3
Aadama Duaꞌaruꞌnaꞌ
Ookara kapooꞌ avutevuꞌ biikoori Kumponinge nkovuruꞌnanka-koo boruꞌ bakei aaꞌnaꞌ toreearoꞌ. Teie tee teni manikuma aaꞌpuuꞌ, “Kumponinge ee masikaꞌ ookara anau-koo koiꞌnanka-koong sinang maaꞌkoo orokoruresing?” Eeꞌnoko tenie makuꞌuma aaꞌpuuꞌ tee boruꞌ, “Neeꞌke aaꞌ ookara koiꞌnanka-kooning sinang anau-kooning maaꞌkoo makosi. Teka Kumponinge aaꞌpuing, ‘Koiꞌnavari anau-koo meuꞌke otoinavari-koong deekoꞌ deeꞌke sinang maaꞌereaukaꞌ, aaꞌnoko tamung kompereaukaꞌ tevari, dooreꞌneenga.’ ”
Nka teie boruꞌke aaꞌpuuꞌ teni manikuma, “A, deeꞌ bakei doorearooꞌnaang. Deeꞌke tee sinang teuꞌkoong maaꞌereta deekoꞌ deeꞌ tee noruꞌ daateꞌdareeꞌnaang kapooꞌ tampara eeꞌnoko kapooꞌ orara noruꞌkoo, eeꞌnoko deeꞌ tee Kumponing-pinaꞌ nariꞌ otoreeꞌnaang. Kumponinge teeꞌ noruꞌui deeꞌ teeꞌ orokoruresing.”
Eeꞌnoko tenang tenie manikumai tee teuꞌkoong sinang oovuko onou eeꞌ oroꞌ tavoꞌkuuꞌ, “Bakei aung sinang maaꞌkoo tampara, oroꞌoroꞌnooꞌ tampaꞌ oroꞌke, eeꞌnoko maaꞌanko norukasiꞌ deeng-antamupeuꞌ.” Tee ninka noruꞌ ninka tee-koo sinang-koo nkavura maaꞌkuuꞌ, eeꞌnoko niiꞌning napoꞌ tenie tee baꞌung nariꞌ otoretuꞌnung avuioꞌ maaꞌuuꞌ. Eeꞌnoko tenang tee noruꞌ ookaanka-koong daateꞌaretuꞌ, eeꞌnoko tenang noruꞌaretuꞌ tenaanka tee simpenoiꞌka, eeꞌnoko tenang koiꞌ piikiꞌkoong paraꞌnooꞌ naroꞌka pateꞌureta duaana nkosiiretuꞌ.
Teketa tenang kamunooꞌnang boimpuioꞌ tenaankai tee Ovoring Kumponing teke mintoonge nanuko taaravuretuꞌ, eeꞌnoko koiꞌnanka-koo meuꞌ bakuꞌaretuꞌ. Teka teie Ovoringe Kumponinge Aadama bokuvuma aaꞌpuuꞌ, “Daꞌ areꞌ otomang?” 10 Eeꞌnoko teie aaꞌpuuꞌ, “Ninge daꞌkoong aurong mintoonge naniko taararamira amoromira simpenoiꞌ deemarama oomeꞌneeng-koo bakuꞌmaring.”
11 Eeꞌnoko Kumponinge aaꞌpuuꞌ, “Daꞌ baie simpenoiꞌ otoing nauruing? Aiꞌ tee koiꞌkoong sinang orokorantuꞌnavari-koong maaꞌei?” 12 Eeꞌnoko teie aaꞌpuuꞌ, “Tenie anie manikumai dake niꞌninka nariꞌ oꞌnoreeꞌnaang ameuꞌnanie tee-koo koiꞌkoong-koo sinang-koo amuioꞌ maaꞌkansing.”
13 Teketa teie Ovoringe Kumponinge teni manikuma aaꞌpuuꞌ, “Dake tee aming-koo teeꞌ nkoveing?” Eeꞌnoko tenie manikumai aaꞌpuuꞌ, “Boruꞌke tosimuioꞌ teeꞌ ninge maaꞌansing.”
14 Teketa Ovoringe Kumponinge tee boruꞌ aaꞌpuuꞌ, “Dake tee teeꞌ oroꞌ kapooꞌ nkoveing-koo dakaang barakosiꞌ tee dau basi ookara kauꞌkarenaumo-nanka bauꞌnaananka-koo eeꞌnoko poraꞌkoonanka-koo. Daꞌ tee keꞌdei nanimatoaing otoainaroong-koo tee nankanankara maaꞌema. 15 Eeꞌnoko ninge tee deeꞌnaanka daꞌ eeꞌnoko ani manikuma karenaanka deeng-antarampeaing eeꞌnoko napoꞌ teing deeꞌke deurukaaꞌ teeꞌke kare-nupoong otoromaatoaing. Teni baurukaaꞌkoo narunge* Aung tee Kumponinge Teroita Pakoꞌpariꞌniiꞌ nantoong domaang mooꞌurira tarevuriaing. Tee-koo nauvurema Kumponinge Aadamararing tee doorenang tampara nauvuretuꞌ. daꞌ boreꞌkoo puuturuaing eeꞌnoko dake tee kankoꞌbo-koo kakieai.”
16 Napoꞌ teni manikuma aaꞌpuuꞌ Kumponinge, “Ninge tee daꞌ pankaing sisikeera arompaing tenang parema mantompemaatoaing. Sisikeera ninka parematoaing. Nka tee, daꞌung-koo pia otoi otoaing, eeꞌnoko bakaang pia siompemaatoai.”
17 Eeꞌnoko napoꞌ Aadama-koo aaꞌpuuꞌ, “Dake teni daꞌaang bakaang kara taaravera tee koiꞌkoong sinang orokoantuꞌnung maaꞌeing-koo, ninge tee kansiꞌ taamang keentoma barakosiꞌansing taamananka tampaꞌ nkoaravaꞌ otoainge, eeꞌnoko daꞌ poreꞌdoma deekoꞌ tee-koo kansiꞌkoo taamanimatoaing ookara batei daꞌ otoaining-koo. 18 Eeꞌnoko kansiꞌketa koiꞌnanka tooꞌmurintaaꞌpoꞌnanka dupuai, napoꞌ baaꞌnanka orananka dupuai, eeꞌnoko dake maaꞌkoo poraꞌkooning baaꞌnanka maaꞌemaatoai. 19 Eeꞌnoko iontakaanang mintoontarama taamanimatoai, bera doora kansiꞌkoo tororaravainooꞌke basi, teꞌ eeꞌnooꞌ daꞌ nkorantuꞌnooꞌ, aiꞌ daꞌ tee daꞌmong, napoꞌ daꞌmong-koo doonko tororaravaing.”
20 Eeꞌnoko Aadamai teni baꞌaang miring Iivi Iiburu-nupoong biikaang kara-koo miring “Iivi” tee “Bioko” miruꞌari otong. tampuuꞌ, aiꞌ teni teni ookara nantoong amutemuriiꞌ bioko.
21 Eeꞌnoko Kumponinge Ovoringe kauꞌkarenaumo-nanka-koong dopaꞌkoo mononopaꞌ nkovura Aadama eeꞌnoko teni Iivi avuretuꞌ kurumpareeꞌnaang.
22 Teketa Kumponinge Ovoringe aaꞌpuuꞌ, “Aung tee naning niiꞌpinaꞌ oroꞌparing aaꞌnoing kapooꞌ tampara eeꞌnoko orara noruꞌui. Emuꞌ tee koiꞌ domang isikung avuꞌnavari-koo dueꞌ beꞌkoo tauraꞌpampiaukaꞌ, tevari-koong sinang maaꞌura napoꞌ domampari otoꞌneenga.” 23 Teeꞌpura Ovoringe Kumponinge tenau-eta Iideniꞌnau-eta bataꞌuuꞌ tamung poraꞌke mintoomparaaꞌnaang, tee naning kansiꞌketaing kansiꞌ nenkeꞌuma. 24 Tenang Kumponinge tering bataꞌureta, tee-koo tenau-koo Iideniꞌnau-koo duaaꞌ pomanooꞌaapenameng-koo koosinunanka purintoꞌnanka donkong-antavuruꞌ, tee tevung taung koiꞌ domang-anta-aape beꞌnavung paraꞌai otoromaatooꞌnaang, bainatu ntaꞌpinaꞌ urung kompai eevaavaama.

*3:15: Aung tee Kumponinge Teroita Pakoꞌpariꞌniiꞌ nantoong domaang mooꞌurira tarevuriaing. Tee-koo nauvurema Kumponinge Aadamararing tee doorenang tampara nauvuretuꞌ.

3:20: Iiburu-nupoong biikaang kara-koo miring “Iivi” tee “Bioko” miruꞌari otong.