌ता. ओळियतस्के, ओर तेदिस नितह्‌तोर.✡ तेदिस नितस्के, ऊळवालोर पका रेयिह्‌तोर. 12 अद्रमलेह्‌कान पया, ओर इर्वुर आसि पोग़ोन देवुळदीपताहि जोरते “इगा पोग़ोन वाटु”✡ इनजोर इतद लेङतुन केंजिह्‌तोर. केंजतस्के, ओर इर्वुर मोयुदगा पोग़ोन देवुळतेके दास्तोर.✡ ओर अनेके, विरुद केवालोर ओरिन ऊळिह्‌तोर. 13 अचोटेने बूमि पकाय गल्जिह्‌ता.✡ सहरता दहा चेकाना बूमताहि, उंद चेका सहर बल अरयह्‌ता. बूम गल्जतस्के, एळुङ अजर्क लोकुर डोलिह्‌तोर. पिसतोर लोकुर पकाय रेयिह्‌तोर. रेयिसि, पोग़ोटा देवुळतुन मान ईसि मोळ्किह्‌तोर.✡

14 केंजाट, दुस्रा गोसा मारता, मति ऊळाट! मुचाकेपाता गोसा✡ चट्पिटे वायलाह आता.§

एळुङ मल्काता देवतुलि अकुम ऊरिह्‌ता

15 पया एळुङ मल्काता देवतुलि अकुम ऊरता.✡ अस्के देवुळदीपतगा वेल्‍लाङे लेङिङ जोरते पेसताङ.✡ अव इद्रम इताङ, “दुनियाता राजेम पूरा मावा देवुळता, ओसो अद आचतोग़ पिसिह केवाल राजाना आता.✡ इंजेके अद अमेसा-अमेसातुह्‌क राजेम ताकिह कीस्ता,✡” इनजोर इताङ. 16 इतस्के देवुळता मुनेह राजकुर्सिनगा उदिस मतोर, वीसा नालवुर पेदल्कु,✡ देवुळता मुनेह दंडुम अर्सि तान मोळ्कतोर.✡ 17 मोळ्किसि इद्रम इतोर:

“ए सामि! बेरा लावता देवुळतिन!

अमेसा मतदु, नेंड वने मनदनद देवुळतिन!✡

इंजेके निमा नीवा लावतुन तोहचि, राजेम ताकिह कीयलाह सुरु कीतिन.✡

अदिनेनाह्‌क माट नीक जोहर कीय्ह्‌नोम.

18 नीक माळवोर ओङ आस मतोर,✡

मति इंजेके निमा ओङ आसि.✡

हातोरा नेयम कीयनद कगो एवता.✡

नीवा कबुर वेहवालोर सेवातोरिह्‌क,

नीवा पवित्र लोकुरिह्‌क,

नीक रेयिस ताकवालोर उड्लोर-बेरोरिह्‌क✡, इनम ईयनद कगो एवता.

ओसो बूमतुन बूळे कीतोरिनु, बूळे कीयनद कगो एवता,✡”

इनजोर इतोर. 19 इतस्के अचोटेने देवुळदीपतगा मनदनद मंदिरता अग़ि पङ्ने आता.✡ आतस्के, अगा देवुळि मन्कलोरिह्‌क करल कीस मतद पोल्‍लोतुन, तासिस मतद संदुकतुन नना ऊळतन.✡ अस्के पका मिळ्स्कता, नेकता, गुळ्न्जता, बूम गल्जता, ओसो पकाय आदुर्क अरताङ.✡

✡11:1 11:1 यहेजकेल 40:3; जकर्याह 2:1; तोहचीतव पोल्‍लोङ 21:15-16

✡11:2 11:2 यहेजकेल 40:17

✡11:2 11:2 दानिय्येल 7:25; 12:7; तोहचीतव पोल्‍लोङ 12:6; 13:5

✡11:2 11:2 लूकाल 21:24

✡11:3 11:3 2:13

✡11:3 11:3 पुटमुळि 37:34; 2 शमूएल 3:31; 1 राजा 21:27; 2 राजा 19:1-2; नहेम्याल 9:1; एस्तर 4:1; देवुळताङ पाटाङ 69:11; योएल 1:13; योनाल 3:5-6,8

*11:3 11:3 यहुदि लोकुर बेदाय दुकम पुटटेके, पोता-गेंदेङ उहन्दुर.

†11:4 11:4जय्तुन मराना नेयदे चिमलि पोतिह्‌ता.

✡11:4 11:4 जकर्याह 4:1-14

✡11:5 11:5 2 राजा 1:9-12; यिर्मयाह 5:14; तोहचीतव पोल्‍लोङ 9:17-18; 13:13

✡11:6 11:6 1 राजा 17:1; लूकाल 4:25

✡11:6 11:6 पेसमुळि 7:17-20; तोहचीतव पोल्‍लोङ 8:8; 16:3-4

✡11:7 11:7 9:1

✡11:7 11:7 13:1-3; 17:8

✡11:7 11:7 दानिय्येल 7:21; तोहचीतव पोल्‍लोङ 12:17; 13:7

✡11:8 11:8 पुटमुळि 18:20; यशायाह 3:9; यिर्मयाह 23:14; यहेजकेल 16:49

✡11:8 11:8 पेसमुळि 3:9

✡11:8 11:8 यिर्मयाह 23:14; यहेजकेल 23:19,27

‡11:8 11:8 सोदोम सहर करब कबस्कने निंदिस मता. मिसर देसेम बार देवुळता लोकुरिन तिपल कीयनद देसेम मता.

✡11:9 11:9 5:9-10; 10:11

✡11:9 11:9 1 राजा 13:22; देवुळताङ पाटाङ 79:2-3

✡11:10 11:10 3:10

✡11:10 11:10 नहेम्याल 8:10,12; एस्तर 9:19,22

✡11:11 11:11 यहेजकेल 37:5,9,10,14

✡11:12 11:12 4:1

✡11:12 11:12 2 राजा 2:11; बळयिर 1:9

✡11:13 11:13 6:12; 8:5; 16:18

✡11:13 11:13 14:7; 16:9; 19:7

✡11:14 11:14 8:13; 9:12

§11:14 11:14 मुनेता गोसा 9:1-12 अगा वेहतद मन्ह्‌ता, दुस्रा गोसा 9:13-21 अगा वेहतद मन्ह्‌ता.

✡11:15 11:15 10:6-7

✡11:15 11:15 19:1,6

✡11:15 11:15 12:10

✡11:15 11:15 पेसमुळि 15:18; दानिय्येल 2:44; 7:14,27; लूकाल 1:33

✡11:16 11:16 मत्याल 19:28; तोहचीतव पोल्‍लोङ 4:4

✡11:16 11:16 4:10; 5:8,14; 7:11

✡11:17 11:17 16:5

✡11:17 11:17 19:6

✡11:18 11:18 देवुळताङ पाटाङ 2:1

✡11:18 11:18 देवुळताङ पाटाङ 2:5; 110:5

✡11:18 11:18 दानिय्येल 7:10; तोहचीतव पोल्‍लोङ 20:12

✡11:18 11:18 देवुळताङ पाटाङ 115:13; तोहचीतव पोल्‍लोङ 13:16; 19:5,18

✡11:18 11:18 13:10; 18:8

✡11:19 11:19 14:15,17; 15:5

✡11:19 11:19 इब्रितोर 9:4

✡11:19 11:19 4:5; 8:5,7; 16:18,21