1 Amaa dɩdaa mʋ antɩŋɛsa wuya ana ba kyɩna ba bʋ Ɩsɩrayɩ asa tɔ, nɩɩ kanɩn gbaa nɩɩ atɩntɩnsa akaapʋpʋ bee biti ba baa ba bʋ fanɛ tɔ. Nɩɩ bee biti ba ba kaapʋ asɩn mʋ nɩɩ ɩ man gyɛ kesintin yɛgɛ ii nyita asa mʋ nɩɩ bee buu kanɩn kɩkaapʋ mʋ. Kɛ ba kina Ɔnyɩrɩpɛ mʋ nɩɩ ɔ mɔlɩgɛ bamʋ, kɛ bamʋ kinyita mʋ ki bwii ba bamʋ sʋ opula tɔ. 2 Lɩɩ ɩnɩmʋ sʋ mʋ, akɔɔlɛ‐gyipu mʋ gaalaagaa bee biti ba buu bamʋ kɩbaabʋtɔ gyaga nɩmʋ sʋ. Lɩɩ bamʋ kɩbaabʋtɔ gyaga maŋa sʋ mʋ, asa mʋ nɩɩ ba man kɔɔlɛ gyii mʋ bee biti ba tɔwɛ asɩn libi gyaga kesintin ɔkpa mʋ sʋ. 3 Lɩɩ kensi payɩ libi atɩntɩnsa akaapʋpʋ nɩmʋ bee biti ba taa kanyaasɩn ɔkpa sʋ pɩna fanɛ biti afulee. Amaa bamʋ ɔtalɛpʋ wʋla waa siriya lɩɩ koo dɩdaa o gyoo bamʋ. Nɩɩ ba mɛɛ taalɛ lɩɩ Ɩbwaarɛ mʋ nɩɩ ɔ gyɛ bamʋ onyitapu mʋ abaa tɔ.

4 Fɛɛ nɩɩ Ɩbwaarɛ maa man yɛgɛ nbɔɔ mʋ nɩɩ ba waa alibi mʋ kʋsʋ kɩbɩɩtɛ, amaa nɩɩ ɔ taa bamʋ tʋʋ waa awʋrʋfɔ kamandɛ, katɩn mʋ nɩɩ o ŋmina bamʋ waa kitentenbiri ɔbɔ bunkyinsa tɔ, ba dɛ ba gyoo Kakɛ talɛsa lala mʋ. 5 Fɛɛ nɩɩ Ɩbwaarɛ maa man yɛgɛ dɩdaa abi mʋ nɩɩ ba waa alibi mʋ kʋsʋ kɩbɩɩtɛ, amaa nɩɩ ɔ yɛgɛ nɩɩ nkyu n bɔla gyii kasɛ yɛ bamʋ nɩɩ ba man nu Ɩbwaarɛ asɛ mʋ. Asa mʋ nɩɩ ɔ mɔlɩgɛ mʋ ɩ gyɛ Nowa mʋ nɩɩ ɔ tɔwɛ ɩkpa kyiigisa mʋ asɩn, yɛ asa asunɔ akʋ. 6 Fɛɛ nɩɩ Ɩbwaarɛ maa man yɛgɛ alibi awaapʋ mʋ nɩɩ ba bʋ Sodom yɛ Gomora ndɛ lala mʋ tɔ kʋsʋ bɩɩtɛ, amaa ɔ yɛgɛ fʋlɔn dɛɛ bamʋ biliŋi ndaara, kɛ ɩ waa sɩnkaala sa kamaa tɔ alibi awaapʋ. 7 Nɩɩ Ɩbwaarɛ mɔlɩgɛ Loti mʋ nɩɩ mʋ ɩkpa i kyiigi, nɩɩ mʋ kɔkɔlɔ ki nyita mʋ lɩɩ asa mʋ kɩbaabʋtɔ gyaga yɛ kumu tɔ ɔlʋn mʋ sʋ. 8 (Nɩɩ Loti gyɛ nyɩmɩsa danbɩrasa mʋ nɩɩ ɔ tɛ alibi awaapʋ mʋ tɔ kakɛ kʋmaa ee wu yɛgɛ ee nu asɩn libi mʋ nɩɩ bɛɛ waa, nɩɩ ɩ yɛgɛ mʋ kɔkɔlɔ ki nyita mʋ nɩɩ mʋ kala sɩlɛ mʋ asɛ.) 9 Ɩnɩmʋ kpini ɩɩ kaapʋ fɛɛ Ɩbwaarɛ nyi kanan mʋ nɩɩ ee biti ɔ mɔlɩgɛ asa mʋ nɩɩ bee nu mʋ asɛ lɩɩ bamʋ kʋtʋʋ tɔ kɩɩ tɔ, kɛ ɔ yɛgɛ alibi awaapʋ mʋ kʋsʋ bɩɩtɛ yɩla naa fʋʋ Kakɛ talɛsa mʋ akɛ. 10 Fɔnfɔn bamʋ nɩɩ ba taa bamʋ n‐yɩɩ sa kɩgyagaa abɛɛ kɔkɔlɔ biti nɩɩ ba man taa Ɩbwaarɛ ɔlʋn tɩɩ sɛhn mʋ.

Falɛ atɩntɩnsa akaapʋpʋ banɩmʋ ba man sʋ kufuu, nɩɩ ba yɩlɛ tɔ bɛɛ saalɛ bamʋ nɩɩ Ɩbwaarɛ sa bamʋ bʋnyaa mʋ. 11 Nɩɩ halɩɩ Ɩbwaarɛ nbɔɔ mʋ nɩɩ ba sʋ ɔlʋn gaa ba kyɔ atɩntɩnsa akaapʋpʋ anɩmʋ gbaa ba mɛɛ pwɩɩ bʋnyaa wuya ana mʋ Ɩbwaarɛ ansi tɔ. 12 Amaa falɛ atɩntɩnsa akaapʋpʋ anɩmʋ awaasa a du nɩn fɛɛ atɔbwaaya kpensa mʋ nɩɩ ba kʋʋgɛ bamʋ fɛɛ asa ba kɩtaa kɛ ba mɔɔ. Ba sʋ asebi bɛɛ sa kʋtɔ kʋmaa mʋ nɩɩ be mee nu kasɛ. Ɩbwaarɛ ii biti ɔ mɔɔ bamʋ fɛɛ kanan mʋ nɩɩ asa bɛɛ mɔɔ atɔbwaaya kpensa mʋ.

13 Ɩbwaarɛ ii biti ɔ taa bamʋ alibi bwii ka bamʋ akɔ. Bamʋ asɛ mʋ kɩlandɛ sʋ alibi kɩwaa ɩ gyɛ bamʋ kayɩɩ‐wʋlɛ kensi‐gyii. Halɩɩ ba maa san ba bʋ bamʋ npɩna yɛ kɩgyagaa kigyii ɩkpa sʋ mʋ, ɩ gyɛ ipeeli yɛ ŋaabaa sa bamʋ fɛɛ ba maa ba tii fanɛ sʋ bee gyii mʋ. 14 Nɩɩ be mee wu ɔkyɩɩ bɛɛ kyʋn, nɩɩ kɩbʋrʋkɔɔnɛ kɩwaa ii gyii bamʋ ansi. Bɛ yɛgɛ bamʋ nɩɩ bamʋ kɩkɔɔlɛ‐gyii kɩ man bʋlʋn mʋ bɛɛ waa alibi. Kʋtɔ mʋ nɩɩ kɩ bɔla bamʋ nkɔlɔ tɔ ɩ gyɛ kensi payɩ libi. Ɩnɩmʋ sʋ mʋ, Ɩbwaarɛ ii biti ɔ bɩɩtɛ bamʋ asʋ. 15 Nɩɩ ba yɛgɛ ɔkpa kyiigisa mʋ, nɩɩ ba fɔyɩ naa taa Bewo mu‐bii Balaam ɔkpa sʋ. Balaam kyɩna ɔ gyɛ Ɩbwaarɛ ɔtɔwɛpʋ, nɩɩ mu kebiti ɩ gyɛ fɛɛ ɔ nyɛ afulee lɩɩ alibi kɩwaa tɔ. 16 Amaa mu kuruma mʋ gya mʋ. Mu kuruma mʋ tɔwɛ mʋ asɛ fɛɛ nyɩmɩsa, nɩɩ i tii Ɩbwaarɛ ɔtɔwɛpʋ Balaam abʋnpʋ‐sɩn mʋ ɔkpa.

17 Falɛ atɩntɩnsa akaapʋpʋ anɩmʋ ba du nɩn fɛɛ atiribo mʋ nɩɩ ɩ man sʋ nkyu yɛ abwaarɛ‐wʋlɛ mʋ nɩɩ afuu a sʋ ɩmʋ a naa. Bamʋ nɩɩ Ɩbwaarɛ lɔŋɔ kitentenbiri ɔbɔ bunkyinsa yɩla. 18 Ba sʋ alala‐sɩn ntɔwɛ mʋ nɩɩ sɛhn man bʋ ɩmʋ tɔ bɛɛ kaapʋ bamʋ n‐yɩɩ. Nɩɩ ba sʋ kayɩɩ‐wʋlɛ kebiti mʋ nɩɩ kɩ gyɛ kɩgyagaa bɛɛ tʋʋ bamʋ tɔ bɛɛ kɩɩ, kɛ ba nyɛ waa alibi mʋ nɩɩ ba daa kyɩna bɛɛ waa nɩɩ ba sɩlɛ lɩɩ ɩmʋ tɔ mʋ. 19 Atɩntɩnsa akaapʋpʋ mʋ ba da bamʋ nkɔlɔ sʋ sa asa mʋ yɛ bee biti ba yɛgɛ ba nyɛ bamʋ n‐yɩɩ, yɛgɛ bamʋ gbaa‐gbaa bamʋ ba gyɛ anyɛ sa bamʋ asun libi. Lɩɩ fɛɛ nyɩmɩsa gyɛ kɩnyɛ sa kʋtɔ kʋmaa mʋ nɩɩ i gyii mu kumu. 20 Fɛɛ ba maa ba bɩɩ anɛ‐Nyɩrɩpɛ yɛ Ɔmɔlɩgɛpʋ Yesu Krisito, nɩɩ ba yɛgɛ atɔ mʋ nɩɩ ɩɩ yɛgɛ nɩɩ nyɩmɩsa ɛɛ waa alibi kɩwaa dulinyaa nɩmʋ tɔ, nɩɩ ba kan bɩla bwii naa loo ɩmʋ tɔ mʋ, ɩɩ nyɛ bamʋ sʋ ɔlʋn ɩ kyɔ kakyɩna dɩdaa mʋ nɩɩ ba daa ba bʋ kɩmʋ tɔ mʋ. 21 Naafɔɔ ii biti ɩ baa ɩ bʋrɔn sa bamʋ gaa fɛɛ ba maa man bɩɩ ɔkpa kyiigisa mʋ, ɩ kyɔ fɛɛ ba maa bɩɩ kɩmʋ, nɩɩ ba bɩla bwii kamaa lɩɩ Ɩbwaarɛ nbara kyɩrɛkyɩrɛ mʋ nɩɩ ba taa sa bamʋ mʋ sʋ. 22 Ɩmʋ sʋ ɩ ba kanɩn sa bamʋ fɛɛ kanan mʋ nɩɩ aŋasan mʋ ɩ tɔwɛ yɛ, “Gyoonɔ bwii naa taa mʋ ɩkpalagɛ gyii” nɩɩ “Kuuri mʋ nɩɩ ba gyee mʋ mʋ, bwii naa dɛ biliŋi kɩdɩpɔɔ tɔ” mʋ, ɩ gyɛ kesintin.