3
1 Vonaia vona ahiahina. Wayahina, yau vi‑tanai taina habuhabumi wayahimia mamaei. Taui me Iudea taui eha me Iudea ivane‑tawanei, o eha? 2 Avonemi ika! Dewa tunina tunina wayahina me Iudea taui eha me Iudea ivane‑tawanei. Naona, Yaubada me Iudea tauna yana ipupu kadu tauna ya vona‑dabadaba venei, idune‑vi‑avini. 3 Vona ahiahina, me Iudea tupwai eha yana ipupu ita‑vitumahane ahiahina. Ka taui tau goyogoyoi, kate Yaubada eha goyona deina. Tauna eha ya vona‑dabadaba ta‑vi‑nua‑pani, kate tauna nuani, kadu dedewei. 4 Aituhu tomotau aitamoata aitamoata tau vitupu, dewana eha ana pata Yaubada na‑vo‑vine. Tauna tunutunuhina maꞌ‑vavaha, Iginuma ivona deina,
“Vona ahiahina, apaina tomotau idueyei
yam vi‑nua‑dadana tunutunuhina,
ka kadu avi tuta tomotau inau‑vonuvonu
yam vi‑nua‑dadana wayahina,
apaina taui kadu inꞌ‑anamanei
yam dewa tunutunuhina.”✡ Sam 51:4.
5 Vonana vona ahiahina akanai. Ka apaina aitam tomotau mwagemwagena na‑vona deina, “Aituhu yauke yau dewa goyona ka Yaubada yana dewa ahiahina ainua kabou‑viwavei, memeanina kadueyei Yaubada ahihi‑vainena. Wayahina, yau dewa goyona Yaubada anꞌ anamana ahiahina ivaitei deina. Ka aituhu Yaubada dewa‑yaiyaieu yau dewa goyona wayahina, tauna ya dewana eha tunutunuhina deina.”
(Aviyaivia eha Yaubada itꞌ‑anamane ahiahina, akanai taui ai pata ina‑ipupu deina.) 6 Kate ipupuna eha ipupu ahiahina. Iuna apaina Yaubada tomotau habuhabuka na‑nau‑yanahika. Ka tauna paisewana ana pata, iuna yana dewa habuhabuna tunutunuhina ana noe.
7 Ka kadu aitam onoto mwagemwagena yana ipupu deina, “Aituhu tomotau yau vitupu inononi, ka aituhu yau vitupu Yaubada yana vona ainua ibou‑viwavei, akaka dewana wayahina memeanina wayahia idudueyei Yaubada yana vona vivane tunutunuhina. Wayahina, aituhu Yaubada didigana avo‑vi‑natei deina, medeina Yaubada ivona vivane yauke tauna a havia?”
8 Yaiau, tau vitupu tupwai imana‑giboeu ka ivonavona vivane yauke, Paulo, aipuipupu deina. Taui ivonavona, “Paulo vonavona, ‘Yaiau, nau‑wawanika dewa goyona kadewa‑nubunubui, e apaina dewa ahiahina vinꞌ‑omo yaka dewa goyona wayahina akanai.’ ”
Ia! Vonana vitupu ananina. Apaina Yaubada tomotaui na‑dewa‑yaiyaiei, kadu dewa‑yaiyaina ivaniahei yai ipupuna wayahina akanai.
Eha Aitam Tomotau Yana Dewa Tunutunuhina
9 Wayahina, yau vonana anꞌ anamana medeina? Kaiwadi, itoka me Iudea yawaika taui eha me Iudea yawai ivane‑tawanei, o eha? Yaiau, avonemi eha! Iuna goyona itoka tomotau habuhabuka bagibagi‑tawaneka, kadu goyona veimeyeka kavi‑ateteyei, tauka me Iudea kadu taui eha me Iudea.✡ Rom 1:18–2:24; 3:23. 10 Kadu Iginuma ivona deina,
“Eha aitam tomotau yana dewa
tunutunuhina Yaubada matana,✡ Sam 14:1-3; 53:1-3.
11 ka kadu eha aitam tomotau ta‑nua‑hau,
ka kadu eha aitam tomotau Yaubada ta‑nenene.
12 Tomotau habuhabui avaha Yaubada ini‑tawanei,
ka habuhabui etawana goyona ivi‑nua‑dadani,
ka eha aitam wayahia yana dewa ahiahina,
eha aitam.”
13 “Taui yai ipupu deina, ka vona vitupu meaia
vinꞌ‑omo‑nananena,”
“kadu vona honahonana epunaia
vinꞌ‑omo‑nananena,
mwata yai pohavu deina,”✡ Sam 5:9; 140:3.
14 “Bwanata manimaninina awai nau‑vi‑anai.”✡ Sam 10:7.
15 “Taui ivo‑kwayavoni tomotau
ivunui inau‑vi‑anigi.✡ Isa 59:7-8.
16 Kadu aveta baina ineine, akanai vita‑vovona
kadu inahe natanata mani tomotau wayahia.
17 Taui nua gomagomanina a etawana
eha itꞌ‑anamane,
kate vi‑naua ana heta a etawana
ianamanei,”
18 “kadu taui eha Yaubada imatamataute.”✡ Sam 36:1.
19 Wayahina, Yaubada ya nuanua kadueyei! Tauna ya veimea veneka, iuna veimeana yaka goyona viwaveneka. Ka avaha yaka goyona kanamanei, eha aka pata kanꞌ‑awa‑vidovidoheka tauna matana. Ka kadu eha aka pata kanau‑vonuvonu tauna ya vi‑nua‑dadana wayahina. Ka kadu eha aka pata kanovo‑tawane. Iuna tau maꞌ tanopi habuhabuka nau‑wawanika yaka dewa ai nau‑pata kavaniahei Yaubada wayahina. Wayahina, Yaubada ya veimea a pai mini ananina taina, vivane itoka aitamoata aitamoata kagenuana tauna matana. 20 Wayahina, eha aitam tomotau ana pata na‑ipupu, na‑vona, “Yaubada ya veimea awaeheu yauke yau dewa tunutunuhina.” Eha. Yaubada ya veimea yaka dewa goyona si‑vinꞌ‑omanei viwaveneka.✡ Sam 143:2; Rom 7:7; Gal 2:16.
Yaubada Ya Etawana Yaka Vidoha Wayahina Tunina
21 Yaubada ya nuanua ananina kavi‑tau tunutunuhika tauna matana. Wayahina, tauna etawana nau‑seanina vevewanei yaka vidoha wayahina. Ataina Yaubada etawanana viwaveneka, kadueyei. Udu! Etawanana eha tauna ya veimea. Yaubada ya tau apa‑taputapu habuhabui etawanana iapa‑taputapuei Iginuma nihenina. 22 Ka etawanana nau‑seanina taina. Aituhu Iesu Tau Ito‑yavuha kavitumahanei ahiahina, akanai Yaubada dewa‑vidovidoheka tauna matana. Aituhu aviyaivia me Iudea, o aituhu aviyaivia eha me Iudea, akanai tomotau yai tupua eha aitam aviani yaka vidoha wayahina Yaubada matana. Aituhu Iesu kavitumahanei ahiahina, Yaubada itoka tomotau aitamoata aitamoata bou‑vidovidoheka.✡ Gal 2:16. 23 Aitamoata aitamoata wayahikaia dewa goyona kadedewei. Wayahina, aitamoata aitamoata wayahikaia kavi‑kutakuta Yaubada didigana wayahina. 24 Kate udu! Aka pata kavidoha Yaubada matana yanꞌ am‑venena awawaehina wayahina. Nonova goyona yawaika poyꞌ‑avini ka veimeyeka. Ka Yaubada dewa‑vidovidoheka yaka Tau Ito‑yavuha Iesu wayahina, iuna Iesu yaka goyona epa‑yavunei. Wayahina ito‑yavuha kavaniahei tauna ya dewana wayahina.✡ Rom 5:1.
25-26 Nonova Yaubada tauna ya veimea nihenina voneka itoka tomotau yaka goyona a nau‑pata tunuhina vivane kanꞌ‑aniga. Nonova tauna eha goyo‑naia wayahi ta‑dewa‑yaiyaieka, kate tauna potapota nau‑pata tunuhina dewaia wayahina. Ataina kadueyei Yaubada Iesu vi‑nomui, ka Iesu yanꞌ aniga vivane nau‑patana tunuhina. Wayahina, tuta ataina aituhu Iesu kavitumahanei, akanai Yaubada nua‑piahika. Ka Yaubada ya dewana kadueyei vivane tunutunuhina. Tauna yaka goyona nau‑pateyei, kadu etawana nau‑seanina vevewanei yaka vidoha tauna matana wayahina. Kadu aituhu aviyaivia ivitumahanei Iesu vivane yaka Tau Ito‑yavuha, akanai Yaubada taui na‑nua‑piahi‑neiei.
27-28 Wayahina, itomi me Iudea anau‑dadanemi vi‑tanai tupwai wayahia. Itoka me Iudea medeina? Aka pata kavona‑vanevane Yaubada matana yaka dewa wayahina? Tauna ya veimea veneka, ka dewana wayahina aka pata kavona‑vanevane? Avonemi eha! Eha aka pata kavona‑vanevane, iuna yaka vidoha Yaubada matana eha ta‑vinꞌ‑omo yaka dewa wayahika, kadu yaka vidoha eha ta‑vinꞌ‑omo veimeana wayahina. Vona ahiahina, yaka vidoha Yaubada matana vinꞌ‑omo tauna yana dewa wayahina, ka itoka dewana kavitumahane‑ohoi. Aituhu aka pata Yaubada ya veimea aitamoata aitamoata kadedewe, akanai kavona‑vanevane yaka dewa wayahina. Kate eha aka pata. Wayahina, etawana aitamoata ana heta mamaei yaka vidoha Yaubada matana wayahina, vivane Iesu kavitumahanei.
29 Ka itomi me Iudea anau‑dadanemi kadu aitam vi‑tanai wayahina. Yaubada medeina? Tauna itoka me Iudea aka heta yaka Yaubada, o kadi tauna kadu taui eha me Iudea yai Yaubada? Vona ahiahina, tauna itoka yaka Yaubada kadu tauna taui yai Yaubada, eha itoka me Iudea aka heta yaka Yaubada.✡ Rom 10:12. 30 Yaubada vivane aitamoata, ka tauna ya etawana itoka tomotau yaka vidoha wayahina vivane aitamoata. Aituhu aviyaivia me Iudea wayahikaia Iesu kavitumahanei, akanai Yaubada yaka goyona nua‑piahi, e kavidoha tauna matana. Ka kadu aituhu aviyaivia eha me Iudea wayahia Iesu ivitumahanei, akanai Yaubada yai goyona nua‑piahi, e taui ividoha tauna matana aitamoata deina.✡ V.V 6:4; Gal 3:20.
31 Kadu aitam vi‑tanai wayahimia taina. Aituhu yaka vidoha vinꞌ‑omo yaka vitumahana wayahina deina, medeina kana‑vona Yaubada ya veimea wayahina? Nau‑wawanika kamana‑giboei ka kahapone‑yavunei? Eha! Iuna ataina Yaubada ya veimea a paisewa ahiahina kadudueyei. Wayahina, nau‑wawanika Yaubada ya veimea kawa‑vidovidohei. Aitam pai dune avenemi, udueyei, e unꞌ‑anamanei.✡ Mat 5:17.