Tutu ña kuaꞌan ndaꞌa na Hebreo, na ndikun Tata yo Jesucristo
1
Tuꞌun yoꞌo kuvi ña kaꞌan xaꞌa Tata yo Jesucristo ña kuu ra seꞌe Tata yo Ndioxi
1 Ra te kuiya xinaꞌa, ra mii va Tata yo Ndioxi kuvi ra taxi tuꞌun ra ndaꞌa tiaa, ndia ndikaꞌan ndoso tuꞌun yuꞌu ra, ra kuaꞌa ni va ichi ndikaꞌan ndia ña, ra kuaꞌa ni tu kuꞌva ndikaꞌan va ndia ña, xiꞌin na xii xikua yo; 2 Ndi su saa kuu, ra ndiyaꞌa kuaꞌa ni va kuiya, ra kii ña ndee yo vichin, ra kuëe xa ka ra saa, chi vichin, ra xa ndaꞌa seꞌe va ra ke taxi ra tuꞌun ra, ra ndikaꞌan ndoso ra kan ña nuu yo. Ra seꞌe ra kuvi tu ra xiniñuꞌu ra ña xavaꞌa ra ña yuuvi, xiꞌin takundiꞌi ñaꞌa ña iyoo nuu ñuꞌu, xiꞌin takundiꞌi ñaꞌa ña iyoo ndiví, ra ndaꞌa ra kuu seꞌe ra ke ndataxi tu ra takundiꞌi va ñaꞌa ña iyoo nuu ña yuuvi yoꞌo. 3 Ra mii Tata yo Jesucristo va kuvi ra ^ndañaꞌa ndiee kaꞌnu, ña nduvi ni kuu mii Tata yo Ndioxi; ra Tata yo Jesucristo, ra iin takundiꞌi ñaꞌa, ña ^kuu mii Tata yo Ndioxi kuvi tu ña ^kuu mii ra yoꞌo va; ra mii Tata yo Jesucristo kuvi tu ra ^tiin takundiꞌi ñaꞌa ña iyoo nuu ña yuuvi yoꞌo va, ña kan ke vaꞌa iyoo ña; ra xiꞌin ndiee kaꞌnu ña ^kuu mii tuꞌun va ra ke tiin ra ña. Ra te ndiꞌi ndakatia ra kuachi yo, ra saa nandaa ra ndivi nuu íin tiayu kaꞌnu, nuu nduꞌu Tata ra Ndioxi, ra ndakunduꞌu ra xiin kuaꞌa va ra.
Tata yo Jesucristo kuvi ra chee nuu takundiꞌi na tatun Tata yo Ndioxi
4 Ra Tata yo Jesucristo kuvi ra chee nuu takundiꞌi va na tatun Tata yo Ndioxi, saa chi kivi ña taxi Tata yo Ndioxi ndaꞌa Tata yo Jesucristo, ra kaꞌnu ni va ña nuu kivi takundiꞌi na tatun Tata yo Ndioxi. 5 Saa chi Tata yo Ndioxi, ra ndia nii ichi ndikäꞌan ra xiꞌin ndia nii na tatun ra, ña kaꞌan ra, ta kuꞌva ndikaꞌan ra xiꞌin Tata yo Jesucristo, ña kachi ra suꞌva:
Yoꞌo kuvi seꞌe mii yu;
ra yuꞌu kuvi ra ^taxi ña tiaku kun vichin;
Ra nii ndikäꞌan tu ra xaꞌa ndia nii na tatun ra, ña kachi ra suꞌva:
Yuꞌu kuvi ra kuu Tata ra,
ra ra kan kuvi ra kuu seꞌe va yu.
6 Ra te tiꞌvi Tata yo Ndioxi Tata yo Jesucristo, ra ndiniꞌi taꞌvi ndakiꞌin takundiꞌi ñaꞌa ña iyoo nuu ña yuuvi kixi ra, ra suꞌva va ke kachi Tata yo Ndioxi xaꞌa ra:
Na ndasakaꞌnu takundiꞌi va na tatun yu, ra kuu seꞌe yu, káchi ra.
7 Ra na kundaa ini ndo, chi suꞌva va ke ^kachi Tata yo Ndioxi, xaꞌa na tatun ra, kachi tuꞌun ra:
Na tatun yu, ra nuu va yu ke ^xachiñu na,
ra ^ndasa tu yu na ta kuꞌva iyoo tachi, xiꞌin yaa ñùꞌù va.
8 Ndi su siin va tu ndikaꞌan Tata yo Ndioxi xaꞌa Tata yo Jesucristo ra kuu seꞌe ra, kachi tuꞌun ra:
Yoꞌo kuvi Ndioxi ra kaꞌndia chiñu ndia ndixaa kii ndixaa tiempo;
ra te xa na kaꞌndia chiñu kun, ra ndasandaku ndiꞌi va kun chiñu kiꞌvi.
9 Saa chi ^xinisii ni kun ña vaꞌa, ra kundasi va kun chiñu kiꞌvi;
ra yuꞌu, ra kuu Tata kun Ndioxi va kuvi ra ndikaxin yoꞌo, ña kuu kun rey saa chi saa kuni mii va yu,
ra kuaꞌa ni ka va ña sii ini, taxi yu ndaꞌa yoꞌo nuu takundiꞌi na itaꞌan xiꞌin kun, kachi Tata yo Ndioxi,
^kachi tuꞌun ra. 10 Ra ndikaꞌan ka tu Tata yo Ndioxi, kachi ra suꞌva va, kachi tuꞌun ra:
Yoꞌo, Ndioxi, ra kuu seꞌe mii yu kuvi ra xakin xaꞌa ña yuuvi yoꞌo xiꞌin ndaꞌa kun,
ra saa tu ndivi va kii ña xikunduꞌu xaꞌa ña yuuvi.
11 Ra takundiꞌi ñaꞌa ña xavaꞌa kun, ra ña ndiꞌi xaꞌa va kuvi ña,
ndi su yoꞌo, ra tiaku kun ndia ndixaa kii ndia ndixaa tiempo va.
Saa chi ta kuꞌva ^ndoꞌo tikoto te xa kuyata va ña ke ndoꞌo ña;
12 Ra ndakaꞌnu tu kun ña ta kuꞌva xa na ña ^ndakaꞌnu na tikoto va.
Ra ndasama tu kun ña, ta kuꞌva xa na ña ^ndasama na tikoto ña ndixi va na.
Ndi su yoꞌo, ra ta iyoo kun, iyoo va kun,
saa chi ndia nii kii ke küvi vi kun.
13 Ra Tata yo Ndioxi, ra ndia nii na tatun ra ndikäꞌan ra xiꞌin, ta kuꞌva ndikaꞌan ra xiꞌin Tata yo Jesucristo, ña kachi ra suꞌva:
Naꞌa kunduꞌu kun xitia kuaꞌa yu,
ra na sandiꞌi yu xaꞌa
takundiꞌi na iyoo kuachi xiꞌin kun,
kachi ra. 14 Ra takundiꞌi na tatun Tata yo Ndioxi, ra takua nuu va ra ke xachiñu na, ra tiꞌvi tu ra na kuaꞌan na ña chindiee taꞌan na xiꞌin yuvi na xiniñuꞌu kaku va.