18
Babilon ei mamauosi
1 Tauluna golu ie, eau ite a bineanea tasa lou ei sivosivo utano maino na langi. Ei isa a sagagalina buo sele, ma malasana buo minei i toe a magamaga ei lada sele. 2 Ei tola sagali sele maido,
“Aubu taula e Babilon ei mamauosi! Ei mamauosi!
Seidei ei palea a aubu mine sou a nunu pagu.
Sou a nunu mumugu, ma manumanu mumugu,
ma manumanu sou pagu sele, sou ino ne ei.
3 Vuna maido, sou a abuna vanunua sou goli a inigogona sualolona makuba pilu e ei.
Ei tomane sou ini a vain sagaligali minei.
Me sou a mapana mina magamaga tamai sou goli a inigogona sualolona pilu e ei.
Ma vanua na vuvutina sou guale a vatu makuba a matamatana inigogona toetavinevinena ei ma maelaela oto a gunolina.”
4 Me eau longe a baligolu tasa sea i palea na langi maido,
“ ‘Amutou a vanunua ma tavivine minau, namutou ilisitase a aubu iede me mu gali usala.’
Dae ne amutou maitamaina pilu e ei a sinusu vuso ei goli.
Me dae ne amutou maitamaina pilu e ei na ilala ei guale a mapa pagu mina sinusu vuso do tamai.
5 Ei taupili a sinusu vuso minei i asu pea na langi.
Salemo ei damutale a inigogona pagu vuso ei goli.
6 Namutou damutale a matana inigogona sualolona tavine do ei goli, me namutou maliu tamai usino ne ei.
Ei matompili a inigogona pagu vuso minei me sou palea makuba sele. Tomane moni ne amutou matompili a mapa pagu minei mapigogoi a inigogona pagu vuso ei goli.
Ei sauvuvule a nanu sagaligali na taogo. Io ne amutou matompili a sagalina nanu sagaligali me mu maini e ei.
7 Ei beilange a aisane ei oto me ei goli a matamatana inigogona toetavinevinena.
Maido me namutou bilii e ei a davutina makuba me namutou matangi ei mapapaina, mapigogoi a inigogona pagu vuso minei.
Ei ade e ei oto maido, ‘Eau eili a tavine a mapana. Eau ma buasu oto.
Mavaana ni ma mapigogoi ete i palea le eau mea na tangi. Boa vuso sele.’
8 Maido ma matamatana golugolu pagupagu sele ne sou palea le ei na malada tasa moni.
Minate ni palea usino ne ei, ma vanua makuba ne sou tangi mamau, ma vitolona buo ni sibitala.
Ma oavi ni aani vuse Babilon,
vuna Salemo, Bibi Taula, ei isa a sagagalina buo ei ni vavasa a inigogona ne Babilon.
9 “Sou a mapana mina magamaga sou goli a inigogona sualolona pilu e ei, me sou goli a matamatana inigogona pagu a vatu pilu e ei, ne sou tangi dododo me ne sou lilomavaa ilala sou ite a muo i palea na oavi ei tununi e Babilon. 10 Ne sou ite a davutina pagu odo ei guale, me ne sou lae sele. Ne sou magili bulago ane ei me sou vei,
‘Maula, maula sele e amutou e Babilon,
oo a aubu buobuo taula me oo sagali!
Me saga i a mapa pagu mina sinusu minio ei paleasi ne oo!’
11 “Ma vanunua na vuvutina mina aveavena vuso na magamaga ne sou damutaletale e Babilon, me ne sou tangi dododo sele e ei me ne sou lilomavaa. Vuna, bibi boasi ni oli a golugolu vuso mine sou. 12 Golugolu vuso mine sou, iedo a gol, silva me sou a malasana vatu me sou a gapu a mapana i buo sele me sou a malasana malo keakea ma malo malavovola ma matamatana malo kasososo me sou a mata vuvuna malo. Me tamai sou a matamatana obu a manginana doana ma matamatana golu sou goli a livona elepan ma matamatana golu sou goli a obu a mapana ei oata ma bras ma ain ma mabel. 13 Ma sinamon ma laia na inani ma kavou na mapalena muo ei isa a manginana doana ma mira ma nanu i manginangina doanana ma vain ma bulu na oliv ma ulalu doana ma vit. Me sou a bulmakau, sipsip, ma hos pilu a karis, me sou a vanua na pipigona sabubu, iede sou a vanunua sou mauli.
14 “Vanua na vuvutina ne sou vei maido, ‘Gona inani oo kale sele no guale, ede sou vuso ino bulago ane oo. Golugolu vuso doanana a mapane sou i buo sele ma golugolu vuso doana mina malolomene oo, iede sou vuso sou bualesi, me oo no ma mapigogoi ete no ite lei e sou.’ 15 Ma vanua na vuvutina sou guale a vatu makuba na aubu buobuo do, ne sou lae sele a niitena davutina pagu a aubu buobuo do ei guale. Me ne sou magili bulago, me ne sou tangi dododo me sou lilomavaa. 16 Ne sou vei maido,
‘Maula, maula a aubu taula do!
Lisa ei tau a malasana kinainai keakea ma matamatana malo malavovola ma kasososo, me ei toemalase a vovone ei a gol ma malasana vatu pilu a gapu a mapana i sae sele.
17 Moni saga i a vuvutina vuso do sou mamau vuso.’
“Ma bibi na matetengina vuso na maivelena kuta ma vanunua sou gaga a kuta ma vanunua na pipigona na dasi ma vanunua vuso sou pipigo a vuvutina na dasi, ne sou tamai magili bulago ane Babilon. 18 Me ne sou ite a muo ma oavi i aani e ei, me ne sou tola maido, ‘Sei aubu buobuo eili ei tomane a aubu taula ie?’ 19 Me ne sou lange a kavou muata na letene sou oto, me ne sou tangi dododo me sou lilomavaa. Me ne sou tola maido,
‘Maula, maule oo a aubu taula ie!
Tamatamana kuta na dasi sou palea a vanua na vuvutina sele a golugolu vuso sou a mapa buo sele maino na aubu buobuo do.
Maula! Moni saga i ei mamau vuso!
20 Oo a langi pilu a vanunua ma tavivine mine Salemo,
me amutou a aposel me amutou a profet, amutou vuso namutou mongemonge a golu seidei ei palea na aubu buobuo do.
Salemo ei maliuosi a inigogona pagu vuso a aubu buobuo do
ei goli le amutou.’ ”
21 Inade do ei pulosi, io a bineanea sagali tasa ei guale a vatu buo tasa tomane a vatu mina valipopolena vit. Ei beilange a vatu odo me ei lange utano na dasi. Me ei vei maido,
“Tomane na vea moni iedo ne sou lange sagali a aubu taula e Babilon utano,
ma vanunua ne sou ma ite etesi e ei.
22 Ma tinangina hap ma tuai ma vivigo ma baligoluna vanunua na inala,
ei ni ma palea otosi lilo na bigomu minio.
Ma vanunua sou gualesi a muadana na gunolina matana pipigona vuso,
ne sou ma ino otosi lilo minio.
Tagogolo na vatu ei valipopole a vit,
ei ni ma palea otosi lilo ne oo.
23 A muada mina lada,
ei ni ma lada otosi ne oo.
Ma inadenade mina bibi ni taulai alaba ma tavine ni taulai alaba,
iede tamai ei ni ma palea otosi lilo ne oo.
Lisa, a vanunua na vuvutina minio sou a bibi buo sele na matene sou a abuna vanunua ma tavivine sanii sea.
Me oo goli a matamatana milolo i auala ane a vanunua ma tavivine mina aveavena vuso.
24 Sou poge a daladalane sou a profet ma vanunua ma tavivine mine Salemo
me sou a vanunua ma tavivine vuso sou mate na magamaga lilo na aubu buobuo e Babilon.”