1 इद सीटटुन नना पीबे पेदिरतद विस्वसि आंचाना कयदे लोहतह्‌नन, अद किंक्रिया✡16:1 बळयिर 18:18 नाटेनोर विस्वसिरगा देवुळता सेवा कीस्ता. 2 अद बेस बुदता आंचाळि, वेल्‍लाटोरिह्‌क तोळ ईता, अहे नाक वने तोळ ईता. अदिनेनाह्‌क अद देवुळता मयाळ आंदु इनजोर तान बेस-नेह्‌ना ऊळाटु. ओसो तान्क बातालाय गर्ज अरतेक मीट तोळ ईम्ह्‌ट.

3 पिरिस्किला, अक्‍विला वेर आळ इर्विरिन आस नना सीता कीय्ह्‌नन इनजोर ओरिन वेहाटु.*16:3 बळयिर 18:2-3 ते वेहतपु, रोम राजेमता कलोदियुस राजाल सबे यहुदिरिन, इतालिया पटटा रोम सहरताहि पेसिस दायलाह उकुम ईस मतोग़. अदिह्‌क ओर आळ इर्वुर इतालिया पटटाहि पेसिसि, कुरिंत सहरतगा वातोर. अगाने पोलु येसुना पोल्‍लो वेहतलाह वातोग़, वातस्के ओरिन कलियतोग़. कलियतस्के ओर पोलुना सेवातुह्‌क तोळ आया बोटटोर. बेचोको वर्साना पया, कलोदियुस राजाल हातापया, ओर इर्वुर रोम सहरते मलतोर. ओर नावा संगे किर्स्तु येसुना सेवा केवालोर आंदुर इनजोर पुतिरे. 4 ओर तमा जीवाता पर्वा केवा, नाक पिसिह कीयलाहि तयर आस मतोर. इद पोल्‍लोतुन नना बेस्केन माग़्ङोन, अहे यहुदि आयवोरविस्वसिरा मुडोर वने माग़्ङोर. 5 ओरा लोतगा जमा आयवालोर विस्वसिरा मुडुह्‌क नना जय येसु इह्‌नन.

ओसो मियग्डोर दुस्रोर विस्वसिरा वने सीता वास्ता. नावा गोतयाल इपनितुसिह्‌क जय येसु इह्‌नन, पूरा आसिया पटटगा किर्स्तुन मुने विस्वस कीतोग़ ओग़े आंदोग़. 6 मरियाल मीक तोळ ईयलाहि पका एपुर पोहच सेवा कीता, तान्क वने नना जय येसु इह्‌नन. 7 नावा यहुदि जाततोर अन्द्रनिकुस, यूनिया, वेर इर्वुरिह्‌क नना जय येसु इह्‌नन. किर्स्तुना बळयिरग्डाहि ओर कम आयोर. नना विस्वस कीयनामुनेन ओर विस्वस कीतोर ओसो नावा संगे जेलते वने मतोर. 8 सामिनेनाह्‌क नावा गोतयाल अम्पलियातुसिह्‌क नना जय येसु इह्‌नन. 9 ओसो नावा गोतयाल इस्तुकुसिना सीता कीय्ह्‌नन, किर्स्तुना सेवाते मावा ऐंगेटोग़ उरबानुसिह्‌क नना जय येसु इह्‌नन. 10 अपिलेसिह्‌क नना जय येसु इह्‌नन, ओग़ तिपल्कने विस्वसतुन विळ्सवा किर्स्तुन पोस मंदोग़. अरिस्तुबुलुसना लोते मनवालोर सबे विस्वसिरिह्‌क नना जय येसु इह्‌नन. 11 नावा जाततोग़ एरोदियोनिह्‌क नना जय येसु इह्‌नन. नरकियुसिना लोतोर विस्वसिरिह्‌क नना जय येसु इह्‌नन. 12 तुरुपेनि ओसो तुरुपोसि इव रेंड आस सामिना सेवा कीयनविस्किह्‌क नना जय येसु इह्‌नन. परसिसिह्‌क वने नना जय येसु इह्‌नन, अद बेस गूनमता आंचाळि, पका एपुर पोहचि सामिना सेवा कीता. 13 रूपुस ओसो ओना तलोग़, वेरिह्‌क नना जय येसु इह्‌नन.†16:13 येसुना हव्कनागुटा कांजवाल सिमोन, रुपुसिना तपे आंदोग़ बहे (मार्कल 15:21). ओग़ पका बेसतोग़ विस्वसि आंदोग़. ओना तलोग़ इतेके नावा अवाना लेह्‌काने. 14 असुंकिरितुस, पिलगोन, हिरमेस, पत्रुबास, हिरमोस ओसो ओरा संगे कलियवालोर विस्वसिरिह्‌क नना जय येसु इह्‌नन. 15 पिलुलगुस, यूलिया, उलुम्पास, नेर्युस ओसो ओना एलाळि, अहे ओरा संगे कलियवालोर सबेटोर विस्वसिरिह्‌क नना जय येसु इह्‌नन.

16 मीट लोकुरिर ओर्विह्‌क-ओर्वोग़ जीवा वाटसोरे जोहर कीम्ह्‌टु. अहे सबे नाह्‌कने मनवालोर विस्वसि मुलु वने मीक जय येसु इनदलाह आतोर.

17 इंजेके, मावोरिर! इद उंद पोल्‍लोतुन अर्जि कीस वेहतलाह आतन, उय्तुर मन्कलोर मन्ह्‌तोर, ओरु मीट कग़यतव पोल्‍लोन नमवा दुस्राङे पोल्‍लोङ काग़्हचि, विस्वसिरा मुडोरगा कोंटेङ पुटिह कीस्तोर. ओसो बोर-बोरिन विस्वसतुन विळ्सनाह कीस्तोर. अदिह्‌क मीट उसरते मन्ह्‌टु, ओरग्डाहि जेक मन्ह्‌टु. 18 अद्रमतोर मावा सामि किर्स्तुना सेवा केवोर, मति तमाङे लालुस्क मतप कीसोर तिरियिह्‌तोर. मिङताङ-मिङताङ पोल्‍लोङ वेहचि, तेळियवोर लोकुरिन नाळेह कीसि लेसिह कीस्तोर. 19 मीट देवुळता पोल्‍लोतुन केंजिस ताकिह्‌निर इनजोर सबेटोर केंजतोर. अदिनेनाह्‌क नना गिर्दा आतन. बेसताङ पोल्‍लोनेनाह्‌क बुदतोर मन्ह्‌टु, मति लाग्वाङ पोल्‍लोने बार पुनवोरा लेह्‌का मन्ह्‌टु. 20 दीरा पोस मन्ह्‌टु, माक सुकम ईयनद देवुळि चट्पिटे देयह्‌कना मुक्याना लावतुन बूळे कीस, तान मीवा काल इळ्न वाटग़ा. मावा येसुसामि किर्स्तुना देय्वा मियगा मनि, आमेन.

21 नावा संगे किर्स्तुना सेवा केवाल तिमोति मीक जय येसु इन्ह्‌तोग़. मावा यहुदि विस्वसिर लुकियुस, यासोन,✡16:21 बळयिर 17:5-9 सोसिपत्रुस‡16:21 ओन “सोपतरु” वने इंदुर; बळयिर 20:4 ऊळाट. वने मीक जय येसु इन्ह्‌तोर. 22 बोना कयदे इद सीटटुन रास वेहतन, ओग़ तिरतियुस मीक जय येसु इन्ह्‌तोग़. 23-24 गयुसना लोतगा माट इर्वोम आस मह्‌नोम, ओनाय लोते इद कुरिंत सहरतोर सबेटोर विस्वसिर जमा आस्तोर.✡16:23-24 1 कुरिंततोर 1:14 ओग़वने मीक जय येसु इन्ह्‌तोग़. मावा तोळतोर विस्वसिर कवारतुस, ओसो इद सहरताङ कोतान ऊळेवळे केवाल इरास्तुस, वेरवने मीक जय येसु इन्ह्‌तोर.§16:23-24 वचन 24 ता पोल्‍लो “किर्स्तु येसुसामिना देय्वा मीट सबेटोरगा मनि, आमेन,” इद पोल्‍लो उचुके मोदुल काग्देह्‌कने दोर्किह्‌ता.

25 देवुळतुह्‌क जोहर आयि! नना काग़्हतनद येसु किर्स्तुना बेसता कबुर वेहतपु, देवुळतगा मीवा विस्वसतुन बेस मेग़्किह कीयनद लाव मन्ह्‌ता. इद कबुरता पोल्‍लो वेल्‍लाय जोम आनाह मकिस मता. 26 मति इंजेके देवुळि तना कबुरतोरा सास्त्रमता मेटे इद मकतद कबुरतुन माक पुन्पिह कीयलाह आता. सबे जातिनोर मन्कलोर इद कबुरतुन विस्वस कीसि, देवुळताङ केंजिर, इनजोर तान पोकुर कीयलाह देवुळि उकुम ईता. 27 ताना बुदतगा बातय कमि इले, अद येसु किर्स्तुन मयगा लोहताह्‌कु, इदे देवुळतुन माट अमेसा-अमेसातुह्‌क जोहर कीकल. आमेन.