49
Dene adu ngü te Yakobo mala teka wü di ye
1 Fü *Yakobo ayia aï wü di ye la ꞌburu kpaka ye, gü ba dene, “Wü koro la ꞌburu, wü biti te-wü kpakine, de ni mala wü ngü de te ena amere te-ye fü wü te gara, te Me ena alügü wü tete agbü *Kanana ne.”
2 Te wü di *Yakobo Yïsarayele koro tete ꞌburu, fü ah akpo angbü ebï ci ka-ye, gü ba dene,
“Wü di Yakobo, yi biti te-yi gbü sü biringbö sene,
teka aje ngü ka-ra, ka wö yi.
3 Rübena, mü de gina ye ra.
Mü ta baka wazi ra.
Ma bï mü ta o ra di la kpah kpekpeke.
Mü ngbü ta gbü nzö wü di enga ni mü ꞌburu.
Wazi mü fa ta nda-wü kpah afa.
4 Rübena, mü de gina ye ra.
Wazi mü ta baka mere ngu te ngbü ego ago.
Tïtïne mü mere *siti ngü eyi.
Wazi mü nza eyi enatikine!
Rübena, mü mere siti ngü eyi.
Wazi mü tï afa nda wü di enga ni mü tïne de.
Angü mü ngbü eyi ake wara wö mü.
Mü to lümü eyi gbü jia wö mü!
5 Sïmïyona ake *Levi, yi de mürü gü!
Yi za maguruma ka-yi mere gü di!
Sïmïyona ake Levi, yi de mürü gü!
6 Sïmïyona, ma tï arï gbü ngü ka-yi la nda-ra de!
Yi ngbü emörö wü kpara, angü maguma yi esiti!
Levi, ngü ka-yi la, de ngü ka-ra nda de.
Yi ngbü esiya ka te wü kpara bü kükürü!
7 Sïmïyona, ma le ngü ka-yi la nda-ra de.
Nguwa yi ena abaya gbü wü sü ka-nih ꞌburu.
Levi, Me ena ato kuru te yi ka ngü la.
Nguwa yi ena aye süka ye jürü jürü.
8 *Yuda, mü de kpeke kpara.
Wü di enga ni mü ena adi ꞌburu agbo nga ïrï mü.
Wü di enga ni mü ena ecu ngü mü.
Wü vügü ka-mü ena angbü ꞌburu esa lö mü.
9 Yuda, mü de kpeke kpara.
Yuda, mü ka-mü baka kami.
Kami te nü mörö nü ka-ye,
te za so ka-ye, go di.
Fü ah ra kötö eme so ka-ye.
Kpara te ena akpülü engu nda ma.
Yuda, mü de kpeke kpara.
Kpara te ena akpülü mü kpah ma.
10 Yuda, mü de kpeke kpara.
Wü di mü ena angbü miri fï badi.
Wü di mü ena aza ngbangba ka miri esaka wü fï badi.
Angü Mere Miri te Me ena atima fü nih,
ah ena adi de kundu kundu mü.
Mere Miri te ena angbü gbü nzö wü kpara ꞌburu.
Nga nzö nguwa wü kpara ꞌburu ena aje rïrï kaka-na.
11 Wü kpara ꞌburu ena angbü de tadu, teka ngü ka Miri la,
Mere Miri, Mere Miri ena akoro.
Sü ena areke de mere bi zü gbü ye.
Wü e ena arï rudu rudu,
fü ewü asibi afa sü.
12 Mere Miri, Mere Miri ena akoro.
Wü kpara ena azü e asika nde.
Fü ewü angbü fï bü de mere tadu!
Wü nü ena asibi, fü wü kpara adi ezü fï bü so.
13 Zebulona, mü ena angbü era mere ngu.
Mere bi *zabu ena adi ekoro kpaka mü.
Sü ka-mü ena akpo era ngu la,
akoro zalü agbü sü ka wü Sïdona.
14 Yïsakara, mü baka gbï.
Sü ka-mü reke te mü fa sü.
Mü baka gbï te ngbü ebiti wü e gbü nze ye.
Angü mü fe te-mü nda-mü de.
15 Yïsakara, sü ka-mü reke te mü fa sü.
Mü fü te-mü labï gbü sü ka-mü.
Mü ngbü emere tima efa sü.
Mü fe te-mü kpah de.
16 Dana, mü de kpeke kpara.
Wü kundu mü ena asibi, akoro mere nguwa wü kpara.
Miri te ena angbü gbü nzö nguwa mü.
Ah ena aye süka ngü ka wü kpara mbi mbi mbi.
17 Dana, mü baka enga kpürü te ngbü edere kaje,
da ecï nü te ngbü ebï kpara te kaje.
Kpürü ena ade tambu lö nü la.
Fü kpara de te di fefeh na, ayere atï kötö.
18 Me, ma ngbü eo jia ra kpaka mü.
Mü ena aküwa a esaka *siti ngü ka-a.
Mü ena akoro areke wü sü ꞌburu.
19 Gada, wü mürü gü ena akoro,
atï de gü gbü nzö mü.
Amba mü ena adu amï ewü ꞌburu.
Fü mü aliki nga ewü, anü di.
20 Asera, mü ena adi emaka mere bi zü.
Fü ndo ka-mü adi erï ꞌburu ba mudu.
Zü ena afa esaka mü sü,
de züka wü türü e, baka e ka wü miri.
21 Nafatalï, ngü ka-mü reke fa sü.
Mü ka-mü baka mügara.
Mü ena ale mere woro da eviti kpa etikpi.
Nafatalï, mü ena abï wü jaji, te ewü ena asu kpah baka mü.
22 Yüsefa, mü de kpeke kpara.
Mü baka züka rü te erï efa sü.
Rïrü te wüh ru era ngu.
Rïrü te ngbü erï gbeee, rudu rudu.
23 Yüsefa, mü de kpeke kpara.
Wü vügü ka-mü koro, tï gü gbü nzö mü.
Fü ewü alofo mü de wü keze ka-wü.
Yüsefa, amba mü kpe cürü nda-mü de.
24 Yüsefa, mü de kpeke kpara.
Mü i maguma mü gö gö gö!
Yüsefa, mü zoro dïrï ka-mü gö!
Mü fa wü vügü ka-mü eyi.
Yüsefa, mü de kpeke kpara.
Me to wazi la me-ye fü mü.
Me ka-ye de mere wazi.
Me ngbü eceka kpï fütanga nguwa nih ꞌburu,
Baka kpara te eceka kpï fütanga kambiliki ka-ye.
Yüsefa, Me di de mü.
Me to wazi ka-ye fü mü.
Me ka-ye de mürü wazi.
Me ngbü eküwa wü kpara,
te ewü ngbü eto te-wü fefe na.
25 Yüsefa, Me di de mü.
Me ka-ye de *vüngüte ka-nih.
Me to agö fü mü de ah lï.
Me to ngu fü mü, te tï anzürü gbü karanga de.
Yüsefa, Me di de mü.
Me to wazi fü wü wara yi.
Wü wara yi ena abï wü jaji gbe gbe gbe.
Wü di yi la ena aga ꞌburu kpeke wü kpara.
26 Yüsefa Me di de mü.
Me to wazi fü wü di mü.
Me to wazi gbü yï ka-mü,
de wü e ka-mü di erï efa sü!
Yüsefa, Me di de mü.
Me to züka wü e ka-ye fü mü.
Züka ngü ka Me ngbü fü mü fï badi, baka da.
Yüsefa, Me o mü eyi gbü nzö wü di enga ni mü ꞌburu.
27 Benzamina, mü de kpeke komoko.
Mü ngbü emere ngü baka siti nü.
Benzamina, mü ena angbü ezü so, biti de ra mini!
Kpara te ena amofo e ka-mü nda ma.”
28 Dela ci ka Yakobo, te engu bï, da esara wü di ye di. Ah bï ci la teka ewü biri biri ꞌburu, kpah te nga ngü ka-ewü. Wü di Yakobo nzükpa de füh ye ꞌbasu la, wüh ꞌburu wü kundu ye nguwa wü kpara nzükpa de füh ye ꞌbasu.
Dene ngü ka kpi ka Yakobo
29-30 Fütanga ngü la, fü Yakobo adu amala ngü fü wü di ye, gü ba dene, “Tïtïne, ni gbe nza eyi. Ni eyi gbamari teka akpi. Te ni kpi eyi la, de wü bï kö ni, du di gbü sü ka-ani, agbü Kanana. Fü wü ati ni gbü mbükü, kpa gbü sü ka wü kundu ani kpala, gbü gö da de ïrï ye Makepela,*49:29-30 Makepela ka-ye to kpa fügö ede Mamare. te wüh ngbü eti wü kundu ani gbügbü na ne. Angü sü de kpala, Abarayama, ta te di de kundu ani ne, se me-ye esaka Efürona, enga Ete. Engu se sü la ta me-ye, de wüh di eti wü kpara ka-ani gbügbü na. 31 Angü wüh ti kundu ani Abarayama ake wara ye, Sara, ta gbü sü la. Wüh ti wö ni, Yïsaka, ake wara ye, Rebeka, kpah sela. De-ni Yakobo, ni ti mene wara ni, de ïrï ye Leya ne, kpah sela. 32 Teka ngü la, ah le de wü za kö ni, nü di, ti kpah kpala, angü dela sü ka kundu ani, ta te engu se esaka wü Ete ne.” 33 Yakobo mala ngü la ta bala fü wü di ye. Fü ah adu ara kötö, ace kpa te ye, akpi.