1 Mɛ kyɛmɩnɛ ana, fan man kɔɔlɛ ɔkʋmaa mʋ nɩɩ ɔ yɛ ɔ sʋ Kayaayu mʋ gyii, amaa fan tʋʋ n‐yaayu mʋ tɔ kɩɩ fɛɛ ba lɩɩ Ɩbwaarɛ asɛ nɩn, abɛɛ ba man lɩɩ mʋ asɛ. Lɩɩ fɛɛ antɩŋɛsa atɔwɛpʋ gaalaagaa ba ba dulinyaa tɔ katɩn kʋmaa. 2 Falɛ nɩɩ fen biti fan bɩɩ kayaayu mʋ nɩɩ kɩ gyɛ Ɩbwaarɛ lɛɛ mʋ. Kayaayu kʋmaa mʋ nɩɩ kɩɩ tɔwɛ yɛ Yesu Krisito ba biliŋi nyɩmɩsa ba dulinyaa tɔ mʋ, kɩ lɩɩ Ɩbwaarɛ asɛ. 3 Amaa kayaayu kʋmaa mʋ nɩɩ kii kina yɛ Yesu Krisito man ba biliŋi nyɩmɩsa mʋ, kɩ man lɩɩ Ɩbwaarɛ asɛ. Kanɩn kayaayu nɩmʋ ɩ gyɛ Krisito okisipu mʋ nɩɩ fan nu yɛ ɛɛ ba mʋ, nɩɩ halɩɩ ɔ tɛɛ wʋla ɔ bʋ dulinyaa nɩmʋ tɔ gbaa.

4 Amaa fanɛ, mi‐bii ana bɩrɛ fan gyɛ Ɩbwaarɛ asa, nɩɩ fan tee gyii bamʋ sʋ. Lɩɩ fɛɛ Ɩbwaarɛ mʋ nɩɩ ɔ bʋ fanɛ tɔ mʋ, kyɔ Sɩtaanɛ mʋ nɩɩ ɔ bʋ dulinyaa nɩmʋ tɔ mʋ 5 Nɩɩ kanɩn asa maŋa ba gyɛ dulinyaa nɩmʋ lɛɛ nɩn, ɩmʋ sʋ bɛɛ tɔwɛ ɩmʋ nɩɩ ɩ gyɛ dulinyaa tɔ asɩn mʋ nɩn, kanɩn sʋ dulinyaa asa bee nu bamʋ asɛ. 6 Anɛɛnɛ bɩrɛ, an gyɛ Ɩbwaarɛ asa nɩn, nɩɩ ɔkʋmaa mʋ nɩɩ o nyi Ɩbwaarɛ mʋ, ee nu anɛ asɛ. Amaa ɔkʋmaa mʋ nɩɩ ɔ man gyɛ Ɩbwaarɛ nyɩmɩsa mʋ, o mee nu anɛ asɛ. Ɩmʋ sʋ falɛ asɩn nɩmʋ nɩɩ an sʋ an bɩɩ kesintin Kayaayu yɛ antɩŋɛsa kayaayu. 7 Mɛ kyɛmɩnɛ ana danbɩrasa, fan yɛgɛ a biti abaa, kpalɩ fɛɛ kebiti kɩ lɩɩ Ɩbwaarɛ asɛ nɩn. Nɩɩ ɔkʋmaa mʋ nɩɩ ɔ sʋ kebiti mʋ, ɔ gyɛ Ɩbwaarɛ Mu‐bii, nɩɩ o nyi Ɩbwaarɛ. 8 Nɩɩ ɔkʋmaa mʋ nɩɩ ɔ man sʋ kebiti bɩrɛ, ɔ man nyi Ɩbwaarɛ kpini‐kpini, lɩɩ fɛɛ Ɩbwaarɛ ɩ gyɛ obitipu. 9 Falɛ nɩɩ Ɩbwaarɛ lɛɛ mu kebiti mʋ kaapʋ anɛ tɔ, fɛɛ maa sun Mu‐Bii kʋlʋn kpen ba dulinyaa tɔ, kɛ a ba bɔla mʋ sʋ nyɛ nkpa. 10 Ɩnɩmʋ ɩ gyɛ kebiti mʋ, man gyɛ anɛ ii biti Ɩbwaarɛ, amaa Ɩbwaarɛ bɩrɛ ɩ sʋ kebiti sa anɛ, nɩɩ o sun Mu‐Bii kʋlʋn yɛ, ɔ ba taa mʋ n‐yɩɩ waa ɩmata saraga sa anɛ alibi. 11 Mɛ kyɛmɩnɛ ana, fan kɩɩ kebiti lala mʋ nɩɩ Ɩbwaarɛ sʋ sa anɛ, kanɩn sʋ ɩ dagaa anɛ gbaa a maa biti abaa. 12 Ɔkʋ ɩ gyɛ ɔkʋ man pɩɩ wu Ɩbwaarɛ, amaa nɩɩ an kan an biti abaa bɩrɛ, Ɩbwaarɛ bʋ anɛ tɔ, nɩɩ mu kebiti mʋ kɩ bʋ anɛ asɛ kyɛɛkyɛɛ.

13 Ɩbwaarɛ maa sa anɛ mʋ Kayaayu Kyɩrɛkyɩrɛ sʋ, nɩɩ an nyi fɛɛ an bʋ mʋ tɔ nɩɩ ngbaa mʋ bʋ anɛ tɔ. 14 Nɩɩ an wu yɛ anɛ ansi, nɩɩ ana gyii ɩmʋ kesintin fɛɛ Ɔsɛ Ɩbwaarɛ sun Mu‐Bii Yesu Krisito yɛ ɔ ba waa dulinyaa tɔ Ɔmɔlɩgɛpʋ. 15 Nɩɩ ɔkʋmaa mʋ nɩɩ ɔ kan bɩɩ nɩɩ ɔ lɛɛ tɔwɛ yɛ, Yesu ɩ gyɛ Ɩbwaarɛ Mu‐bii mʋ, Ɩbwaarɛ bʋ mʋ tɔ nɩɩ ngbaa mʋ bʋ Ɩbwaarɛ tɔ. 16 Nɩɩ anɛ bɩrɛ an nyi Ɩbwaarɛ kebiti mʋ nɩɩ ɔ sʋ sa anɛ, nɩɩ an taa anɛ n‐yɩɩ tʋʋ kɩmʋ sʋ mʋ. Ɩbwaarɛ ɩ gyɛ kebiti. Nɩɩ ɔkʋmaa mʋ nɩɩ ɔ sʋ kebiti mʋ, ɔ bʋ Ɩbwaarɛ tɔ, nɩɩ Ɩbwaarɛ gbaa bʋ mʋ tɔ. 17 Nɩɩ ɔkpa nɩmʋ sʋ nɩɩ kebiti kɩ lɛɛ kaapʋ anɛ tɔ kyɛɛkyɛɛ, nɩɩ ɩmʋ sʋ nɩɩ an sʋ tamaa fɛɛ kakɛ mʋ nɩɩ Ɩbwaarɛ ii biti ɔ ba talɛ asa mʋ, an taalɛ yɩlɛ tɔ, lɩɩ fɛɛ dulinyaa nɩmʋ tɔ mʋ an du fɛɛ mʋ. 18 Kufuu kɩ man bʋ kebiti tɔ, amaa kebiti mʋ nɩɩ ki du kyɛɛkyɛɛ, kɩɩ gya kufuu kɩɩ lɩɩ tɔ, lɩɩ fɛɛ kufuu maa kʋsʋ bɩɩtɛ ɛɛ naa, amaa ɔsa kʋmaa mʋ nɩɩ ɔ sʋ kufuu mʋ man du kyɛɛkyɛɛ kebiti mʋ tɔ.

19 An sʋ kebiti sa Ɩbwaarɛ yɛ asa, lɩɩ fɛɛ Ɩbwaarɛ ɩ gyankpaa ee biti anɛ. 20 Nɩɩ ɔkʋ kan tɔwɛ yɛ, ee biti Ɩbwaarɛ yɛgɛ ee kisi mʋ tɔɔmaa bɩrɛ, ɔ gyɛ antɩŋɛsa wuya. Nɩɩ ɔkʋmaa mʋ nɩɩ ɔ mɛɛ biti mʋ tɔɔmaa mʋ nɩɩ ee wu mʋ, ɔ mɛɛ taalɛ biti Ɩbwaarɛ mʋ nɩɩ o mee wu mʋ mʋ. 21 Nɩɩ nbara nɩmʋ nɩɩ ɔ taa sa anɛ yɛ, Ɔkʋmaa mʋ nɩɩ ee biti Ɩbwaarɛ mʋ, ɩ dagaa maa biti mʋ tɔɔmaa gbaa.