2
1 Dela ngü te Me mere, te engu o tö ake kpï, de wü e gbü wü ꞌburu. 2 Me nza tima la gbü wü sïkpï maꞌdiya. Fü ah adu afe te-ye gbü sïkpï lorozi. 3 Fü ah ayia afe sïkpï la, ao ꞌduwa sïkpï ka-ye tete na. Fü ah amala ngü, gü ba, “Wü kpara te ni mere ewü ne, wüh ena angbü efe te-wü gbü sïkpï lorozi, kpah baka ni, te ni fe te-ni, fütanga mere bi tima, ta te ni mere ne, teka fü ewü amaka wazi gbü ngü la.” 4 Dela wü ngü ta te Me mere te enga gina.
Dene ngü ka Adama ake wara ye
Ta gügü, te Me o tö ake kpï tete na, 5-6 wü siti wü e, baka wü ti, de wü siti gü, kö ta nda-wü la de, angü Me o agö füh kotö sene, ta nda la de. Ndo kpah ma, angü kpara, te ena adi esö e, nda kpah ma. Amba ngu ngbü edü ka-ye bü esa tö. Fü wü e angbü ega di. 7 Fü Me ayia acö tö, afa komoko gbügbü na. Fü ah ayia auru wazi ye gbü tö, de te engu fa la. Fü e la ayia awo wazi, akoro kpara tete.
8 Fü Me amala ngü, gü ba dene, “Ni ena ao yï ka-ni to kpa fügö, agbü sü de ïrï ye Edene, teka fü komoko la anü angbü gbügbü na.” 9 Fü ah adu amala ngü, teka de nguwa wü rü, de wü züka nguwa rïrü ka mazü, kö agbü yï la. Fü wü e la akö, aga, angbü erï agbü yï la. Fü gara wü rïrü ꞌbasu angbü kpa etü yï la. Gara biringbö la, Me gü ba, rïrï na ena aküwa wü kpara, de wüh kpi de. Fü gara la angbü nda-ye eto talara ngü fü wü kpara, de wüh wu da eye süka siti ngü ake züka ngü.
10 Gara mere nzö ngu ta ladü gbü Edene sela, te wü e ngbü ega di. Fü ngu la anü aye süka ye, kpa ekere Edene kpala, akoro wü ngu bala. 11 Ïrï gina ngu la de Pïsona. Ah ngbü ego nda-ye ekere nga nzö kötï ka wü Avïla. 12 Wüh ngbü emaka züka *diki-se gbü sü la, de wü züka wü teme te ngbü eci aci. 13 Ïrï eꞌbaꞌbasu ngu la de Giyona. Ah ngbü ego nda-ye ekere nga nzö kötï ka wü Kusi. 14 Ebabata ngu de Idekele,* 2:14 Idekele de Tigire gbü ngü Giriki. te ngbü ego nda-ye to kpa fügö, ekere nga nzö kötï ka wü Asura.† 2:14 Gbü wü gara buku, Asura de Asïrïya. Ebabala ngu de Efürata.
15 Fü Me adu aza komoko, de te engu mere la, ao engu agbü yï ka-ye la, de ah di eceka kpï fütanganga na. 16 Fü ah agü ïrï komoko la gü ba, Adama. Fü ah ato rïrï fefe na, gü ba dene, “Wü rï-rü de gbü yï ne, mü ena azü azü ꞌburu. 17 Amba ꞌduwa mene engu de biringbö ka talara ngü ne, mü mere e azü de, angü mü ena akpi.”
18 Fü Me adu afï nga ngü, gü ba dene, “Te komoko ne ngbü kpikpi ye bala, ah reke de. Ni ena amere gara kpara fü ewü angbü ꞌbasu ake di.” Fü Me ayia ato fïngangü gbü nzönzö. 19-20 Fü Me ayia aza wü nü, de wü lu, ta te engu mere ne, anü di fü Adama, de engu gü ïrï ewü. Fü Adama agü ïrï gbü nzö wü nü la biri biri ꞌburu. Fü ïrï la angbü ꞌduwa bala. Fü Adama angbü egïrï kiri ye, kpara te ani ena angbü ake di. Ah gü ba dene, “Esüka wü nü ne ꞌburu, ni maka kiri ni nda-ni de.” 21-22 Fü Me ayia ato mere ra gbü jia Adama. Te Adama ngbü era tete na, fü Me akoro aü babaga na, aza gara biki sasajikara na biringbö, amere würüse gbügbü na. Fü ah adu ani sü, te engu ü la, alügü yere te nga ye. Fü ah ayia aza würüse la, ato fü Adama, amala ngü fefe, gü ba, “Wara mü dene.” 23 Te Adama wu würüse la, fü würüse la areke gbü jijia na afa sü. Fü Adama akpo da ebï ci ka tadu, gü ba dene,
“Züka ngü! Kiri ra koro eyi dene!
Me to züka würüse eyi fere dene!
Biki würüse ne, ah de biki ra.
Ngüte würüse ne, ah de ngüte ra.
Wüh ena adi eï engu, gü ba, würüse,
Angü engu koro gbü komoko.”
24 Dela si-ngü te komoko ngbü eyia ece wö ye ake ni ye, aza wara ye, alala tete na. Fü ewü adu angbü ake di tïne ba kpara biringbö ne. 25 Wü Adama ake wara ye, ta te ewü ngbü ka-wü agbü yï la, wüh ka-wü ꞌbasu mini ngïrïmu. Lümü mere ewü gbü ngü la nda kpah de.