1 Yuꞌu, ra Pablo, ra ndikaa veꞌe kàà xaꞌa ña kaꞌan ndoso yu tuꞌun vaꞌa xaꞌa Tata yo Jesucristo, kuvi ra ^tiáá tutu yoꞌo xiꞌin ra ñani yo Timoteo, ña kuxaa ña ndaꞌa kun, ñani Filemón, ra xachiñu xiꞌin ndi, ra kuꞌvi ni ini ndi xini ndi; 2 ra ^tiꞌvi tu ndi tuꞌun ndioxi kuxaa nuu ña kuꞌva yo Apia va, ra saa tu ra ñani yo Arquipo, ra tiaa ni ndieé chikaa ndie̱e̱ xika kaꞌan ndoso tuꞌun Tata yo Ndioxi xiꞌin va yo, ra ^tiꞌvi tu ndi tuꞌun ndioxi kuxaa nuu na ñani yo na ndakutaꞌan veꞌe va kun. 3 Ra mii Tata yo Ndioxi, xiꞌin Tata yo Jesucristo na taxi ña vaꞌa kutaꞌvi ndo, ra vaꞌa ni na koo ndo.

4 Ra iin takundiꞌi va ichi ña ndataxi yu tixaꞌvi ndaꞌa Tata yo Ndioxi, ra ndakaꞌan tu yu xaꞌa yoꞌo va ñani Filemón, ra ndataxi ni yu tixaꞌvi ndaꞌa ra xaꞌa kun. 5 Saa chi ^ndatuꞌun na ñani yo xiꞌin yu xaꞌa kun, ña ndinuni ni va ^ndíku̱n kun Tata yo Jesucristo, ra kuꞌvi ni tu ini kun xini va kun ra, ra ^kuꞌvi ni tu ini kun xini kun takundiꞌi na yii na kuu na ñuu va ra. 6 Ra xaꞌa ña ndakundikun yuvi Tata yo Jesucristo xiꞌin yo, xaꞌa ña kundaa ini na ña ndiaa ini yoꞌo, ra kuvi ña kaꞌan ni yu xiꞌin Tata yo Ndioxi ña vaꞌa na tandiaa na kundaa vaꞌa ini na xaꞌa ña vaꞌa, ña xa ndakiꞌin yo xaꞌa ña ndikun yo Tata yo Jesucristo. 7 Ra tiaa ni kusii ini ndi, ra ndiakua ndakindiee tu ini va ndi xiꞌin kun ñani Filemón, saa chi kuꞌvi ni ini kun xini kun na veꞌe ñuꞌu, ra xaꞌa ña xa yoꞌo kuvi ña ndakindiee tu nima va na.

8 Ra xaꞌa ña kuu yu, ra xika kaꞌan ndoso tuꞌun vaꞌa xaꞌa Tata yo Jesucristo, ra kuu mii va yu ndiayu ña kaꞌndia yu chiñu nuu kun, ña sa kun ña xiniñuꞌu sa kun, 9 ndi su küni yu ña sa yu saa, chi ña kuni yu ke kuaku ndaꞌvi yu nuu va kun, xaꞌa ña xa iyoo ña ^kuꞌvi ini ña kuu mii Tata yo Ndioxi xiꞌin yo. Ra yuꞌu, ra xikuaꞌa Pablo, ra ndikaa veꞌe kàà xaꞌa ña kaꞌan ndoso yu tuꞌun vaꞌa xaꞌa Tata yo Jesucristo, 10 kuvi ra nduku iin ña mani nuu kun vichin, ñani Filemón, xaꞌa ra Onésimo, ra iyoo ta kuꞌva iyoo seꞌe yu, xaꞌa ña ndakundikun ra ichi Tata yo Ndioxi xa̱ yu ini veꞌe kàà nuu ndikaa yu yoꞌo.

11 Ra vaꞌa ni ña ndixa va ke kuëe vivii ndixachiñu ra Onésimo nuu kun te yachi, ndi su vichin, ra tiaa ni va xiniñuꞌu ra nuu kun, ra saa tu nuu yuꞌu va. 12 Ra xaꞌa ña kan ke tuku va ^ndatiꞌvi yu ra, ña xaa ra nuu kun vichin; ra ta kuꞌva ^xa kun xiꞌin yuꞌu ña vii ni ndakiꞌin kun yuꞌu, ke na sa tu kun xiꞌin ra yoꞌo va, ña vii ni na ndakiꞌin kun ra. 13 Ra vaꞌa ni kuni ni tu yuꞌu va ña na kindoo ra yoꞌo, ña chindiee taꞌan ra xiꞌin yu nuu yoꞌo, ña ndikaa yu veꞌe kàà vichin xaꞌa ña kaꞌan ndoso yu tuꞌun vaꞌa xaꞌa Tata yo Jesucristo. 14 Ndi su küni yu ña kaꞌndia mii yu chiñu, tu köo yuꞌu kun xiꞌin yu, saa chi ña mani ña nduku yu nuu kun, ra küni yu ña na kuu ña ña nduxa, chi ña kuni yu ke na kuu ña ña kusii ini va kun. 15 Ra ña xi̱nu ra Onésimo nuu kun, ña köo ra ndixiyo xiꞌin kun ndiaꞌvi kii, ra kusana ña vaꞌa na ndakutaꞌan mani ra xiꞌin kun ndia ndixaa kii ndia ndixaa tiempo va kuvi ña. 16 Ndi su küu ka ra, iin ra xachiñu ndaꞌvi köo yaꞌvi nuu kun, chi vichin, ra ta kuꞌva iyoo iin ñani mii kun, ra ^kuꞌvi ni ini kun xini va kun na koo ra. Ra ^kuꞌvi ni tu ini yuꞌu va xini yu ra, ndi su na kuꞌvi ni ka va ini yoꞌo kuni kun ra, xaꞌa ña xa ndakundikun ra Tata yo Jesucristo.

17 Ra ña kuu kun ñani yu, xaꞌa ña ndikun yo Tata yo Ndioxi, ra ta kuꞌva ^xa kun ña vii ni ndakiꞌin kun yuꞌu ke na sa tu kun xiꞌin ra yoꞌo va, ña vii ni na ndakiꞌin kun ra. 18 Ra tu ndia chiñu kiꞌvi xa ra xiꞌin kun, ra a ndia tu ñaꞌa kun tiin va ra, ra na kundïꞌi ini kun, chi yuꞌu va na ka̱ꞌa̱n kun xiꞌin ra ndachaꞌvi yu ña nuu va kun. 19 Yuꞌu, ra Pablo kuvi ra, ^tiáá tutu yoꞌo xiꞌin ndaꞌa yu ña kuxaa ña nuu kun, ra yuꞌu va kuvi ra ndachaꞌvi takundiꞌi ña nika ra nuu kun; ra vaꞌa ni ña ndixa ke kuvi tu sandakaꞌan yuꞌu va yoꞌo, ña níká tu mii va kun nuu yu xaꞌa ña ndikaku kun, ra tiaku kun vichin. 20 Saa va ke iyoo ña ñani, ra na sa kun ña mani yóꞌo xiꞌin yu, xaꞌa ña ndikun yo Tata yo Jesucristo; saa chi ndakindiee ni ka va ini yu tu na sa kun ña mani yoꞌo xiꞌin yu.

21 Ra xa kundaa kaxi va ini yu ña sa va kun ña mani ña nduku yu nuu kun yoꞌo, ñani, Filemón, ra a kusana viꞌi ka va ña sa kun nuu ña nduku yu nuu kun. 22 Ra xa kaꞌan tuꞌva tu yu xiꞌin kun ña na sanduvi kun iin ñaꞌñu veꞌe kun nuu koo va yu, saa chi ndiaa va ini yu, ña ndakuiin va Tata yo Ndioxi yuꞌu ndo xaꞌa ña ^kaꞌan ni ndo xiꞌin ra xaꞌa yu, ra taxi va ra ndiayu ña kama ni va xaa yu koo yu xiꞌin ndo.

23 Ra ra ñani yo, Epafras, ra ndikaa veꞌe kàà xiꞌin yu xaꞌa ña kaꞌan ndoso ndi tuꞌun vaꞌa xaꞌa Tata yo Jesucristo, ra tiꞌvi ni ra tuꞌun ndioxi kuxaa ña nuu kun, 24 ra saa tu ra Marcos va, xiꞌin ra Aristarco, xiꞌin ra Demas, xiꞌin ra Lucas, ra ndia yoꞌo kuvi ndia kaꞌan ndoso tuꞌun Tata yo Ndioxi xiꞌin yu.

25 Ra mii Tata yo Jesucristo na taxi ña vaꞌa kutaꞌvi takundiꞌi ndo. Saa koo.