1 इव सबे आतापया, पोग़ोन देवुळदीपतगा, वेल्‍लाय मुलु रोदा पोयतना लेह्‌का रोदा पोयतनद केंजतन. ओर इद्रम इतोर: “हलेलुया! मावा देवुळिये मन्कलोरिन पिसिह कीयनदु; मावा देवुळिये पका बेरा वेह्‌चते उदता. अदे लावता देवुळि.*19:1“हलेलुया” इद इब्रि पोल्‍लो आंदु. इद पोल्‍लोता अर्तमि, “देवुळतुह्‌क मान आयि” इद्रम आस्ता. 2 ताना नेयम कळ्‍कते मन्ह्‌ता; अद कळ्कते नेयम कीस्ता. अद बेरा बोगे आंचाळि तना साट्याल कबळते पूरा बूमतोरिन कळ्वोग़ कीस मता. देवुळता मन्कलोरिन अद आंचाळ हव्कताह्‌कु, देवुळि ओरेनाह्‌क इंजेके तान्क सिक्सा ईसि बद्ला एता,” इनजोर रोदा पोयतोर. 3 ओर ओसो उंद मल्का इतोर, “हलेलुया! अद सहर कर्वनद उंडुलि अमेसा-अमेसा पेससोरेन मनदग़ा,” इनजोर रोदा पोयतोर. 4 वीसा नाल्वुर पेदल्कु ओसो नालुङ आस जन्वर्कु, “आमेन, हलेलुया” इनजोर कुर्सितगा उदिस मतद देवुळतुन दंडुम अरसि मोळ्कतोर. 5 कुर्सितग्डाहि उंद लेङ इद्रम इता: “ए देवुळता मन्कलोरिर! तान्क रेयवालोर उड्‌लोरिर, बेरोरिर! देवुळतुन जोहर कीम्ह्‌टु,” इनजोर इता. 6 इतस्के पया वेल्‍लाटोर लोकुर रोदा पोयतना लेह्‌काडा लेङ केंजतन. एग़ गोदोग़ उसना लेह्‌का ओसो गुंळ्जना लेह्‌का अद केंज वांदु. अद लेङ इद्रम इन्दु: “हलेलुया! सामि, मावा देवुळि, पका लावता, राजेम ताकिह कीस्ता. 7 माट गिर्दा-वेळ्का आयकल! ताना जोहर कीकल! गोरे पिलाताङ मर्मिङ एवताङ. मर्मिनेनाह्‌क मर्म पिला तयर आता. 8 तान्क उहतलाह कुलुल मनदनद, मिळ्सकनद, डागिल लेवद गेंदे दोर्कता.” इद कुलुल मनदनद गेंदे इतेके, देवुळता मन्कलोर कीतव सेतेमताङ कबस्क आंदुङ.

9 पया अद देवतुल नाक इता, “इद्रम रासा: गोरे पिलाताङ मर्मिह्‌क देवुळि बोरिन-बोरिन कव्स गोग़िस तिनदलाह केयता ओर देय्वातोरु,” इनजोर इता. ओसो इता, “इव पोल्‍लोङ देवुळताङ सेतेम पोल्‍लोङ आंदुङ,” इनजोर इता. 10 इतस्के नना अद देवतुलतुन दंडुम अरयलाहि तानाङ काल्क अरतन; मति अद इता, “नाक दंडुम अर्मा! नीवा लेह्‌कान, नीवा ऐंगेटोर विस्वसिरा लेह्‌कान नना वने देवुळता सेवा केवानन आंदन. माट येसुनेनाह्‌क साक्सि ईय्ह्‌नल. देवुळतुन निमा दंडुम अर्म. देवुळता पोल्‍लो ततनद इतेके, ताना अर्तम, येसुना साक्सि ईयनदु,” इनजोर इता.

11 पया देवुळदीप पङने आस मतद ऊळतन. अगा उंद पांड्रि कोडा मता. ताना पोग़ोन ओर्वोग़ उदिस मतोग़. ओना पेदिर बर्वस लायकतोग़, सेतेमतोग़. ओग़ सेतेमते नेयम कीस्तोग़ ओसो लळय कीस्तोग़. 12 ओनाङ कोंडाङ किसतळ्मिना लेह्‌का रगरग आस मताङ. ओना तलातगा वेल्‍लाङे राजटोपिङ मताङ. ओना पेदिर वने रासिस मता. अद पेदिरतुन ओग़े पुन्ज मतोग़. ओन विळ्सिस बोग़े दुस्रोग़ मन्कल पुनोग़. 13 ओग़ नेतुरतगा मुळ्हच मतद गेंदे उहचि मतोग़. ओना पेदिर मता देवुळता पोल्‍लो. 14 देवुळदीपतोर सीपय्क पांड्रि कोडाना पोग़ोन उदिसि, ओना पयाह-पयाह अंदुर. ओर उहच मतव गेंदेङ कुलुल मताङ, पांड्रि मताङ, डागिल लेवा मताङ. 15 लाग्वोर सबेटोरिन कोटलाहि ओना तोडटाहि ओळतद तल्वर कसेग़ पेसिस मंदु. ओग़ ओरिन पूरा अदिकरते ताकिह कीयनोग़. पका लावता देवुळता बेरा ओङ इनदनद अंगुर जोमा पेग़नद बोंदातगा ओग़ अंगुरकिन विह्‌कनोग़. 16 ओना गेंदेतगा ओसो कोग़्कगा तना पेदिर रासिस मता. अद इद्रम मता: सबेटोर राजालोरा राजाल, सामिरा सामि इनजोर मता. 17 अचोटेने उंद देवतुल पोळ्दतगा निच मतद ऊळतन: अद पोग़ोन पग़यनव सबे पिटेन जोरते इद्रम इता: “अलेट! देवुळि तयर कीतद कुळ्प तिनदलाह जमा आम्ह्‌टु! अगा मीक पकाय तिनदलाह दोर्किह्‌ता. 18 राजालोर, साय्बलोर, सीपय्कु, कोडाङ ओसो अविस्‍कना पोग़ोन उदिस पूंडवालोर, ओर्युल मनवोर, ओर्युल मनवालोर, साव्कर्क, उड्‌लोर, बेरोर सबेटोर मन्कलोराङ अविङ तिनदकिर,” इनजोर इता. 19 इतस्के नना ऊळतन: अद जन्वर,†19:19 इद पुस्तकता 13:4 वचन ऊळाट. बूमतग्डोर राजालोर, ओराङ सबेटोर सीपय्क जमा आस मतोर. ओरु पांड्रि कोडाता पोग़ोन उद्‌तोना ओसो ओनाङ सीपय्कना संगे लळय कीयलाह जमा आस मतोर.

20 जमा आस मतोर, पया किर्स्तु अद जन्वरतुन पोयतोग़. जोल कबुरतोन✡19:20 तोहचीतव पोल्‍लोङ 16:13 वने पोयतोग़. ओग़ जोल मन्कल, अद जन्वरता मुनेह बामनाङ सीनाङ तोहंदोग़. बोर अद जन्वरता सीना कीतोर ओसो ताना बोमातुन मोळ्कतोर ✡19:20 तोहचीतव पोल्‍लोङ 13:12-16 ओरिन लेसिह कींदोग़. किर्स्तु अद जन्वरतुन ओसो जोल कबुरतोन मळ्गनद किसता बटटगा जीवा अग़्केन वाटिसीतोग़. 21 कोडाता पोग़ोन उदिस मतोग़ु, जन्वरता तोळतोरिन तना तल्वरते हव्कतोग़. अद तल्वर कसेग़ ओना तोडटाहि पेसिंदु. पया सबे पिटेङ ओराङ अविन पोटा पंजनाह तिताङ.