1 «ꞌNdàngɨ mbete adɨ malayka*2:1 Ta-je kinlé sɔbɨ dɔ njékəwna̰-je kɨ́ gin siri. Ə Malayka-je lé à to njékɔrnɔ̰̀ njékəwna̰-je. lə njékəwna̰-je kɨ́ ɓebo Epɛjɨ-tɨ ꞌpanè: ꞌOo, njèkuwə kərwəḭ-je siri jikɔl-é-tɨ, kɨ́ to njènjiyə dan kagna̰a̰ lampɨ-je-tɨ siri kɨ́ to kagɨ-je kɨ́ lɔr ɓá ꞌra-né lé panè: 2 Mꞌgə kullə ra-i-je, mꞌgə kɔɔ-je lə-i, ɓá mꞌgə kuwə rɔ nga̰ lə-i rəm tɔ. Mꞌgə kɨ́ i ꞌa kisɨ dɔ-tɨ kɨ̀ njémḛḛndul-je al. Beɓa njéɓa rɔ-dé njékɔwkulə-je lé, i ꞌna̰-dé ꞌoo, adɨ ꞌgə-dé kɨ́ ꞌto njékədta-je ɓɨ ꞌto njékɔwkulə-je al. 3 I ꞌuwə rɔ-i nga̰ rəm, ꞌingə kɔ̰̀ kdɔ ta lə-m rəm, ɓá kɔɔ ra-i go-m-tɨ al rəm tɔ. 4 Ngà né kɨ́ mꞌɔw-né sə-i kɨ̀ ta ə́n: Ndigɨ kɨ́ dɔsa̰y kɨ́ ndɔkɨ i ꞌndigɨ-m lé ɓá, i ꞌtusɨ in̰ə. 5 Ə́n ə́ adɨ mḛḛ-i ole dɔ lo kɨ́ ḭ-tɨ usɨ, in̰ə panjiyə-i kɨ́ majal kɔgɨ ə ꞌtəl un kullə ra-i-je kɨ́ dɔsa̰y ndɔkɨ lé gogɨ. Kinə in̰ə panjiyə-i-je kɨ́ majal kɔgɨ al rəmə, mꞌa kɔw rɔ-i-tɨ ə mꞌa kun kagna̰a̰ lampɨ lə-i lo ka̰-é-tɨ kɔgɨ. 6 Bè ya kàrè, né kɨ́ i ꞌra adɨ majɨ ə́n: I ꞌmbatɨ kullə ra dow-je lə Nikola titɨ kɨ́ ma̰ mꞌmbatɨ-né kin bè tɔ.»

7 †2:7 Ntd 22:2Dow kɨ́ mbi-é tò rəmə, kadɨ oo-né ta kɨ́ Ndil kɨ́ aa njay idə njékəwna̰-je kɨ́ gay-gay. Ndil kɨ́ aa njay idə-dé panè: Dow kɨ́ tətɨ rɔ lé mꞌa kadɨ-é uso kandɨ kagɨ kiskəm kɨ́ a̰ ɓe kisɨ majɨ-tɨ lə Lubə.

8 †2:8 Ntd 1:17; 22:13ꞌNdàngɨ mbete ꞌadɨ malayka lə njékəwna̰-je kɨ́ ɓebo Ismir-tɨ ə ꞌpanè: ꞌOo, ḛ kɨ́ to kɨ́ dɔsa̰y rəm, to sɔ̰y dow-je rəm, kɨ́ ndɔkɨ oy ɓá tɔsɨ ndəl ində lo tḛḛ lé panè: 9 Mꞌgə kɔ̰̀ kɨ̀ ndoo lə-i ya, ngà ꞌto njènékingə. Ta-je kɨ́ majɨ al majɨ al kɨ́ dow-je kɨ́ ꞌto jipɨ-je al ya ꞌɓa rɔ-dé jipɨ-je dꞌisɨ ꞌpa dɔ-i-tɨ kin kàrè mꞌgə rəm. Dḛ ꞌto kəykəwna̰ lə Sata̰. 10 ꞌƁəl kɔ̰̀ kɨ́ ꞌa kingə kin al; Sú à kungɨ dow-je kɨ́ dan-tɨ-je kɨ́ dan-si-tɨ dangay-tɨ kdɔ na̰-si-né, ə a kingəi kɔ̰̀ ndɔ dɔgɨ. ꞌA̰ dɔ ndi-i-tɨ njángɨ sar ya kadɨ ꞌoy-né rəmə, mꞌa kadɨ-i jɔgɨ tətrɔ kɨ́ sɔbɨ kiskəm. 11 †2:11 Ntd 20:14; 21:8Dow kɨ́ mbi-é tò rəmə, kadɨ oo-né ta kɨ́ Ndil kɨ́ aa njay idə njékəwna̰-je kɨ́ gay-gay kin. Ndil kɨ́ aa njay idə-dé panè: Dow kɨ́ tətɨ rɔ lé, koy kɨ́ nja joo à tɔl-é al ngá.

12 ꞌNdàngɨ mbete adɨ malayka lə njékəwna̰-je kɨ́ ɓebo Pɛrgam-tɨ ə ꞌpanè: ꞌOo, njèkɔw kɨ̀ kiyərɔ kɨ́ dꞌɔl ta katɨ-é joo lay ndətɨ-ndətɨ panè: 13 Mꞌgə lo kisɨ-i. Lo kisɨ-i kinlé ɓá kalikɔ̰ɓe lə Sata̰ tò-tɨ. Bè ya kàrè i ꞌnam sə-m, ɓá Antipasɨ kɨ́ to dow kɨ́ tɔgrɔ-tɨ kɨ́ to njèpata lə-m kadɨ dow-je kɨ́ ꞌtɔl-é ɓe lə-i kɨ́ to lo kisɨ Sata̰ kin kàrè, ndɔ-é-tɨ kinlé i ꞌnajɨ ta dɔ kadmḛḛ-tɨ lə-i kɨ́ adɨ-m lé al rəm. 14 Ngà né-je kɨ́ mꞌɔw-né sə-i kɨ̀ ta ə́n: I adɨ dow-je kɨ́ njéndigɨ néndó lə Balam dꞌisɨ rɔ-i-tɨ; Balam lé ndɔkɨ ndó Balakɨ kadɨ ədɨ Israyel-je kadɨ dꞌuso da̰-je kɨ́ ꞌpole-né magɨ-je rəm, ɓá ədɨ-dé kadɨ ꞌra kaya rəm tɔ. 15 Ɓəy ɓá, i adɨ njéndigɨ néndó lə dow-je lə Nikola lé dꞌisɨ rɔ-i-tɨ tɔ. 16 Beɓa ꞌin̰ə panjiyə-i-je kɨ́ majal kin kɔgɨ al rəmə, ngɔsnè ya mꞌa kɔw rɔ-i-tɨ nɔ̰ɔ̰ ə mꞌa rɔ sə-dé kɨ̀ kiyərɔ kɨ́ ta-m-tɨ.

17 †2:17 Ja̰ 6:48-50Dow kɨ́ mbi-é tò rəmə, kadɨ oo-né ta kɨ́ Ndil kɨ́ aa njay idə njékəwna̰-je kɨ́ gay-gay kin. Ndil kɨ́ aa njay idə-dé panè: Dow kɨ́ tətɨ rɔ lé, mꞌa kadɨ-é nékuso kɨ́ ꞌɓa-é maan kɨ́ to né kɨ́ tò lo ɓɔyɔ-é-tɨ, ɓá mꞌa kadɨ-é ər kɨ́ nda ə ər-é kinlé dꞌa ndàngɨ ri kɨ́ sigɨ titɨ; to ri kɨ́ ꞌɓa-é ya kɨ̀ kár-é à gə ɓɨ dow kɨ́ rangɨ à gə al.

18 ꞌNdàngɨ mbete ꞌadɨ malayka lə njékəwna̰-je kɨ́ ɓebo Tiyatir-tɨ ə ꞌpanè: ꞌOo, ta kɨ́ Ngon lə Lubə kɨ́ kəm-é ɔ̰̀ njoy-njoy titɨ ndɔ̰ pər kɨ́ tḛḛ bilɨm-bilɨm ə nja-é ndɔ̰y mbṵṵ tana̰ kɨ̀ ngɔwla kɨ́ dow ulə dan yalpər-tɨ bè pa ə́n: 19 Mꞌgə kullə ra-i-je, mꞌgə ndigɨ kɨ́ ꞌndigɨ-m, mꞌgə kadmḛḛ lə-i, mꞌgə né kɨ́ ꞌisɨ ꞌra adɨ-m, mꞌgə kuwə rɔ nga̰ lə-i, ɓá mꞌgə kɨ́ kullə-je kɨ́ ꞌra gogɨ nè n̰a̰ itə ḛ kɨ́ kete. 20 Ngà né kɨ́ mꞌɔw-né sə-i kɨ̀ ta ə́n: Jejabɛl kɨ́ to dené kɨ̀ njèɓa rɔ-é njèpata kɨ́ ta Lubə-tɨ lé, i in̰ə-é adɨ ndó-né ngannjékullə-je lə-m ur-dé-né wale adɨ ꞌra kaya, ɓá adɨ dꞌuso da̰-je kɨ́ ꞌpole-né magɨ-je rəm tɔ. 21 Mꞌin̰ə kaglo mꞌadɨ-é kadɨ in̰ə-né panjiyə-é-je kɨ́ majɨ al kɔgɨ, ngà panjiyə-é kɨ́ majɨ al kɨ́ to kaya kɨ́ ra lé, ḛ ndigɨ kin̰ə kɔgɨ al. 22 Yən! Kinə njéra siə kaya-je dꞌin̰ə panjiyə-dé-je kɨ́ majɨ al kɨ́ ɔw natɨ kɨ̀ néndó liə kin kɔgɨ al lé, mꞌa kungɨ-dé dɔ tɨrə-tɨ dan kɔ̰̀-tɨ kɨ́ n̰a̰ natɨ siə. 23 Mꞌa tɔl ngan-je liə kɔgɨ. Rəmə njékəwna̰-je kɨ́ gay-gay lay dꞌa gə kɨ́ ma̰ lé mꞌto njètən tagɨr-je, kɨ̀ né-je kɨ́ ɓɔyɔ rɔ-é mḛḛ dow-je-tɨ, adɨ mꞌa kugə ná̰-ná̰ kɨ́ go kullə ra-é-je-tɨ. 24 Ngà sə̰i ndəgɨ njékəwna̰-je lay kɨ́ ɓebo Tiyatir-tɨ kɨ́ ꞌndigi néndó kɨ́ majɨ al kin al rəm, ꞌgəi né kɨ́ dḛ ꞌɓa-é ta lə Sata̰ kɨ́ tò lo ɓɔyɔ-é-tɨ kin al rəm lé, mꞌidə-si mꞌpanè: Ma̰ mꞌində nékotɨ kɨ́ ɔy kɨ́ rangɨ dɔ-si-tɨ al ngá. 25 Ngà né kɨ́ tò ji-si-tɨ kinlé, uwəi njarara ya sar kadɨ mꞌree-né.

26 Dow kɨ́ tətɨ rɔ, kɨ́ ra kullə lə-m ya sar tɔl-né ta-é lé, mꞌa kadɨ-é ɔw kɨ̀ tɔ́gɨ dɔ gin dow-je-tɨ kɨ́ gay-gay. 27 Beɓa ḛ à kɔr nɔ̰̀-dé kɨ̀ ngɔwla ji-é-tɨ, kdɔ tə́tɨ-dé-né ɗɛkɨ-ɗɛkɨ titɨ kɨ́ dow tɔɔ-né ba̰y kɨ́ ra kɨ̀ anjɨ kin bè. Ma̰ ya kàrè Bɔbɨ-m adɨ-m tɔ́gɨ kinlé bè tɔ. 28 Dow kɨ́ tətrɔ lé, mꞌa kadɨ-é ngòrongɨ kɨ́ njèndógɨ ta lo kaa-tɨ. 29 Dow kɨ́ mbi-é tò rəmə, kadɨ oo-né ta kɨ́ Ndil kɨ́ aa njay idə njékəwna̰-je kɨ́ gay-gay kin.