Wakita ga Pol ya àbikioru ana ndam Galasi ni
Ere ye ti məɗəmki ka wakita ga Pol ya àbikioru ana ndam Galasi ni
Maslaŋa ya ti àbəki wakita hini ni ti àɗafa slimi gayaŋ a : àbəki ti Pol, zal asak ga Yezu ni (1.1). Leli mə̀sər sarta ya àbəki wakita ni do, mə̀sər məlaŋ ya àbəki ni do daya. Àbiki ti ana ndam Galasi : Galasi ti kəsa do ; haɗ kà gəvay ga Azi (a vaɗ ya kani Azi akaba Galasi ti tə̀bu ka haɗ Tʉrki). Kəsa Ikoniyum, Listir akaba Derbi ti ka haɗ Galasi ; ka ya ti Pol òru e mirkwi gayaŋ ye enjenjeni ni ti àhia ma ge Melefit ana ndam ga kəsa nday nana (Tʉwi 14). Pol àbiki wakita hini ana ndam Galasi ya ti tə̀gəskabá ma ga Yezu ya àhi ana tay na.
Àbəki wakita ti aɗaba mis ndahaŋ e kiɗiŋ ga ndam ga Yezu ya ka haɗ Galasi ni bu ni tə̀ɗəm ahàr àɗəm ndam ga Yezu tə̂gəskabu Divi ge Melefit ya Mʉwiz àbəki ni ɗek : ahar gəɗakani tə̀ɗəm si ndam ga Yezu ɗek têkeley kʉɗi kwa (6.12). Pakama gatay ya tə̀ɗəm ni àzumia ɓəruv ana Pol a dal-dal, nahkay àbiki wakita hini ana ndam Galasi ɗek ga məhiani ana tay tə̀fəki ŋgasa ke mis ge mekeley kʉɗi ba ; tamal maslaŋa awayay egi mis ge Melefit àna mekeley kʉɗi ni ti, Krist àjənaki naŋ va do (5.2).
Pol ànjəki ka pakama gayaŋ, àɗəm naŋ zal asak ga Yezu eɗeɗiŋ : àfiyu Pol e tʉwi gayaŋ ni vu ti Melefit ; ndam asak ga Yezu ndahaŋ ni tə̀gəskabá Pol a, tə̀ɗəm ma gayaŋ ya àhi ana mis ni ti ma ge Melefit eɗeɗiŋ. Pol àɗəm zlam ya ti àcahi ana mis ni ti Melefit Melefiteni àhi, do ni ti mis àhi do (1–2).
Pol àɗəm ka ya ti ndam Galasi tə̀gəskabu ma ge Melefit enji ni ti tìgia bəza ge Melefit a. Tə̀gəskabu, tìgi bəza ge Melefit ti azuhva tʉwi ga Məsuf ge Melefit, do ni ti azuhva Divi ge Melefit ya Mʉwiz àbəki ni do. Àhi ana tay nihi ti kəmbrəŋum Məsuf ge Melefit, kəgəsumkabu Divi ge Mʉwiz ni ciliŋ ti kamam ? Nday ya ti təgəskabu Divi gani ciliŋ, təmbrəŋ Məsuf ge Melefit ni ti nday eviɗi, nday bəza ge Melefit va do (3–4).
Ke mendeveriŋ ga wakita ni àhi ana ndam Galasi si tânjəhaɗ àna njəɗa ga Məsuf ge Melefit kwa. Tamal maslaŋa agəskabu njəɗa ga Məsuf ge Melefit ya avi ni ti, esliki məmbrəŋ zlam magudarani ɗek ; do ni ti Divi ge Mʉwiz ciliŋ ni ti àjənaki naŋ do. Tamal maslaŋa àgəskabá Krist a ti, maslaŋa nani ègia mis mʉwena : zlam ndahaŋ ni ɗek tìsli araŋa do (5–6).
1
Sa ga Pol
Nəbəki wakita hini ti nu Pol, nu zal asak ga Yezu. Àslərbiyu nu ti mis hihirikeni do. Tə̀vu njəɗa gani ti mis do ; tə̀vu njəɗa gani ti ata Yezu *Krist nday ata Bəŋ geli Melefit, naŋ ti àhəŋgaraba Yezu e kisim ba. Nu Pol nəgri sa ana kʉli, lekʉlʉm ya ti kəfumki ahàr ka Yezu, kə̀bum *kacakalumvu a kəsa gərgərani bu ka haɗ Galasi ni. Bəza ga məŋ geli ya mə̀bu akaba tay ni tə̀gria sa ana kʉli a daya.
Bəŋ geli Melefit nday ata Bay geli Yezu Krist tə̂gri sulum gatay ana kʉli, tâgray ti *kânjəhaɗumkabu àna sulumani ti. Krist ti àgəskabá ti tâkaɗ naŋ azuhva zlam magudarani geli, ga məhəlaba leli a duniya hini magədavani ni ba. Krist àgray nahkay ti ka mawayay ga Bəŋ geli Melefit. Melefit ti mə̂zləbum naŋ ga kaŋgay-kaŋgayani. Aya nahkay !
Ma Mʉweni Sulumani ti bəlaŋ hʉya, nahaŋ àbi
Ere ye ti kə̀grum ni ti àgrua ejep a dal-dal, aɗaba nə̀hi ana ahàr kə̀grum zlam akaɗa nani do. Melefit àzala kʉli azuhva sulum ge *Krist ya àgri ana kʉli na. Ay ti lekʉlʉm kə̀mbrəŋuma Melefit ke wecewecena ; kə̀bum kəɗəbum ma mʉweni nahaŋ sawaŋ ti ahəmamam ? *Ma Mʉweni Sulumani nahaŋ ti àbi, si goro ya nə̀hi ana kʉli ni ciliŋ. Ay mis ndahaŋ tə̀bu tiwisirikaba ahàr ana kʉli a, tawayay tambatkaba Ma Mʉweni Sulumani ge Krist na. Leli mə̀hia Ma Mʉweni Sulumani ana kʉli a ; tamal maslaŋa ahi ma nahaŋ ana kʉli gərgəri akaba ma ya mə̀hi ana kʉli ni ti Melefit mêtikwesla maslaŋa gana. Ku leli leleni, ku *məslər ge Melefit àsləkabiya e melefit ba ahi ma gani ana kʉli nəŋgu ni, Melefit mêtikwesla naŋ a. Leli mə̀hia ana kʉli a, nihi day nəhi ana kʉli keti : Tamal maslaŋa ahi ma mʉweni nahaŋ ana kʉli gərgəri akaba ma ya ti kə̀gəsumkabu ni ti Melefit mêtikwesla maslaŋa gana.
10 Nəhi ana kʉli nahkay ti kə̀humi ana ahàr nawayay ti mis tâzləbay nu waw ? Aha, nahkay do ! Bay ya ti nawayay mâzləbay nu ni ti Melefit. Kə̀humi ana ahàr nawayay ti pakama goro mâɓəlafəŋ kè mis aw ? Aha, nahkay do ! Kekileŋa tamal nawayay pakama goro mâɓəlafəŋ kè mis keti ti akal nu bay məgri tʉwi ana Krist va do.
Pakama ga Pol ya ahəŋgri ana mis ni ti Yezu Krist àhi àna ahàr gayaŋ
11 Bəza ga mmawa, nəhi ana kʉli nahəma, *Ma Mʉweni Sulumani ya nə̀bu nəhi ana kʉli ni ti ma ge mis hihirikeni do. 12 Mis hihirikeni àhu ma gani do, mis hihirikeni àcahu ma gani do daya. Àɗəfuaba ma gana ti Yezu *Krist àna ahàr gayaŋ.
13 Zlam ya ti nàgray ahaslani ka ya ti naɗəbay Melefit akaɗa ga ndam *Zʉde ni ti kìcʉma àndava. Ka sarta gani nani ti nə̀gria daliya ana ndam ge Melefit àsaɓay, nàwaya mijiŋ tay a. 14 E kiɗiŋ ga məndalala goro bu e jiba goro bu ni ti nàɗəba divi ga ndam goro ndam Zʉde na, nə̀tama nday ndahaŋ na ahar gəɗakana. Nàwaya maɗəbay divi ga ata bəŋ goro na dal-dal àsaɓay.
15 Ay kwa ka ya ti nu a huɗ ga mmawa bu ni ti Melefit àdaba nu a. Àgru sulum gayaŋ, àzalay nu ga məgri tʉwi. Sarta gayaŋ àra ènjia ti 16 àŋgazlu Wur gayaŋ ti nə̂sər Wur ni, ti nə̂zlapaki ka Wur ni, nə̂hi ma gani ana mis ya nday ndam Zʉde do ni. Ka sarta gani nani ti nìhindifiŋa ma kè mis hihirikena ndo. 17 A Zerʉzalem day nòru ga məmənjiyu ndam ya ti tìgi ndam *asak ga Yezu enji goro ni ndo. Nòru suwwa ka haɗ Arabi sawaŋ. Kələŋ gani nàŋga a Damas a. 18 Vi mahkər kələŋ gani day kwa ti nòru a Zerʉzalem ti nə̂sər Piyer. Mànjəhaɗkabu vaɗ kru mahar zlam ciliŋ. 19 Eslini ti nìpi zal asak nahaŋ ndo, nìpi ti Zek wur ga məŋ ga Bay geli ni ciliŋ. 20 Kè meleher ge Melefit, ma goro ya nə̀bəki ni ti ma ge jiri, nàsəkaɗ malfaɗa do.
21 Kələŋ gani nàsləka, nòru ka haɗ Siri akaba ka haɗ Silisi. 22 Ka sarta gani nani ti ndam ge Krist ya *təcakalavu ka haɗ *Zʉde ni tìpi nu ɗay-ɗay faŋ ndo. 23 Tìcia ma ge mis ya tə̀ɗəmku na ciliŋ ; mis ni tə̀ɗəm : « Maslaŋa ya ti àgri daliya ana leli ahaslani, àcafəŋa leli ga məhi ma ga məfəki ahàr ke Krist ana mis a ni, nihi ti ègia naŋ naŋani àna ahàr gayaŋ naŋ àbu ahi ma gani nani ana mis. » 24 Tàra tìcia nahkay ti tàzləbay Melefit azuhva nu.