2
Teeꞌ eeꞌnaꞌ nariꞌ Kumponinge aaꞌning paning eeꞌnoko kansiꞌ bakevuuꞌ, eeꞌnoko ookara kapooꞌnanka mmauꞌ nariꞌ bakevuruꞌ. Eeꞌnoko Kumponinge ookara bakaang nko-nko nkovuruꞌnanka ˜naꞌmung-taa-naꞌmung bakevura, teꞌmung ˜keꞌmunta-taa-naꞌmung uaavouꞌ. Eeꞌnoko Kumponinge teꞌmung ˜keꞌmunta-taa-naꞌmung biraankevura meekaꞌantavuuꞌ, aiꞌ teꞌmung eeꞌnaꞌmung tee, tee uaavouꞌnaꞌmung bakaang nko-nko kansiꞌ nko-koong bakevura.
Tampaꞌ Kuunauꞌ Sirakaꞌanta Kumponinge Naninka Nkovuretuꞌnaꞌ
Tenang tutunaꞌ Kumponinge kansiꞌnaanka paning nkovuuꞌnaꞌkoong minkunaa aung: Tenang Ovoringe Kumponinge kansiꞌ eeꞌnoko paning nkovuuꞌnang kapooꞌ keenavaang tovang koiꞌ dovang baaꞌ otoarukoꞌ kansiꞌkoo, mmeꞌ Kumponinge apoꞌ botovuaruko eeꞌnoko naning otoarukoꞌ mintoong nkovupeuꞌnung. Nka ntonooꞌ tenang eeꞌnang tavoꞌarakoꞌ okiꞌnarekaꞌ kansiꞌkoo dau tompatompaꞌanta-koo. Eeꞌnoko tenang eeꞌnang teie Ovoringe Kumponinge naning kansiꞌkoong daꞌmong-etab nkovuuꞌ, eeꞌnoko keꞌnie deto uupuvura domaang avuuꞌ domang-antavuma eeꞌnoko tee naning tenang domaang-poꞌnung deemparuꞌ.
Teketa Kumponinge tee naning nkovura tampooꞌ temuꞌ nerievuuꞌnooꞌ sipuuꞌ teka Iideniꞌka duaaꞌ pomanooꞌaapea. Tenau tenau Kumponinge koiꞌnanka amutemuriiꞌ tampaꞌ oroꞌnanka keempuruꞌnau eeꞌnoko sinang maaꞌkoo tamparanankai. Eeꞌnoko meerooꞌ tenau-koo koiꞌ kevarira sipuretuꞌ: navari domaang isikung avuꞌnavari; niiꞌnavari noruꞌ aaꞌning tampara eeꞌnoko orara avuꞌnavari.
10 Eeꞌnoko teing ntong kareriiru teꞌ Iideniꞌ tavearikooꞌ tenau mintoonau duuꞌpaama, teketa nari deempari siarakooꞌ. 11 Tutunaꞌnari teing-koo miring Piison-nari, Aavila nameng, kooro-poꞌnameng, korovui pomanari. 12 Tee kooro temeng-koong tampara eeꞌnoko narung napoꞌ koiꞌ tampaꞌ nuuraaꞌ otomanooꞌ miring deliam. Napoꞌ kapang tampaꞌ oroꞌnanka-poꞌnooꞌ, miring kaneliani, ereng naakiomaing. 13 Keriira-nari ntong miring Kiong-nari, Kus-nameng-eta pomanari. 14 Beeriiru-nari miring Taikirisi-nari, Asiria-nameensiꞌkoo duaaꞌ pomanooꞌaapeita pomanari. Kareriiru-nari miring Iuperetisi-nari.
15 Eeꞌnoko teie Ovoringe Kumponinge tee naning nkavura teꞌ Iideniꞌnau-koo sipuuꞌ tenau mintoompuma teke tarevui otooꞌnaang. 16 Eeꞌnoko Ovoringe Kumponinge botovuma aaꞌpuuꞌ tee naning, 17 “Ookara koiꞌkoong sinananka mintoong-koo otoining-koong tamung naroꞌketa maaꞌemaatoaing, teka tevari koiꞌnavari noruꞌanta nka-navari teing aaꞌning-koo tampara eeꞌnoko orara dake maaꞌeaukaꞌ tee sinang tevari-koong, aiꞌ teꞌmung daꞌ tevari-koo sinang maaꞌeainaꞌmung daꞌ tee dooaing.”
18 Teketa Ovoringe Kumponinge aaꞌpuuꞌ, “Aung naning baka otoꞌkoo tampaꞌ deeaꞌ. Ninge bakaang pakupakunung tee-koo makosi nkoevompaing.” 19 Teketa teie Ovoringe Kumponinge teing kauꞌkarenaumo-nanka eeꞌnoko barennanka kansiꞌketa temuꞌ nkovuruꞌning teꞌ Aadama-anko poꞌantavuruꞌ teie namuriiꞌnaꞌ oovurira miring tampuriiꞌnaang, eeꞌnoko aming miring teie Aadamai tampuruꞌnung teing kapooꞌ domantooꞌnanka-koo tee tee biikaang miring deemparuꞌ. 20 Eeꞌnoko tenang Aadamai mirinanka tampuruꞌ teing kauꞌ karenaumo-nanka-koong bauꞌnaananka-koo eeꞌnoko biikoori-koo, napoꞌ ookara barennanka-koo tampuruꞌ, teka tee Aadama bakaang pakupakunung tee-koo makosi otoaruuꞌ.
21 Teketa teie Ovoringe Kumponinge tee Aadama aaꞌnaꞌ aasiꞌantavuuꞌ, eeꞌnoko tenang aatuko paramparang-koo kooꞌkoo nariꞌ bitaꞌura teꞌ napoꞌ bioꞌke avoꞌantavuuꞌ. 22 Eeꞌnoko teriꞌ paramparang-nariꞌ nkavuuꞌnariꞌketa Kumponinge nani manikuma nkovuuꞌ eeꞌnoko teni teꞌ Aadama-anko tavoꞌuuꞌ. 23 Teketa Aadamai aaꞌpuuꞌ, “Emuꞌ ani eeꞌnani mmaikoꞌ masikani. Bakaang kooꞌ tee ning-koong-eta kooꞌketaing eeꞌnoko bakaang bioꞌ tee ning-koong-eta bioꞌketaing. Ani donkaani-koong-eta kooꞌketa nkoniiꞌnani naning-eta-nani, teꞌkoo manikuma tampampaing.”* Iiburu-nupoong biikaang kara-koo “manikuma” eeꞌnoko “donkaani” dapiꞌ nariꞌ aurompari otong. 24 Teeꞌkoo teeꞌ aaꞌnomaung naninge baumararing sipurema baꞌaang ninka pinkaꞌarekooꞌ eeꞌnoko narung deemparekooꞌ.
25 Tenang tee tering ookaring donkaani eeꞌnoko teni baꞌaang simpenoiꞌdaring otoresi teka tee maiaꞌoreaꞌ.

*2:23: Iiburu-nupoong biikaang kara-koo “manikuma” eeꞌnoko “donkaani” dapiꞌ nariꞌ aurompari otong.