19
Vanunua ma tavivine mine Salemo sou beilange a aisane Salemo
1 Tauluna golu ieli, eau longe a tinola buo mina abuna vanunua ma tavivine buo na langi. Sou vei maido,
“Haleluia!
Salemo mine eitou ei tasa moni ei gualeliu e eitou. Ei isa a aisa buo ma sagagalina.
2 Vavasana mine Salemo ei patotona me ei bilesi vuso.
Salemo ei maliuosi a mapa pagu usino na sualolona tavine buo ei toegegeli a vanunua ma tavivine na magamaga a inigogona sualolona minei.
Tavine ieli ei isa tamai a sinusu mina valiputematene sou a vanunua na pipigona mine Salemo, me Salemo ei adovesi a sinusu minei iedo.”
3 Me sou tola lou maido,
“Haleluia!
Muo na oavi ei tununi a tavine do ei vele uata taliuliu taliuliu!”
4 Ma vanunua buobuo savulu lua timana iva pilu a golu iva ino mauli sou totopatulu me sou kaka ane Salemo ei ino ugu na niugugu a mapana minei. Sou vei maido,
“Amen! Haleluia!”
5 Me na niugugu a mapana mine Salemo a baligolu tasa ei tola maido,
“Amutou a vanua na pipigona mine Salemo,
amutou a abuabuna amutou laelae e Salemo
me amutou matano moni ne ei,
amutou a vanua sabubu pilu e amutou mu isa a sagagalina,
amutou vuso namutou beilange a aisane Salemo!”
Inani buo mina taulaina mine Natuna Sipsip
6 Io eau longe a baligolu tomane a abuna vanunua ma tavivine makuba sou adeade, me ei tamai tomane a mala na nanu buo ei tagogolo, me ei tamai tomane sou a ausa sou tupaulu sagali sele. Sou tola maido,
“Haleluia!
Bibi Taula, Salemo mine eitou ei isa a sagagalina vuso, seidei ei iteale sou.
7 Seidei neitou lilokuba me neitou mongemonge sele me neitou beilange a aisane ei,
vuna ilala i sibitalasi ne Natuna Sipsip ei taulai, me susuna ei masusuluosi.
8 Salemo ei bilii a tavine do a malasana kinainai kea sele mei alaba.”
Malasana kinainai keakea do ei matailale a inigogona bilesi mina vanunua ma tavivine maolo mine Salemo.
9 Ma bineanea ei vei le eau maido, “Oo niage a inade maido, ‘Sou a vanunua ma tavivine Salemo ei toleale usinani na inani taula mina taulaina mine Natuna Sipsip, ne sou mongemonge.’ ” Me ei vei lei le eau maido, “Inade do ei a inade patotona mine Salemo.”
10 Io eau totopatulu agavuale a ubuna bineanea, me eau kale na kaka ane ei. Moni ei vei, “Oo ma goligoli lei maido! Eau tamai eitau a pipigona tasa moni pilu e tamtamaimu, iede amutou a abuabuna amutou silimuli a inade Iesu ei veipale. Oo no totopatuliale Salemo tasa moni. Eitou muada a inade Iesu ei veipale ei a inade na profet.”
A bibi ei ugu na hos keakea
11 Eau ite a langi i peo, ma hos keakea tasa ino. Ma aisana bibi ei ugu na hos iodo ei maido, “Bibi ei iteale kube a pipigona minei,” ma “Bibi ei goli moni a inigogona i patotona.” Ilala ei vavasa ana vanunua ma tavivine mei maubi, ei ogomuli moni a inigogona bilesi. 12 Matana ei tomane a oavi ei lulu, me ei isa a kele a mapana papaina na letene ei. Na vovone ei sou niage a aisa tasa, moni ei tasa moni ei muada a aisa do. 13 Daladala ei avipope a kinainai lagolago ei kai, me sou vate a aisana “A inade mine Salemo.” 14 Sou a vanua na maubina mina langi sou ugu na hos keakea mine sou, me sou ogomuli e ei usino. Sou kai a malasana malo keakea i alaba sele. 15 A viso tasa ei binaso sele, ei palea usala na asena, na viso do ei ni taupui a vanunua ma tavivine mina abuna vuso. Ei ni lapitole a butu a ain mei iteale sagali e sou. Me ei ni soetole a vuavua na vain na taogo a vatu buo ei matailale a lilotivulana buo mine Salemo ei isa a sagagalina vuso. 16 Na kinainai lagolago minei me na ubune ei sou niage a aisa maido, “Mapana mine sou a mapana, me Bibi Taula mine sou a vanua buobuo.”
17 Io eau ite a bineanea tasa ei magili oata na oaso. Ei tola sagali ana manumanu sou lovolovo balivua na langi maido, “Amutou asu usinani mu viepilu a inani taula mine Salemo. 18 Ne amutou ani a mainine sou a mapana, ma mainine sou a munuganuga mina vanua na maubina ma sagalina vanua, ma mainina hos pilu a vanua sou ugu na hos. Ne amutou ani tamai a mainine sou a vanunua vuso, iede sou a vanua sou malamala pilu a vanua na pipigona sabubu, ma vanua sabubu pilu a vanua sou isa a sagagalina.”
19 Me eau ite a viuviu masivo do me sou a mapana mina magamaga pilu a vanua na maubina mine sou sou asu maino me sou viepiluosi. Sou kale ne sou maubi ana bibi ei ugu na hos ma vanunua na maubina minei. 20 Moni ei paletole a viuviu masivo do pilu a aualana profet, ei goli a gona sinaga makuba na matana viuviu masivo, me na inigogona li ei auala ana vanunua sou guale a matailala mina viuviu masivo me sou totopatulialale a puigolo minei. Viuviu masivo pilu a aualana profet, sulu ino mauli, me sou lange sulu utano na aova taula i bubuli ma vatu loiloi i vonu ne ei me sou lululu. 21 Ma bibi ei ugu na hos odo, ei valiputemate a gegene ne sou odo a viso lago na asene ei iodo. Ma manumanu sou ani a maini ne sou, me sou masu sele.