4
God Gumbe Ebnotu Aya
1 ✡ Rom 7:23Divi oya ye yapeyap mut ge mut atan gaiyawa vene? Ye kwapuiwa danave ye mut atan ene me oya. 2 Ye divi da autan anoene go den auyawa, ye ud me toen guriya. Ye divi da autan oya anokukam ene go den auyawa, ye mut ge mut atan gaiyawa waya. Ye divi da den auyawa, ye God den diyana oya. 3 Ye nun waya, go ye den auyawa, kuiyawa ano kukaeba yeuma gumbe nun wayana degadega yeuma autan oya.
4 ✡ Rom 8:7; 1Jn 2:15Ye uinantaraki ene igiyawa. Ye den yaug anoyana, ye piyu mame yaireyapa ayawa, ye God anavi meuma aya. Bira da wagomiyane piyu yaireyapa anewa, me God anavi meuma ane. 5 Go, Baiboru wane, “God Guwawa baraune nu danunup wakene. Me Guwawa mame baiganeba kokavit ane.” Ye me natawa gaibu den anoene? 6 ✡ Pro 3:34; 1Pi 5:5Go, God oraiwa meumawa obiren sira egave numpe. Baiboru waivi,
“God membo iviwa enagatpewa me matai yan baraupe.
Me mokona abnawa wan enagatpe.”
7 ✡ Epe 6:12Meoya yembovit God gumbe ebnotu aya. Kukaeba gaibu mu aya. Sira kukaeba ye guniyap a aipe. 8 ✡ Ais 1:16; Jak 1:3; Mak 3:7Oneg manman God gumbe uwaya. Sira God me on manman ye guniyap uwape. Ye kukaeba igiyawa, naniwa muiniya. Ye kuiewa duwam aiviwa. Ye nonemagewa muiniya. 9 Danadawai auya. Danadawai aug iruwaya. Iru nonemisi aya. Ye to yeuma biroriyag iruwaya. Ye degadega yeuma biroriyag danadawai auya. 10 ✡ Job 5:11; 1Pi 5:6Ye yembovit Ayapan namive mokona aya. Sira me ye enagat yempe.
11 Tatangwanen, ye yekut garadi den aya. Da bira me tatawa gumbe wag pui yupewa, me Gwangwan gumbe wag pui yupe. Meve ge Gwangwan pui yuwamigimawa, ge Gwangwan den amarege, pui yuwamege. 12 ✡ Rom 2:1; 14:4Gwangwan munne sira keptenewa me desirom. Me oma ane waita mumpe sira oma ane wakukamumpe. Go, ge bira? Ge owogaiwa kep teege.
Umae Oya Venewa
13 ✡ Ruk 12:18-20Gare anoya. Ye vene, “Gare go umae, nu gwetoimu mame go asime anta, bairawan desirom asimeve waketa, sira anmaga nau ag auta.” 14 ✡ Sam 39:5,11; Pro 27:1Ye den yaug anoyana umae dimbae matatpe? Ye inaiinai yeuma dimbae? Ye wankwarak mina dauene sira koni pipi me apa inanatpe. 15 Go, ye wapono, “Ayapan ano meuma mamaib ipewa, nu vinigimta ge nau mame ata go yan me ata.” 16 Megara, gare ye vene yembovit waiyene. Yembovit waiyenewa me undag kukaine. 17 ✡ Ruk 12:47Meoya, bira da anone oraiwa me atanit di, megara den apewa, me kukaeba ane.