1 Ɔkʋmaa mʋ nɩɩ ɔ kɔɔlɛ gyii fɛɛ Yesu ɩ gyɛ Krisito (Ɔmʋ nɩɩ Ɩbwaarɛ wʋla lɛɛ) mʋ, ɩ gyɛ Ɩbwaarɛ Mu‐bii nɩn. Nɩɩ ɔkʋmaa mʋ nɩɩ ɔ sʋ kebiti sa ɔsɛ mʋ, sʋ kebiti sa kebii mʋ gbaa. 2 Falɛ nɩɩ an bɩɩ fɛɛ an biti Ɩbwaarɛ mu‐bii ana, fɛɛ a maa biti Ɩbwaarɛ nɩɩ an buu mʋ nnɔsa mʋ sʋ. 3 Mʋ nnɔsa kibuu sʋ, ɩ gyɛ nyɩmɩsa maa biti Ɩbwaarɛ, nɩɩ mʋ nnɔsa mʋ ɩ man bʋsɩn. 4 Lɩɩ fɛɛ ɔkʋmaa mʋ nɩɩ ɔ gyɛ Ɩbwaarɛ Mu‐bii mʋ, i gyii dulinyaa sʋ. Lɩɩ anɛ kɩkɔɔlɛ‐gyii nɩmʋ sʋ mʋ, an gyii dulinyaa sʋ. 5 Anɩmʋ i gyii dulinyaa sʋ? Amɔɔ bamʋ nɩɩ ba kɔlɛ Ɩbwaarɛ Mu‐Bii Yesu gyii mʋ.

6 Yesu ɩ gyɛ ɔmʋ nɩɩ ɔ ba, nɩɩ o gyee Ɩbwaarɛ kekyugyee nɩɩ ɔ kyɛɛgɛ mʋ nkalan wʋrɩgɛ, man gyɛ Ɩbwaarɛ kekyugyee mʋ nkʋn sʋ nɩɩ ɔ ba, amaa Ɩbwaarɛ kekyugyee mʋ yɛ nkalan kɩkyɛɛgɛ wʋrɩgɛ mʋ sʋ. Nɩɩ Kayaayu mʋ ɩ lɛɛ kaapʋ, lɩɩ fɛɛ Kayaayu mʋ gyɛ kesintin. 7 Ɩ sʋ atɔ asa mʋ nɩɩ ɛɛ lɛɛ Yesu keduli ɩɩ kaapʋ anɛ. 8 Ɩmʋ ɩ gyɛ Kayaayu Kyɩrɛkyɩrɛ mʋ, yɛ nkyu, yɛ nkalan. Falɛ atɔ asa anɩmʋ ɩɩ waa atɔ kʋlʋn 9 An kɔɔlɛ nyɩmɩsa asɩn tɔwɛsa an gyii, amaa Ɩbwaarɛ lɛɛ mʋ gyɛ kɩkparɛ, lɩɩ fɛɛ ɩ gyɛ adansɛ mʋ nɩɩ o gyii lɩɩ Mu‐Bii mʋ sʋ. 10 Ɔkʋmaa mʋ nɩɩ ɔ kɔɔlɛ Obii mʋ gyii mʋ, kɔɔlɛ asɩn nɩmʋ waa mʋ kɔkɔlɔ tɔ. Amaa ɔkʋmaa mʋ nɩɩ ɔ man kɔɔlɛ Ɩbwaarɛ gyii mʋ, kanɩn nyɩmɩsa maŋa kaapʋ fɛɛ Ɩbwaarɛ gyɛ antɩŋɛsa wuya, lɩɩ fɛɛ ɔ man kɔɔlɛ asɩn mʋ nɩɩ Ɩbwaarɛ tɔwɛ lɩɩ Mu‐Bii mʋ sʋ mʋ gyii. 11 Ɩnɩmʋ ɩ gyɛ asɩn mʋ yɛ, Ɩbwaarɛ sa anɛ nkpa kakpaa, nɩɩ kanɩn nkpa kakpaa nɩmʋ bʋ Mu‐Bii tɔ nɩn. 12 Ɔkʋmaa mʋ nɩɩ ɔ kɔɔlɛ Obii mʋ gyii mʋ sʋ nkpa, amaa ɔkʋmaa mʋ nɩɩ ɔ man kɔɔlɛ Ɩbwaarɛ Mu‐Bii mʋ gyii mʋ man sʋ nkpa kakpaa nɩmʋ.

13 N kyʋrɔɔ ɔwʋlɛ nɩmʋ sa fanɛ mʋ nɩɩ fan kɔɔlɛ Yesu gyii fɛɛ ɔ gyɛ Ɩbwaarɛ Mu‐Bii mʋ, kɛ fan nyɛ bɩɩ fɛɛ fan sʋ nkpa kakpaa 14 Atɔ mʋ nɩɩ an nyi anɛ nkɔlɔ tɔ ɩ yɛgɛ nɩɩ an bugi anɛ nkɔlɔ tɔ an sa Ɩbwaarɛ mʋ ɩ gyɛ yɛ, kʋtɔ kʋmaa mʋ nɩɩ an kʋlɛ mʋ mʋ, ee nu anɛ asɛ 15 Nɩɩ an nyɛ nɩɩ an nyi fɛɛ Ɩbwaarɛ i nu kʋtɔ kʋmaa mʋ nɩɩ an kʋlɛ mʋ mʋ, kanɩn bɩrɛ kʋtɔ kʋmaa mʋ nɩɩ an kʋlɛ mʋ mʋ, ɛɛ waa ɛɛ sa anɛ.

16 Nɩɩ fanɛ tɔ ɔkʋ kan wu fɛɛ mʋ bɩrɩsa ɩɩ waa alibi mʋ nɩɩ ɩ mɛɛ yɛ ɩ barɩgɛ maa Ɩbwaarɛ nsana kakpaa mʋ, ɔ kʋlɛ Ɩbwaarɛ sa mʋ. Ɩbwaarɛ ii biti ɔ sa ɔsa mʋ nkpa. Alibi mʋ nɩɩ ɩ mɛɛ yɛ ɩ barɩgɛ nyɩmɩsa maa Ɩbwaarɛ nsana mʋ, asɩn nɩɩ n tɔwɛ. Amaa alibi akʋ ɩɩ bɩya lewu abɛɛ ɩɩ barɩgɛ nyɩmɩsa maa Ɩbwaarɛ nsana, maa gyɛ ɩmʋ kabwaarɛ‐kʋlɛ nɩɩ n dɛ. 17 Asɩn kʋmaa mʋ nɩɩ ɩ man bʋrɔn sa Ɩbwaarɛ mʋ gyɛ alibi nɩn. Amaa alibi akʋ ɩɩ barɩgɛ nyɩmɩsa maa Ɩbwaarɛ nsana kakpaa nɩn.

18 An nyi fɛɛ ɔkʋmaa mʋ nɩɩ ba kʋʋgɛ mʋ Ɩbwaarɛ tɔ mʋ, mɛɛ kyaga sʋ ɛɛ waa alibi. Lɩɩ fɛɛ Krisito mʋ nɩɩ ɔ kʋʋgɛ mʋ Ɩbwaarɛ tɔ mʋ ii kun kanɩn ɔsa mʋ, nɩɩ nyɩmɩsa mʋ nɩɩ ɔ gyɛ Sɩtaanɛ lɛɛ mʋ mɛɛ taalɛ waa mʋ alibi akʋ 19 An nyi fɛɛ an gyɛ Ɩbwaarɛ Mu‐bii ana, nɩɩ asa mʋ nɩɩ ba bʋ dulinyaa nɩmʋ tɔ kpini ba bʋ alibi awaapʋ mʋ abaa tɔ. 20 Nɩɩ an bɩla an nyi fɛɛ Ɩbwaarɛ Mu‐Bii mʋ ba kasɛ sʋ, nɩɩ ɔ yɛgɛ nɩɩ an nu kʋtɔ kʋmaa nɩmʋ kasɛ, kɛ ɩ yɛgɛ a bɩɩ ɔmʋ nɩɩ ɔ gyɛ Ɩbwaarɛ kesintin mʋ. Anaa Ɩbwaarɛ kesintin wuya mʋ an waa kʋkʋlʋn, lɩɩ fɛɛ an waa kʋkʋlʋn maa Mu‐Bii Yesu Krisito mʋ. Mʋ ɩ gyɛ Kesintin Ɩbwaarɛ mʋ nɩɩ ɔ gyɛ nkpa kakpaa mʋ.

21 Mi‐bii ana, fan kɩtaa fanɛ n‐yɩɩ lɩɩ ɩdakpa mʋ sʋ.